OBROLAN DI WARUNG KOPI ( 13 )

Mpok Mumun  :  Baca koran serius amat bang ? emang ade berita apaan sih...? ( tanye mpok Mumun sambil nyuci gelas )

Bang Mamat   :  Ini mpok.., baca berita tentang buku " Gurita Cikeas " kayaknya seru nih..!

Bang Pendi     :  Gurita apaan bang ? oh..yang buat ngiket perut orok ye..., emangnye pak SBY nyambi jualan popok gurita ye bang..? ( dengan mimik serius )

Bang Mamat   :  Ah..ngada-ngada aje lu Pen .  Udah ah...kalo kaga tau, kaga usah ngikut ngomong lu..! ( bang Mamat sewot, bang Pendi mengkered..pikirnye " kaga sari-sarinye bang Mamat sewot gitu.." )

Mpok Mumun  :  Iye lu Pen..! nyamber aje kayak bensin...nah trus serunye dimane bang ( tanya ke bang Mamat lagi )

Bang Mamat    :  Disini ditulis, pak Amin Rais bilang " kalo buku itu ditulis cuman berdasarkan gabungan berita-berita dari internet, jurnal ame berita dari koran alias bukan dari hasil penelitian sendiri " Lha..apa akurat tuh isi bukunye..?

( " mao ngomong apaan lagi lu Pen ? mao bilang pak Amin itu bapaknye si jabrik..!?" ujar bang Mamat pas ngeliat mulutnye bang Pendi mangap. Mulut bang Pendi langsung mingkem, mpok Mumun cekikikan ngeliat bang Pendi mati kutu )

Bang Somad   :  Nah..itulah kalo duit panas bang. Kalo aye bilang mah...soal bank Century itu ibarat kate kayak anak-anak  mainin uler ( ular mulu yang diomongin, kaga ade binatang yang laen apa ?  he..he ). Nah..pertame-tame sih ntu uler emang jinek, bise dielus-elus ame dikalungin keleher. Lame-lame ntu uler sewot juga di maenin, trus catok sana catok sini deh. Kemaren pak Boediono yang kena catok, trus bu Sri Mulyani. Nah sekarang pak SBY...besok-besok pasti ade lagi yang kena catok...

Bang Mamat   :  Bise aje lu Mad..! tapi emang bener juga sih...kalo ngga salah malah pak Bibit-Candra juga bilang kalo bank Century ngeluarin duit buat yayasan SBY, bener ngga nye..Wallahu alam deh...

Bang Pendi    :  Haaah..! pade sok bangat dah ngomongin politik mulu, sekali-kali ngomongin Ayu Azhari kek..! Miyabi kek..! jande mude kek...! atawe cerite xxx kek...! kan ade ser...ser nye. Kalo ngomongin politik mah cuman bikin puyeng aje.... ( gantian bang Pendi yang sewot )

Mpok Mumun  :  Ah..dasar emang otaklu aje yang ngeres Pen..! kencing aje belon lurus...mao ngomongin yang gitu-gituan, lagian kalo ude ser-ser...elu pelampiasannye kemane..!? ( sambil cekikikan, bang Mamat ame bang Somad cekakakan )

Bang Pendi    :  Jande kampung sebelah  banyak yang mao mpok. Ngapain pusing-pusing...( sambil nyengir-nyengir )

Mpok Mumun  :  Pade mao gamparin elu...maksudnye  !? ( semue pade ngakak lagi )

Bang Pendi    :  Udeh ah...kaga usah ngomongin politik mulu. Eh...bang Somad.., aye punye cerite panas nih..mao denger ngga..? ( setengah bisik-bisik )

Bang Somad  :   Cerite panas apaan Pen ? ( rade penasaran )

Bang Pendi   :   Abang tau kan si Siti anaknye mpok Hindun yang bahenol ntu..? ( bang Somad ngangguk ). Kemaren aye ngga sengaja ngintip die lagi masak di dapur...

Bang Somad  : Trus...!? ( makin penasaran, mpok Munah ikut-ikut penasaran...bang Mamat pura-pura serius baca koran, padahal ikut dengerin juga )

Bang Pendi  :   Nah si Siti ntu masak cuman pake anduk doang yang ngelibet badannye, kayak-kayaknye sih die abis mandi. Ngga tau kenape..tibe-tibe penggorengan diatas kompor kebakar, lame-lame kompor juga ikut kebakar...apinye gede bangat ! Nah..si Siti pan langsung tereak-tereak, tapi karena babe ame enyaknye lagi pade pegi akhirnye si Adul tetanggenye yang dateng nolongin matiin apinye...

Bang Somad  :  Trus...? ( tanya bang Somad makin penasaran sambil nelen ludah )

Bang  Pendi  :  Ya..udah, begitu ceritenye....( sambil nyengar-nyengir )

Bang Somad  :  Gitu doang..!? lha..cerite panasnye gimane...? ( bingung )

Bang Pendi   :  Lha...itu tadi, kompor ame penggorengannye kebakar. Kan...panas tuh bang...!

Bang Somad  :  Ah...brengsek lu ! gue kirain si Siti ame si Adul ngapa-ngapain...( bang Pendi cekakakan, bang Mamat ame mpok Mumun yang tadi pora-pora kaga dengerin ikut-ikut ngakak )

(  Bang Pendi dan seluruh crew pendukung " OBROLAN DI WARUNG KOPI " mao ucapin selamat buat mba Prita Mulyasari yang hari ini mendapat vonis bebas dari pengadilan )

SAPA BERANI SAMA ULAR...?

DILARANG KERAS..!!

BACA POSTINGAN INI SAMBIL MAKAN

Ada yang takut sama ular ? Wah bang Pendi paling phobia tuh ame yang namenye ular, sebenernye sih bukan takut tapi ngeri aje...he..he sami mawon ya ?. Nah ngemeng-ngemeng soal ular, bang Pendi punya pengalaman unik yang kaga bakalan dilupain.

Dulu waktu bang Pendi masih imut-imut ( sekarang amit-amit he..he ), daerah bang Pendi masih banyak bangat pohonan. Segala macem pohon ade, pohon rambutan..duren..kecapi..mangga..jambu de-el-el. wah...!! pokoknye lengkap dah, barangkali yang ngga ade cuman pohon duit aje ! he..he. Nah karna masih banyak pohon en kebon so pasti banyak ular yang wara-wiri sekitar rumah. Ngga aneh kalo ampir tiap ari die ketemu ame ular di jalan, tapi bang Pendi kaga pernah ngobrol ame ntu uler..paling-paling cuma say hello doang...

" Woiii..mao kemana lu...!?"

" Biase bang, cari kodok...!"

Selain masih banyak kebon atawe pu-unan, disitu juga banyak empang ( kolam ikan ). Nah..di empang-empang ntu banyak yang dibuatin jamban ( tempat bab/ buang aer besar ), bentuknye seperti kubus ( kalo ade orang jongkok yang keliatan cuman kepalanye doang ) dan kaki-kaki jamban ntu tertanam didasar empang. Dari pinggir empang atau tanah sampai ke jamban dihubungin ame beberape bilah kayu atawe bambu sebagai penyeberangan.

Suatu pagi bang Pendi kebelet untuk bab, masih pake sarung die buru-buru pegi ke jamban. Nyampe disono, tinggal angkat sarung langsung dah die nongkrong. Eh..belum juge keluar bab-nya, tiba-tiba dan sekonyong-konyong ade uler yang ikut-ikutan mao naek ke jamban juga ( barangkali si uler ude kebelet juga..he..he ). Bang Pendi jelas aje kalang kabut, abis..die mao lari kemane kalo ntu uler nekat juga masuk jamban. Jalan atu-atunye paling nyebur ke empang. Keringet dingin keluar dari embun-bunannye bang Pendi, antara takut ame kebelet nahan bab....bang Pendi cuman bise ngusir si uler.." hush..hush..!!"

Untungnye si uler kayaknye ngerti, die kaga terus masuk jamban. Tapi celakanye si uler kaga terus pegi tapi malah ngejogrok di pinggir jalan masuk. Mao kaga mao bang Pendi ngeden sambil merhatiin ntu si uler yang lagi ngelingker dengan santainye.

Nah..pas bab pertama keluar dan meluncur ke bawah, pas sampe aer berbunyi.." plung..!!". Tiba-tiba si uler bangun sambil gerakin kepalanye kekiri dan kekanan, barangkali die mikir " bunyi apaan tuh..tadi ?". Bang Pendi jadi keder, terpaksa deh..die tahan jangan sampe bab keluar dulu. Karna ngga ade suare lagi, si uler kembali ngelingker lagi. Merasa aman, bang Pendi keluarin lagi bab-nye..." plung....!!" dan si uler yang tadi ngelingker bangun lagi dan gerakin kepalanye lagi, kayaknye die makin penasaran. Tapi ngga lame ntu uler ngelingker lagi.

" Wah..berabe nih, kalo terus begini. Lame-lame ntu uler masuk juge nih ke jamban " pikir bang Pendi sambil kembali nahan bab-nye. Tapi makin ditahan perut bang Pendi tambah mules, akhirnye karna ude ngga nahan akhirnye bab-nye mbrojol keluar kaga ketahan lagi .." Plung...plung...plung...plung...plung...plung..!!!!". So pasti si uler bangun lagi dan langsung kepalanye goyang-goyang kayak uler India yang ngikutin irama suling dan ngga lame uler ntu jalan menuju jamban dan menuju kearah bang Pendi.

Jelas aje bang Pendi langsung panik. Masih megangin kaen sarung, bang Pendi bangun dari jongkoknye sambil tereak...Maaaaaaakkkkkk !!!!. Anehnye si uler yang rade-rade nekat tadi langsung ngibrit dan lari masuk kebon. Kaga jelas dah si uler takut ame apaan, tereakan bang Pendi ape takut yang laen ? he..he..he. Dalem ati bang Pendi.." wuiih..slamet...slamet dah gua..!!", tapi mukanye langsung merah padam pas dari jamban yang laen ade yang tereak

" Woiiiiii....!! kalo pantat burik, kaga usah dipamer-pamer dah.....!" Bang Pendi langsung mendek sambil nahan-nahan malu.

WARNING...!!!! 

YANG OTAKNYA LAGI NGERES DILARANG BACA POSTINGAN INI

( EH.....UDE PADE BACA YA...!!?? HE..HE..HE )

KORUPSI, APAAN SIH ?

Bang Pendi lagi bingung nih..., orang-orang lagi rame ngomongin korupsi tapi die kaga tau korupsi itu apaan ? apa korupsi itu korma campur terasi ? kalau memang itu, bang Pendi tambah bingung. Lha...ape enaknye ? lagian terasi kan identik ame masyarakat kelas bawah tapi kenapa para pejabat doyan bangat ame yang namanye korupsi.

Nah...lalu ape bedanye korup-si ame ero-si, gu-si, tera-si, na-si ba-si trus shu-si atau masturba-si ? pan semuanye akhirannye si..wah bang Pendi tambah puyeng alias pusang tujuh kelalang. Iseng-iseng bang Pendi maen kerumahnye engkong google tapi bang Pendi tambah puyeng soalnye banyak bangat..! akeh tenan..! loba pisan...! arti dari korupsi. Tapi bang Pendi bise sedikit ambil kesimpulan barangkali arti korupsi ntu adalah sebuah tindakan atau perilaku dari seseorang untuk mendapatkan keuntungan pribadi. Kalo pejabat, ya menyalahkan gunakan jabatannye buat mencari keuntungan pribadi ( barangkali kalo pejabat ntu cari keuntungan buat rame-rame kaga di sebut korupsi ya..he..he )

Trus.. kalo arti korupsi kayak gitu, apakah suami yang dapat bonus di kantor trus ngga bilang ame bini disebut korupsi ? Istri yang masak sayur, sayurannye dikurangin yang ditambahin cuman kuahnye doang disebut korupsi ? lalu mahasiwa yang bolos kuliah karena males ngadepin dosen nyebelin, karyawan yang maen fb ame blogging saat jam kerja disebut korupsi juga ? bagaimana kalau ade yang ketawe cuman hihihi.. atau hehehe.. padahal seharusnye huahahaha..disebut korupsi ? atau ade orang makan nasi basi pake terasi nyangkut di gusi disebut korupsi juga ? wah...binun...binun..

Tapi bang Pendi ngerase die dah korupsi waktu karena ude nunda-nunda mosting award dari - Gek - ame Nindya. Nah..awardnye dah di pajang, jangan bilang bang Pendi suka korupsi ye....

Ini die awardnye...eng...ing...eng !!

Wadoooh...karena borongan, aye lupa deh mane yang dari non Anggie mane yang dari non Nindya. Ga papa khan non ?

Nah...mantab...mantab khan ? ayo sapa yang maoooo....di comot aja dah....

OBROLAN DI WARUNG KOPI ( 12 )

Bang Mamat  :  Wah...tanggal 11 Juni piala dunia ude mulain nih mpok, sekarang aje ude jadi bahan omongan di mane-mane. Ngomong-ngomong kalo nanti maennye malem, nih warung buka ngga ..?

Mpok Mumun  :  Yah..ngga tau dah laki aye, mau ngga die jualan tengah malem !? kalo aye sih..ogah dah..

Bang Somad  :  Nah..kalo buka, aye punye usul mpok ! gimane kalo di warung ditaroh tv biar nih warung tambah rame rame...( sambil ngeganyem singkong goreng )

Mpok Mumun  :  Kalo ramenya doang mah..buat apaan bang kalo kaga pade jajan, paling-paling pade ngutang kayak si Pendi...lagian pade demen amat ame piala dunia, orang masih lama juga. Tuh pikirin kesebelasan Sea Games Indonesia..!  lawan Singapura aje ude ngos-ngosan apelagi nanti ketemu Thailand...mati ica..!!

Bang Pendi  :  Lha..aye kok di bawa-bawa mpok !? aye kan ngutang kalo pas lagi kaga gablek duit aje...

Mpok Mumun  :  Emangnye kapan elu punya duit Pen..!? perasaan tiap hari bokek terus..( bang Mamat ame Somad cekikikan, bang Pendi cuman nyengir doang )

Bang Mamat  :  Ngomongin soal bola, kira-kira elu bisa maen ngga Pen..?

Mpok Mumun  :  Yah...tampang kayak gini... maen bola. Paling-paling larinye bise.. nendangnya kagak, nendangnye bise..larinye klemar-klemer..kayak onta ! ( sambil cekikikan )

Bang Pendi  :  Eh...semarangan ! mpok Mumun belon tau aje...nah waktu Rw kite juare di kelurahan, tujuh belasan kemaren. siape yang bikin gol..?

Bang Somad  :  Lha..emangnye elu Pen ? perasaan elu kaga maen, jangan ngibul lu..!

Bang Pendi  :  Siape yang ngibul bang, aye khan tadi cuman nanya...siape yang bikin gol ? bukan aye...! orang aye nonton juga kaga..

Mpok Mumun  :  Huuuuu...!! gue kirain elu ( bang Pendi cengar-cengir )

Bang Mamat  :  Tapi emang bener mpok, taon lalu waktu tuuh belasan antar Rt, die jadi bintangnye ! sayang mpok kaga nonton. Belon lima menit si Pendi masuk lapangan, penonton ude pade sorak-sorak. Si Pendi lari penonton sorak..., si Pendi nendang bola penonton sorak...ampe si Pendi duduk penonton masih aje sorak..malah tambah rame..( mpok Mumun melongo nahan-nahan kagum, bang Mamat ame Somad justru nahan-nahan tawa )

Mpok Mumun  :  Ck..ck..ck..hebat bangat lu Pen ! emangnye masukin berapa gol...bise jadi bintang lapangan kayak gitu..

Bang Somad  :  Dia mah bukan bintang lapangan mpok ! tapi binatang lapangan ( ngga bisa nahan tawa, bang Somad cekakakan ). Tau ngga mpok kenape die di sorakin..!? waktu ntu si Pendi kaga nyadar kalo celana kolornye robek gede bangat dari bawah selangkangan ampe ke pantat...

Mpok Mumun  :  Pantesan aje...! iiiih..selem !! ( sambil tutup muka pake tangannye. Bang Mamat ame bang Somad cekakakan lagi, muka bang Pendi merah nahan malu )

OBROLAN DI WARUNG KOPI ( 11 )

Mpok Mumun  :  Wah..babe ame enyaklu ude pulang haji Pen.., oleh-olehnye mane ? ( sambil bikin kopi )

Bang Pendi      :   Yah..mpok..babe bawa duit juga cekak..pas-pasan, boro-boro dah beli oleh-oleh. Pulang selamet aje.. ude syukur..

Bang Somad    :  Lah..kemaren gue liat babelu bawa pulang onta Pen..! berarti babelu banyak duit dong, bisa beli onta dari arab. ( sambil cengar-cengir )

Bang Pendi      :  Onta.., onta yang mane ? ( rade bingung )

Bang Somad    :  Ntu..yang kemaren bawain koper-koper babe ame enyaklu...

Bang Pendi      :  Set dah...! yang bawain koper kan aye...sembarangan aje, orang kayak bret pit gini di samain ame onta. ( Bang Somad ame mpok Mumun cekakakan, bang Mamat cuman mesem-mesem  )

Bang Mamat    :  Bener Pen..gue juga seneng dan bersyukur babe ame enyaklu pulang dengan selamat, soal oleh-oleh kaga perlu pusing-pusing bawa dari arab. Kalo elu punya duit, elu beli aja oleh-olehnya di pasar Tanah Abang...apaan aja juga ada disono, dari korma sampe aer zam-zam semue ade..lengkap !

Bang Pendi      :  Ah...yang bener bang ? ( bang Mamat cuman ngangguk-ngangguk sambil nguyup kopi ). Kalo gitu minjem duitnye deh bang..aye mao kesono ( sambil cengar-cengir, bang Mamat ampe keselek kopi ngedengernye )

Mpok Mumun  :  Yeee..! malah bang Mamat yang rugi, kaga modal lu Pen...! ( bang Pendi cuman nyengar-nyengir )

Bang Pendi      :  Eh..bang Somad, ngomong-ngomong soal onta...aye punye tebakan nih ! Onta khan punuknye ade dua, nah..kenape punuknya itu ade dipunggung atawe di belakang..( bang Somad belaga mikir, bang Mamat juga cuman geleng-geleng kepale )

Bang Somad    :  Ah..nyerah dah ! kaga tau gue...emang kenape Pen...?

Bang Pendi      :  Kalo punuknye didepan bukan onta namenye tapi mpok. Mumun ...!! ( bang Pendi langsung ngibrit keluar, bang Mamat ame Somad ketawa cekakakan )

Mpok Mumun  :  Heh..kurang ajar lu Pen ! dari tadi gue ude tebak jawabannye pasti ga bener...dasar Pendi sarapnye kaga ilang-ilang ! ( mpok Mumun sewot, bang Pendi cekakakan sambil guling-guling )

PELIPUR LARA & PENGOBAT RINDU

Wadoooh..! tiga ari kaga blogwalking, ati bang Pendi jadi ngerenes. Kayaknye separuh jiwanya pergi...jiaaah ! ( maaf ya mas Anang ). Padahal biasanye juga blogwalking cuman pake komputer 2 band he..he kayak radio jadul yang kalo pindah stasiun radio bunyinye kresek..kresek !, atau kalo komputernye ngadat bang Pendi nungguin maling komputer lewat buat dipinjem komputernya. So pasti si maling dengan rela hati minjemin, pikirnye " daripade bonyok !". Malah sekarang si maling kalo abis ngembat komputer, die selalu mampir ke rumahnya bang Pendi..minta diajarin ngeblog..he..he.

Oh..ya ngomongin tiga hari ntu bang Pendi jadi sedih, pasalnye bang Pendi jagain adenye yang sakit abis operasi usus buntu. Operasinye sih lancar tapi sehari abis operasi perutnye jadi kembung dan napasnya sesek. Keadaannye bikin miris... tiga ari abis operasi asupan makanan masih dari selang infus, di idungnye juga dimasukin selang katenye buat nyedot cairan yang bikin kembung, belon lagi di tambah selang oksigen.. duh..! ngga tega rasanye ngeliat penderitaan adenye . Hati bang Pendi sedih, bingung sekaligus deg-degan, pasalnye enyak babe lagi di Arab Saudi ngejalanin ibadah haji. Kalo di kabarin takut ibadahnye jadi keganggu, kaga dikasih kabar..takut kalo ade ape-ape. Yang paling sedih saat adenye ngomong sambil meringis ngelawan sakitnye " bang...masa sih gua mati bang..!?" duuh..bang Pendi rasanye mao nangis bombay ngedengernye.

Syukurlah kondisinye mulai mendingan walau belon 80%, tapi bang Pendi bisa curi-curi kesempatan ( pinjem istilahnye pak Iwan ) buat mengunjungi blog sahabat. Eh...ngga nyangka non Ninneta... kasih award yang mantab punya, bang Pendi seneng banget. Award ntu bagai pelipur lara dan pengobat rindu setelah beberapa hari ngga ngeblog. Makasih ya non...!!

Award dari non Ninneta

OMNYA BANG PENDI POLISI ?

Hari ini bang Pendi seneng bangat, mpoknye ame abang iparnya dateng pake motor. Nah..akhirnye ade kesempatan buat die buat jajalin naek motor. Bang Pendipun langsung minjem ame abang iparnye walau abang iparnye rela kaga rela minjemin " Wah..bakalan penyok-penyok nih motor gue kayak mukanye si Pendi " pikir abang ipar rade khawatir.

" Emangnye elu ude biase bawa motor Pen.." tanya abang ipar

" Wah..die mah kalo bawa motor ude biase bang, biase mecahin kaca lampu ame matahin stang motor " mpoknye yang jawab sambil cekikikan.

" Ye..elah empok kaga boleh adenye seneng dikit "

" Ye ude bawa sono, tapi awas kalo sampe jatoh motornye !" ujar abang ipar

" Dijamin kaga jatoh dah.. bang , paling juga nyusruk " jawab Pendi asal sambil nyetarter motor

Ude dua puteran ngiderin kampung bang Pendi belon puas, trus die nekat bawa motor ke jalan besar. Baru aje bentaran, die ude nyenggol motor laen. Nyenggolnye sih dikit....tapi masalahnye yang disenggol ntu polisi, jelas aje polisi itu langsung nyetop bang Pendi.

" Heh..kamu ini, sudah tidak becus naik motor ngga pakai helm lagi , mana SIM !?" bentak pak polisi. Bang Pendi gemeteran, die cuma geleng-geleng aje.

" Ngga punya SIM ? kalau begitu mana STNK, jangan-jangan ini motor curian "

" Kaga pak, ini motor om saya. Om saya juga polisi " Bang Pendi ngebohong sekenanye.

" Oh ya..!? siapa nama om kamu dan tugas dimana...?"

" Om saya namanye Sugito pak ! tugasnye di Polsek Lenteng Agung " jawab Pendi asal, dahi pak polisi berkerut.

" Yang bener...jangan bohong "

" Bener pak...sueeeer deh ! tapi bapak jangan ikut-ikut kelakuan om saya dah.. ude orangnye item, jelek dah gitu paling doyan malakin orang. Tapi om saya itu pinter pak, kalau jage di lampu merah die ngumpet. Nah..kalo ade yang ngelanggar baru deh die nongol sambil nyemprit periwitannye. Lumayan dapet sepuluh rebu ampe lima puluh rebu." muke pak polisi langsung merah padam, kayak tomat kematengan.

" Heh...kamu menghina saya ya..!?" bentak pak polisi lagi.

" Lho..ngga pak ! saya ngomongin om saya ko pak "

" Om kamu yang mana ? yang namanya Sugito di Polsek Lenteng Agung cuma saya..nih lihat !" kata pak polisi sambil nunjukin nama di bajunya.

" Busyeeet dah..bise tambah runyam nih urusannye " untung motornye tadi belon sempet di matiin, bang Pendi ngegas motornye dan langsung ngacir diiringi suare sempritan...priiiit...priiiit !!

DIARE...EH.. DIARY BANG PENDI

Bang Pendi uring-uringan lagi, pasalnye ni hari ujan kaga brenti-brenti. Rasanye die ude empet banget ngejogrok di rumah aje, abis...bentar-bentar enyaknye tereak. Peeeen....! benerin genteng bocor. Peeeen..! samperin babalu gih di kebon..( hah..ade-ade aje ! aki-aki manja amat sih pake disamper-samperin. Lagian kurang kerjaan amat ujan-ujan maen di kebon. Bang Pendi ngegerendeng sendiri ). Yang lebih sewot lagi pas enyaknye tereak...Peeeen ! masukin ayam noh...( set dah...! ntu ayam emang pade bader bangat. Padahal die ude ngancem " Kalo elu pade kaga mao balik kekandang sendiri, gue gorok leherlu pade. Eh...ntu ayam cuman pade ngejawab.." Uu..Uuuuuuuuuuuuuuu...!! " ). Wah...pusing dah !

Padahal kemaren-kemaren, waktu die masih ngojek payung. Bang Pendi seneng bangat kalo ujan tambah deres, ngojek payungnye tambah laku. Tapi gara-gara cewe yang die tawarin payung bilang " Ngga ah, sama anak kecil aje..!!", lah.. bang Pendi bingung lalu die tanya " Emangnye kenape neng...?". Si cewe ngejawab lagi sambil cekikikan " kalo anak kecil khan imut-imut, kalo abang amit-amit.. ". Bang Pendi langsung diem klekep, mukanye merah kayak strobery panggang ( Eh...emangnye ade ye, strobery panggang..?). Nah..abis ntu, bang Pendi langsung down. Die kagak semangat 45 lagi ngojekin payung, lagian die juge rade malu berebutan ame anak-anak kecil.

Bang Pendi jadi nyalahin si Axl Rose yang nyanyiin lagu " November Rain ", kalo aje judul lagunye die ganti..pasti bulan ini ujan kaga turun mulu. Bang Pendi juga jadi rade kesel ame enyaknye, die ngerase sebagai anak semata wayang ( Eh..die juga bingung, enkongnye dulu dapet istilah semata wayang darimane ? ape karna matanye wayang cuman atu ? kalo wayang kulit...iye bener ! tapi wayang golek..kan matanye due..). Nah...sebagai anak semata wayang ntu, bang Pendi ngerase kagak pernah di manja. Padahal die pengen di manja atawe butu tati tayang he..he.

Boro-boro dimanje...! die inget bangat waktu pake sepeda babenye terus jatoh nyusruk, sambil meringis kesakitan die mao ngadu ame babenye.

Trus babenye nanya.." Elu kenape Pen..? kaki pade besot gitu ...". Pastinye bang Pendi terus terang...Pendi terang terus ! ( eh..kayak iklan bohlam he..he ). " Anu...be ! aye jatoh dari sepeda " jawab bang Pendi. Eh..bukannye kasian tapi babenye malah ngomel " makanye mata jangan taroh di dengkul...!! ". ( " Busruutttt...!! sejak kapan mate ade didengkul..?" bang Pendi ngedumel ). " Trus..gimane sepedanye, rusak ye ?" tanya babenya lagi.

" Kagak beh...! cuman lecet dikit doang.."

" Ya..syukur dah...!" kate babenye. Bujug dah...! bang Pendi dongkol. Babenye lebih sayang ame sepedanye daripade bang Pendi, nasib...nasib !

Rase-rasenye die jadi kepengen punye enyak kayak mpok Rani, soalnye ade isu kalo die punye tabungan 300 milyar. Busyet..300 milyar !?.  Kalo di beliin ikan peda atawe jengkol, dapet berape karung ya..?. Masa bodo dah itu duit darimane, dari pak Antasari ape dari pak Nasruddin. Yang penting kalo mpok Rani jadi enyaknye, bang Pendi jadi keduman jajan banyak. Paling kagak sehari dapet jajan satu jute, kagak kayak sekarang. Kagak mungkin dah...! abisnye kembalian beli garem aje di tanyain. Gimane mao kasih duit jajan banyak, seperak juga kaga acan-acan.

" Peeeen..!" Tiba-tiba enyaknye tereak lagi. Ngagetin bang Pendi yang lagi ngelamun.

" Apaan lagi sih nyakkk..." tanya bang Pendi rade kesel.

" Elu mao ngupi..? kalo mao kopi bikinannye mpok Mumun, sono gih beli..!. Tuh...duitnye ambil di gerobogan..!" kate enyaknye .

Bang Pendi mesem-mesem malu " ternyate..enyak sayang ame gue " pikirnye. Die langsung cium tangan enyaknye berkali-kali, Enyaknye ampe bingung " Ude sarap kali nih anak...?" pikir enyaknye bang Pendi.

OBROLAN DI WARUNG KOPI ( 10 )

Bang Somad  :  Eh..mpok ! ude denger belon kalo ade isu kiamat ude deket lagi. Kire-kire taon 2012 ( sambil nguyup kopi )

Mpok Mumun  :  Ude bang...aye juga jadi takut, apelagi tanda-tandanye ude keliatan. Gempa dimane-mane..

Bang Somad  :  Nah..elu Pen, ude siap belon kalo taon 2012 kiamat bener-bener dateng ( bang Pendi yang lagi asik ngeganyem singkong goreng, kaga ngejawab ). Heh...! elu makan singkong aje serius amat...

Bang Pendi  :  Hah...apaan, Ki Amat !? siape die ? kapan die mao dateng, emang mao ngapain ? ( tanya bang Pendi dengan tampang bloon )

Mpok Mumun  :  Kiamat odoooon...! bukannye Ki Amat. Kiamat ntu, hari dimana semue yang ade di bumi ini kaga ade lagi yang kesise. Kite-kite pade koit semue...

Bang Pendi  : Yah..si mpok ! kiamat aje dipikirin. Lagian bukannye si mpok ame bang Somad ibadahnye kaga pernah putus, ngapain takut ! ( bang Somad ame mpok Mumun saling pandang " bener juge nih anak !" )

Bang Mamat  :  Bener tuh kate si Pendi. Isu kiamat ntu kaga usah dipikirin, anggap aje itu peringatan buat kite kalo mulai sekarang kite kudu jadi orang yang bener...ibadahnye yang bener. Kalo soal mati mah, kaga usah nungguin kiamat. Kite lagi ngobrol enak-enak gini terus ade yang kejet-kejet mane kite tau...!

Bang Somad  : Bener sih bang, tapi bukannye aye sombong..justru aye mao tanya ame si Pendi dah siap belon. Soalnye setau aye, die kaga pernah sholat apelagi beramal..( sambil mesem-mesem )

Mpok Mumun  :  Si Pendi mah boro-boro beramal, orang ngupi disini aje ngutang mulu ( sambil cekikikan )

Bang Pendi  :  Ya elah mpok..! jangan ngeliat dari luarnye aje dong, sekali-kali liat juge dalemnye...

Bang Somad  :  Dalem yang mane Pen..? badan pade burik gitu elu bangga-banggain ( bang Somad cekakakan )

Mpok Mumun  :  Hiiiiii...!! ogah ah.... ( dengan mimik jijik )

Bang Mamat  :  Ude deh ah...! kaga usah ngomongin kiamat lagi, yang penting nikmatin aje ni kopi sekalian nikmatin hidup...ye nggak !? ( belon lagi dijawab ngomongan bang Mamat, tiba-tiba nongol si Pian anak tetangga sebelahnye bang Pendi )

Si Pian  :  Bang Pendi...! dicariin nyak Asiah, kayaknye lagi ngamuk-ngamuk noh..!!

Bang Pendi  :  Astage..!! aye kelupaan, wah...mampus dah gua...! ( ujar bang Pendi dengan tampang ketakutan )

Nyak Asiah  :  Pen....Pendiiiiiii..!! jadi anak kebangatan bangat lu ya..Disuruh beli garem malah nongkrong disitu. Awas lu ye...!! ( Nyak Asiah beberekan )

Bang Pendi  :  Iye nyak..!! bentar...( langsung ngibrit ninggalin bang Mamat, Bang Somad ame mpok Mumun yang cekakakan )

Bang Somad  :  Nah loh..! kiamatnye si Pendi ude dateng tuh...( pade cekakakan lagi )

MOTOR BARU BANG SARMILI

Sebenernye cerpen ini ude pernah aye posting di blog hanya ilusi, tapi yang ini aye bikin agak beda dikit dari yang kemaren. Aye sekalian belajar buat cerita dengan satu tema tapi dengan beberapa ending yang berbeda, lumayan biar keliatan blognye di up date...he..he

" Elu kenape sih Mun? dari tadi gua liat mukalu ditekuk aje" tanya bang Sarmili melihat wajah mpok Munah yang cemberut. Mpok Munah tak menjawab, ia menyibukkan diri merapihkan piring-piring kotor sisa makan pelanggan nasi uduknya. Bang Sarmili hanya bisa geleng-geleng kepala melihat tingkah laku istrinya dan iapun tak berminat meneruskan pertanyaannya karena bila sedang ngambek seperti ini biasanya sekali saja kata-kata yang keluar dari mulut mpok Munah bagai petasan gantet alias nyerocos terus dan lama berhenti, malah hanya akan membuat kepala bang Sarmili tambah pusing. Bang Saminpun meneruskan menikmati segelas kopi pahit ditemani beberapa potong ubi goreng yang tak habis terjual. Bang Sarmili sebenarnya tahu apa yang membuat istrinya bersikap seperti itu, semua gara-gara keinginan mpok Munah memiliki sepeda motor yang sampai saat ini belum kesampaian.

Bukan bang Sarmili tidak mau menuruti kemauan istrinya itu tapi ia masih berpikir seribu kali. Memang sudah banyak dealer motor yang menawarkan kemudahan kredit motor tanpa uang muka tapi bagaimana dan darimana uang untuk membayar cicilan motor itu nantinya yang membuat bang Sarmili pusing tujuh keliling." mau bayar pake ape? buat makan sehari-hari aje masih ngos-ngosan" ujar bang Sarmili dalam hati. Bang Sarmili sendiri sebenarnya punya keinginan yang sama dengan istrinya, dia juga sudah punya rencana bila sudah memiliki motor akan memanfaatkannya untuk cari uang dengan menjadi tukang ojek seperti beberapa tetangganya. Karena pekerjaannya sebagai tengkulak atau penjual buah-buahan sudah tidak dapat diandalkannya untuk menopang hidup keluarganya, seiring makin padatnya pemukiman penduduk yang berimbas makin berkurangnya pohon-pohon buah dikampungnya. Kini jarang sekali ia menemui pohon-pohon seperti durian, rambutan, kecapi, manggis, nangka ataupun pohon melinjo. Padahal sewaktu kecil semua jenis pohon tersebut tumbuh subur disekeliling rumahnya. Ia juga ingat bila musim durian datang, saat masih berbunga ia bersama adik-adiknya, sepupu juga tetangganya saling berlomba mengumpulkan bunga-bunga durian yang berjatuhan. Kemudian bunga-bunga yang telah dibersihkan diserahkan ke ibunya untuk dijadikan sayur tumis sebagai lauk pauk. Juga saat buah durian mulai besar dan matang, bila tengah malam terdengar suara berdebum dari arah pohon durian bang Sarmili dan adik-adiknya saling berlomba mencari buah durian yang jatuh. Dan bila buah durian sudah didapat biasanya langsung ludes dilahap beramai-ramai malam itu juga, kini kenangan seperti itu tidak akan pernah terjadi lagi. Jangankan merasakan masa-masa seperti yang pernah ia alami, mengenal bentuk atau mengecap rasa buah durianpun anak cucunya nanti belum tentu tahu bila tidak membelinya.
" Eh..bang! bukannye ngebantuin, malah bengong disitu ".
" Ah..elu Mun. Ngagetin gue aje.."
" Nih..bang!, bantuin beresin. Aye mau belanja ke pasar buat besok, ntar kesorean. Coba kalo punya motor, kan enak..!. Aye ngga perlu lagi naek turun angkot. Lagipula bisa cepet bang ".
" Motor lagi..motor lagi yang elu omongin. ngga ade yang lain apa ?"
" Udah ah..sebodo !" ujar mpok Munah sambil ngeloyor pergi dengan menenteng keranjang belanjaan meninggalkan bang Sarmili yang hanya bisa geleng-geleng kepala.

* * * * * * * * * *

Hari masih pagi, namun gang di depan rumah bang Sarmili sudah ramai hilir mudik sepeda motor para warga yang akan berangkat kerja juga ibu-ibu yang mengantarkan anaknya sekolah. Mpok Munah terlihat sibuk melayani para pembeli nasi uduknya, biasanya mereka membeli nasi uduknya mpok Munah untuk sarapan pagi dirumah namun ada juga beberapa warga yang makan ditempat sekalian berangkat kerja seperti bang Minan dan bang Nasir yang sedang asik menyeruput kopi panasnya.
" Bang Sarmili kemana mpok? dari tadi kagak keliatan batang hidungnye " tanya bang Nasir sambil meniup-niup pisang goreng yang masih panas.
" Kagak tau tuh, abis bantuin aye nyiapin dagangan die langsung ngeloyor pergi. Nggak tau kemana ".
" Emangnye kagak bilang-bilang mpok ?"
" Ya..bilangnye sih ade urusan. Tadi di samperin si Mamat "
" Si Mamat adenye ?"
" Iya..Mamat mana lagi"
" Mau ikut kerja kali.. mpok, ane denger si mamat kan udah enak sekarang " sahut bang Minan.
" Ya..syukur kalo emang gitu, daripade ngejogrog aje disini cuma ngabisin dagangan aye "
" Segitunye...!" ujar bang Minan dan Nasir hampir bersamaan. Mereka kembali menyeruput kopi sedang mpok Munah sibuk melayani pembeli yang lain.

Hari sudah menjelang siang, azan djuhurpun sudah berkumandang beberapa menit yang lalu. Matahari sudah berada diatas ubun-ubun kepala dan memancarkan sinarnya yang panas menyengat, tapi bang Sarmili belum juga kelihatan batang hidungnya. " Kemana ntu orang ?, kagak sari-sarinya" tanya mpok Munah dalam hati, sambil menggerutu sendirian mpok Munah membereskan barang dagangannya. Tak berapa lama kemudian mobil kijang pick-up putih berhenti dan parkir didepan rumahnya.
" Mun..!" teriak bang Samin memanggil istrinya sambil keluar dari pintu depan mobil. Mpok Munah langsung menoleh ke arah suara.
" Eh..ada apa bang ?" tanya mpok Munah sedikit terkejut.
" Ayo..! elu liat deh.. Mun " ajak bang Sarmili sambil menarik lengan mpok Munah ke belakang mobil. Diatas bak mobil terlihat sebuah motor baru warna biru menyala terikat tali tambang.
" Eh..! bagus amat ntu motor, punya siape bang ?".
" Ya..motor gue Mun..motor kite!"
" Ah..yang bener bang ? abang nyolong dari mane ?"
" Husss..sembarangan aje lu ngomong, ini motor kreditan ! baru gue ambil dari dealer.." ujar bang Sarmili diiringi senyum orang-orang dealer yang sedang membuka tali ikatan motor. Hati mpok Munah langsung berbunga-bunga karena akhirnya keinginan untuk punya motor sudah terkabul. Namun ada yang masih mengganjal dihati mpok Munah, dia langsung menarik tangan suaminya menjauh.
" Abang dapet duit darimane?"
" Ya..elah Mun..! yang penting maulu kan udeh gue turutin "
" Bukan gitu bang..aye kan kagak mau kalo abang sampe ngapa-ngapain buat beliin aye motor "
" Pokonye tenang aje deh ! si Mamat minjemin gue duit buat uang panjer, tapi cicilannya kite yang bayar "
" Oh...gitu !" ujar mpok Munah agak lega setelah mendengar penjelasan suaminya. Lalu mpok Munah mendekati motor baru yang sudah diturunkan dari mobil dan mengelus-ngelusnya. Tak lama kemudian, para tetangga terutama ibu-ibu dan anak-anak datang berkerumun untuk melihat motor barunya bang Sarmili. Anak-anakpun mulai bersorak-sorak.
" Motor baru...motor baru..!" sorak mereka sambil tertawa cekikikan. Mpok Munah senang bukan kepalang, saking senangnya sore hari ia meminta bang Sarmili untuk keliling kampung untuk mencoba sekaligus memamerkan motor barunya pada para tetangga. " ah..elu kayak anak kecil aje. Pake pamer-pamer segala " umpat bang Sarmili, walau begitu tetap saja bang Sarmili menuruti keinginan istrinya itu.

Keesokan harinya dengan berbekal sisa uang pemberian Mamat adiknya, bang Sarmili pergi ke pangkalan ojek di stasiun kereta api Universitas Indonesia Depok. Menurut bang Saiful tetangganya yang sudah lebih dahulu menjadi tukang ojek disana, pengojek baru di wajibkan membayar iuran pendaftaran sebesar dua ratus ribu rupiah. Menurut mereka itu sebagai simpanan paguyuban para tukang ojek yang mangkal disitu. Bagi bang Sarmili sendiri itu tak jadi masalah yang penting ia bisa cari uang untuk menambah penghasilan juga untuk membayar cicilan kredit motornya. Walau belum ada nomor polisinya, bang Sarmili tetap nekat memulai jadi tukang ojek lagipula ia mengojek masih dilingkungan universitas Indonesia kalaupun ada paling jauh ke Pondok Cina Kukusan. Karena penumpangnya kebanyakan mahasiswa atau warga Pondok Cina Kukusan yang pulang pergi kerja naik kereta api. Bang Sarmili bersyukur pihak Universitas Indonesia masih memberi kelonggaran kepada warga termasuk dirinya untuk menjadi pengojek dilingkungan kampus, walau lingkungan kampus yang sangat luas itu menjadi ramai oleh hilir mudiknya para tukang ojek melintasi jalan-jalan sekitar kampus. Dan kondisi tersebut menjadi perhatian ekstra bagi satuan pengaman kampus karena tak jarang terjadi peristiwa-peristiwa kriminal yang menimpa mahasiswa-mahasiswinya seiring bebasnya keluar masuk warga dilingkungan kampus.

Hari pertama bang Sarmili mengojek, dua puluh lima ribu rupiah mampu dikantonginya. Setelah dipotong uang bensin dan rokok, bang Samin masih bisa menyisihkan sebagian untuk ditabung. Itu yang membuat mpok Munah terlihat makin sayang pada suaminya seperti yang terlihat pada sore ini. Setelah membuat segelas kopi, mpok Munah langsung memijat-mijat punggung bang Sarmili yang rada pegel.
" Bang..! sekali-kali aye diajarin bawa motor kek " rajuk mpok Munah disela-sela pijatannya.
" Ya..elah Mun, gue pikir elu sayang.. mau mijit-mijit gue. Eh..ada maunye !"
" Ye..abang! emangnye ngga boleh?".
" Boleh-boleh aje Mun..tapi ngapain sih. Kalo elu bisa, emangnya mau ngapain ? kan ntu motor tiap hari gue pake buat ngojek "
" Kalo aye bisa naek motor sendiri kan enak bang. Coba kalo abang sakit, emang abang bisa nganterin aye belanja?"
" Busyet..elu nyumpain gue sakit Mun..?"
" Ya..kagak gitu bang, aye kan bilang seumpama.."
" Udah deh ah..! gue mau mandi. Tambah gerah aje badan gue denger ngomongan lu " ujar bang Sarmili sambil ngeloyor pergi meninggalkan mpok Munah yang pasang tampang asem.

Tapi bang Sarmili nggak tega juga melihat istrinya tiap hari cemberut sebelum keinginannya terkabul. Akhirnya pada hari minggu pagi bang Sarmili mengajak istrinya ke kampus UI untuk mengajarinya naik motor, kebetulan kegiatan kampus agak berkurang dan para pekerja banyak yang libur sehingga ia tak merasa begitu rugi bila tidak mengojek hari itu. Setelah beberapa kali bolak-balik masih dipegang oleh bang Sarmili akhirnya mpok Munah dilepas membawa motor sendiri. Kelihatannya mpok Munah cepat bisa mengendarai motor sendiri walau masih kelihatan keseimbangannya belum mantap benar alias masih goyang, sudah dua kali putaran mpok Munah mengendarai motor sendiri tanpa terjatuh. Bang Sarmili masih dengan sabar menunggu mpok Munah mengendarai motor sampai puas, tapi pada putaran yang ketiga ini mpok Munah dirasanya lama sekali tak kelihatan. Bang Sarmili kelihatan mulai gelisah, sebentar-sebentar ia bangun dari duduknya. Ia masih mencoba menunggu namun setelah sebatang rokok habis dihisapnya sedang mpok Munah belum juga kelihatan, bang Sarmilipun menjadi khawatir kalau-kalau istrinya jatuh atau menabrak sesuatu. Dia pun berjalan mengikuti jalan yang dilalui mpok Munah, hati bang Sarmili gundah antara kesal dan khawatir bercampur jadi satu. Satu persatu orang yang lalu lalang dengan sepeda motornya ia tanya perihal istrinya namun sayangnya tak ada yang tahu karena memang tak mengenal mpok Munah.

Setelah sekian lama berjalan, dari kejauhan dilihatnya beberapa orang berkerumun. Bang Sarmili segera mempercepat langkahnya, rasa khawatirnya makin menjadi-jadi dan itu menjadi kenyataan. Dilihatnya istrinya duduk sambil menangis dikelilingi beberapa orang yang coba membujuknya, begitu dilihatnya bang Sarmili datang tangisnyapun semakin menjadi-jadi.
" Maafin aye bang..maafin aye!" ujar mpok Munah sesegukkan.
" Maafin apanye.. ? motor kita mane ?" tanya bang Sarmili sambil matanya jelalatan mencari-cari motornya. Mendengar pertanyaan suaminya mpok Munah bukannya menjawab malah tangisnya makin kencang. Bang Sarmilipun makin bingung dibuatnya apalagi motornya juga tak kelihatan.
" Motornya dibawa kabur orang..bang! si mpok ketipu!"
" Dibawa kabur ? gimane ceritanye Mun ?"
" Ta..tadi ada orang pake pakean polisi bang. A..aye di stop karena motor belum ada nomer polisinye, dah gi..gitu aye kagak punya SIM " jawab mpok Munah terbata-bata.
" Lha.. emangnya elu ngga bilang kalo lagi belajar "
" Bi..bilang bang. Tapi aye ta..takut, kata polisi ntu.. aye mau dipenjara "
" Terus motornye mane ?"
" Di..dibawa orang itu, katanya kekantor polisi buat barang bukti "
Bagai disambar geledek mendengar penuturan istrinya, wajah bang Sarmili serta merta menjadi pucat dan dengkulnya mendadak lemas. Bang Sarmili tak tahu harus berbuat apa. Mau menagis rasanya malu, mau marah juga tak ada gunanya lagi.
" Ya..elah Mun..Mun! belum juga seminggu ntu motor. Apes bangat dah.., gua !" ujarnya sedih.

OBROLAN DI WARUNG KOPI ( 9 )

Ini hari bang Pendi lagi uring-uringan. Ude bela-belain beli hp seken, eh..kaga ade panggilan juga dari SBY. Boro-boro di telepon..di sms aje kagak, saking penasaran die sms ke nomernye SBY tapi balesannye " emangnye elu siape...!?"  he..he..he. Sebenernye bukan itu yang bikin bang Pendi manyun aje dari tadi, tapi die lagi pusing karena malem minggu ini die ade janji ame neng Yuli buat traktir makan, padahal die lagi kagak gablek ( punya ) duit. Di kantongnye cuman ade duit logam gopean satu biji ame cepean tiga biji, itu juge kembalian beli garem emaknye tadi pagi.

Mau jual hp di malu, abis kemaren pas nawarin ke orang malah bikin dongkol. Boro-boro di tawar, ngeliatnye aje ogah. Yang bikin tambah dongkol..orang ntu malah nyeletuk "Yah..elu nawarin hp kayak gitu, kucing juge bakalan ngibrit di sambit ( lempar ) pake hp kayak gitu..!". Bang Pendi jelas ngedumel, dalem ati die bilang " jelas aje ntu kucing lari, palelu aje gue sambit pake ini bise pitak..!".
Males-malesan die nyatronin warung kopinye mpok Mumun, disitu ude ade bang Mamat ame bang Madi.

Mpok Mumun  : Ude deh..kagak usah pasang tampang lecek, kalo mao ngutang..ngutang aje ( mukenye bang Pendi langsung merah " tau aje...! " pikirnye )

Bang Mamat   : Iye Pen..kalo mao kopi, pesen aje ..! ntar gue yang bayarin.

Bang Pendi     : Nggak ah bang..! Kalo minum kopi aye kagak bise tidur ( pora-pora kaga mao )

Bang Madi     : Bise aje lu Pen..kemaren sore abis dari sini gue liat elu ngorok di pos ronde ( bang Madi nyeletuk sembari ngeganyem singkong goreng )

Bang Pendi    : Itu kan abis ngopi bang ! kan aye bilang kalo minum kopi bukan abis minum kopi. Emangnye bang Madi bise minum kopi sembari tidur ( bang Madi garuk-garuk pale.." Iye juge ye.." )

Bang Mamat  : Ah..banyak cincong lu Pen..! Udeh mpok, bikinin die kopi ntar gampang dah..

Bang Pendi    : He..he jadi kagak enak nih bang ( sambil cengar-cengir )

Mpok Mumun : Jadi enak kaleeee..!

Bang Madi     : Eh..elu malem minggu ade acare ngga Pen ?  mending elu ikut gue kondangan. Nemenin gue..soalnye bini gue lagi sakit ! Sekali-kali ngerasain makanan enak Pen, soalnye kondangannye di gedong. Mao ngga..? ( bang Pendi diem, ngga lame die cengar-cengir )

Mpok Mumun : Di tanye kok malah cengar-cengir Pen..! ntu diajak makan-makan, kaga usah pora-pora lagi. Kaga bae nolak rejeki...! ( sambil cekikikan )

Bang Pendi    : Nggak ah..bang ! aye ude ade janji ame neng Yuli...

Mpok Mumun : Wah..mao-maonya si Yuli di ajak jalan ame elu, paling-paling di ajak nongkrong di pinggir jalan sembari ngitungin mobil yang lewat...( masih cekikikan, bang Mamat ame bang Madi cekakakan )

Abis maghrib bang Pendi ude ngejogrok di depan pos ronde nungguin neng Yuli. Die kaga berani nyamperin ke rumahnye lantaran takut ame nyak Salminah. Dandanannye keren abis...! baju batik, celane kayak orang kantoran, sepatunye juge pantopel...tapi semue minjem ame abang iparnye. Cuman yang dalem aje...yang kayak-kayaknye asli punye die..he..he. Ngga lame neng Yuli nongol.

Neng Yuli     : Sebenernye abang mao ngajak aye kondangan kemane sih bang..?

Bang Pendi   : Ya..ke temen bang Pendi dong..!!  Ude deh..neng Yuli ikut aje, yang penting kite makan enak ( kate bang Pendi sambil gandeng tangannye neng Yuli )

Nyampe di gedong resepsi..( maaf, ceritanye dipotong sutradare..! katenye kalo nyeritain perjalanan sampe ke gedong, kepanjangan..he..he ). Dengan pedenye bang Pendi narik tangan neng Yuli masuk gedong, corat-coret buku tamu terus nyemplungin amplop di gentong yang ude disediain. Lantas salaman ame pengantennye..terus nyari makanan deh..

Neng Yuli   : Temen bang Pendi ternyate kaya juge ye..! makanannye aje enak-enak.. ( sambil minggirin potongan-potongan cabe rawit di piring irisan kambing guling )

Bang Pendi  : Pendi gitu loh...!! ( sambil nyengir en ngeganyem kambing guling juge. Lagi asik-asiknye makan kambing guling, bang Madi nongol sambil nepok bang Pendi )

Bang Madi  : Lah..elu ude disini aje Pen !? Tadi sore gue ajak kaga mao. Eh..elu kenal pengantennye juge Pen..? ( bang Pendi kaget di tegor bang Madi, die keselek ampe batuk-batuk. Irisan kambing guling berase nyangkut di tenggorokan. buru-buru die minum )

Bang Pendi : Eh..bang Madi, ngagetin aje..! eh..sini deh bang ( sambil narik tangan bang Madi ngejauh dari neng Yuli. Neng Yuli ampe bingung )

Bang Madi : Apa-apaan sih Pen..? elu mao pinjem duit..? ( bang Madi juga bingung )

Bang Pendi : Ssst..jangan bilang-bilang neng Yuli ya bang, sebenernye  aye kagak kenal ame pengantennye, aye cuman mao numpang makan gratis doang..! amplop kondangan aje, cuman aye isi serebu...( bang Madi langsung ngakak ampe batuk-batuk )

Bang Madi  :  Pen..Pen..!! emang paling-paling lu... tapi kadang-kadang pinter juge lu, sayangnye kadang-kadang ( bang Pendi ame bang Pendi jadi ngakak bareng )

COKLAT CAMPUR STOBERY

Kayak bang Pendi yang suka ngutang kopi di warungnye mpok Mumun, aye juga hampir lupe posting award dari sahabat. Makasih buat Aviorclef dan mba Fanny atas awardnya yang keren dan mantap punya, coklat dicampur ame strobery...hmmm...yummy ! Awardnye mo dipajang di kamarnye bang Pendi yang rade sumpek, biar ade endah-endahnye...walau ade resiko dikerubutin semut, abis due-duenye manis..he..he

Nah..ini die awardnye...

 Award dari Aviorclef

Award dari mba Fanny

Buat mpok Fanny ( kaga pantes bangat ya..!? he..he )  Eh..mba Fanny, aye bingung nih mao di tag kesiape awardnye. Soalnye aye ngga punye temen yang postingannye ude 500. Ya..udeh, award ini aye hibahin ketemen-temen yang ude mampir ngebaca ceritanye bang Pendi. Yang berminat..langsung di comot dah !

OBROLAN DI WARUNG KOPI ( 8 )

Hari ude tengari bolong, bang Pendi keliatan lagi jalan sambil sibuk mencet-mencet huruf pade hp jadulnye. Di bandingkan dengan anak-anak abg yang ude pade gape ngetik sms..bang Pendi pastinye kalah jauh. Boro-boro bise cepet, mao ngetik sms aje hurufnye masih nyari-nyari. Saking seriusnye, die kaga liat ade batu gede ngejogrok ditengah jalan. Bang Pendipun kesandung dan dengan sukses nyusruk ketanah. Gedubrakkkk..!! gabrukkkk...!!. Pas di depan mukanye ada tai kebo,tapi die masih beruntung karena ade si Untung ame si Slamet. Jadi die bisa bilang " Untung gue kaga nibanin tai kebo, Slamet deh gue...slamet..slamet !". Tapi sialnye banyak bocah-bocah pade ngeliat die nyusruk dan ngetawain die.

Bang Pendi : Heh...! bukannye pade nolongin, malah ngetawain..sono..sono pegi..!! ( bang Pendi sewot sambil ngelempar sendal jepitnye )

Bocah-bocah : Weeee..!! kaga kena ( bocah-bocah bukannye takut tapi malah ngeledek. Salah satunye malah bawa lari sendal jepitnye bang Pendi )

Bang Pendi : Heh..heh..! mao di bawa kemana sendal gua. Balikin ga..!! ( tereak bang Pendi sambil ngejar ntu bocah ) " set dah..! ntu anak, kaga ade takut-takutnye ama gua.." ( gerutu bang Pendi )

Ngga lama bang Pendi sampe di warung kopinye mpok Mumun sambil ngos-ngosan.

Mpok Mumun : Eh..kenape ngos-ngosan gitu Pen..? kayak baru dikejar maling aje..( tanyanye keheranan )

Bang Pendi : Sembarangan aje..! yang ade aye ngejar maling, masak dikejar maling...( sewotnye ame bocah2 masih kebawa )

Mpok Mumun : Eh..kirain ! ( sambil cekikikan )

Bang Mamat : Terus elu kenape Pen..?

Bang Pendi : Itu bang...tadi lagi aye asik sms eh..kepaduk, ya udeh..aye jadi nyusruk. Eh..bocah-bocah pade ngetawain ( jawab bang Pendi setengah meringis, tapi bang Mamat, bang Somad ame mpok Mumun malah ngakak bareng )

Bang Somad : Pen..pen ! ngeliat mukalu aje orang-orang pade katawa, apelagi ngeliat elu nyusruk ( ngakak lagi )

Bang Mamat : Salah lu sndiri Pen, sms-an sembari jalan. Lagian gaya amatlu pake bawa-bawa hp segala, kerjaan cuma metik ninjo ame ngojek payung aje..

Mpok Mumun : Oh..die lagi nunggu telepon dari SBY kali bang ! kali-kali aje nanti die diangkat jadi menteri, paling ngga jadi menteri MENPERPA..

Bang Somad : Menteri apaan tuh mpok ? ( jadi penasaran )

Mpok Mumun : Menteri Perojekan Payung ( mpok Mumun cekikikan, bang Mamat ame bang Somad cekakakan )

Bang Pendi : Seneeeng..! seneeeng..! ( setengah dongkol,dalem ati bang Pendi " awas lu pade..tunggu aje ! ) Eh..aye numpang kencing mpok...

Mpok Mumun : Set dah..! elu kesini mao numpang kencing doang Pen. Elu kaga mesen kopi..?

Bang Pendi : Aye kaga usah pesen mpok, ntar juge ade yang gratisan ( sambil ngeloyor kebelakang. Bang Mamat, bang Somad ame mpok Mumun berpandangan...dalem ati masing-masing " weee..siapa yang mao ngasih gratisan ? kaga dah.." )

Ngga lame bang Mamat grasak-grusuk ngambil hp dari kantongnye, ade sms yang masuk.

Bang Mamat : Astage..!! rumah gue kebakaran Mad..( ujar bang Mamat panik, buru-buru bang Mamat lari ampe kesarug-sarug. Bang Somad ikutan lari )

Mpok Mumun : Pen..Pen ! rumah bang Mamat kebakaran Pen..( tereak mpok Mumun ikut-ikutan panik, tapi bang Pendi nongol sambil cengengesan ). Lah..elu bukannye cepet bantuin, kok..malah cengengesan..?

Bang Pendi : Kan tadi aye bilang mpok..ade yang ngasih kopi gratisan. Tuh..punyanye bang Mamat ame bang Somad masih penuh..( masih cengengesan )

Mpok Mumun : Oh...jadi elu ngerjain bang Mamat barusan, kuwalat lu Pen...!! ( rade kesel, bang Pendi cuek aje sambil nguyup kopinye bang Mamat yang masih rade anget. Tapi ngga lame bang Mamat ame bang Somad ude balik lagi, bang Pendi kaget..mulutnye yang lagi nguyup kopi jadi keselek ampe batuk-batuk )

Mpok Mumun : Nah...nah.. baru tau rase deh lu ! minum tuh kopi gratisan..

Bang Pendi buru-buru lari ketakutan, karena buru-buru bang Pendi kaga merhatiin jalanan dan kepaduk lagi...en so pasti nyusruk lagi. Tapi kali ini mukanye persis nibanin tai kebo. Bang Mamat ame bang Somad yang tadinye mau marah jadi ketawa ngakak ampe guling-guling. 

Bang Pendi  :   Kebo sialan, naro tai sembarangan aje...!! ( gerutu bin ngedumel..)

Si Kebo  :  Enak aje lu ngomong..! elu yang sialan, kenape jatohnya ditempat yang ade tainye...( si kebo sewot, untung bang Pendi kagak denger )

OBROLAN DI WARUNG KOPI ( 7 )

Gare-gare ade kalimat yang rade saru, aye jadi kaga bise tidur...ampe kebawe mimpi ditimpukin batu ame Bunda Elly dan Bu Nura..he..he. Untungnye pagi-pagi ade ide buat ganti kalimat ntu dan maaf buat sohib yang ude terlanjur baca..

Bang Pendi : Eh..bang Somad udeh ngejogrok disini aje. Kemane aje bang, kaga keliatan-keliatan ( pas nyampe di warungnya mpok Mumun dan langsung nepok punggungnye bang Somad yang lagi nguyup kopi )

Bang Somad : Set..dah ! yang bener aje lu Pen..( sambil batuk-batuk karena keselek )

Bang Pendi : Sorry brader, ai kaga sengaja..!

Bang Somad : Ai..ai, ai ucing..!! ( masih sewot )

Bang Pendi : Maaf bang, lagian sewot amat sih. Kaga dikasih bini ape semalem..!? ( lalu ngeliat mpok Mumun yang lagi sibuk goreng pisang )Eh..mpok !kopi mpok, biase...kaga pake laler, kaga pake lama. Susunya kalo bise yang asli ( sambil cengar-cengir )

Mpok Mumun : Abis puase pikiranlu masih ngeres aje Pen ! kemaren otaklu belon disapuin ape..

Bang Pendi : Emangnye lante disapuin...

Bang Somad : Iye Pen, makanye buru-buru kawin ! kalo otaklu ngeres ade yang nyapuin.( sambil mesem-mesem )

Bang Pendi : Kawin mah gampang bang..! nikahnye yang ribet..pegel !

Mpok Mumun : Pegel apenye Pen..?

Bang Pendi : Ye..si mpok kayak kaga pernah ngerasain aje, yang pegel..ni mulut mpok ! ( sambil nyomot pisang goreng )

Bang Somad : Ape hubungannye Pen.., mulut ame nikah..?

Bang Pendi : Bayangin aje bang..! pas jadi penganten,ber jem-jem aye mesti cengar-cengir pas nerima tamu. Tau sendiri kan kalo di kampung, kalo kondangan dateng segeroyokan..apelagi babe termasuk sesepuh kampung. Nah..kalo tamunye lima ratusan, ape kaga pegel tuh congor..!? ( bang Somad manggut-manggut sambil cengar-cengir )

Mpok Mumun : Ya ude Pen..kalo elu mao nikah, elu latihan dulu cengar-cengir seharian noh..dipinggir rel kereta( sambil cekikikan )

Bang Pendi : Bujug dah..! aye bise di sangke orang gile nanti, bise-bise calon mertua ngebatalin nikahin anaknye..( bertige pade ngakak bareng )

Bang Somad : Eh..ngomong-ngomong elu mau kemane Pen..?, pakean rade rapihan dikit. Bawa tas raket bulutangkis segala..! ( sambil mau pegang tasnye Pendi )

Bang Pendi : Eit..jangan pegang-pegang, ntar senar raketnya pade putus ! masih baru nih. Ntar abis kerja aye mau tanding..( sambil ngejauhin tasnye dari bang Somad )

Bang Somad : Du..ilah, sombong amat lu Pen ! tapi beneran elu kerja ? hebat lu, ude ade kemajuan sekarang.

Mpok Mumun : Iye Pen, hebat lu. Kerja dimane Pen..?

Bang Pendi : Aye kerja di perusahaan jasa mpok..!, kantornye di deket Mall Depok ( sambil nyaplok ubi gorengnye )

Mpok Mumun : Perusahaan jasa ? kerjalu apaan Pen..( rade-rade penasaran )

Bang Pendi : Bagian antar jemput mpok, tapi lumayan dah.. daripade anggur ( mpok Mumun cuma manggut-manggut aje tanda setuju. Nggak lama setelah ngabisin kopi ame ubi gorengnya bang Pendi bangun dari duduknya lalu tengadahin tangannye, ngecek gerimis yang makin gede ). Ya..udah nih mpok..! aye tinggal dulu bang..( bayar kopinye lalu pamit ame bang Somad )

Mpok Mumun : Ck..ck..ck hebat juga si Pendi ya bang. Jadi orang kantoran sekarang...

Bang Somad : Iye mpok.., paling ngga die kaga ngutang lagi sama mpok..! ( bang Somad ngakak, mpok Mumun mesem-mesem aje. Ngga lama dateng si Ican anaknye bang Tohir )

Si Ican : Cang Somad..ngeliat bang Pendi ngga..?

Bang Somad : Barusan sih ade disini tapi sekarang ude pegi, emang kenapa tong..? ( sambil ngeganyem singkong rebus )

Si Ican : Ngga kenape-kenape sih cang, cuma tanya aje. Soalnye payung aye...dititipin di tasnye bang Pendi.

Bang Somad : Lagian payung elu titipin ke bang Pendi, kan bang Pendi mao kerja...!

Si Ican : Kan kerjanye juga bareng aye cang..ngojekin payung di depan mall. Ya ude ya cang..aye mao nyusul bang Pendi ( si Ican langsung ngeloyor pergi, mpok Mumun melongo denger ngomongannye si Ican..bang Somad kagak bise nahan tawa, singkong yang lagi die kunyah nyembur keluar. Bang Somad ame mpok Mumun ngakak bareng )

Bang Somad : Pen...Pen ! ngojek payung aje gayanye sebakul. Pantesan ntu tas kagak boleh gue pegang, ngga taunye isinye payung..MP3 juga..!

Mpok Mumun : MP3..? apaan tuh bang..

Bang Somad : Memang Pendi Paling-Paling...! ( bang Somad ame mpok Mumun ngakak lagi )

HARI RAYA TELAH USAI

Bulan Ramadhan dan hari raya Idul Fitri telah meninggalkan kite, bagi umat muslim sesungguhnye... pasti ngerase sedih karena bulan yang penuh rahmat dan pengampunan telah pergi dan baru akan kembali sebelas bulan lagi. Kate Ustad Sobri ( pinjem istilahnye bang Akri dari " OKB " he..he ). Bagaikan kupu-kupu, kini umat muslim telah ngalamin tiga tahapan...

Pertame : Sebelum bulan Ramadhan, umat bagaikan ulat bulu yang terlihat menjijikkan dan menakutkan. Karena dalam kehidupan sehari-hari selalu diselimuti dosa dari perbuatan-perbuatan yang di benci Allah.

Kedue : Pade bulan Ramadhan, umat bagaikan ulat yang ber metamorfosis menjadi kepompong. Dimasa ini ( bulan Ramadhan ) umat muslim berusaha menempa dan membentuk dirinya untuk menjadi manusia yang lebih baik karena di bulan Ramadhan umat dapat meningkatkan moral, meningkatkan solidaritas kemanusiaan, meningkatkan rasa persaudaraan, meningkatkan kematangan spiritual serta mencapai keridhoan Allah.

Ketige : Bagai kepompong yang telah berubah jadi kupu-kupu, berwarna-warni nan indah dan sedap dipandang mata. Selain indah..kupu-kupu juga melakukan perbuatan yang menguntungkan makhluk lain dengan menyebarkan serbuk sari ke segala penjuru sehingga dimana-mana bermekaran bunga-bunga yang menyejukkan hati. Begitu juga manusia...setelah melewati bulan Ramadhan dan Idul Fitri kini menjadi manusia baru. Diharapkan setelah itu..semangat, kebiasaan serta akhlak yang telah ditempa di bulan Ramadhan dapat membentuk karakter dan mental untuk tetap konsisten juga Istiqomah dalam menjalani kehidupan sehari-hari di sebelas bulan berikutnya..

Itu kate Ustad Sobri...!

Nah..sehubungan telah lewatnya bulan Ramadhan, episode " Nunggu Beduk " yang cuma sempet 6 episode sementara juga berakhir dan kalo masih bise nulis akan di ganti kembali dengan " Obrolan Di Warung Kopi ". Sebagai ucapan terimakasih untuk sohib yang setia ngebaca cerite ini, pade kesempatan ini aye nulis episode terakhir nunggu beduk...sampai ketemu tahun depan.

" LEBARANNYE BANG PENDI "

Babe Jupri : Cepetan Pen..! dari tadi kerjaanlu makan mulu, di rumah engkong aji juga banyak makanan, ayo..nanti keburu tengari.. ( tereak babe Jupri karena kesel nungguin bang Pendi dari tadi..)

Bang Pendi : Iye..iye ! bentaran napa...kagak sabaran amat, lagian lebaran juga belon nyampe sini..( bang Pendi ngedumel sambil nyaplok potongan ketupat, lalu buru-buru nyamperin enyak dan babenye sambil benerin peci yang rade miring )

Nyak Asiah : Ini Pen..bawa ! ( sambil nyodorin dua rendeng rantang )

Bang Pendi : Set dah..! masak aye di suruh bawa-bawa rantang nyak..kayak bocah aje, lagian masih kayak orang dulu aje..lebaran bawa-bawa rantang ! sekali-sekali ngasih parcel napa...

Babe Jupri : Palelu kucel..! disuruh orang tua ngebantah aje lu.., lagian kalo babe mao ngasih parcel kulkas elu mao manggul..sono lu panggul ! ( babe Jupri sewot, ati bang Pendi mengkered..tapi dalem ati die ngedumel.." Sombong amat..! pake mao ngasih parcel kulkas, itu aje belon lunas. Lagian kalo aye panggul tuh kulkas, ape enyak kaga nangis bombay kulkasnye dibawe " )

Mao kaga mao bang Pendi bawain juga 2 rendeng rantang ntu, mane berat lagi. Satu rendeng isinye lima rantang, dua rantang isinye nasi ame ketupat, satu rantang isi daging semur, satu rantang isi daging pindang dan satu lagi isinye uli ame dodol. Mane sebentar-sebentar salaman kalo ketemu orang di jalanan, mao nggak mao ntu rantang mesti turun naik karena tangan kiri dan kanan bang Pendi nenteng rantang.

Bang Pendi : Kayak lebaran aje nih..! salaman mulu...( lame-lame kesel karena tangannye mulai pegel, babe Jupri melotot tapi bang Pendi pura-pura kaga liat. Pas lewat deket rumah neng Yuli, dari jauh bang Pendi liat neng Yuli lagi salaman ame tamu yang mao pulang. Pas ngeliat bang Pendi..neng Yuli cengar-cengir, ngga jelas nyengir karena seneng ngeliat bang Pendi ape nyengir ngetawain bang Pendi yang lagi nenteng-nenteng rantang ).

Babe Jupri : Ayo Pen..! lelet amat..cape lu bawa rantang ?

Bang Pendi : Kaga..! ( dalem ati sih ngedumel " pake nanya lagi..!" ), eh..be ! aye mao mampir dulu sebentar..lebaran ame temen.

Babe Jupri : Entar aje mampir-mampirnye..yang penting kerumah engkonglu dulu.

Bang Pendi : Bentaran doang be...! ( babe Jupri ngebolehin pas ngeliat muke bang Pendi rade melas, ati bang Pendi jingkrak-jingkrak seneng...buru-buru die ke rumah neng Yuli, di teras ada keponakan Yuli yang lagi pade maen ). Assallammualaikum..Minal Aidhin Walfaidzin, maaf lahir bathin ya neng...! enyak mane neng..?

Neng Yuli : Eh..bang Pendi. Iye bang..same-same, maaf lahir bathin juge ye..! Enyak ade di dapur...bentar aye panggilin..( ngga lame nyak Salmineh nongol sambil mesam-mesem )

Bang Pendi : Maaf lahir bathin nyak..! maapin aye kalo kemaren banyak sale-sale kate..( sambil nyium tangannye nyak Salmineh )

Nyak Salmineh : Same-same...eh ni rantang due-duenye buat enyak ? ( ngeliat bang Pendi nenteng 2 rendeng rantang, bang Pendi gugup...kalo die bilang bukan, die malu ame neng Yuli )

Bang Pendi : Eh..I..iye nyak !, yang atu dari enyak..yang atu dari aye..

Nyak Salmineh : Wah banyak amat...! iye deh..enyak bawa dulu ke dapur, elu duduk dulu dah...! temenin si Pendi Yul..( bukan maen senengnye bang Pendi di bolehin deketan ame Yuli )

Bang Pendi : Ehmm...neng Yuli tambah cakep aje..! tapi rambutnye kenape di kuncir ? cakepan juge di lepas..

Neng Yuli : Ah..abang bise aje ! iye nih bang..rambut aye pade rontok, mangkanye aye iket..

Bang Pendi : Rontok..? ya sudah..ndak usah di cato'-cato', nanti kepalamu gundol..! ( ngikutin iklan shampo..neng Yuli cengar-cengir, keponakan neng Yuli pade ngakak. Lagi asik-asiknye ngobrol nyak Salmineh nongol dari dapur )

Nyak Salminah : Ini..Pen ! bilang makasih ame enyaklu...ini rantangnye cuma gue isi geplak doang...

Bang Pendi : Iye nyak..ngga ape-ape ! ( dalem ati die ngedumel.." cepet amat sih..dapurnye di Bogor kek..!" ). Tapi bang Pendi cukup seneng karena ude bise janjian ame neng Yuli untuk jalan-jalan di lebaran kedue, jalan kerumah engkongnye sambil siul-siul...tapi pas nyampe dirumah engkongnye die kaget ngeliat enyaknye berdiri sambil kacak pinggang..( dalem ati bang Pendi.." wah..mampus gue..! )

Nyak Asiah : Elu kemane aje sih Pen..!? dasar anak kaga semenggah...sini rantangnye..( Masih kacak pinggang dan keliatan bangat marahnye..)

Bang Pendi : Anu nyak..orang dari kereta pade turun semue, ngajak salaman ama aye...nih tangan masih pade pegel ( sodare-sodare bang Pendi pade nyengir...)

Nyak Asiah : Ah..ngomonganlu sebakul Pen..., sini..rantangnye ! lho..rantangnye kok pade kosong Pen..isinye elu kemanain..? ( nyak Asiah bingung..)

Bang Pendi : Anu nyak...! anu..( bang Pendi nggak tau mao ngomong ape.., die langsung ngibrit pas ngeliat enyaknye megang gagang sapu ) Ampun..nyak..! ampun... ( sodare ame keponakan-keponakannye pade ngakak..)


Bang Pendi serta crew dan artis pendukung dari episode Nunggu Beduk he..he..he , mao mengucapkan selamat hari raya Idul Fitri..Minal Aidhin Walfaidzin..mohon maaf lahir dan bathin.

NUNGGU BEDUK ( 6 )

Bang Pendi : Neng Yuuuli.., abang boleh nganterin pulang ga..? ( pas ketemu di luar langgar abis sholat taraweh, neng Yuli cuman angguk aje sambil mesem-mesem malu )

Bang Somad : Eh..Pen ! berani-beraninya lu..ntar enyak Salmineh nyap-nyap baru tau dah..

Bang Pendi : Biarin aje bang..orang anaknye mao ko..! iye kan neng..? ( neng Yuli masih senyam-senyum aje lalu keduanye jalan pulang bareng. Sambil jalan mereka ngobrol, sebenernye bukan ngobrol..abis yang nanya cuma bang Pendi, neng Yuli cuma angguk..geleng ame mesem-mesem )

Bang Pendi : Ah..si eneng dari tadi cuman ngangguk-ngangguk aje kayak burung celepuk..eh maaaaf..! ngomong-ngomong malam minggu ade acara ga neng, kite jalan nyok..!

Neng Yuli : Iiih..abang, mao jalan kemana sih..? ini kan bulan puase. Lagian..malemnye pan taraweh..( akhirnya ngomong juga karena ngga mao di bilang kayak burung celepuk )

Bang Pendi : Ye..jalan kemane kek..! yang penting bise ngobrol, lagian taraweh pan sunnah..kalo dikerjain dapet pahale kalo kagak dikerjain pan kaga ape-ape..

Neng Yuli : Ah..enggak ah..! nanti enyak ngomel. Mendingan kalo mao ngobrol..lewat face book aje bang..

Bang Pendi : Pace buk itu apaan sih..? ( bang Pendi bingung, kedengeran die kayak nama buah..)

Neng Yuli : Face Book baaang..! f-a-c-e b-o-o-k ( sambil ngeja ), gimane ye jelasinnye..itu loh bang kayak ngobrol lewat sms-an gitu deh..

Bang Pendi : Yah..boro-boro gituan neng ! ngadepin komputer mpok aye aje..abang bingung. Abis ditempat ketikannye ade dua shift..nah abang kaga tau, yang shift siang yang kiri ape yang kanan. Maklum dah..abang pan gaplek..! ( sambil cengar-cengir )

Neng Yuli : Iiih..gaptek kaleee..! abang gimane sih.., kalo lewat face book pan kite bise ngobrol sepuasnye, walo kaga ketemu muke..

Bang Pendi : Yah..kaga seru neng..! kaga ade ser..sernye..

Bang Madi : Eh.. besukaan aje kerjalu Pen ! kaga nyadar ape..ini bulan puase ( pas ketemu di tengah jalan )

Bang Pendi : Ye..abang sirik aje.., puase kan di siang hari kalo malem pan kaga..lagian kalo nanti aye bikin bulan pacaran..ape orang puase kaga boleh..?

Bang Madi : Ah..bise aje lu ! dibelakang ade nyak Salmine noh..( bang Pendi celingak celinguk )

Neng Yuli : Ya..ude ya bang disini aje, ude nyampe nih..( gantian bang Pendi yang cuman angguk aje )

Bang Pendi rade puyeng, die ngerase kayaknye didepan neng Yuli die mati gaye karna kaga ngarti face book. Die kaga jadi pulang dan balik lagi mao nyari anak mude yang bise ngajarin die, di pos ronda die ngeliat si Pian ame si Mamo lagi nongkrong.

Bang Pendi : Eh..tong ! elu pade ngarti fes buk ga..bikinnye gimane sih..?

Si Pian : Cieee..mau fesbuk-an ame siape bang..?

Bang Pendi : Ye..orang nanya malah balik nanya.., elu ngarti kaga..?

Si Mamo : Segitunye..! abang bikin status aje dulu..

Bang Pendi : Status..? status apaan..? tersangka ape baru saksi..( si Pian ame Mamo ngakak )

Si Pian : Emangnye kasus kriminal..pake status tersangka, status itu..ape ya Mo..gampangnye sih..status itu data-data pribadi bang Pendi buat jadi anggota. Eh..tapi abang ude punya alamat email belon..? abang kudu punya dulu tuh..

Bang Pendi : Wah..ribet amat ya..! kayak mao bikin ktp aje. Tapi kenapa harus punye alamat Imel.., emangnye Imel itu anak mane..?

Si Mamo : Walllah..! pusing dah ngomong sama bang Pendi, mendingan kite masang petasan aje Pi..!

Si Pian : Nyok..!! ( bocah-bocah itu pade ninggalin yang bengong en binun )

Bang Pendi : Eh..elu pade mao kemane..? yah..kaga bise pedekate deh gue..( bang pendi manyun sambil garuk-garuk kepale )

AWARD DARI NURANURANIKU

Sebenernye kaga enak juga nih sama Bu NURA ( NURANURANIKU )karena telat banget pajang award yang beliau berikan di sini, malu juga sama mba Fanny karena sang master cerpen ini nulis posting " JANGAN SUKA NUNGGAK..!" yang isinya nyindir aye yang suka nunggak..he..he,Yasuds..aye buru-buru deh pajang nih award..keren-keren khan..!







Pengen bagi-bagi ame yang laen kayaknye ude pade dapet, kagak enak kalo ngasih award tapi ternyata ude dapet..sekali lagi terima kasih buat Umi NURA ( eh..ngga ape-ape ya bu aye panggil Umi )atas pemberian awardnya, moga-moga bise bikin aye tambah semangat buat nulis..

NUNGGU BEDUG ( 5 )

Bang Madi : Darimane lu Pen..? tumben pagi-pagi ude kelayapan..biasenye masih ngorok.

Bang Pendi : Eh..baru pulang nginep bang, aye nginep di rumah mpok Salmah semalem..

Bang Madi : Oh..pantesan..! pas teraweh semalem kayaknya rade tertib, kaga ade yang tereak-tereak..( sambil cengengesan..)

Bang Pendi : Set..dah ! emangnye aye bocah, aye mah kaga gitu-gitu amat bang..si Amat aja kaga gitu-gitu..! Lha abang sendiri mao kemane..? keliatannye rade necis nih..

Bang Madi : Gue mau ke Manggarai..Pen, biase..ade obyekan dikit. Lumayan dah..nambah-nambahin buat beli baju lebaran bini gue..

Bang Pendi : Ke Manggarai..? mao naek ape bang, angkot ape kereta..? ( muka rade serius )

Bang Madi : Niatnye sih naek kereta Pen..emang ngapa..?

Bang Pendi : Wah..kalo kaga salah liat sih.., kereta yang dari Bogor belon nyampe Manggarai ude pade balik lagi..bang !

Bang Madi : Lha..! bener tuh Pen..emang ade apaan..?

Bang Pendi : Ye..mane aye tau..! kalo kaga percaya, coba abang liatin kereta yang dari Bogor ke Jakarta. Kalo ude lewat..tungguin bentaran, pasti balik lagi dah ke arah Bogor..( masih dengan tampang serius )

Bang Madi : Wah..gawat dong..! mane gue bawa ongkos pas-pasan lagi, kalo naek angkot mesti berapakali naek...nih ! Ya ude deh Pen..gue liat dulu ! ( bang Pendi ude keliatan kalo sebenernye die nahan-nahan tawa )

Bang Madi jalan sambil nunduk, keliatannye seperti orang kebingungan. Die ragu-ragu jadi ke Manggarai ape enggak. Pikir bang Madi kalo naek kereta die bisa numpang atawa kagak beli karcis, kalo di tangkep paling-paling suruh bersihin wc.

Bang Mamat : Elu mao kemana Di..? tampanglu kusut amat.. ( pas ketemu di tengah jalan )

Bang Madi : Eh..bang Mamat ! aye mao ke Manggarai bang.., niatnye sih mao naek kereta. Tapi si Pendi bilang keretanye pade balik lagi..

Bang Mamat : Balik lagi gimane..? ( bang Mamat bingung )

Bang Madi : Kate si Pendi..kereta yang dari Bogor, belon nyampe Manggarai ude pade balik lagi bang...( bang Mamat langsung ngakak..) Lha..ko abang malah ketawa ?

Bang Mamat : Gimane gue kagak ketawa, elunya juga yang oon..! Pan elu tau kalo jalan kereta ude lama dibikin 2 atawa rel ganda, yang satu buat yang dari Bogor ke Jakarta dan yang satunya lagi buat yang dari Jakarta ke Bogor. Gimane balik lagi..orang punya rel masing-masing...( Bang Madi melongo..., die baru nyadar kalo di kibulin bang Pendi..)

Bang Madi : Kurang ajar si Pendi, kena gue dikibulin. Awas kalo ketemu...! gue bejek-bejek lu Pen...! ( sambil nahan marah, mukenye juga jadi merah nahan malu apalagi bang Mamat masih ngakak. Bang Pendi yang ngintip bang Madi dari pos ronda tawa ngakak sambil guling-guling )

AWARD DARI BUNDA ELLY

" The Hottest Male Blogger " ck..ck..ck..sebuah predikat yang bukan maen-maen bagi aye, soalnye aye newbi..jadi makasih banget buat bunda Elly atas pemberian awardnye. Gambar awardnye sih bunga liar ( menurut bunda ) tapi mudah-mudahan lelaki yang dapet award ini bukan termasuk kategori tipe lelaki liar..he..he



Mumpung dalam suasana bulan ramadhan saya juga mau menyapa sahabat yang telah sudi mampir di blog ini sekaligus bawa oleh-oleh awrd pemberian bunda..
Dan ini sahabat yang belum kebagian award dari bunda : Mas Abd Basid, Mas Yudi WS, Mas Harto, an4k singkong, kediaman ayah dan jojoba male..
Nah bagi yang berkenan, langsung dicomot aja dah...!

NUNGGU BEDUG ( 4 )

Bang Somad : Kagak terasa ya bang..kite puase ude 12 hari. Rasa-rasanye baru kemaren.. ( pas lagi jalan bareng ame bang Madi menuju Langgar untuk taraweh )

Bang Madi : Iye Mad.., kalo kite ngejalaninnye karena rasa keimanan kite apelagi kalo bulan puase itu kite manfaatin buat ngeraih sebanyak-banyaknye pahale puase. Rasa-rasanye malah sedih..kesempatan itu mulai berkurang..

Bang Somad : Iye...ye

Bang Pendi : Assalammualaikum..

Bang Madi & bang Somad : Wa alaikum salam..( saling ucapkan salam pas ketemu di jalanan lalu pade salam-salaman )

Bang Madi : Nah gitu dong Pen..! gue demen dah..ngeliat anak mude rajin taraweh kayak elu..( bang Pendi cengar-cengir aje )

Bang Somad : Iye Pen..! tapi elu bukan karena ade maunye kan..? ( sambil ngelirik sendal yang dipake ame bang Pendi )

Bang Pendi : Ya..elah bang Somad ! mentang-mentang sendalnye pernah ketuker, curigaan aje bawaannye..

Bang Somad : Ya maaf Pen..cuma becande ! ( pas di pertigaan jalan ketemu nyak Salminah ame neng Yuli, anaknye yang demplon )

Bang Pendi : Itu anaknye nyak..? ( tanya bang Pendi basa-basi sambil cengengesan )

Enyak Salmineh : Bukan ..! ini nenek gue...( jawabnye judes sambil pasang muke galak. Bang Pendi yang tadi cengengesan langsung diem..klekep, bang Somad ame bang Madi cekakakan sedang neng Yuli cuman senyum-senyum aje )

Bang Pendi : Eh..astaga ! nyak Salmineh abis keselek kolang-kaling ape ye..? galak amat, lagian neng Yuli mau taraweh aje pake bawa-bawa herder segale..( rade sewot )

Bang Madi : Lagian elu Pen.., ame orang tue yang beneran ape..! ucapin salam dulu ke..ape cium tangannye dulu ke..( sambil nahan-nahan tawa )

Bang Pendi : Yah..enyak Salmineh belon pernah denger pantun aye sih...coba dah kalo denger, jangankan cewe-cewe ABG..orang tue kayak die aye yakin klepek-klepek kaya ikan di cengkaling..

Bang Somad : Hu..lagaklu Pen..! cewe sekarang mane mempan elu rayu pake pantun.. ( bang Somad & bang Madi cekakakan lagi )

Habis taraweh bang Pendi masih keliatan nongkrong di depan langgar sambil matanye celingak-linguk.

Bang Somad : Lha..elu nungguin ape Pen.., lagi ngincer sendal yang bagusan ye..?

Bang Pendi : Ah bang Somad.., mau tau aje urusan anak mude..!

Bang Madi : Kalo urusanlu mao nuker sendal, ya emang urusannye die Pen..! lha..die pan hansip..( bang Madi cekikikan , tiba-tiba neng Yuli lewat sendirian sambil senyum-senyum malu..)

Bang Pendi : Eh..sebentar neng..! Pergi ke Belanda beli bawang ame seledri, Ke Tanah Abang jual ayam cemani. Bila adinda Yuli pulang sendiri, Bolehkah abang ikut menemani..

Bang Somad : Beli bawang..jauh-jauh amat Pen ! di Pasar Minggu juga banyak..( bang Somad & bang Madi cekakakan, bang Mamat yang baru nimbrung juga kagak kuat nahan tawa. Neng Yuli nutup mulutnye, kayaknye juga nahan tawa tapi die langsung brenti..ngeliat bang Pendi trus ngangguk-ngangguk )

Bang Pendi : Hehe..hehe..!! hehe..hehe..!! ( bang Pendi ngebacot kayak woody woodpecker sambil jingkrak-jingkrak )

Bang Somad : Hah..! bise aje tuh anak..( yang laen juga pade bengong..)

DAPET AWARD LAGI...!

Ngga nyangka, aye dapet award lagi. Jadi malu neh..karena ude beberapa sohib yang ngasih award tapi belum bise kirim award balik. Makasih mba Reni..awardnye dah aye pajang neh..he..he muaaaantep !