Halaman

Kamis, 29 April 2010

MINTA TOLONG NOTARIS

Babenye bang Pendi lagi uring-uringan nih...pasalnye tanah warisan dari babenye alias engkongnye bang Pendi ude kena gusur buat jalan besar, ude gitu sisa tanahnye kagak boleh di pacul atawe ditanemin. Mao kagak mao bang Pendi ikut-ikutan puyeng, die bingung mao minta tolong sama siape. Kebetulan pas die maen di daerah Kelapa Gading, bang Pendi ngeliat ade plang notaris... setau die notaris bise bantu ngurus akte tanah. Nah barangkali sang notaris bise bantu die, duh...dari namanye kayaknye notarisnye cewe nih. Bang Pendi paling demen dah berurusan dengan cewe, tapi die ragu-ragu mao ngomong langsung...ntar cewe nye cerewet atawe galak lagi kayak enyaknye...he...he. Ya ude...bang Pendi catet aje nomer teleponnye, maksudnye mao ngomong lewat telp aje...
Nah..ini pembicaraan bang Pendi ame sang notaris yang sempet disadap ame KPK ( Kumpulan Para Pemburu Kadal )  he..he

" Hallo...selamat sore " Ujar bang Pendi
" Ya..hallo, selamat sore juga..." jawab sang notaris dengan suara lembutnye tapi terkesan berwibawa. Bang Pendi langsung grogi.
" Hallo...bener ini rumah sakit bersalin..."
" Hah...rumah bersalin..!? sembarangan aja. Bapak salah sambung pak...! ini peternakan kodok..." ujar sang notaris kesel dan langsung mao nutup teleponnye. " Brengsek banget tuh orang...emangnya suara gua kayak suara dukun beranak " sang notaris ngedumel.
" Eh...maaf bu...maaf ! abis tadi barusan aja bantuin istri yang lagi nganter suaminye yang mao ngelahirin. Maaf ya bu...!" bang Pendi minta maaf. Sang notaris yang tadi kesel jadi geli sendiri denger bang Pendi ngomong kebalik...
" Ya..sudah, sekarang bapak mau apa. Ada yang bisa saya banting...!? " kata sang notaris tapi masih kebawa kesel.
" Sekali lagi maaf bu...sebenernye saye mao bicare sama bu Fanny, bisa bu...?"
" Ya...saya sendiri....eh nggak ding..! saya berdua sama pembantu. Ada perlu apa..?"
" Begini bu...saya mohon bantuan ibu. Masak saya nggak boleh mencangkul dan tanem pohon di tanah saya sendiri padahal itu tanah warisan dari engkong saya..."
" Lho....siapa yang melarang !?" tanya sang notaris heran
" Ya...Kamtib bu ! tapi kadang Satpol...kadang juga aparat kelurahan, malah terakhir polisi ikut-ikut ngelarang..."
" Wah...kayaknya mafia tanah sudah bermain tuh...! Oke deh...saya coba tolong pak. Boleh tahu nggak luas tanahnya berapa..?"
" Luasnye..? berapa ya...saya agak-agak lupa bu. Kalo lebarnye sih kayaknye dua atau tiga meter tapi kalo panjangnye saya ngga tau, soalnye lumayan panjang. Lagian kemaren saya ngukurnye pake penggaris plastik punye keponakan..." jawab bang Pendi. Sang notaris ngedumel lagi..." Odon banget nih orang...ngukur tanah pake penggaris plastik. Orang yang aneh...! "
" Oke deh....sekarang boleh tahu, tanahnya ada didaerah mana ? terus apa alasan aparat melarang tanah bapak di cangkul...?"
" Oooh...tanah saya ada di daerah Lenteng Agung Bu, letaknye persis di pinggir jalan besar. Katanye sih...tanah itu mao dibuat trotoar ! emang trotoar itu apaan sih bu...?" bang Pendi balik nanya.
" What....!!? jadi tanah itu tanah trotoar...? " pekik sang notaris yang diiyakan sama bang Pendi. Gagang telepon langsung dibanting sang notaris.
" #%@*&%$$*#@@+!!#....semprul...!! pantes aja ngga boleh di cangkul, wong pedagang kaki lima aja  jualan disitu diuber-uber apalagi di cangkul...dasar orang sarap..!! " sang notaris ngomel-ngomel sambil narik-narik rambutnye jadi jabrik...he..he


Ini cuma cerita fiktif sodare-sodare...kalau ade kesamaan nama atau tempat, itu merupakan faktor kesengajaan...wekekekkkkkkkk...
harap maklum...!!

Sabtu, 24 April 2010

DUH CANTIKNYA...... TANTE PENDI !

Kali ini bang Pendi ame si Jabrik disuruh nganter ikan asin lagi, bukan ke Bogor lagi tapi ke Depok...kata engkoh Achong tempatnye nggak jauh dari jembatan Panus. Kate engkongnye bang Pendi sih, jembatan Panus ntu panggilan dari nama sohibnye engkong... namanye Stefanus Leander. Nah die dulu yang ngebangun ntu jembatan.

Bang Pendi ame si Jabrik sepakat kagak lewat jalan raya Bogor, soalnye takut ketemu waria yang kemaren...nanti ikan asinnye diambil lagi.he..he. Kali ini si Jabrik ngotot pengen bawa ntu kijang butut...
" sekali-kali gue yang bawa Pen..! gue jamin waria kagak bakalan naek ini mobil.." kate si Jabrik, bang Pendi cengar-cengir aje.
" Setuju brik...! kalo liat mukelu...kayaknye bukan waria yang naek, tapi neneknye waria.." bang Pendi cekikikan sambil nutup pintu.
" Ya..ude, elu tidur-tiduran aje. Tapi kalo ade polisi gantian deh...elu yang bawa, pan gue belon punye SIM " kate si Jabrik lagi.
Nah..akhirnye ntu mobil si Jabrik yang bawa, bang Pendi seneng banget bisa tiduran tapi baru juga merem-merem ayam....ngga jauh  terminal Depok si Jabrik bangunin die. Bang Pendi liat mobilnye ude dibrentiin si Jabrik dipinggir jalan.
" Pen...Pen..bangun ! gantian Pen...didepan ade polisi " kate si Jabrik tanpa ngeliat bang Pendi karena die fokus kedepan ngeliatin gerombolan polisi yang lagi razia deket lampu merah juga nengok-nengok kebelakang lewat kaca spion. Tapi bang Pendi diem aje...
" Pen...elu gimana sih ! ayo cepet gantian..." kate si Jabrik lagi sambil ngelirik bang Pendi. Tapi si Jabrik kaget bukan kepalang karena pas nengok, die ngeliat muka polisi berwajah garang dan berkumis pak Raden di jendela deket duduknye bang Pendi.
" Ya..sudah, gantian sama saya saja. Temennya ngga mau tuh..!" Ledek pak polisi sambil cengar-cengir onta. si Jabrik kagak bisa ngomong saking kagetnye. Karena tadi brentinye agak mendadak, polisi yang lagi istirahat minum es cendol jadi curiga dan langsung nanya surat-surat ame si Jabrik. Dan karena kagak punya SIM, akhirnya gocapan dari dompetnye si Jabrik melayang, si Jabrik cuma bise ngedumel.
" Salahlu sendiri brik ! nah...elu brenti didepan polisi lagi pade istirahat, sama aje elu ngeledek..! tadi kagak sekalian aje elu brentinye di depan Polres..." kate bang Pendi.

Akhirnye sampe di jembatan Panus, kate engkoh Achong...rumahnye yang pesen ikan asin persis dipinggir kali. Ngga lame ketemu deh...ame mpok Laila yang pesen ikan asin, pas mao pulang bang Pendi ngiler ngeliat aer kali...rasa-rasanye die pengen nyebur aje...
" Kayak-kayaknye gue pengen mandi di kali brik...!" kate bang Pendi
" Elu pengen mandi Pen ? kebetulan...gue kebelet nih, pengen beol ( buang air besar ). Gue duluan ye...!" kate si Jabrik langsung ngacir ke pinggir kali. Bang Pendi belakangan karena die nitip mobil dulu ame mpok Laila. Abis nitip mobil, bang Pendi langsung nyusul ke kali. Bang Pendi seneng banget bise ngerasain berenang lagi di kali. Bang Pendi sebenernye kagak kenal namanye renang gaya katak atawe gaya kupu-kupu, yang die tau cuma gaya kodok bekangkang ame gaya jangkrik nyungsep...( gaya yang kayak gitu cuma bang Pendi yang tahu, pelatih renang Raja Nasution aje kagak bakalan tau...he...he ). Tapi bang Pendi paling jago gaya batu...ntu tuh..gaya renang yang kalo ude nyebur kagak nimbul-nimbul lagi alias kelelep...he...he.

Nah...tanpa tengak-tengok kiri kanan lagi, langsung aje bang Pendi buka baju ame celananye dan disangkutin di batang pohon dipinggir kali...lalu nyebur. " Wuuuiiiih...seger banget !" pikir bang Pendi. Tapi lagi enak-enak mandi, ade yang kuning-kuning lewat persis didepan idung die. Sambil huak...huek die minggir-minggir.." Kurang ajar banget..! siapa sih yang berak dikali..?" tanya bang Pendi dalem ati, tapi die langsung inget ame si Jabrik yang tadi kebelet.
" Brik...jabrik...dimane lu..!? " tereak bang Pendi
" Disini...Pen !" bales si Jabrik
" Hah...dasar lu kambing kurap...kadal buntung...upil onta !! yang bener aje lu...beol diatas gue yang lagi mandi, ude cepetan...!!"
" Weeei...yang duluan siape ! lagian tanggung nih...ude keluar ujungnye..." bales si jabrik...he..he. Bang Pendi jadi kagak nafsu lagi nerusin mandinye, lalu die naek dan mao pake bajunye. Tapi bang Pendi kaget karena bajunye kagak ade di batang pohon tadi. Rupanye batang pohon tempat die nyangkutin baju ame celana...patah, bisa jadi bajunye nyebur kekali dan hanyut. Wah...bang Pendi langsung kelimpungan, die buru-buru masuk kekali lagi tapi sambil ngeliat kalo-kalo ade yang kuning-kuning lewat lagi....
" Jabrik....sinilu cepetan !!" tereak bang Pendi lagi
" Hah...elu Pen kagak boleh orang seneng aje. Orang lagi enak-enak juga !" bales si Jabrik lagi. Ngga lame si Jabrik nongol.." apaan sih Pen...elu tereak-tereak mulu !?"
" Baju gue kanyut brik...!" kate bang Pendi sendu, si Jabrik langsung ketawa ngakak.." pake ketawa lagilu...bukannye bantuin ! ude sono...pinjemin gue baju ame mpok Laila.." tereak bang Pendi kesel. Karena kasian si Jabrik langsung ke rumah mpok Laila walau di jalanan die megangin perutnye nahan-nahan tawa. Karena buru-buru, mpok Laila juga ngambilin baju asal aje. pas mao di kasih bang Pendi, baru deh si Jabrik tau kalo mpok Laila ngasih baju daster. Si Jabrik makin ngakak aje...sampe die hampir nyebur kali gara-gara ngga kuat nahan tawa. Bang Pendi kesel bukan maen tapi mao ngga mao die pake juga ntu baju...daripade anunye keliatan ( puser maksudnye...he..he ). Si Jabrik masih duduk sambil megangin perutnye....die jadi mules lagi ngeliat bang Pendi pake daster.
" Elu duluan dah Pen..!! perut gue jadi sakit lagi nih..." Kate si Jabrik sambil cekikikan. Bang Pendi cuman bisa manyun apalagi ngeliat baju yang die pake..." sebodo deh ah...! mudah-mudahan kaga ade yang liat " kate bang Pendi sambil berharap. Tapi sialnye didepan rumah mpok Laila ade gerombolan ibu-ibu yang lagi belanja sayuran di gerobak dorong...kontan aje ibu-ibu pade cekikikan.
" Eh...tante cantik darimane, abis nyuci ye..? pakaiannye mana ? " celetuk ntu ibu-ibu sambil cekikikan. Duh...malunye minta ampun ! buat ngilangin malu...ya ude bang Pendi belagak aje jadi bencong...
" Eh...iye jeng, baju-baju ike...kepake buat ngeredongin kodok ! " kate bang Pendi, siku tangan kanannye ditaruh ditelapak kiri sambil gigit-gigit kuku jari tangan kanannye. Jelas aje ibu-ibu pade ngakak, bang Pendi buru-buru masuk mobil dan ngumpet.

Kamis, 15 April 2010

AWARD BANG PENDI

Wah..ngga terase, bulan April ini bang Pendi ude ngeblog 1 taon. Bikin blog yang mulanye kaga sengaje ( dibikinin temen..he..he ) akhirnye malah jadi keterusan walao postingnye jarang-jarang. Bang Pendi juga seneng banget, ude banyak punya sohib walau yang ngefans ame bang Pendi jumlahnya belum seberapa..he..he atau belon ade ape-apenye kalo dibandingin ame blognye sohib-sohib bang Pendi tapi Alhamdullilah bang Pendi ude bersyukur banget...

Pengennye bang Pendi sih...diumur blog yang 1 taon ini mau ngasih award yang spesial,  seperti bikin gambar bang Pendi lagi manggul beras atawe lagi nongkrong di jamban...he...he, tapi sayangnye bang Pendi gaptek banget...!!. Ya..ude, bang Pendi nyomot-nyomot aje deh... daripade bikin sendiri kaga bisa-bisa. Nah..ini die awardnye..



award


Award ntu cuman gambarin kalo bang Pendi pengen selalu membawa kehangatan cinta dalam persahabatan buat sohib-sohib...Jiaaahhh...guuuubrrraaakkk..!! ( mangkanye sohib-sohib bang Pendi suka bawa-bawa karung basah kalo deket-deket bang Pendi, soalnye takut kepanasan..he..he ).

Nah...award ini bang Pendi timpukin kepade sohib, guru, sahabat, mba, mas, teteh, tante, encang, encing, enyak, babe, adek, abang dan empok....

30. Dimas
31. DuniAkura
32. Ieyaz zone
33. MINOMINO


Mohon maaf kalo ada yang namanya belon kesebut atau ketulis, soalnye bang Pendi nyomot nama-nama blognye dari sohib yang mampir akhir-akhir ini. Tolong deh..diingetin ! nanti akan menyusul. Dan bagi sohib-sohib yang sudah mampir, kalo berkenan...silahken langsung dicomot deh !

Senin, 12 April 2010

OBROLAN DI WARUNG KOPI ( 18 )

MARKUS...ANAK MANA SIH !?


Bang Pendi   :   Eh...Brik..! elu pernah denger ngga kalo si Gayus ame pak Susno mao masuk dapur rekaman..( celetuknye sambil nguyup kopi )

Si Jabrik   :   Kagak Pen..! emangnye die bedue pade pinter-pinter nyanyi Pen, sampe pade mao masuk dapur rekaman segala ? ( sambil nyomot pisang goreng )

Bang Pendi   :   Ye...mane gue tau..!! yang gue liat di tipi sih...cuman ngomong doang, kaga pernah keliatan nyanyi. Tapi gue denger...nyanyian die bedua banyak ditunggu-tunggu orang, gue jadi penasaran denger die bedue pade nyanyi !

Bang Mamat   :   Eh...elu salah Pen..! yang dimaksud nyanyi ntu...die bedue ngungkapin siape-siape temen maen korupsinye si Gayus. Bukan nyanyi beneran...!

Mpok Mumun   :   Iye...bener tuh bang ! kayaknye emang masih banyak temen-temennye si Gayus. Die pan kagak kayak si Messi yang bise menari-nari ngelewatin pemain lawan sendirian sampe ngejebol gawang ( sambil nyengar-nyengir sendirian )

Bang Pendi   :   Jiaaahhh...menari-nari ! hebat bangat dah bahasenye....nari...ya nari mpok, maen bola..ya maen bola. Kagak ade hubungannye ! kalo ade yang jago nari terus jadi jago masukin bola...aye usul dah ame PSSI, biar orang Bali aje yang masuk Timnas...pan orang sono pade jago nari tuh...( celetuk bang Pendi cuek sambil ngeganyem singkong goreng )

Mpok Mumun   :   Elu Oon banget sih Pen..! itu pan cuman istilah, mangkanye dengerin tuh kalo komentator bola lagi pade ngomong ( mpok Mumun jadi sewot )

Bang Pendi   :   Halaaaaa..komentator bola didengerin, die pade mah...cuman pinter ngomong ame nyela pemain doang. Coba suruh die pade maen bola...aye jamin die pade juga kagak bakalan bise...( terus bang Pendi bisik-bisik ame si Jabrik )  tuh..denger Brik ! mpok Mumun juga demen maen bola tapi bolanye kecil-kecil..( si Jabrik ame bang Pendi langsung ngakak bareng )

Mpok Mumun   :   Nah...nah...!! pasti ngomong yang kagak-kagak nih...awas lu Pen.. kalo ngomongin gue !, jangan sampe centong sayur nyium kepalelu lagi...( sambil ngangkat-ngangkat centong sayur, bang Pendi nutupin palenye pake tangan...bang Mamat nyengar-nyengir jangkrik )

Bang Pendi   :   Iye...iye kagak dah mpok ! ( sambil ngelepas tangannye ) Eh...terus si Gayus ame pak Susno, gimane sekarang bang..( tanyanye ame bang Mamat )

Bang Mamat   :   Sekarang sih belon tau..tapi terakhir gue liat di tipi sih, pak Susno terus nyebutin nama-nama yang kelibet korupsi ame markus pajak...

Si Jabrik   :   Kalo aye sih sebenernye salut ame pak Susno sampe berani ngomong kayak gitu. Tapi kalo emang die tau ade markus atawe korupsi...kenape kagak dari kemaren-kemaren ye...ngungkapinnye ? ape pas lagi jadi Kabareskrim...die kebagian jatah juga. Nah...sekarang kagak ! ( sambil nguyup kopinye lagi )

Bang Mamat   :   Ya....itu juga gue kagak tau. Tapi paling kagak...karene die ngomong kayak gitu...kite-kite jadi tau kalo banyak markus yang keliaran di kepolisian, yang sampe saat ini masih dicari-cari atawe diselidikin..

Bang Pendi   :   Nah...siape lagi tuh si Markus, anak mane die ? Ooooh..jadi die yang jadi biangnye, kalo duit-duit pajak kite dikorupsi ? Aye mao dah...bantuin nangkep si markus, biar aye bejek-bejek mukanye..!! ( bang Pendi semangat bangat ngomongnye..ampe berdiri segala. Dibelakangnye ade orang masuk ke warung. Badannye gede tinggi, kulitnye item dan kumisnye tebel...die langsung nyamperin bang Pendi..terus ngangkat kerah bajunye dari belakang )

Si Markus   :   Heh...elu ngomong ape tadi ? gua ini Markus..beranilu bejek-bejek muka gua.. nanti mukalu yang gua bikin perkedel  mao lu..!! ( orang ntu ngebentak bang Pendi sambil melotot. semua pade kaget apelagi bang Pendi yang langsung gemeteran ampe kebelet kencing. Bang Mamat buru-buru ngejelasin biar kagak salah paham ). Oooh..kirain ngomongin gua. Makanya jangan sembarang sebut-sebut beta punya nama...! ( kate orang itu sambil nyengir mamerin giginye yang putih, terus ngeloyor pergi )

Mpok Mumun   :   Lha...ngga jadi ngebejek-bejek Pen !? ntu..ade pisang goreng yang bise elu bejek-bejek...tenang aje die kagak bakalan bikin elu jadi perkedel...( semua pade ngakak, bang Pendi manyun sambil nahan-nahan pipis )

Jumat, 09 April 2010

KODOK JERAWATAN

Sang kodok..eh..eh..eh..sang kodok
Kenape elu bengang-bengong aje
Kenape aye bengang-bengong aje
Eh..tukang kredit nagihin utang...

Bang Pendi nyanyi asal sambil beresin dagangan. Abis die empet banget ngeliat si Jabrik, sedari tadi kerjaannye bengong aje sambil ngelus-ngelus jerawatnye..mentang-mentang koh Achong belon dateng ( lagian si Jabrik ngada-ngada aje, orang mah...biasanye ngelus-ngelus jenggot...ini jerawat yang dielus-elus..he..he ). Bang Pendi nerusin nyanyinye....sang kodok...eh...eh..eh...duutttttttt !! saking semangatnye nyanyi, ampe pantat-pantatnye ikut nyanyi alias kentut..he..he. Bang Pendi diem sejenak...celingak-celinguk, kalo-kalo ade yang denger kalo die kentut. Merasa aman, die nyanyi lagi...tapi

Plaakkkk..!! 
Tiba-tiba sendal jepit si Jabrik sukses mendarat di mbun-mbunan bang Pendi .
" Elu yang bener dong Pen kalo nyanyi. Perasaan gue lagunye kaga kayak gitu, elu ngeledek gue ye..? ude gitu pake kentut segala lagi.." Si Jabrik sewot sambil nyomot sendalnye.
" Sett..dah ! segitu sewotnye lu Brik...lagian dari tadi bengong mulu, mikirin apaan sih...jerawat..?"
" Sebenernye kaga mikirin jerawat sih, tapi bener juga...ngomong-ngomong apaan obatnye ye...?"
" Halaaaa...jerawat aje lu pikirin, kodok buduk aje..yang jerawatan tenang-tenang aje.." kate bang Pendi sambil cekikikan.
" Enak aje lu..nyamain gue ame kodok. Lagian masih mending gue yang jerawatan di muka...daripade elu yang jerawatnye di pantat.." bales si Jabrik
" Eh...itu mukalu ya Brik..!? dari dulu gue pikir itu pantatlu..." bang Pendi cekakakan lagi, si Jabrik dongkol." Tapi tenang aje Brik...gue punye tips nih buat ngilangin jerawatlu. Pertama..elu cari sosor bebek..terus.."
" Oooo...daon sosor bebek ye Pen..!?  daonnye ditumbuk terus dipopolin di muka, gitu ye...?" tanye si Jabrik motong omongannye bang Pendi.
" Bukan...! bukan gitu...lagian elu maen motong aje orang lagi ngomong. Yang elu musti cari bukan daon sosor bebek tapi congor bebek beneran..." kate bang Pendi dengan mimik sok serius
" Set dah...baru denger gue, congor bebek buat obat jerawat. Terus diapain..?"
" Elu tangkep bebeknye, terus elu taroh cacing dimukelu...biarin dah ntu bebek nyosorin mukelu yang penuh jerawat..."
" Bisa sembuh Pen..?" si Jabrik penasaran
" Nggak...! tambah ancur iye..." jawab bang Pendi sambil ngakak. Si Jabrik gondok banget...padahal die ude serius dengerinnye.
" Eh...ada satu lagi Brik..,yang ini beneran. Elu ambil kapas ame minyak jelanta, terus elu olesin dengan merata keseluruh mukelu yang jerawatan sambil duduk di rel kereta api. Yang ini gue jamin Brik...kaga sampe 1 jam jerawatlu ilang, elu kaga bakal dah...ngerasain lagi punye jerawat " sambung bang Pendi.
" Mampus aje lu Pen...! jelas aje gue ngga ngerasain lagi, bukan cuman jerawatnye aje yang modar...gue juga ikut modar..." si Jabrik ngamuk-ngamuk tapi die jadi ikut-ikut bang Pendi yang ngakak ampe batuk-batuk. Terus bang Pendi nyanyi lagi....

Sang kodok..eh..eh..eh..sang kodok
Kenape elu jadi jerawatan...


Maaf...postingan kaga jelas...abis daripade kaga apdet..ye ngga !? he..he. Sebenernye ide ini nongol pas ngeliat di tipi Sheila Marcia yang jerawatan. Eh...ngomong-ngomong, gimane pendapet temen-temen. Sebaiknye bang Pendi ngaku ape ngga ye...kalo die adalah ayah biologis dari anaknye Sheila...he..he

Sabtu, 03 April 2010

PANTUN GOKIL ALA BANG PENDI

Wah...runyem dah...!! gare-gare mba Yati tukang jamu gendong langganannye bang Pendi.  Mba Yati nyamperin bang Pendi yang lagi asik makan bakso ame yayangnye..neng Siti.
" Pesen jamu kuatnya lagi ndak mas ? yang ini lebih sip lho...nanti bang Pendi bisa tambah greng dan bisa di praktekkin seperti biasa " Ujar mba Yati sambil senyam-senyum kadal. Denger gitu ..kontan aje neng Siti marah-marah, die nyangka bang Pendi suka minum jamu kuat trus prakteknya ame si tukang jamu ( wah..bang Pendi sih ngga kayak gitu, die nggak bakalan sekali-kali ngelakuin yang kayak gitu tapi kalo berkali-kali...bolehlah...he..he ).  Liat yayangnye marah, bang Pendi jadi gelagapan...die ampe kagak bise ngomong ( mao ngomong gimane, orang die keselek bakso. Mending bakso yang kecil...yang ini baksonye bakso tenis..he..he ). Sebenernye neng Siti cuman salah paham, yang dimaksud jamu kuat bukan buat kuat begituan tapi kuat manggul beras..he..he. Nah..sekarang bang Pendi puyeng dah dan lagi nyari jurus-jurus buat ngebujuk neng Siti...bukan bang Pendi namanye kalo ngga bisa..

Hujan gerimis enaknye makan rujak bebeg
Loreng harimau emang keliatannye nakutin
Duh neng...janganlah dikau suka ngambek
Apa yang neng mau..nanti abang turutin

Bang Pendi ngeluarin jurus pantunnye, neng Siti yang sedari tadi pasang muka manyun langsung diem. Bang Pendi seneng...die pikir jurusnye berhasil...tapi

Rujak bebeg bikinnye diuleg
Pepaye mentah rasanye sepet
Bukan aye ngambeg sembarang ngambeg
Aye pengen muntah ame kelakuan abang yang bikin empet

Weekkk...bang Pendi kaget, ternyate neng Siti bise ngebales pantunnye. Bang Pendipun nggak mao kalah set...

Buah pepaye dimakan sekeluarge
Makan sekuteng jangan lupa kacang polongnye 
Bukan salah aye didemenin perawan ame jande
Muka abang ganteng...emang ude dari sononye..

He..he..he bang Pendi emang kelewat pede dari kemaren, lagian sejak kapan sekuteng pake kacang polong...he..he. Tapi ternyate neng Siti masih bise ngebales...

Ade raje sukanye makan kakap ame ikan bandeng
Die takutnye cuma ame durinye yang kayak peniti
Percuma aje punye muka cakep lagi ganteng
Kalo kelakuannye cuman bikin makan ati...

Wah...bise aje nih..neng Siti ngebalesnye, bang Pendi lagi nyari-nyari kate buat ngebales lagi...tapi neng Siti ude keburu ngeloyor pergi. " Eh..tunggu dong..neng, jangan pergi dulu ! yang bayar bakso nanti siape...?" tereak bang Pendi...he..he

Naek bendi beli kedondong...bikin soto jangan lupa santennye
Bantuin bang Pendi dong...bantu kasih contoh buat pantunnye
He..he.he