KUTEMUKAN JODOH DI PINGGIR KALI 2

Gara-gara merasa ditolongin ame Bang Pendi singkat cerita akhirnya ntu cewe jadi pacar barunya Bang Pendi ( apes amat ntu cewe ya...hehe ). Padahal kalo ntu cewe tau yang bikin kepalanye benjut gara-gara ketiban batu sekepel karena Bang Pendi...ude pasti Bang Pendi dibejek-bejek jadi perkedel.

Nah..ni hari Bang Pendi jalan bareng ame ntu cewe, niatnye sih mao makan bakso tapi sepanjang jalan orang-orang pade melongo kayak baru ngeliat gawangnye Markus kebobolan 3 gol tanpa balas. Ade yang cekikikan, bisik-bisik tapi ade kakek-kakek yang justru sibuk nyari sesuatu dirumput ( soalnya tadi ngeliat Bang Pendi ampe mangap-mangap, nah...gigi palsunye lepas dan jatoh kerumput...hehe ). Bang Pendi sebenernye agak heran tapi die pede aje. Ditengah jalan die papasan ame Si Jabrik yang juga melongo ngeliat die...

" Elu ame ntu orang-orang pade kenape sih Brik..? Emang tampang gue ude kayak Tom Cruise ya...? " Tanya Bang Pendi heran.

" Tom Cruise palelu bau menyan..!! Sini lu bentaran..." Kate Si Jabrik sambil narik tangannye Bang Pendi ngejauh dari cewenye. " Elu kagak salah Pen...nah elu kerempeng kayak gini, lah dienye subur makmur gemah ripah loh jinawi kayak gitu. Bise kebanting lu...! Ato elu mau ngirit ga beli kasur kalo ude merit...?" Kate Si Jabrik sambil cengar-cengir onta.

" Lah emangnye kenape Brik..? Dia pan cewe...wajar dong kalo gue pacaran ame die. Daripade kite beduaan mulu....banyak yang gosipin, mending gue ame die. Ayo deh gue kenalin...! Eh...Neng...kenalin nih temen aye, namanye Jabrik Enak Digamparin Bolak-Balik " Kate Bang Pendi sambil cengengesan.

" Ooo..ini temennye Bang Pendi ye, nama pendek aye Monaroh " Balas ntu cewe

" Kalo nama panjangnye..?" Tanya Si Jabrik penasaran

" Monaroh Dimana Aja Boleh Terserah Elu..!" Sela Bang Pendi. Monaroh nyubit tangan Bang Pendi, Si Jabrik ngakak.

" Nah..Monaroh ini sekarang cewe gue Brik. Kalo elu masih ngejomblo...tenang aje ! Kambing punye babenye perempuan semua, gampang deh...nanti gue comblangin !" Bang Pendi ngakak.

" Ah...brengsek lu Pen, sekate-kate kalo ngomong..." Si Jabrik ngedumel.

Bang Pendi cuma cekakakan, sambil ngegandeng tangannye Monaroh Bang Pendi ninggalin Si Jabrik. Bang Pendi kayaknye emang keliatan bahagia banget, pikir die..." masa bodohlah orang mao bilang ape tentang Monaroh !" Bagi Bang Pendi yang penting hatinye bukan cuma fisiknye, daripede cakep bikin makan ati...iye gak !? hehe. Lagipula Monaroh ntu baik kok, bicaranye lembut, penuh perhatian..pokoknye bikin adem ati deh. Dan yang terpenting...Monaroh ntu anak orang kaya, soalnye bapak Monaroh ntu juragan undur-undur. Jadi walo si Monaroh kalo jajan makannye banyak, Bang Pendi kagak khawatir...wong setiap jajan yang bayarin Si Monaroh. Enak pan...!? hehehe

KUTEMUKAN JODOH DI PINGGIR KALI

Cerita kali ini disetting seperti era 70-an, soalnye kalo jaman sekarang...mane ade kali di Jakarta yang aer nye bersih dan bening. Ude jarang-jarang ngeliat orang mancing  di kali dapet ikan yang gede, kalo ade..paling ikang ikan sapu-sapu yang orang ngeliat mukanye aje ude geli. Nah...apelagi ngeliat perawan-perawan pade nyuci atawe mandi di kali....Beeeuuuhhhh...kagak bakalan dah ! paling-paling ngeliat orang nongkrong karena kebelet...hehe.

Pada zaman dahulu kala ( kayak cerita anak-anak ye...!? hehe ), Bang Pendi pergi mancing di kali Ciliwung.  Die emang mao cari ikan tapi tujuan sebenernye..ya..itu tadi, ngintip perawan-perawan pade mandi ( padahal Bang Pendi pernah bintitan segede telor gajah lho...tapi kagak ade kapok-kapoknye die ngintip...hehe ). Bang Pendi sebenernye ude lama pengen kayak Jaka Tarub yang bise ngawinin bidadari karena ngumpetin selendangnye. Nah...Bang Pendi juga pengen tuh ngumpetin baju-bajunye ntu perawan yang lagi mandi, tapi boro-boro kesampean....Abis Bang Pendi masih jauh aje...baunye ude kedengeran, jadi belon sempet ngapa-ngapain die ude ditereakin..." Awas lu Pen..deket-deket sini !! Gue timpuk batu rame-rame baru nyaho Lu...!" ( Bang Pendi jelas aje keder...walo yang ngancem die ntu perawan-perawan tapi kalo ditimpukin ame batu tetep aje kepala benjut juga. Coba kalo ngancemnye ganti..." Awas lu Pen...deket-deket sini ! Gue perkosa rame-rame baru tau lu.." wah..kalo gitu mah...Bang Pendi nekat-nekatin deh ! hehehe ).

Hari ini Bang Pendi boleh dibilang agak beruntung. Lagi asik tarik-tarikan ame udang...die ngeliat ade cewe megap-megap di tengah kali. Bang Pendi langsung blingsatan pengen nolongin tapi die ragu-ragu, soalnye die kagak bise berenang...gaya berenang yang die tau cuman gaya batu alias sekali nyebur kagak nongol-nongol lagi...hehe. Untungnye die bawa tali tambang...( kalo yang ini emang disuruh bawa tali ame sutradara...hehe ), akhirnye ujung tali die iket ke batu segede kepelan tangan. Lemparan pertama kagak nyampe dan lemparan kedua.....Plettaaakk..!! ( Ntu batu sukses mendarat di mbun-mbunan kepala ntu cewe...Oon ye !? hehe ), jelas aje ntu cewe langsung semaput lalu tenggelem, ngeliat gitu Bang Pendi panik...mao gak mao die nyebur buat nolongin. Bermodal tali yang sempet die iket ke pohon toge...eh..pohon kelapa, die coba narik ntu cewe ke pinggir kali.

Akhirnye dengan semangat 46, die berhasil juga. Nah...ntu awal cerita Bang pendi punya demenan. Kalo inget...nanti ceritanye bersambung deh...hehe

KAMPRET NGEJOMBLO

Ni hari Bang Pendi lagi seneng. Tadi pagi abis bantuin enyaknye nyuci baju, die dapet upah dua puluh rebu...tumben-tumbenan Bang Pendi rajin ye !? hehe. Nyak Salmineh yang jarang-jarang ngeliat anaknye rajin, jadi terharu. Die nyangka Bang Pendi ntu bantuin nyuci karena mao nunjukkin rasa sayang ame enyaknye, kebetulan pan ni hari adalah hari Ibu. Padahal mah....Beeeuuuhh... Boro-boro...!! Sebenernye Bang Pendi  cuma mao nyuci bajunye sendiri yang kotor gara-gara semalem mao ngintip penganten baru tapi malah kecebur got...hehe. Daripade enyaknye nyap-nyap dan urusannye jadi panjang mending die nyuci sendiri dah....hehe.

Nah...siang ni Bang Pendi mao ngupi di warungnye Mpok Mumun, saking senengnye die jalan sambil nyanyi-nyanyi lagu Qasidahan yang sering dinyanyiin enyaknye...

" Kunang-kunang terbang melayaaaang....sedang terbang ketimpa duri..." ( Ntu kunang-kunang apes banget ya...? hehehe ). Sampe di pos ronda, Bang Pendi ngeliat Si Jabrik lagi bengong sendirian...

" Eh...elo kenape Brik ? Bengang-bengong gitu...kayak kampret nunggu musim rambutan..!! "

" Ah...sialanlu Pen ! Enak aje nyamain gue kayak kampret..."

" Eh..gue kagak asal ngomong Brik, elu sama kampret nggak jauh beda...cuma beda-beda tipis ! Monyongnye sama...jabriknye juga sama !" Kate Bang Pendi sambil cekikikan.

" Yang ngada-ngada lu Pen, jangan menghina....lagian mane ade sih kampret yang rambutnye jabrik !"

" Ada Brik..! Elu ga tau aje....Kampret pan rambutnye pendek, coba aje elu suruh keramas..ape nggak ngacir atawe jabrik tuh rambutnye. Die pan kagak bise rebonding di salon... " Bang Pendi ngakak.

" Hah...!! ude-ude...tambah ngaco ajelu.."

" Ya....maaaaaaaf ! Tapi ngomong-ngomong kenape sih..elu bengong aje..."

" Yah...nasib Pen, ude mo deket-deket malem taon baru...eh cewe gue malah ngajakin putus. Kayaknye kagak enak banget malem taon baru ngejomblo " Si Jabrik sedih...

" Jelas kagak enak Brik..elu pan masih muda, belon pantes masuk panti jomblo.."

" Itu panti jompo...oon..!! Ini jomblo...bukan jompo.." Si Jabrik kesel

" Eh...ude ganti ye ? ( Bang Pendi cekikikan ) Ya ude Brik...kite senasib, tapi kagak usah dipikirin....nanti gampang nyari cewe lagi..."

" Nyari sih gampang Pen...di pasar atawe di Mall banyak. Cuma yang mao ame gue pan belon tentu ade...ye gak !?"

" Ya ude deh...kite kagak usah mikirin pacaran dulu, kebo aje kagak pake pacaran bisa punya anak. Mending kite ngupi deh....lagian pan, pak ustaz pernah bilang " Tuhan menciptakan manusia untuk hidup berpasang-pasangan " Jadi tenang aje, jodoh kagak bakalan kemane....sekarang kayaknye bukan giliran kite...mungkin nanti ( Kalo ude 70 taon...hehe )"

" Lah..kalo dapet pasangannye kebo, gimane Pen ?"

" Yaaa...itu ude nasib..!! " Si Jabrik ame Bang Pendi ketawa ngakak. Trus bedua pergi ke warungnye Mpok Mumun sambil bergandeng tangan...( Eh..nggak...nggak..itu fitnah ! hehe )

OBROLAN DI WARUNG KOPI ( 23 )

DEMAM IRFAN BACHDIM

Perjuangan Bang Pendi buat ngedapetin jodoh kayaknye semakin berat aje. Abisnye semua cewe lagi pade demam Irfan Bachdim, mereka mending milih ngomongin Si Irfan daripade diajak ngutang makan bakso ame Bang Pendi..hehe. Bayangin aje...lagi nyuci, lagi masak ampe lagi belanje, yang diomongin cuma die...parahnye lagi ibu-ibu sampe nenek-nenek juga ikut-ikutan. Kayak tadi pagi...ibu-ibu yang lagi ngerubungin gerobak sayurannye Mas Warno cekakak cekikik ngomongin Si Irfan, ude gitu dateng nenek Ipeh yang langsung nyeletuk " Kalo sama ne..nek...kira...ki..ra...si Irfan ma..sih mao ga ya ?"  Mesam-mesem sambil beneran kunciran rambut. Jelas aje ibu-ibu tambah cekakakan dengernye, Bang Pendi yang kebetulan lewat juga jadi geli sendiri dan langsung nyeletuk " Kalo sama nenek kayaknye Si Irfan kagak bakalan mao nek...! Soalnye die kagak mao pacaran ame cewe di bawah umur...!!" sambil nahan-nahan tawa.

" Lho..kok di bawah umur Pen..?" Tanye Mpok Nenih karna gak ngarti.

" Liat aje giginye Mpok...! pan belon pade tumbuh..." Jawab Bang Pendi sambil cengar-cengir.

" Heh...elu ngeledek gue ya Pen...!!?" Tereak Nek Ipeh sambil nyomot tomat buat ngelempar, Bang Pendi langsung ngacir sambil cekakakan. Sampe di warungnye Mpok Mumun die masih cengar-cengir...

Bang Somad  :  Eh...elu kenape Pen...? Cengar-cengir sendiri kayak orang stres.. ( Bang Somad keheranan )

Bang Pendi    :  Ntu bang....Ibu-ibu ame nenek-nenek ngada-ngada aje. Segala Si Irfan lah di demenin, pade kagak nyadar kali kalo ude pade tue...( sambil mesen kopi ame Mpok Mumun )

Mpok Mumun  :  Yeeee...emangnye kenape Pen !? Dia mah emang pantes jadi idola...ude pinter maen bola, ganteng, banyak duit...siape yang kagak demen. Emangnye elu...! Ude jelek, kagak bise apa-apaan...duit kagak gableg lagi..( gak punya ), siape yang mao demen ame elu...kuntilanak aje...males godain elu..!! ( celetuk Mpok Mumun sambil cekikikan )

Bang Pendi  :  Busyet dah...! Segala kuntilanak lah dibawa-bawa. Aye bukannye iri Mpok, tapi kasihan ame die...Die pan masih mude, kalo sekarang dipuji setinggi langit...nanti kesononye die jadi kurang mawas diri, cepat puas dan terbuai ame kepopulerannye. Contohnye tuh Si Kurniawan , karirnye anjlok gare-gare kurang bisa nahan diri.

Bang Somad  :  Ada benernye juga sih omongan lu Pen....tapi emang susah juga, soalnye kite ude lame kagak ngeliat tim nasional kite berprestasi. Sekarang timnas kita lagi maen bagus-bagusnye, ude gitu ade pemain yang pantes jadi idola...ya jadi klop dah..!! Ada untungnye juga...PSSI menaturalisasi pemaen luar....

Bang Pendi  :  Nah...ntu sebenernye yang aye kurang setuju bang. Pemaen muda kite pan seabreg ( banyak ), masa sih kagak ade yang bagus. Yang penting pan..sistim pembinaan pemaen muda kite, lah..kalo Si Irfan maennye bagus...ntu karena di Belande emang die dibina dengan bagus. Liat aje...nanti juga kalo die ude setaon disini, die maennye juga bakalan kayak orang Indonesia alias biase-biase aje. Sekarang mah...yang mesti dipikirin PSSI, bagaimana caranye agar pemaen-pemaen muda kite...maen bolanye kayak orang Belanda...jangan suruh orang Belanda maennye kayak kite...

Mpok Mumun  :  Ah...sok tau lu Pen..!! Bilang aje kalo elu sewot sendiri gare-gare kagak punye duit buat beli tiket nonton di Senayan ( Mpok Mumun cekikikan lagi, Bang Pendi cuman cengar-cengir sambil ngeganyem singkong goreng ). Tiba-tiba..." Pen...Pen...!! Kemane aje sih lu ? Enyak cariin dari tadi..." Nyak Salmineh nyamperin Bang Pendi.

Bang Pendi  : Emangnye ade ape nyak..? ( tanye Bang Pendi keheranan )

Nyak Salmineh  :  Sono gih ke Senayan...! Beliin enyak tiket, ntar keabisan. Enyak pan pengen ketemu ame Si Irfan Bachdim ( Sambil ngeluarin duit gocapan, Bang Pendi melongo....)

Bang Pendi  :  Busyet dah....nyak...nyak..!! Yang ngada-ngada aja ah....pake mao ke Senayan segale. Lagian duit segini mana dapet beli tiket...kalo dapet juga kebagian duduk diatas atep stadion. Mending buat belanje nyak....

Nyak Salmineh  :  Emang ntu duit belanje...!! Makanye enyak nyuruh babelu nyabut singkong buat makan lu ni hari. Ude sono beliin...!! ( Kate Nyak Salmineh sambil ninggalin warung, Bang Pendi gondok setengah mati sambil ngeremes-remes rambutnye. Bang Somad ame Mpok Mumun cekakakan )

Sampe sigitunye ye...!!??

BANG PENDI BUTUH TATI TAYANG....

Makasih buat sohib-sohib yang masih inget sama Bang Pendi. Dan maaf Bang Pendi baru nongol lagi, soalnya kemaren-kemaren Bang Pendi puyeng mikirin kalo die ude lama kagak punye demenan. Saban malam minggu temen-temennye pade besukaan tapi die cuma bise nongkrong di pos ronde berkawankan nyamuk-nyamuk nakal.., Bang Pendi pan juga manusia yang butuh tati tayang...hehe. 

Bang Pendi bingung...kenape cewe-cewe kagak ade yang demen ame die, padahal kalo diliat dari belakang Bang Pendi ntu mirip sama Irfan Bachdim, dari depan juga mirip Tukul Arwana...apa yang kurang ? hehe. Beberapa trik ngedapetin cewe die ude coba tapi kagak berhasil, akhirnye saking keselnye die coba trik yang dari iklan di tipi. Maklumlah...Bang Pendi termasuk paling doyan nonton tipi atawe istilahnye TipiHolik ( suka nonton tipi dirumahnye Bang Holik..hehe ). Nah...triknye ngikutin iklan permen yang kalo pake baju belang-belang dikejar-kejar cewe. Bang Pendi coba deh pake baju belang-belang, pas ditengah pasar die tereak..." Tarrrraaaaaaaaaa......!!!! " ( maksudnye mau unjukin kalo die pake baju belang-belang ). Tapi boro-boro dikejar cewe...orang-orang disitu malah ngelemparin Bang Pendi ame telor busuk... ikan busuk...tomat busuk " Brisik Luuu...!!" orang itu pade ngomel. Huaaaaaaa....!! mao gak mao Bang Pendi ngacir...haaah..apes banget emang Bang Pendi.

Pas lagi jalan pulang, lagi kesel-kesel gitu ada orang yang nanya...

" Numpang tanya bang...rumah Pak Rt 7 dimana ya bang ? "

" Pak Rt 7 yang mana nih ? kalo Rt 7 Kelurahan Mekkah..elu tanya aja gih sama Pak Haji...gue kagak tau ! " Jawab Bang Pendi rade sewot, maklum ati lagi kesel.

" Ya..rumah Pak Rt 7 kampung sinilah bang.."

" Ya ude...elu cari aja rumahnye Bu Rt ! Tanya aje ame die...die pasti tau.."

" Iye...makasih ye bang " Kata orang itu sambil ngangguk-ngangguk, tapi sambil jalan die mikir " Dodol juga tuh orang...! kalo gue ude ketemu ame rumahnye Bu Rt, ngapain juga gue nanya rumahnye Pak Rt...pan die bininye Pak Rt " Orang itu ngedumel, sedang Bang Pendi cekikikan sendiri di jalanan.

Nyampe rumah Bang Pendi langsung mikir, trik apelagi yang mesti die pake.." Ah..kayaknye gue mesti semedi nih ". Ya ude..pas malemnye Bang Pendi nyiapin bekel buat semedi, die bawa panci...indomie 4 bungkus...telor 2 biji...( ini mao semedi ape kemping ya...? hehe ). Tapi die kagak perlu bawa aer minum, kopi atawe teh..kalo pengen kopi die tinggal sms.." Makk..bawain kopi dooooong !!" Ngga lame pasti ntu kopi nongol...orang semedinye dibelakang rumah...hehe. Nah waktu semedi, Bang Pendi duduk di bawah pohon nangka ( biar rada mistis dikit..hehe ). Sebelum die doa minta di cariin jodoh, die inget lagi ame iklan ditipi yang kayak gini..." Coba ada hp yang murah....bisa chating...bisa pesbukan...baterenya kuat..". Nah..kagak lame kedengeran bunyi kresek-kresek dari atas pohon, tapi belon sempet tau..apaan yang jatoh, Bang Pendi ude semaput duluan...( gimane kagak semaput..?! Kalo di iklan tipi yang jatoh dari atas itu hp..ini mah kagak ! Bukannye hp tapi nangka busuk yang jatoh nibanin kepalanye...hehe )

Gak tau deh...berape lame Bang Pendi klenger kagak siAman..( maaf...ganti istilah dulu, siAman ntu adenye siUman...siUmannye lagi pulang kampung...hehe ). Untung babenye nyari-nyari Bang Pendi dan nemuin die lagi pingsan...sebenernye sih babe nyariin Bang Pendi bukan khawatir ame anaknye tapi mao minta balikin kolor yang dipake Bang Pendi. Lah...kalo kolor atu-atunye ntu dipake ame Bang Pendi..babe pake apa dooong ? Ujan-ujan gini...pan dingin kalo cuma sarungan doang...( jangan ngeres lho ya...hehe )

Nah...ntu perjuangannye Bang Pendi buat nyari jodoh tapi belon dapet-dapet juga. Cariin dooong...!!! Kalo bisa yang masih gadis tapi ude kerja...ude punye rumah sendiri...ude punye mobil..tabungannye juga ude banyak. Kalo jande juga kagak ape-ape...yang penting kaya dan hartanye kagak abis tujuh turunan...hehehe ( Ngaco lagi deh gue....). Nah..kalo ude ade yang dapet tolong hubungi Bang Pendi...di 021-1253754100...hehe.

TAFSIR PUISI " SANG PANGERAN "

Lagi iseng-iseng gak ada kerjaan, Bang Pendi mampir kerumahnye Mba Fanny...abis kangen ngerasain kue stroberynya. Eh..bukannye di suguhin kue atawe jus strobery tapi malah diajak maen tebak-tebakan, tapi masih untunglah daripada ditimpuk strobery...hehehe.

Tak apalah...Bang Pendi coba ikut, barangkali yang iseng-iseng kayak begini justru yang berhadiah. Lagipula sekalian ngabarin sohib-sohib kalo Bang Pendi masih hidup..hehehe

TAFSIR PUISIMU, PUISIKU :

Kayaknya itu ungkapan hati dari Sang Pangeran yang berkeinginan untuk mempunyai seorang anak dari Mba Fanny ( dari kalimat : Kita Rajut Ikan Paus dengan benang merah muda sambil menyanyi penuh mesra...hehe ). Dan seiring berjalannya waktu, Sang Pangeran berharap sang anak akan tumbuh dewasa dan menaklukkan dunia.

Gitu aja deh....

Moga-moga aja tafsir puisinya gak terlalu ngasal...hehehe

Kalo dikasih hadiah, Bang Pendi pilih buku " Rasa karya Bertahindara "

NEMU DOMPET

Emang susah jadi bujangan ! Sore-sore gini bang Pendi bingung mao ngapain, nongkrong di rumah seharian ude suntuk. Untungnye ni hari kagak ujan kayak kemaren-kemaren, akhirnye bang Pendi jalan ke pos ronda...kali-kali aje dapet rejeki kayak kemaren. Tapi sampe disono die bingung juga mao ngapain, akhirnya...

Gelas-gelas kaca....

Katakan padaku...siapakah aku ini...

Bini kutak punya...

Pacar kutak punya....

Selingkuhan... juga tak punya.....( gimane selingkuhan ? yang jadi pacar bener aja ga ada yang mao...hehe )

Si Jabrik yang baru dateng jadi ngakak ngeliat tingkah bang Pendi yang lagi nyanyi sambil meluk tiang pos ronda.

" Kasian amat sih lu Pen...! Makanya kalo lagi punya pacar jangan belagu. Anak orang elu maen-maenin, ditinggal malah elu yang klenger.." Kate Si Jabrik sambil cekakakan

" Masih mending anak orang Brik..kalo anak monyet, gue bisa dicakar emaknye! Lagian siape yang maen-maenin cewe ? Elu tau sendiri pan...kalo gue cowok yang baik hati dan tidak sombong... " Bales Bang Pendi sambil nyengir kudanil.

" Iye..iye..elu emang baek hati, tapi isi dompetlu yang kagak pernah baek hati  ( Si Jabrik cekikikan ). Ya ude...soal cewe mah kagak usah dipikirin...nanti sakit tipes lu ! Di Indonesia pan banyakan ceweknya daripada laki, masak elu kagak kebagian ? Kalo kagak kebagian juga...Noh...ame nenek gue aje ! Ude 5 taon jadi jande. Daripade lama-lama elu jadi bujang lapuk !" Si Jabrik tambah ngakak. 

" Sialan lu..! kayak gue kagak laku aje...Eh ngomong-ngomong soal dompet, kemaren gue nemu dompet disini Brik..."

" Wah...untung banget lu ! Ade duitnye Pen ?" Tanya Si Jabrik penasaran

" Ya ada lah..., lumayan...baru gue pake beli rokok ame ngupi diwarungnye Mpok Mumun. Sisanye masih ada...". Baru aje Si Jabrik mao ngomong minta jatah, tiba-tiba die keingetan kalo dari kemaren perasaan belon megang-megang dompetnye. Die ngeraba-raba kantong belakangnya...

" Eh...dompetnye kayak gimana Pen ?"

" Kenapa emang ? Nih...! " Tanye Bang Pendi sambil ngeluarin dompetnye.

" Wah...ini mah punye gue Pen ! Nih liat ade KTPnye..."

" Sorry Brik...gue kagak liat-liat KTPnye. Nyesel dah gue...!"

" Nyesel ude pake duit gue...?"

" Kagak sih..! Gue nyesel...kalo tau itu dompetlu, dari kemaren ude buru-buru gue abisin duitnye.." Kate Bang Pendi sambil ngakak terus ngacir.

" Heh...sialanlu Pen ! Balikin ga...duit gue !! " Si Jabrik ngejar-ngejar Bang Pendi yang terus lari sambil cekakakan.

WAKTU....HUJAN

Waktu terus berjalan...

Aku terlalu lelah.. letih.. lesu..lemah...kurang darah...untuk mengejar 

Berharap waktu berhenti dan berteduh karena takut kehujanan

Atau berhenti sejenak, memesan bajigur untuk menghangatkan badan

sambil makan ubi rebus.

Waktu terus berjalan...

Untunglah ia tak berlari karena akan makin sulit kukejar

Andai saja hansip dan satpam menangkap dan mengikatnya di pos ronda Rt 7

Atau berharap Sensus...Eh Densus 88 menembaknya hingga mati dan tersungkur di pinggir kali

Tapi waktu terus berlalu...

Tak perduli hujan..hansip..satpam ataupun Densus

Tinggalkanku terpaku menatap air bekas cucian piring bidadari khayangan yang tumpah dari langit

Tinggalkanku termenung sambil bersenandung lagu sendu

Lagu dari Iwan Sumbang...." Di pos ronda ini kutunggu..." atau

Lagu dari Doel Fals..." Kalau hujan bisa ngomong..."

Ah....andai saja hujan itu cabe keriting yang selalu naik dan jarang-jarang turun

MAKAN TUH...BIJI RAMBUTAN...!!!

Wah...senengnya bisa posting lagi ! kemaren-kemaren ide lagi buntu dan terserang penyakit males..les..les. Ibarat kate aer kali, aer yang mao ngalir mampet gare-gare banyak orang yang sembarangan buang sampah di kali. Nah... ide posting yang ada juga sering-sering mampet, kayak kemaren...pas mao posting adaaaa... aje yang bikin ide jadi buyar. Bayangin aje...ude bela-belain ngantuk-ngantuk nongkrong ngadepin kompi, eh...diatas kepale ade cicek yang brisik ... akhirnye kagak jadi posting tapi malah nonton ntu cicek...hehehe

Nah... sekarang mao ngasih tau nih kalo Bang Pendi lagi gondok. Gare-gare rame berita teroris di Sumatera, pak RT jadi latah nyuruh warganye aktifin ronda. Padahal musin ujan...tau sendiri pan kalo dingin-dingin enakan ngeringkel di kasur sambil ngelonin guling . Lagian di kampungnye mana ada yang bikin bom, paling banter...bikin lontong...hehehe.

Malam minggu ini Bang Pendi ronda. Sebenernye sih gilirannye bukan malam ini tapi die minta tukar harinya, die mao di malem yang ade Si Jabrik...biar ade yang dikerjain atawe bahan ledekan. Ni malem Bang Pendi rade-rade telat, soalnye die nonton liga Inggris dulu...antara Chelsea lawan Persib...hehe. Nah..nyampe pas ronda empat temennye ude lagi maen remi termasuk Si Jabrik.

" Eh..gue ikutan dong !"

" Wah..kagak seru Pen kalo maen berlima, tapi daripade nganggur...mending elu bikin kopi dah atawe pijit-pijit pundak gue " Kate Si Jabrik sambil cekikikan yang laen pade ngakak. Bang Pendi gondok, bukannye gue yang ngerjain tapi malah kena skak. Karena kesel akhirnye Bang Pendi ngeloyor pergi.

" Eh..mao kemane..lu Pen !?" Tanye Bang Mamat

" Mao ngider ( muterin kampung ) !"

" Baguslah...! Eh...tapi elu kagak takut jalan sendiri ?" Tanye Bang Japra tapi Bang Pendi ngga ngejawab, Si Jabrik bisik-bisik " Dia mah berani bang...orang kalo ketemu setan bukan die yang takut tapi setannye yang ngacir kalo ngeliat mukanye.." Berempat pade ngakak lagi. Kalo Bang Pendi denger pasti die marah banget, soalnye die selalu merasa kalo mukanye mirip-mirip Justin Bibir...hehehe.

Bang Pendi sebenernye bingung mao kemane tapi lagi bingung-bingung die ngeliat ade pohon rambutan yang buahnye ude mateng-mateng. Sebenernye die takut dosa ngembat rambutan orang tapi die inget pesen  Wira-Wiri Sableng, gurunye " Jangan takut berbuat dosa yang penting nanti tobat.." ( Hah...emang kagak bener tuh ajaran gurunye ! ) Eh...belon pade tau ya kalo Bang Pendi berguru. Die emang  ude dua taon berguru...malah sekarang ude pegang Gelas Hitam ( bukan Ban Hitam ! Soalnye dua taon berguru bukannye belajar silat tapi kerjaannye cuma nimba ame bikinin kopi item buat gurunye...hehe ). Akhirnye Bang Pendi nekat uga naek pohon rambutan tapi belon juga sempet makan, die denger orang ngobrol...buru-buru die naek agak tinggi sambil ngintip...ternyate Si Jabrik ame yang laen. Nyampe di bawah pohon rambutan yang dinaekin Bang Pendi mereka malah berhenti.

" Kayaknye enak nih bang, ngeronda sambil makan rambutan " Kate Si Jabrik

" Wah..sakit perut iya...Brik ! Tapi kalo mao, elu ambil dah sendiri...." Jawab Bang Mamat, ternyate rambutan ntu kepunyaannye die. Si Jabrik langsung aje siap-siap naek, bang Pendi yang ada diatas jadi keder. Bukannye takut tapi die malu kalo ketahuan ngembat rambutannye Bang Mamat. Akhirnye die punya akal, die ambil rambutan terus die lempar kepalanye Si Jabrik. Si Jabrik kaget dan sempet bingung apaan yang nibanin kepalanye, die berhenti manjatnye sambil celingak-celinguk keatas. Bang Pendi nahan-nahan tawa terus die lempar lagi kepalanye Si Jabrik sambil bersuara....hihihihi..hihihihi...hihihihi !. Kagak pake bengong lagi, Si Jabrik langsung merosot turun...

" a..a..ada se..se..setannya bang..!!" Kate Si Jabrik ngadu ame Bang Mamat yang nungguin ngga jauh dari pohon rambutan.

" Ah...yang bener aje lu, gua aje yang punya kagak pernah nemuin...!" Bales Bang Mamat. Bang Pendi hampir ngakak ngeliat tingkah Si Jabrik, sekarang die ngerasa ude aman buat makan rambutannye. Tapi baru aje die caplok ntu rambutan tiba-tiba angin niup agak kenceng, pas die nengok...die ngeliat ade putih-putih melayang kearahnye. Bang Pendi panik....buru-buru die turun ( biasanye kalo keadaan kayak gitu die pasti tereak-tereak tapi sekarang kagak karena dimulutnye ade rambutan..hehe ). Saking buru-burunye Bang Pendi kagak merhatiin lagi kalo cabang pohon yang die pegang kecil, jelas aje ntu cabang jadi patah akhirnye Bang Pendi jatoh dan badannye sukses dengan gilang gemilang mencium tanah...

" Gedebuuuuuukkkkk...!! "

Si Jabrik ame yang laen kaget dan pade bengong. Walau takut-takut die pade nyamperin asal suare.

" Busyeeeet...elu Pen ! Kirain apaan....eh..kenape lu ?" Kate Si Jabrik yang ngeliat Bang Pendi yang nggak bise napas kayak orang sakit asma.

" Ude..ude...tenang Pen, ambil napas pelan-pelan " Kate Bang Mamat tapi Bang Pendi geleng-geleng sambil ngasih kode bulat-bulat pake jari jempol ame telunjuknye, terus nunuk-nunjuk lehernye. Bang Mamat sempet bengong tapi kemudian die langsung mukul belakang lehernye Bang Pendi. Keluar deh..rambutan yang masih ade bijinye, terus gelinding di depannye Bang Pendi. Ternyate ntu rambutan nyangkut ditenggorokan Bang Pendi pas jatoh tadi, kontan aje yang laen langsung pade ngakak.

" Modar lu Pen..!! Makan tuh biji rambutan. Elu sih pake acara nakut-nakutin gue..." Kate Si Jabrik sambil cekakakan. Bang Pendi cuma bise nunduk malu sambil ngambil napas...

( Padahal putih-putih yang ditakutin Bang Pendi tadi cuma karung beras yang dipake Bang Mamat ngebungkus nangka tapi copot ketiup angin...hehehe )

KAYAK IKLAN DI TIPI

Hari ini Bang Pendi ame Si Jabrik belon kerja. Tadi sih sempet ke tokonye Engkoh Achong tapi berhubung masih suasana lebaran Engkoh Achong berbaik hati nambah liburnye satu hari. Sebenernye Bang Pendi ude tau karena Engkoh Achong ude bilang sebelum libur lebaran tapi die tetep dateng soalnye ngarep angpaonye dari Engkoh Achong..hehehe. Abis die bingung mao kemane, mao jalan-jalan kagak punye duit. Ke kebon binatang Ragunan yang murah die masih trauma, soalnye dulu waktu jalan-jalan disono ade yang tereakin.." Wooiii...kok elu ada diluar kandang sih !? Ntar nggak ada yang ngasih kacang loh. Pak petugas..! ada yang lepas nih..". Busyeet..emangnye gue monkey, dikasih kacang..hehehe.

Nah..karena masih suasana lebaran. ditengah jalan tiap papasan sama orang Bang Pendi inisiatif ngajak salaman walau kagak kenal siapa orangnye. Tapi Bang Pendi milih-milih, kalo cowok die pora-pora kagak liat dan kagak kenal tapi kalo cewek, Bang Pendi langsung sok akrab.." Eh...kemane aje nggak keliatan-keliatan !? Nggak pulang kampung nih...?" Kate Bang Pendi sambil nyodorin tangannye ngajak salaman. Terang aje ntu cewek pade bingung tapi karena emang masih suasana lebaran, akhirnye mao juga salaman ame Bang Pendi.." Lumayan dah..bise megang tangan-tangan yang alus " hehehe.

" Siapa Pen ?" Tanya Si Jabrik keheranan.

" Nggak tau..! Yang penting salaman..." Jawab Bang Pendi sambil nyengar-nyengir onta. Si Jabrik cuma bise garuk-garuk kepala. Nggak lame ketemu cewek lagi didepan warung rokok, Bang Pendipun mulai beraksi...

" Eh..si empok baru keliatan lagi, tambah cakep aje ! Nggak pulang kampung mpok..?" Tegor Bang Pendi sambil cengar-cengir. Yang ditegor keliatan bingung sambil celingak-celinguk ke warung.

" Pulang kampung kemane Pen ! Kampungnye pan disini, die pan bini gue.." Jawab Bang Japra yang lagi beli rokok. Bang Pendi kaget, buru-buru die nyamperin Bang Japra basa-basi ngajak salaman trus buru-buru ngacir. Si Jabrik ngikutin Bang Pendi sambil cekikikan.

Ditengah jalan Bang Pendi brenti. Die ngeliat ada nenek-nenek diteras depan rumah keliatan lagi bingung sambil megangin kertas ( kayak iklan ditipi..hehe ) Bang Pendi langsung nyamperin.

" Ada apa Nek , kok sedih ? "

" Ini cuu...nenek mao sms keluarga buat ngucapin Idul Fitri, tapi....."

" Tapi pulsanya kurang atawe habis, iye pan ?" Potong Bang Pendi sambil cengar-cengir ke  Jabrik.

" Iye..bener...bener Pen ! Kayak iklan di tipi.." Kate Si Jabrik

" Bukan cuu..Bukan pulsanye yang habis, tapi hpnya nenek ngga punya !" Jawab Si Nenek. Bang Pendi langsung diem. Mukanye merah karena malu dan gondok.

" Hah...Si Nenek ngada-ngada aje ! Ude tau kagak punya hp, ngapain juga pengen sms.." Bang Pendi ngedumel, Si Jabrik cekikikan lagi.

NUNGGU BEDUK ( 10 )

Matahari siang ini begitu terik, sinarnya jatuh tepat diatas kepala. Peluhpun bercucuran...( Jiaah..kayak mao bikin cerpen aja nih..hehe ). Maksudnye..ni hari panas banget, kata enyak..tengari bolong. Nah..karena cuacanye panas, Bang Pendi ame Si Jabrik ngadem di pos ronda.

Si Jabrik   :   Wah..lebaran ude dikit lagi nih Pen ! Semur daging masakan enyak gue, bau-baunye ude terasa nih...

Bang Pendi  :  Enyaklu masih kayak orang dulu aje Brik..masaknye semur mulu ! Sekali-kali suruh bikin teriyaki kek..! Ya..ude, besok lebaran elu kerumah gue deh ! Rendang ame ketupat sayur Padang baunye kemane-mane...( sambil ngipas-ngipas badannye pake daon pisang )

Si Jabrik   :   Wah..asiiik, kalo ke rumahlu gue bisa makan rendang bumbu Padang dong...!!

Bang Pendi   :   Lha...siape yang bilang dirumah gue masak rendang Padang !? Tetangga gue yang masak, ! baunye aje yang nyampe rumah gue...! ( sambil nyengir onta )

Si Jabrik   :  Busyeeet..!! Masa gue disuruh nyium baunye doang Pen, ape enaknye...( Si Jabrik ngedumel )

Ngga lame lewat Nyak Markonah ame Neng Endang, anaknye..

Bang Pendi   :   Eh...
                         Semilir angin meniup selendang

                         Masuk kandang ayam berpagar kawat

                         Kita lagi ngomongin rendang

                         Eh...Neng Endang yang mao lewat

Si Jabrik      :    Eh...iya Pen...!

                         Begadang sambil minum cendol

                         Tak lupa ketupat sayur Padang

                         Neng Endang emang bahenol

                         Liat aje pantatnye ude kayak dandang..*
                        * ( alat masak )

Neng Endang    :   Heh...ngomong apaanlu..!? ( bentak Neng Endang sambil nyamperin Bang Pendi ame Si Jabrik. Si Jabrik langsung diem klekep )

Bang Pendi    :   Sabar....sabar...Neng ! Bulan puase...kagak baek marah-marah. Lagian Neng Endang kalo marah-marah tambah imut-imut kayak IDEFIX ( sambil senyam-senyum )

Neng Endang  :   Siape lagi tuh IDEFIX...!? ( Tanya Neng Endang sambil melotot ke arah Bang Pendi, Bang Pendi kayaknye keder-keder juga )

Bang Pendi   :   E..e..e..IDEFIX ntu...e...anjingnye ASTERIX* ( Cerita komik anak-anak ) 

PLAAAAKKK...!! Pipinya Bang Pendi dengan sukses dapat tamparan Neng Endang yang pergi sambil ngedumel.

Bang Pendi   :   Eh...gue salah ngomong ya Brik...(  Bang Pendi meringis sambil ngusap-ngusap pipinya, Si Jabrik kagak ngejawab karena die nahan-nahan tawa sambil megangin perutnye )

NUNGGU BEDUK ( 9 )

SAHUR....SAHUUUUUUUR..!!

Wah...lebaran ude deket-deket lagi nih...! Di daerahnye Bang Pendi ade beberapa orang yang pergi pulang kampung . Nah sehubungan dengan itu, Pak Rt meminta warganye untuk menggiatkan ronda malam...maklumlah banyak rumah yang kosong. Sambil menjaga lingkungan, para peronda juga diminta untuk membangunkan sahur...karena kemaren ada yang ngedumel bangun sahur kesiangan. Kebetulan...malam ini gilirannya Bang Pendi, Si Jabrik ame Bang Namin, sekarang die pade lagi ngumpul dipos ronda..

" Ngubek-ngubek kampung udehan nih...Pen ! tinggal bangunin saur dah...tapi jam saur masih lama, yang enaknye  kite ngapain ye..." Tanye Si Jabrik

" Kite bakar singkong aje Brik.." Jawab Bang Pendi

" Ah...dasarlu perut karung, kagak ade kenyang-kenyangnye, dikit lagi pan mao saur..." Bang Namin ikut nimbrung

" Abis...kite ngapain dong !?"

" Kite ngintip aje nyok...!" Usul Bang Namin.

" Busyeet..! gile juga lu Min, bulan puase bukan ngajakin yang bener malah ngajakin ngintip. Eh...tapi siapa yang kite mao intip, ayo dah... ? " Kate Bang Pendi

" Sial lu Pen, kirain mao nolak...eh malah ngajak duluan " Celetuk si Jabrik, bang Pendi cengar-cengir. Akhirnye bang Pendi ame si Jabrik  ngikutin bang Namin tapi bang Pendi masih penasaran siapa target perintipannya kali ini..hehehe.

" Kite mao kemane sih bang ? p'rasaan ini jalanan mao ke Mushola.." Tanye bang Pendi

" Ude...tenang aje ! paha-paha aje sih...pasti keliatan " Jawab bang Namin. Pas sampe samping mushola die berhenti.." Sssst...diem ! Nah..tuh liat, ada paha..ji lagi mengaji " kata bang Namin  cekikikan, trus lari ngacir..

" Sialan lu Min ! gue ude deg-degan, ngga taunye paha..ji " Umpat bang Pendi sambil ngejar bang Namin diikutin si Jabrik. Sampe pos ronda bertiga ude pade ngos-ngosan....

" Wah...lari-lari gini gue jadi aus nih Pen ! bentar ye...gue balik dulu ngambil kopi, sekalian biar kagak ngantuk.." Ujar bang Namin. Bang Pendi ame Si Jabrik cuman ngangguk aje....tapi setelah ditunggu-tunggu bang Namin kagak nongol-nongol juga.

" Wah..wah...brengsek bener dah ah...! Si Namin ngambil kopi di Bogor kali ye..? kenape kagak sekalian aje ke Medan, biar kagak balik sekalian " gerutu bang Pendi

" Iye tuh...si Namin, gue jadi ngantuk nih...! " Ujar Si Jabrik sambil merem

" Eh...elu jangan tidur Brik ! Nanti yang bangunin saur siape..."

" Halaaa...masih lama Pen "

Tadi si Namin yang pergi, sekarang si Jabrik yang tidur. Bang Pendi jadi kagak punye temen ngobrol...akhirnye lama-lama bang Pendi merem juga disampingnye si Jabrik. beberapa saat kemudian Bang Pendi terbangun dari tidurnye. Sayup-sayup die denger suara orang mengaji...

" Wah...jam berapa nih ? brengsek.. si Jabrik maen minggat aje lagi, bukannye bantuin bangunin orang sahur.." gerutu Bang Pendi. Sambil gerutu bin ngedumel dengan pedenya bang Pendi mukul kentongan yang ada di pos ronda

Tong...tong...tong....!!!
" Sahuur....sahuuuuuuuuuurrrr...!!!! " Tereak bang Pendi. Tapi....

" Heh...heh...ngigo kali lu ya !? Tereak-tereak sahur aje, ini jam berapa nih...!? waktu imsak ude lewat..." Ujar Pak Rt yang lewat ame beberapa warga yang mau sholat subuh ke mushola. Jelas aja mereka pade ngakak semua. Bang Pendi menunduk malu sambil ngacir pulang...

NUNGGU BEDUK ( 8 )

Ling..Ling..Ling..Ling..Ling...kekasihku
Dara lincah tetanggaku
Diam-diam aku jatuh cinta
Kepadamu oh..Ling-Ling ku

Pada suatu hari yang indah
Di hari ulang tahunku
Diam-diam engkau menciumku
Hadiah ulang tahunku

Bang Pendi nyanyi-nyanyi sambil jalan. Kayaknya emang die lagi seneng, soalnye hari ini die ame si Jabrik disuruh nganter parcel ke kota ame Koh Achong. Nah...bisa jalan-jalan deh..bang Pendi.
" Wah...kalo tiap hari kayak gini enak ya Brik..., kite bise jalan-jalan sekalian ngabuburit nungguin bedug !"
" Ngabuburit palelu..!! Ngabuburit mah sore Pen...ini pan baru jam sembilan, kelamaan nungguin bedugnya !. Justru kalo disini tambah berat puasa gue Pen, banyak makanan yang menggoda iman "
" Elu salah Brik...harusnye elu seneng, karena makin banyak godaan makin gede pahalanye. Inget Brik..! Bulan puase ntu bulan penuh keajaiban, contohnye...kalo bukan bulan puase yang namanye biji salak ntu kerasnye bukan maen ! tapi di bulan puase, biji salak pade dijadiin kolak...empuk lagi. " Kate bang Pendi sambil ngakak.
" Ah...elu ngada-ngada aja Pen..." mao ngga mao si Jabrik mesem-mesem.

Nah...itu omongannye bang Pendi waktu baru nganter, tapi pas pulang...omongannye ude laen..!
" Duh...panas bangat ya Brik..! kayaknya gue aus banget nih, bedugnye masih lama ya Brik..!?"
" Elu salah Pen...harusnye elu seneng ! makin banyak godaan...."
" Hah..elu ngikut-ngikut aje ngomongnye, kreatif dikit napa..!?" Bang Pendi rade kesel, si Jabrik cuman cengar-cengir aje.  Pas lewat sebuah klinik kesehatan bang Pendi brenti. Die kayaknye serius baca tulisan yang ada di kaca depan klinik.
" Eh...elu tunggu disini Brik...!!" kate bang Pendi langsung ngacir ninggalin si Jabrik yang bengong. " Si Pendi baca apaan sih  ? kok tiba-tiba lari.." Tanya si Jabrik dalem ati. Nggak lame bang Pendi nongol sambil bawa dua bungkus plastik es cendol.
" Nih..buatlu Brik..!! Ude batalin deh...kagak boleh ditunda-tunda "
" Elu apa-apaan sih Pen, gue pan puasa..! kalo elu mao batal...batal aje sendiri "
" Ya..elah, gue juge puasa Brik. Tapi ini pan ude jamnye buka...!"
" Buka dari Hongkong...!! Baru juga jam 10.00..gile aje lu ! "
" Nah..ntu ape..!? Baca dong....!! "

BUKA

JAM  09.00 -  16.00

Abis baca tulisan ntu, si Jabrik kagak bise ngomong ape-ape. Die cuma bise ngakak sambil megangin perutnye.

Siape yang bikin kolak biji salak ? kirim-kirim ke rumah Bang Pendi ya...hehehe

NUNGGU BEDUK ( 7 )

Wah...kagak terase puase ude lewat seminggu, ude lewat seminggu juga bang Pendi kayaknye kagak nongol buat nemuin sohib. Maafin ye...! Maklumlah...bulan ini bang Pendi pengen puasanye beneran dikit dibandingin ame taon-taon kemaren. Bang Pendi atut kalo buka-buka inet, soalnye suka ngga nahan ngelantur ke situs " ZZZ" ( kalo yang " X " ude biase...hehehe ). Nah..kate pak Ustaz bise ngurangin pahala puase tuh ! Sayang pan...kalo cuman dapet laper ame ausnye doang...ye ngga !?

Apelagi imannye bang Pendi masih tipis kayak kulit kadal ( Gantinye kulit Ari, soalnye si arinye lagi pulang kampung...hehe ) jadi gampang jebol. Kalo ibarat kate....Teh Manis ntu Imannye bang Pendi, kadang-kadang kurang gula...jadi berasa pahit. Kadang pula kurang tehnya...nah jadinye aer manis bukannye teh manis. Yang parah lagi...pernah takeran gula ame tehnye ude pas tapi aer panasnye yang kurang...hehehe. Jadi gitu deh...imannye bang Pendi ngga pernah sempurna dan ngga pernah bener..!! Tapi masih untung ade gelasnye buat naroh teh, kalo nggak ! Kagak tau lagi deh....

Nah sambil nunggu bedug, biasanye bang Pendi duduk-duduk pos ronda. Kali-kali aje ade dompet jatoh didepan pos, pan lumayan buat beli baju lebaran..hehehe. Tiba-tiba si Jabrik nongol sambil nyanyi keong racun....versinye die

Kau memang.. keong racun

Belon Maghrib...ude ngajak makan bubur

Kau memang.. keong racun

Nasi basi...elu bilang nasi kebuli

Hei...kau usil sekali

Kau potong kuku-ku

Kau gunting rambutku

Kau cuci sendalku

Mulut kemat kemot.....

" Hadooooh...Brik...Brik...!! Orang-orang ude pade sepet ngeliat mukelu apelagi suaralu. Mending diem dah...malah lebih mantep !

" Yah...elu Pen, bolehnye sirik aje kalo ngeliat temen seneng dikit. Sesama orang jelek mah...kita harus menghargai Pen "

" Heh...kitaaa ? Elu aja kali Brik....gue kagak ! " Kate bang Pendi sambil cekikikan, si Jabrik manyun.

" Nah...elu lagi ngapain disini Pen ? gue liat dari jauh mulutlu kemat-kemot kayak dukun beranak, elu kagak puasa ye ?"

" Sembarangan...! Gue lagi ngapalin doa nih, buat nahan laper.."

" Hah...emangnye ada !? Ajarin gue dong.."

" Nih...dengerin !"

* Huma baring sana...baring sini

  Wa' auuz......Wa' laffar.....Wa' maomati

  Wa' kadaffur....Wa' takadafafa

  Ya' udahlah...Wa' tahan lagi

" Ah...brengseklu Pen, dosa lu.....!!" Gerutu si Jabrik, bang Pendi cekakakan.

*  Dapat dari sms

OBROLAN DI WARUNG KOPI ( 21 )

Mpok Mumun  :  Wah...tumben lu Pen, makan nasi uduk sampe nambah gitu.. laper ape rakus lu...! Asal jangan ampe ngutang lagi aje ( sambil mesam-mesem )

Bang Pendi   :  Ya..elah mpok, tenang aje ape..! Pasti aye bayar..( " taon depan !" katanye dalem ati sambil nyengir sendiri ). Ngga tau juga nih mpok, puase masih berape hari lagi tapi perasaan lapernye ude kerasa !.

Bang Mamat  :  Emangnye elu mao puase Pen ? Bagus dah..tapi mulai sekarang elu kudu siap-siap . Maksud gue, siap lahir bathin...( sambil ngeganyem singkong goreng )

Bang Pendi    :  Kayak mao kawin aje bang, pake siap lahir bathin segale.

Bang Mamat  :  Lha...iye dong ! siap lahir ntu, elu kudu nyiapin fisiklu...biar nanti pas puase badanlu bager ( sehat ) pan puasanye kagak lancar kalo elu sakit. Jaga juga tuh mulutlu jangan sampe ngomong yang bikin orang sakit hati, jaga mata, jaga kuping...pokonye semua deh elu jaga...

Mpok Mumun :  Bener tuh Pen..! jangan cuman sakit panu ame kurap jadi alesan elu kagak puase ( Mpok Mumun cekikikan, bang Mamat mesam-mesem )

Bang Mamat   :  Nah..ntu yang lahir Pen ! kalo yang bathin, hatilu yang kudu bersih...jaga hati kalau kate Aa Gym. Jangan ade marah, ade benci, iri apelagi dendam ! sebelum puase, diilangin deh yang kayak gitu...biar puase kite lebih afdhol.

Mpok Mumun :  Nah...dengerin tuh Pen ! sapuin juge otaklu, jangan sampe punye pikiran ngeres mulu...

Bang Pendi     :  Ah..Mpok Mumun dari tadi nyamber mulu, kayak api kagak boleh liat tabung gas yang bocor aje. Emangnye Mpok sendiri ude siap kagak marah-marah ame siap kagak benci ? ( sambil nyomot pisang goreng )

Mpok Mumun : Yah..gue mah siap-siap aje Pen ! lagian ngapain elu pake nanya-nanya gue, mestinye elu yang kudu siap-siap. Soalnye yang gue tau...elu doang yang kagak pernah bener ! ( Mpok mumun cekikikan lagi )

Bang Pendi      : Ya..kalo ude siap kagak marah ame benci, bagus dah ! soalnye kemaren aye kagak sengaja ngintip pok Mumun lagi mandi...( Mpok mumun yang lagi cekikikan langsung diem, mukanye merah. Bang Pendi malah cuman cengar-cengir aje )

Mpok Mumun :  Hah...jadi elu yang kemaren ngintip gua ? Brengsek lu....... !! ( Mpok Mumun grabag-grubug nyari perabotan buat ngemplang kepalanye bang Pendi. Bang Pendi buru-buru nguyup kopinye ampe keselek dan siap-siap ngacir )

Bang Pendi    :  Eh...eh...katanye ude siap mpok !? Lagian aye ngintip pan kagak sengaja. Ampooooon...ampuuoooon !! ( Bang Pendi ngacir dikejar-kejar Mpok Mumun yang megang gayung aer. Bang Mamat cekakakan sendiri sambil geleng-geleng kepale )

Puasa tinggal beberapa hari lagi nih...! Untuk itu Bang Pendi mao minta maaf kepada sahabat-sahabat...adek, abang, empok, encang-encing, enyak-babe, kalau selama ini ada postingan yang kagak bener isinye juga komen-komen bang Pendi yang kagak pantes. Mohon maaf ye...! Biar bang Pendi bisa ngejalanin puasanye lebih afdhol ( kayak puasa aje...hehehe ). Kalo sempet, di bulan puasa nanti bang Pendi mao nerusin episode "Nunggu Beduk " yang taon kemaren baru nyampe 6 episode. Do'ain ye...! hehe

Selamat Menjalankan Ibadah Puasa bagi yang menjalankannya.

Salam hangat selalu................

ABU GOSOK

Ngeliat kereta Argo Bromo anjlok di Manggarai ame stasiun PondokCina yang kebakar di tv, bang Pendi jadi inget naek kereta dari Lenteng ke Kota karena disuruh ambil ikan asin ame Koh Achong. Dulu sebenernye bang Pendi sering naek kereta tapi pas diledekin temen " Eh..Pen ! kalo naek kereta, biasanya dapet berapa dompet ? " Diledek gitu bang Pendi jadi males naek kereta..hehehe.

Waktu ntu bang Pendi ude ogah-ogahan, tapi si Jabrik ngotot ngajakin naek kereta,  " Pan lumayan Pen, bise dempet-dempetan ame cewe ! " kate si Jabrik sambil nyengir. Bang Pendi diem aje sambil mikir " Hmm..yang kayak gini nih, yang suka nyari yang sempit-sempit. Eh..nyari kesempatan dalam kesempitan maksudnye..hehe". Nah..ibu-ibu ame none-none mesti waspada tuh..!  kalo ade tampang-tampang kayak si Jabrik..hehe. Tapi emang bener sih, penumpang di kereta ekonomi ude kayak ikan teri dipepes. Pade dempet-dempetan semua, kayaknye mao naroh kaki aje susah. Kalo turun dari kereta mesti periksa kaki, soalnye takut jempol pade ketuker..hehehe

Nah..kalo ude begini, gimane tuh.. !!?

Nggak lame, ade pemeriksaan karcis. Untungnye bang Pendi ame si Jabrik beli karcis jadi tinggal nyodorin, tapi cewe disebelah bang Pendi cuman bilang " Abu pak..!" sambil nyengir-nyengir onta ( Abu ntu maksudnye Abodemen ). Bang Pendi kagak ngerti ape ntu Abu ,tapi mao nanya malu. Akhirnye bang Pendi bisik-bisik ame si Jabrik " Besok kagak usah beli karcis Brik...! tinggal bilang abu, yang meriksa juga ude tau " Si Jabrik cuman ngangguk-ngangguk aje. Besoknye bang Pendi ame si Jabrik naek kereta lagi, tapi sekarang nekat ngga beli karcis " Tinggal bilang abu, pasti beres !" pikir bang Pendi. Nah..ngga lame ade pemeriksaan lagi tapi yang meriksa bukan petugas PJKA doang, sekarang ame polisi juga. Wah...bang Pendi langsung panas dingin " Gimane nih Brik..?" tanya bang Pendi. Tapi pas ngelirik kesamping si Jabrik ude kagak keliatan batang idungnye, kayaknye ntu anak ude ngacir pindah gerbong. Ya..ude, bang Pendi tambah keringetan

" Lagi kebelet ya bang..?" Ledek cewe yang ngeliat muka bang Pendi kebingungan sambil cekikikan. " Sialan...pake ngeledek lagi, kalo ditempat sepi...ude gue gigit lu !" pikir bang Pendi..hehe

" Karcis...karcis, karcisnya mana ?" Tanye petugas.

" A..a..abu pak..!" Jawab bang Pendi rade gemeter

" Abu apaan...abu gosok !? Mana...sini lihat !" Bentak polisinye. Bang Pendi jadi malu, abis penumpang yang laen pade cekikikan. Ya ude...akhirnye bang Pendi diturunin di stasiun Kalibata, terus di bawa ke toilet mao disuruh bersihin wc. Bang Pendi ngedumel " Brengsek nih si Jabrik ! maen ninggalin gue aje. Disuruh bersihin wc lagi...hah..apes bangat dah gua !". Tapi pas nyampe, die ngeliat si Jabrik ude nongkrong disitu bersihin wc. Bang Pendi jadi cekikikan sendiri.

" Pake abu gosok aje bang ! biar bersihan dikit..." Celetuk bang Pendi sambil cekakakan.

" Ah..brengsek lu Pen ! gare-gare elu nih, nyuruh kagak beli karcis " Kate si Jabrik pas tau bang Pendi yang ngeledek. Tapi due-duenye langsung ngakak bareng. Paling kagak ini jadi pengalaman, besok-besok kalo naek kereta mesti bawa abu gosok. Lho.... !!? hehehe.

Gambar Dari Sini


Eh...sohib2 ude pade tau belon kalo ade kontes bikin cerpen dari Mba Fanny . Nah...bang Pendi ude bikin tuh cerpennye, kalo mao baca2 mampir deh di hanya ilusi.
Sekalian ikutan ye... ! Met wiken......

SERIBU LANGKAH ( Cegah Pertengkaran Suami-Istri )

Hari ini tumben-tumbenan bang Pendi mao bantuin kong Sanip engkongnye buat nyabutin singkong. Keliatannye juga rade-rade akrab, soalnye sambil nyabut singkong ade aje yang diobrolin dari soal janda pahlawan yang dibebasin oleh pengadilan, soal Bibit-Candra, soal Ariel sampe soal anak sekolah yang ngelahirin anak di wc

" Nah..ntu contoh anak muda kayak elu yang kagak tau apa itu arti cinta. Cinta ntu bise diibaratin kayak coklat. Taunye elu pan coklat ntu manis padahal sebenernye pahit, yang bikin manis ntu karena ditambah pemanis atawe gula. Jadi cinta ntu jangan cuma mao ngerasain manisnye doang tapi rasain juga pahitnye. Nah...kalo cuma mao ngerasain manisnye doang, ya..kayak anak sekolah tadi yang ngebuang anaknye. Mao enaknye tapi anaknye kagak mao...!!" Jelas kong Sanip panjang lebar.

" Ah..engkong bise aje..." Kate bang Pendi sambil ngedumel dalem ati karena merasa diceramahin.

" Yah...elu kagak percaya amat ame yang tuaan. Emang mesti begitu ! liat aje engkong ame uwaklu ( nenek ), sampe sekarang masih awet jadi laki bini.." kate engkong lagi

" Kalo awet aye sih percaya, soalnye dulu kagak ade Luna Maya. Eh..kalo Luna Maya mao sama engkong, engkong pasti mao kan...!?" Tanye bang Pendi sambil nyengir

" Busyet...ngeledek gua lu..!? kalao gua mah kagak nolak dah...ya pasti mao bangat, si Lunanya juga pasti mao...cuma mao muntah !" Jawab kong Sanip, bang Pendi ngakak " nyadar juga nih aki-aki..." pikirnye.

" Oh...ye kong sebenernye apa sih resep engkong supaya ame uwak adem tentrem dan kagak pernah ribut " tanya bang Pendi serius

" Nih..denger ! Engkong emang punye seribu langkah supaya kagak ribut mulu "

" Busyet...banyak amat kong ampe seribu !?" bang Pendi keheranan.

" Elu dengerin dulu ! pertame, jadi laki ame bini harus saling menghargai dan menghormati. Kedue, harus bise instropeksi. Kalo emang kite salah...ya musti minta maaf, jangan ude tau salah malah ngotot ( bang Pendi manggut-manggut ) dan yang terakhir, jadi laki bini harus punya sifat mengalah. Kalo laki lagi panas bini harus adem, kalo bini lagi panas giliran laki yang harus adem..." kate kong Sanip lagi.

" Lha...kok ude terakhir kong, katanye ade seribu langkah ?" bang Pendi bingung

" Makanye dengerin...! pan engkong bilang kalo bini lagi panas laki mesti adem. Elu tau sendiri kalo uwaklu lagi marah segala perabot rumah pada melayang, kalo kagak piring atawe gelas...kadang-kadang centong nasi. Daripada kena kepala mending gua kabur ambil langkah seribu. Kalo cuma dua atawe tiga langkah pan kepale gua masih bisa benjut.." Kate engkong Sanip, bang Pendi ngakak lagi.

maaf...lagi nggak ada ide, jadi postinganya ngga jelas gini...

ZUNEA-ZUNEA

Cinta satu malam...
Oh...Indahnya
Cinta satu malam...
Buatku melayang...

Ude pernah denger pan lagu ntu ?
Sebenernye kalo denger lagu ntu, bang Pendi ude kagak nahan pengen joget. Tapi barusan yang nyanyi ponakan bang Pendi yang baru 4 taon umurnye. Bujug buneng....!! ngedengernye jadi gimana ya..antara lucu sekaligus ngerenes ! ck..ck...ck.. anak kecil ude pinter nyanyi lagu cinta-cintaan, abis gimana lagi...!? lagu anak-anak jarang kedengeran, pade kemana sih...yang bisa ciptain lagu anak-anak ? Hah..puyeng dah...!!!

Ya ude deh..! daripade puyeng, mending kite dengerin lagu anak-anak favoritnye bang pendi deh....nyooooooookkk...!!



Gimane....siiip khan ?

BERLAGAK WARIA

Gare-gare harga kebutuhan pokok pade naek, dapur rumah ude jarang-jarang ngebul. Bang Pendi jadi mikir-mikir buat nyari kerja sampingan, lagian die pengen cari suasana baru. Abis saban hari yang diliat cuman si Jabrik kalo engga ikan asin. lama-lama dia bingung bedainnye..mana si Jabrik mane ikan asin, baunye sama..hehehe. Bang Pendi sebenernye pengen kerja di tempat yang banyak cewenye, biar mata segeran dikit. Mau jadi artis, produsernye pade nolak. Abis pade takut kalo bayaran bang Pendi mahal, maklumlah kalo tampang mirip-mirip Bred Pit...hehehe.

Nah...bang Pendi kadang-kadang suka iri sama waria-waria yang kerja disalon. Lha..waria-waria itu pan cowo tapi saban hari bisa peluk sana peluk sini terus juga cipika-cipiki sama cewe-cewe. Saking irinye, bang Pendi pernah masuk salon dan pora-pora jadi waria. Kalo soal jalan megal-megol kayak mentok sih gampang, soalnye bang Pendi sering manggul beras ( pan kagak mungkin manggul beras badannye lurus kaku..ye nggak !? hehehe ). Bang Pendi berlagak pede aja jadi waria, jalan sambil tangan kiri dipangku tangan kanan...lidah melet-melet ( bayangin sendiri aja dah..! susah ngejelasinnye disini...hehehe )

" Iiih..ne, kemana aja sih ? sombong deh..ngga koling-koling ike. Eh...cantiknye !!" Kate bang Pendi sambil nepok badannye waria yang lagi ngelayanin cewe creambath terus nyolek cewenya. Jelas aje si waria bengong en bingung.

" Eh..ye siapa ya ? kayaknye ike nggak kenal deh " tanya si waria.

" Iiih..masak lupa sih ! ike temen waktu kita sama-sama nyebur got, pas dikejar satpol. Nama malem ike Peny, nama siang Pendi " jawab bang Pendi asal sambil cekikikan. Sebenernye ntu waria kurang percaya tapi karena emang die pernah nyebur got terus gayanye bang Pendi juga meyakinkan akhirnye die percaya aje. 

" Aduh..maaf deh bo, kalo ike lupa.." kate waria ntu. Akhirnya ntu waria langsung meluk bang Pendi terus cipika cipiki, terang aje bang Pendi merinding...hiiiii..!! walau akhirnye dapet cipika-cipiki dari cewe-cewe yang ada disitu.

Tapi nggak lama, masuk mpok Saodah tetangga bang Pendi yang nyalon alias pasang sanggul karena mao kondangan. Mpok Saodah jelas aje kaget ngeliat bang Pendi ade disitu..

" Heh...elu ngapain disini Pen ? lagian sejak kapan elu jadi bencong kayak gitu. Nanti gue bilangin pacarlu...si Siti " mpok Saodah langsung nyerocos.

" Yah...si empok, namanye juga lagi usaha " jawab bang Pendi. Tapi die lupa bergaya jadi waria.

" Hah... elu pura-pura ya !? jadi elu mao cari kesempatan ya buat meluk-meluk gue, sialan...enak aja lu !" kate cewe yang tadi dipeluk bang Pendi. Jelas aja waria yang tadi juga marah, langsung deh bang Pendi diunyeng-unyeng. Masih mending kalo cuman diunyeng-unyeng, bang Pendi langsung ditelanjangin...celana panjangnye dicopot ( Untungnye die pake boxer...he...he ). Nah abis ntu...bang Pendi disuruh pake baju cewe, mukanye langsung dipermak alias dipakein bedak ame lipstik. Ntu belon seberape...yang tambah bikin malu, bang Pendi disuruh berdiri dipinggir jalan sambil ngacungin tangan nyetop mobil-mobil yang lewat. Jelas aje yang ada di salon pade ngakak sambil guling-guling termasuk mpok Saodah, bang Pendi cuman bise manyun..." Siaaaaaaaaalll ....!!!!"

Eh..ada yang minta fotonye, nah ini die...!!

Akooo..tak maooo...jikalaooo..akoooo...dimadooooo..!!

Gambar dari sini

KOMPOR M'LEDUG

Hadoooh....bang Pendi minta maaf nih ame sodare-sodare, kagak apdet-apdet ame jarang mampir ketempat sohib-sohib. Abis bang Pendi puyeng kayak mikirin negara, sekarang-sekarang ini banyak yang aneh-aneh. Bayangin aje, katanye satpol mao dikasih senjata api padahal pake pentungan aje banyak orang ude pade dibikin bonyok apelagi dikasih pestol...bisa banyak yang modar tuh !. Bang Pendi juga puyeng mikirin adeknye si Ariel..hehe. gara-gara otak mesumnya, sekarang jadi di penjara. Emang susah juga anak-anak muda sekarang, kagak boleh ngeliat jidat licin dikit. Gayanya ude kayak sekretaris kelurahan, bawaannya pengen langsung kasih stempel aje...!! hehehe....Maaaaaaaaf..!!

Yang bikin bang Pendi tambah puyeng, sekarang ape-ape pade naek ! listrik naek...beras naek...telor naek...ayam naek...cabe keriting juga naek ( padahal ude direbonding..hehe ), sampe mas-mas juga pade naek..( abis ujan mulu...hehe ). Kalo harga-harga ude pade naek gini, ude pasti enyak males masak ( ape yang mao dimasak, orang kagak kuat beli...ye ngga ? ). Apelagi sekarang enyak rade-rade ngeri kalo mao masak, soalnye ude banyak kejadian tabung gas pade meleduk. Pemerentah mah kagak mao tau...nyediain selang buat ganti..eh..malah disuruh bayar ! hah..kebangetan bangat dah...nyusain rakyat kecil mulu. Bayangin aje...saking takutnye, enyaknye bang Pendi kalo nyalain kompor pake tekep ( tutup kuping ). Ude kayak bocah yang lagi mao pasang petasan...hehe. Tempo-tempo bang Pendi pernah nyeletuk...

" Lha..kagak ngaruh nyak.., nyalain kompor pake tutup kuping. Kalo ude meleduk...mati mah, mati aje !" Kate bang Pendi.

" Eh...elu nyumpahin gue mati ye..!?" Bales enyaknye sewot.

" Ya kagak nyak..! lagian nyari enyak yang jelek kayak gini pan susah, cuman ade atu-atunye di dunia.." Jawab bang Pendi asal. Kagak heran kalo centong sayur langsung melayang kemukanye bang Pendi. Untungnye bang Pendi ude belajar jurus " kunyuk metik petai " dari wiro sableng, jadi ntu centong kagak kena jidatnye...hehehe

Gara-gara kagak kuat beli lauk akhirnye bang Pendi tiap hari cuma makan ubi yang die cabut dari kebon. Sekalinye ade nasi..lauknye cuman jengkol semur, abis cuman ntu yang ade di kebon. Lha..kalo tiap hari makannye ubi-jengkol...ubi-jengkol, ude bisa kebayang pan baunya.... kalo kentut..hehe. Tapi antara bang Pendi, babenye ame enyaknye ude punya perjanjian tak tertulis, kalo kentut mesti diluar rumah. Mangkanye jangan heran kalo lewat rumah bang Pendi terus ngeliat enyaknye lari-lari keluar rumah sambil ngangkat kaennye dikit biar ngga keserimpet..." awas.....awas...!!"  nyampe diluar pegangan pager terus...Brooooottt !!! wuiiih...mantap dah...ude kagak pake baygon lagi, nyamuk-nyamuk dikebon ude pasti langsung tewas seketika....hehehe

Udehan dulu ye...ide bang Pendi lagi buntu. Met wiken aje deh...

PT. JENGKOL LEGIT PULEN

Diruang rapat direksi, semua staf sudah berkumpul. Mereka masih menunggu pak Pendi Van Burick MBA ( Muka Bonyok Ancur ) yang belum hadir untuk memimpin rapat. Tapi tak lama yang ditunggu datang, pak Jabrik Kucay Hotae sebagai wakil direktur langsung merapikan dasinya lalu.." Selamat pagi...cikgu ! " ( halaaaah...dia kelepasan gara-gara keseringan nonton Upin & Ipin. Para staf langsung cekikikan, pak Pendi melotot ).

" Selamat pagi saudara-saudara, seperti biasa pagi ini kita akan mengadakan rapat koordinasi rutin dan seperti biasa pula saya ingin memulai rapat ini dengan mendengar laporan dari setiap divisi. Silahkan dimulai dari divisi penjualan, Diana...jangan lupa di catat ya ! Eh...kenapa kamu, kok kelihatan duduknya gelisah gitu ? " Tanya pak Pendi kepada Diana Kisut Keset..sekretarisnya.

" Anu pak...melihat bapak saya jadi pengen.." Ujar Diana Kisut Keset malu-malu. Dada pak Pendi Van Burick langsung berdebar-debar...pagi-pagi gitu lho..! lalu dia mendekatkan wajahnya dan berbisik.." Sssst..jangan sekarang ! nanti-nantilah saat jam makan siang "

" Ngga bisa pak...sudah ngga tahan nih ! Saya ijin ke wc dulu deh pak..." Ujar Diana. Muka pak Pendi langsung memerah seperti tomat setengah busuk.." Sialan...kirain pengen apa, ternyata pengen buang aer.." Gerutu pak Pendi dalam hati, para staf cekikikan lagi.

" Sudah...sudah, ayo di mulai " Ujar pak Pendi menghilangkan malu.

Pak Abdu Dadidu memulai laporannya.

" Dari divisi promosi dan penjualan melaporkan bahwa di awal kwartal tiga penjualan produk jengkol kita mengalami sedikit penurunan. Hal itu bukan disebabkan kapasitas produksi atau kwalitas produk kita yang menurun tetapi karena produk kita kalah bersaing dengan produk impor dari negara Muangthai BuangThai. Produk mereka lebih besar dibandingkan dengan produk kita, barangkali karena kebijakan pemerintahnya yang meminta penduduk untuk buang kotorannya di bawah pohon sehingga tanahnya lebih subur. Selain itu ada satu lagi kelebihannya pak, yaitu produk jengkol mereka juga tersedia berbagai macam rasa...ada jengkol rasa nanas, jengkol rasa mangga bahkan jengkol rasa strobery " Ujar pak Abdu Dadidu. Dahi pak Pendi langsung berkerut.." Gimana ceritanya tuh, bisa begitu ? " tanyanya dalam hati.

" Kok bisa ? saya malah belum coba tuh...Nah terus apa langkah antisipasinya ?" Tanya pak Pendi kemudian.

" Ya pak...kami sudah mengambil langkah-langkah untuk meningkatkan penjualan. Pertama...kami berupaya melakukan kerjasama dengan Badan Eksekutif Mahasiswa dari setiap perguruan tinggi agar dalam setiap demonstrasi dapat kita sokong dengan satu atau dua truk jengkol untuk aksi lempar polisi. Selama ini aksi lempar mengunakan batu, selain berbahaya...untuk cari-cari batupun akan makan waktu. Nah..dengan adanya jengkol produk kita, selain tak terlalu sakit setelah demo jengkolnya juga bisa dikumpulkan para penduduk untuk dimakan..." Ujar pak Abdu Dadidu. Pak Pendi Van burick hanya manggut-manggut senang.

" selain itu, kami juga mulai mendekati para petinggi polri agar juga menggunakan produk jengkol kita untuk meredam para pendemo. Selama ini polisi biasa menggunakan water canon atau gas air mata yang kami pikir biayanya cukup mahal. Nah...kita akan buat produk olahan berupa cairan dari saripati jengkol yang bila disemprotkan ke para pendemo akan menimbulkan bau menyengat. saya jamin demo akan segera bubar.." Ujar pak Abdu Dadidu menyelesaikan laporannya. Para staf langsung tepuk tangan mendengar ide jenius dari pak Abdu tapi tidak ada respon dari pak Pendi. Beliau terlihat terkantuk-kantuk dengan air liurnya yang menetes-netes di meja karena semalam dirumah naik sampai 3 kali ( naik ke atap benerin genteng bocor...maksudnya ).

" Hoiiii...baru ditingal sebentar ude tidur aje lu Pen ! nih...pesenanlu..." Kate si Jabrik sambil nyerahin nasi bungkus.

" Ah...sialanlu ! gangguin aje. Lauknye apaan nih..." Tanye bang Pendi

" Ya...jengkol rendang pesenan lu..!"

" Mantaaaaap....!! " Kate bang Pendi seneng. ( ck..ck..ck...saking kepengen makan jengkol sampe ngimpi jadi direktur PT JENGKOL LEGIT PULEN...hehhehehe...)

DUREN TAMBUN

Bang Pendi kalo lagi kebagian nganter ikan asin ke Kalibata suka lewat depan makam pahlawan. Disitu biasanye suka banyak yang jualan duren, kalo dulu perasaan bang Pendi yang dijual duren petruk alias duren dari Semarang tapi sekarang kebanyakan duren Montong alias duren bangkok yang dijual. Bang Pendi sebenernye suka heran, apa aja asalnye dari Bangkok...jambu bangkoklah...pepaya bangkoklah...ayam bangkoklah...kakek-kakek bangkok ( yang ini bongkok...hehehe ). Yang bikin bang Pendi tambah heran, ape insinyur-insinyur pertanian dari IPB kagak ade yang bisa merekayasa buah-buahan Indonesia hingga bisa ngalahin yang bangkok-bangkok ntu. Atau karena orang Indonesia aja yang kagak nasionalis atawe cuma merasa keren kalo makan buah-buahan yang asalnye dari luar negeri doang. Tapi kalo bang Pendi tanya jawabannya.." Ini soal rasa bro....masalah lidah, bukan nasionalis ape kagak nasionalis !" Emang begitu ya..? Ah...embuhlah....!

Nah..kalo lihat fisiknya, duren petruk emang kalah jauh ame duren montong. Namanye juga petruk, tau sendiri pan..!? kalo petruk itu kurus ceking dan yang panjang cuman idungnye doang. Mungkin duren semar, duren bagong atawe juga duren tambun ( gendut ) yang bise ngalahin duren montong. Eh..ngomong-ngomong  tambun, kemaren ade istilah yang bang Pendi baru denger tuh...yaitu rekening tambun. Kalo kagak sale sih...ntu artinye rekening yang bengkak karena gaji yang dipunya kagak sesuai dengan jumlah rekening yang ada. Kalo rekening tambun itu miliknye si Gayus atawe antek-anteknye semua orang juga ude pade tau tapi yang ini punya perwira-perwira polisi kita sodara-sodara...! bang Pendi cuman bisa geleng-geleng kepale dan juga bingung, duit darimana ya ? kagak mungkin pan duitnye dari nilang motornye bang Pendi..hehehe.

Wah...kalo bang Pendi jadi presiden, bang Pendi bakalan bikin peraturan...barang siapa yang gede...eh maaf maksudnye siapapun yang jadi pejabat kagak boleh punya rekening di bank. Kalo mao nabung harus pake celengan semar ! nah..kalo gitu pan, selain bisa melestarikan budaya nasional juga bisa membantu pengrajin celengan. Dan yang paling penting, kalo punya duit banyak bakal ketauan...makin banyak duitnye makin gede tuh celengannye. Ye.... nggak !

Halaaaa...bang Pendi  ngaco nih ! ya ude..balik lagi ke soal duren. Dulu...kalo mao makan duren, bang Pendi kagak pernah mikirin beli ( mikir ngembat punya orang..iya ! hehehe ). Dirumahnye bang Pendi pohon duren banyak..tinggal nungguin jatoh...gedebuk ! jadi deh makan duren, nah sekarang boro-boro dah...satu pohon juga kagak ! pohonnye ude ganti jadi tiang listrik ame tiang rumah semua. Tapi terus terang bang Pendi dari dulu ampe sekarang kagak bise yang namanye belah duren alias bisa makannya doang, kayaknye sih emang gampang-gampang susah. Siape yang mao ngajarin ? hehehe. Nah...sekarang siape nih yang dirumahnye punya banyak duren...kirim-kirim deh kerumahnye bang Pendi...hehehe.

Eh...sohib2 ude pade tau belon kalo ade kontes bikin cerpen dari Mba Fanny Nah...bang Pendi ude bikin tuh cerpennye, kalo mao baca2 mampir deh di hanya ilusi. Sekalian ikutan ye... !
Kalo ngga, ikut juga deh..kontes menghayal melakukan hal yang paling gila buat pesta ulang tahun yang diadain ame Non Dela

Dua-duanya berhadiah buku. Ya ude...ikutan aja deh !

BAKAR AYAM PENDI

Sekarang ini kagak dimane-mane, orang-orang pade gila bola. Kagak tua kagak muda semua pade ngomongin piala dunia. Kalo lagi pade ngumpul nonton bareng komentarnye juga macem-macem. Biasa deh...kayak komentator bola yang ade di tv, bisanye cuman komentar doang atawe nyela yang maen padahal kalo die disuruh maen belon tentu juga bisa..hehehe. Nah... saking pade demen ame bola, sampe-sampe bulutangkis Indonesia terbuka kagak ade satupun yang ngomongin. Padahal untuk ukuran bang Pendi prestasi pemaen-pemaen Indonesia sungguh luar biasa ! masak sebagai tuan rumah kagak satupun ke bagian gelar. Ck..ck..ck..hebat..hebat ! Eh..ape karena ude biasa kali ya, jadi orang-orang nganggapnye kagak aneh lagi...hehehe.

Nah...balik lagi ke soal bola. Bang Pendi yang sebenernye kagak begitu ngerti soal bola jadi ikut-ikutan demen nonton bola apelagi nontonnye rame-rame di pos ronda. Enaknye lagi kalo pas nonton tiap malem ade aje yang dibakar buat ganjel perut. Kadang singkong, kadang ubi, kadang ikan sapu-sapu sampe sendal jepit bang Pendi ikut dibakar ( yang ini kagak sengaja..hehehe ). Yang nonton disitu tiap malem giliran nyari bahan buat dibakar, kayak kemaren gilirannye bang Pendi ame si Jabrik yang nyari.

" Wah..gimane nih Pen !? gua lagi kagak punye duit. Elu punya ngga ?" tanye si Jabrik waktu ntu.

" Tenang aja Brik..! nanti kita minta aje ame kong Amin " jawab bang Pendi santai.

" Mintanye gimane Pen ? ini pan ude jam satu pagi..masak kite mesti gedor-gedor rumahnye kong Amin "

" Ya ude tenang aje, nanti gue ajarin caranye..." kate bang Pendi, si Jabrik akhirnye nurut aje. Sesampenye di kebon singkong kong Amin, bang Pendi nyuruh si Jabrik minta singkong sama kong Amin.

" Kong Amin...aye minta singkongnye barang dua pohon, buat temen nonton bola.." kate si Jabrik ikutin ajarannye bang Pendi.

" Ambiiil...aaaaja cuuu ! kalooo kuraang, singkongnyaaa ambiiiil ajaaa yang banyakaaan. Guaaa relaaaa !" jawab bang Pendi niruin suaranye kong Amin. Si Jabrik cekakakan denger suaranya bang Pendi, terus sambil nahan-nahan tawa die bedua nyabut tuh singkong. Jadi deh malam ntu..pesta bakar singkong.

Malam ini giliran si Amat ame si Jabrik yang nyari bahan yang bisa dibakar. Bang Pendi sempet nyeletuk " cari yang enakan dikit Brik...! ude bosen gue makan singkong mulu...sekali-kali ayam kek !". Si Jabrik ame si Amat cuman manggut-manggut aje.

" Brengsek si Pendi maonye enak aje, darimane kite punye duit buat beli ayam " kate si Amat ngedumel.

" Ah..tenang aje Mat ! nanti kite pake ilmunye si Pendi. Elu ikut aje deh !" kate si Jabrik. Nggak lame die bedue ude bawa ayam ke pos ronda.

" Wah..ini baru Jabrik namanye ! ternyate elu bise diandelin.." kate bang Pendi, si Jabrik cuman nyengar-nyengir kadal. Bang Pendi langsung semangat dan die yang inisiatif motong ame nyabutin bulunye tapi pas lagi megang ayamnye bang Pendi sempet bengong. Ada perasaan aneh..kayak-kayaknye die ngenalin ntu ayam...tapi " Sebodo ah...! yang penting gue makan ayam ni hari " pikir bang Pendi. Ayam langsung dibakar dan dalem itungan menit ayam langsung ludes. Tapi abis makan, bang Pendi masih penasaran ame ayam tadi..

" Eh...Brik, ngomong-ngomong ntu ayam elu beli dimane ? " tanye ban Pendi penasaran.

" Yah...kagak pake beli Pen ! Gue pan ikutin ajaran lu kemaren. Si Amat yang minta ijin, nah..gue yang kasih ijin " kate si Jabrik sambil cengengesan.

" Busyeet...elu ngembat ayam orang, ayam siape ?" bang Pendi masih penasaran.

" Ayamnye kong Jupri.." jawab si Jabrik nyantai.

" Hah..kong Jupri !? itu pan babe gue...berarti tadi ayam gue dong !?. Brengsek lu Brik...pantesan aje gue kayak ngenalin ntu ayam. Gantiin nggak !" kate bang Pendi marah sambil mao mukul si Jabrik tapi langsung dipisahin temen-temennye.

" Lha...gue pan ude minta ijin Pen, pan....elu juga yang ngajarin !. Lagian yang paling rakus makannye juga elu.." kate si Jabrik. Bang Pendi kagak jadi marah, die langsung diem tapi badannye langsung lemes.." Yah..selesai sudah kebersamaan gue ame Novi ( nama ayamnye..hehehe ) " kata bang Pendi dalem ati. Si Jabrik ame yang laen cuman cekikikan aje ngeliat bang Pendi yang lagi manyun.

JAKARTA ( Makin Tua Makin Peyot )

Kalo ngomongin PRJ ( Pekan Raya Jakarta ) bang Pendi suka heran en bingung sendiri. Bukan ape-ape, soalnye sebagai orang yang ngaku anak Jakarte...sebujeg-bujeg ( tak sekalipun ) selame idupnye die kagak pernah tau yang namanye PRJ. Ade apaan disono ? orang-orang pade ngapain ? die kaga pernah tau. Yah..kalo liat filosopi hidupnye yang tidak suka keramaian rasa-rasanye emang pantes die kagak pernah kesono. Kalo ade yang tanye kenape die kagak ke PRJ paling-paling die jawab..." Capek ah..! orang-orang yang ade disono pasti bakalan ngerubutin gue buat minta tanda tangan. Pan bise pegel tangan gue ! " ( he..he.. )

Tapi bise jadi ape yang die bilang bener, soalnye bang Pendi emang rade-rade unik. Uniknye...kalo orang-orang punye pitak di kepale, nah...bang Pendi punye pitak di pipi. Lho..kok bise, gimane ceritanye ?. ceritanye pitak itu dulunye bekas panu, mending panunye kecil...nah yang ini panunye selebar duit logam cepean lama...pan keliatan bangat tuh !. Waktu lagi marahan, neng Siti pernah ngeledek die sambil nyanyi lagunye Betharia Soneta ( mantan pemain gendangnye grup musik dangdut bang haji Rhoma, jadi dibelakang namanye pake soneta...he...he ). Lagunye begini...."  Lihatlah tandaaaa...Pitak di pipiiii...bekas gambar panu..mu " he..he. Nah..gare-gare itu bang Pendi jadi kagak pede, kalo keluar rumah die suka pake tensoplast buat nutupin panunye. Lumayan jadi nyaru ( tersamar ) dikit..paling-paling kalo ade yang tanya die jawab...kena silet atawe kena sabet golok, semalem abis kelahi ame maling...he..he

Nah...kembali ke soal PRJ. Acara ntu biase barengan ame ulangtahunnye kota Jakarte, taon ini kalo kagak salah sih ulang tahun yang ke 483. Ude tua juga ye..? tapi kalo bang Pendi pikir-pikir, Jakarte makin tua bukannye tambah bener atawe banyak kagak benernye. Jalan-jalan malah tambah macet, kalo ujan makin sering banjir dan juga makin kagak aman. Perasaan beberape taon lalu waktu bang Pendi masih suka maen kesana kemari, menclok sana menclok sini jam 1 atawe jam 2 pagi... nyante-nyante aje ! tapi sekarang...boro-boro dah, meleng dikit dompet bise melayang...itu masih untung ! kalo lagi apes mah..nyawa juga bise melayang. Sekarang aje kalo kemane-mane bang Pendi kagak pernah mao bawa duit banyak-banyak di dompet ( lagian kapan die pernah punye duit...he...he )

Atau Jakarta itu bisa disamain kayak orang kali ye..? tambah tua bukannye tambah cakep alias cuman menang tuanye doang. Ude kagak bise ape-ape...bisanye cuman ngemut doang ! he..he. Tapi mudah-mudahan deh...bang Fauzi ame aparatnye punye kepedulian yang tinggi buat ngebangun Jakarte agar bise lebih baik lagi dan bukannye cuma mikir...proyek ape lagi nih yang ngedatengin ( dapat ) duit...he...he... maaaaaaf !

Selamat ulangtahun deh buat kote Jakarte. Moga-moga aje bise nemu jamu kuat yang mantep, biar bise jadi tua-tua keladi makin tua makin jadi...ye ngga ?

Tariiiiik....maaaaang...!!

OBROLAN DI WARUNG KOPI ( 20 )

GARE-GARE BOLA

Bang Pendi  :  Ce...elah...pagi-pagi muke ditekuk  aje mpok !  mendingan bikinin kopi dah...biase, kagak pake laler, kagak pake lama dan kagak pake manyun..( sambil cengar-cengir nyomot pisang goreng )

Mpok Mumun  :  Banyak omong lu Pen ! ude tau gue lagi kesel...pake ngeledek lagi...( bales mpok Mumun sewot )

Bang Pendi  :  Ya...maaaaaaf, lagian kenape sih mpok ?

Mpok Mumun  :  Gimane gue kagak kesel ! laki gue ( suami ) mulai abis maghrib ampe subuh kerjaannye nonton bola mulu. Boro-boro dah bantuin gue beres-beres barang dagangan...tiap malem nyolak-nyolek gue juga kagak ! ( bang Pendi ngakak ampe keselek pisang goreng....kaciaaaan deh lu ! kate bang Pendi dalem ati )

Bang Pendi  :  Yah...susah deh aye ngomongnye, namanye juga piala dunia yang adanye cuman 4 taon sekali...wajar kali mpok ! tapi ngomong-ngomong, kate ustad Sobri...kagak baek mpok ngomongin kejelekan laki ( suami ) ke lelaki laen apelagi kalo ude soal kasur. Itu sama aje ngundang setan mpok..!

Mpok Mumun  :  Kalo ngomong sama elu pan laen Pen...emang gue ude ngomong sama setan ! lagian elu pan cuman anak kecil..( mpok Mumun jadi cekikikan, bang Pendi yang lagi nguyup kopi jadi batuk-batuk.." Bujug buneng...! gue dibilang setan, lagian perasaan dari kemaren gue dibilang anak kecil mulu. Ape karena gue ganteng dan imut-imut ye ? " pikir bang Pendi sambil mesam-mesem sendiri )

Si Jabrik  :  Nah..nah.. lagi ngomongin apaan nih !? lagi ngomongin gue ya ? ( tanya si Jabrik sambil nyelonong masuk )

Bang Pendi  :  Jiaaaah...kepedean amat lu Brik ! gue lagi ngomongin bola " Jabulani " yang jalannye kagak jelas dan sering bikin kiper pade bingung. Sama persis ame mukalu yang kagak jelas..! ( kate bang Pendi sambil cengar-cengir )

Si Jabrik  :  Kagak jelas gimana Pen !? ( tanye si Jabrik bingung sambil ngeganyem singkong rebus )

Mpok Mumun  :  Emang kagak jelas Brik ! itu muka ape pantat...abis buriknye sama...! ( mpok Mumun cekikikan lagi, bang Pendi cekakakan, si Jabrik manyun.." Set dah...mimpi ape gue ya ? pagi-pagi ude jadi bahan ledekan " pikir si Jabrik sambil nerusin ngeganyem singkongnye )

Ude dulu ah...! takut kepanjangan...lagian Brazil ude mao maen nih..he..he