HUJAN...HU..HU..HU..JAN

Duh...hujan turun lagi

Berisik butir-butir air mengetuk-ngetuk genting dan jendela

Bagai ketukan tak sabar tukang kredit menagih hutang

Air tercurah...meluap, mungkin karna dewa Indra lupa menutup keran

Atau bidadari khayangan meratap sedih melihat Pendi pangeran bumi patah hati

Duh hujan turun lagi

Disertai...diiringi

Guntur bergemuruh dan menggelegar

Guruh menari dan mencipta lagu

Megawati nggak ikutan, beliau cuma pidato

Duh...hujan turun lagi

Kecebong...lele dan kodok bangkong menyanyi dan menari tari India

Kambing...kucing dan landak lari terbirit lalu meringkuk manis sambil cabuti bulu ketek

Tukang gorengan bersorak dan tertawa

Tukang es lilin menangis sedih

Hujan memang s'lalu tinggalkan suka dan duka

Duh...hujan turun lagi
Basah..basah...basah...semua basah
Baju luarku basah, baju dalamku juga
Celana luarku basah, celana......juga

Kapan kau berhenti ? tidakkah kau merasa iba

Kini kumenggigil dan meringkuk hanya berselimutkan kain

Hujan...hu..hu..hu..jan

ANAK JENGKOL

Malam ini rumah bang Pendi lagi rame, banyak sodare yang dateng. Maklumlah...enyak ame babenye lagi ngerayain hari perkawinan yang ke 15. Tapi ntu yang bikin bang Pendi bingung, lha..bang Pendi sekarang umurnye ude 25 tapi kawinnye enyak ame babe baru 15 taon, gimane ceritanye..? Ude bang Pendi tanye sih ame babe tapi jawabnye plintat-plintut kayak terpidane korupsi, akhirnye mamangnye ( paman ) yang jawab..." Sebenernye yang ngelahirin elu bukan enyaklu ! babelu nemuin elu di bawah pohon bambu deket pinggir kali, lagi ngeringkuk ame biawak.." kate mamangnye. " Bussseeett...dah ! berarti gue anak biawak dong.." tanye bang Pendi dalem ati. Yang bikin penasaran lagi, bang Pendi bingung ame umurnye...bener ngga 25 taon ? perasaan baru 17...he..he. Abis babenye lebih tau umur taneman daripade umur anaknye, coba aje tanya...

" Pohon pisang ini umurnye berape beh..?" 

" Oh..ini umurnye 8 bulan nih..!" jawab babe

" Kalo pohon pete itu umurnye berapa beh...?"

" Nah..kalo pohon pete itu umurnye ude 4 taon.." jawab babe lagi

" Kalo umurnye si Pendi berapa beh..?"

" Wah...kalo itu mah gua kagak tau dah ! tapi waktu lahirnye si Pendi barengan gua nanem pohon jengkol. Nah pohon jengkol ntu umurnye ude 25 taon, ya jadinye umur si Pendi 25 taon juga.." jawab babe bang Pendi. 

Guubrrrraaaakkk...!! umur gue disamain ame pohon jengkol...bang Pendi ngedumel. Dan keselnye bang Pendi berlanjut ampe malem, karena die terpaksa tidur di ubin gare-gare kamarnye ditempatin ame sodaranye. Karena kaga biase tidur diubin bang Pendi jadi kaga bisa merem apelagi nyamuk genit-genit bangat colak-colek mulu...maennye keroyokan lagi, kagak berani satu lawan satu...he..he. Tapi untungnye ade sodare juga yang tidur diubin pake tiker, jadi berase ade temennye. Nah...lagi tidur-tidur kadal ( ganti istilahnya ah..! ngga enak ame ayam, namanye dibawa-bawa mulu...he...he ), mamangnye malah negor.." Elu tidur gelisah amat Pen, bolak-balik kayak bakar singkong kagak mateng-mateng..". Bang Pendi gondok, padahal mata ude mao merem...eh malah diajak ngomong. Bang Pendi pora-pora kagak denger tapi mamangnya malah ngajak ngomong terus. Tiba-tiba....Duuuuuuuuutttt..!! " Busyeeet...deh ! kurang ajar bener lu Pen...diajak ngomong malah ngentutin, beuh...! bau jengkol lagi.." mamangnye ngomel sambil mao jitak kepalanye bang Pendi, tapi bang Pendi ude ngacir duluan..." Eh..maaf...maaf, kelepasan...!! " kate bang Pendi sambil cengengesan.

Notes : 
Postingan ini sudah direvisi, itupun setelah otaknye bang Pendi diservis ( ternyate..akinye soak..)..he...he. Makasih buat sohib-sohib yang ude ngingetin bang Pendi, dan maaf buat sohib yang ude baca postingan kemaren.

NENG SITI & NENG TANIA ( ganti foto )

Cuma postingan iseng..!

Wah...bang Pendi puyeng dah...! walau ude lagi pedekate ame neng Tania tapi wajah neng Siti masih aje terbayang-bayang dipelupuk mate. Ya ude...bang Pendi minta bantuin sohib-sohib deh, lebih baik pilih siape ? neng Siti ape neng Tania. Nah..ini fotonye ! tapi seperti biase, fotonye ngga lame-lame bang Pendi pajang. Soalnye kalo neng Siti tau fotonye di pajang, nanti die malah tambah ngambek...
Eh...ude ganti tuh ! abis neng Siti dah ngamuk-ngamuk minta royalti makan bakso..he..he

Yang sebelah kiri bawah neng Tania, yang sebelah kanan atas neng Siti

Pilihin yang mane, kiri...kanan atau yang tengah...he..he

Kasih tau bang Pendi ye..! tapi jangan lama-lama
Yah...kelamaan sih, bang Pendi ude kembali kewujud aslinye...he..he

Oh...ya , ada yang suka maen tebak-tebakan ngga ? silahken mampir di Hanya Ilusi

Ditunggu ye....!

PUISI BUAT GEBETAN BARU

Bang Pendi ude mulai semangat lagi, sekarang die ude bise dikit-dikit ngelupain neng Siti. Soalnye die lagi kesengsem ame jande beranak tujuh...bujug buneng..!! dari kampung sebelah ( sebelahnya kampung, sebelahnye lagi kebon binatang...he..he ). Sekarang bang Pendi lagi minta edpis ame si Jabrik gimane caranye deketin ntu cewe..

" Sebenernye gue yakin Pen, elu bise dapetin cewe mane aje yang elu taksir. Soalnye kekurangan lu cuman atu yaitu kurang cakep..!" kate si Jabrik

" Cakep itu relatif Brik..! cewe sekarang ngga cuma liat tampang..." bales bang Pendi

" Justru itu Pen...yang gue tau bukan mukalu aje yang kurang cakep, isi dompetlu juga kagak cakep...! setau gue..dompetlu tebel isinya cuman bon utang doang...!" kate si Jabrik sambil ngakak. Bang Pendi diem sambil garuk-garuk kepale.." Tumben..gue kena skak si Jabrik..!?" pikirnye.

" Ya..ude Pen, elu bikin puisi aje..! seinget gue elu pernah jadi juara puisi antar hansip sekelurahan..." si Jabrik ngakak lagi.

" Oh...iye...ye..Eh...kapan gue jadi hansip..!" bang Pendi bingung sendiri. Tapi die nurutin sarannye si Jabrik, die langsung corat-coret bikin puisi. Ngga lame.." Nah...ude jadi nih Brik..! coba dengerin,...judulnya Tania tapi elu jangan komen dulu kalo gue belon selese..." si Jabrik ngangguk-ngangguk aje kayak burung celepuk.

TANIA

Ta...ta...tania

Maaf..mulutku selalu tergetar bila menyebut namamu

Bibirku terasa kaku bagai udang windu di freezer dua minggu

Kali ini ijinkan  kukeluarkan isi hati tanpa empedu

Kau pasti tau, empedu itu pahit...Tania

Ta...ta...tania

Terus terang dan pastinya terang terus

Kadang tatap matamu tajam bagaikan pisau dapur menghujam jantung ayam

Kadang tatap matamu sejuk bagai nongkrong dibelakang kulkas

Senyummu  merekah tak kalah dengan senyum kuda nil

Kaulah makhluk terindah didunia ini selain ayam kalkun

Ta...ta..tania

Menatap wajahmu hatiku bergetar bagai gendang bertalu

" Pak...tipak...tipung..swara gendang bertalu-talu.."

" Pura-pura bingung hati orang siapa yang tau.."

Maaf...aku tak kuasa berdendang

Karena memang aku suka  rendang

Apalagi yang masak orang Padang

Sambalnya memang terasa nendang..

Puisi ini kubuat sambil begadang dalam gudang

" Ude...!?" tanye si Jabrik. Bang Pendi cuman ngangguk aje sambil cengar-cengir. " Jiaaaahhh...puisi kayak gini mah, boro-boro bikin si Tania kesengsem...paling-paling elu ditendang lagi kayak si Siti kemaren.." Kate si Jabrik sambil ngakak, bang Pendi ngejawab tapi tiba-tiba..." Waddaaaaauuuoowww...!!" tereak Bang Pendi kaget, pas pantatnye die ditendang ame koh Achong.

" Elu...beldua pada ngapain heh...!? keljaaaaaaa...!!" bentak koh Achong. Bang Pendi ame si Jabrik langsung ngacir ngangkatin beras lagi.

" Nah...gue bilang apa Pen...! belon ape-ape pantatlu ude kena tendang.." bisik si Jabrik sambil cekikikan.

" Ah..brengsek lu...!" omel bang Pendi sambil ngedumel sendirian.

OBROLAN DI WARUNG KOPI ( 19 )

BULU AYAM....BULU TANGKIS

Si Jabrik    :   Wah...maen bulu tangkis, badan pade pegel-pegel juga ya Pen..! Pegelnye ampe ke pantat-pantat, jalan gue ampe ngegang kayak mentok nih...( kate si Jabrik sambil cengengesan sendiri )

Bang Pendi  :   Elu sih...maen grabag-grubug kayak nangkep ayam ! Orang mah...maen kayak gue, sekali-sekali maen kalem kayak pak SBY...maen dropshot atawe maen netting. Sekali-sekali boleh maen ganas atawe maen smes , tapi jangan asal smes...bise-bise kepala orang pade ilang  ( bales bang Pendi sambil ngeganyem pisang goreng )

Bang Mamat  :   Mangkanye Brik..! kalo maen bulutangkis jangan musiman kayak maen layangan. Orang-orang rame ngomongin bulutangkis, elu baru pade maen....nah besok rame piala dunia gue rasa elu bedue pade demen maen bola...

Bang Pendi   :   Abis kayaknye gemes bin geregetan bang, pemaen Indonesia kalah mulu !! Lagian kagak enak kalo cuma jadi penonton....aye juga takut..

Mpok Mumun  :   Lha....takut apaan Pen...!? ( tanye mpok Mumun keheranan )

Bang Pendi   :   Yah...mpok, kayak kaga tau aje ! kalo nonton pan kite ngeliatin kok ( shuttlecock ), kalo koknye kekiri kite nengok kekiri...kalo kekanan kite nengok kekanan. Lame-lame leher bise kecengklak...! ( keseleo ). Asal tau aje mpok...walo ngetopnye dari Inggris tapi sebenernye asal muasal bulutangkis itu pan dari India. Mpok pan tau...orang India kalo ngomong godek-godek gitu kayak wayang golek, nah...ntu gare-garenye kebanyakan nonton bulutangkis ( kate bang Pendi sambil cengar-cengir, semua pade ngakak ngedengernye )

Mpok Mumun  :   Bise aje lu Pen...! orang India ngomong kayak gitu emang ude dari sononye. Eh...ngomong-ngomong elu bedue maennye pake ape, masih pake potongan triplex..? ( tanye mpok Mumun sambil cekikikan )

Si Jabrik   :   Ye...sembarangan aje, pake triplex...! kite-kite ude punye raket sendiri mpok. Nih..kalo ngga percaye liat raket punye aye... (sambil ngeluarin raket dari tas )

Bang Mamat  :  Coba gue liat Brik...!! Jiaaaahhhh...mereknye kok Bonex !? bukannye Yonex Brik....( bang Mamat heran bercampur geli, bang Pendi cuman cengengesan aje )

Si Jabrik    :   Ntu laen bang...! kalo Yonex aslinye pan dari luar negri, nah..yang ni asli buatan Surabaya ( kate si Jabrik sambil nguyup kopinye )

Mpok Mumun  :   Jiaaahhh...kayak singkatan bondo nekat pendukung Persebaya dong ! ade-ade aje lu Brik...( cekikikan lagi )

Si Jabrik   :   Ya...bise aje mpok ! mungkin aje yang punye pabrik atawe karyawannye emang anak-anak mude pendukung Persebaya. Iye ngga Pen...!?

Bang Pendi   :   Iye...betul tuh mpok...! jangan sangke anak mude cuman bise bikin rusuh doang, anak mude juga bise kreatif dan inovatif. Kayak aye nih...bikin kok sendiri pake bulu-bulu ayam. Liat...kreatif pan...!? ( sambil cengar-cengir nunjukin kok yang bulu-bulunye item )

Babe Jupri   :   Kreatif palelu bau menyan...!!! nih...liat kerjaaanlu....ayam gue jadi pade bugil semua. Tanggung jawab lu...!! ( bentak babenye bang Pendi yang tiba-tiba nongol sambil nenteng-nenteng ayam yang lagi meringkuk malu...he..he. Bang Pendi langsung pucet, yang laen juga kaget. Kopi yang lagi diuyup bang Mamat langsung muncrat kena mukanye si Jabrik. Mpok Mumun langsung mendek atawe ngumpet  di belakang meja sambil nahan-nahan tawa ). Pulang...lu...!! bentak babe Jupri lagi sambil narik kupingnye bang Pendi.

Bang Pendi   :   Ampuuun...be ! ampuuuuuun.....( tereak bang Pendi sambil meringis-ringis, pas babe Jupri ude keluar dari warung semua pade ngakak. Si Jabrik ngekek sambil ngelap mukanye yang kena sembur kopi  )

Mpok Mumun  :   Ya...ude gantian aje be...!! cabutin aje tuh bulunye si Pendi ( tereak mpok Mumun dari dalem, bang Mamat ame si Jabrik ngakak lagi )

( Besok-besok orang Indonesia kalo bikin shuttlecock  jangan dari bulu ayam, nanti kalo maen keseringan...." Keok...! Keok....! Keok....!"  he..he..he )

TAK KENAL MAKA TAK SAYANG

Bang Pendi emang laen daripade yang laen, selain sarap die juga kepale batu. Orang-orang mah...kalo mao deketin cewe paling kagak baek-baekin juga babe ame enyaknye. Kalo ngapel...bawain duren kek...! martabak kek...! atawe apes-apesnye bawain kue cucur..he..he ( Eh..ngemeng-ngemeng kue cucur pade kemane ye..? perasaan ude lama kagak ketemu. Gimane ketemu kalo kagak beli...! he..he ). Nah...kalo bang Pendi mah..boro-boro bawain duren atawe martabak, kasih unjuk batang idungnye didepan enyak ame babenye neng Siti aje die ogah !. Kalo die mao ngajak besukaan neng Siti, die cuman kasih kode dari kebon pisang samping rumah.

Tempo-tempo die pake kode suare kucing..." meooooong..!!" suarenye bang Pendi tapi neng Siti belon nongol.  Yang kedua..." meoooooong...meoooong !! " neng Siti kagak nongol juga..." meooong...meooong...meoooong...!!!" lame-lame bang Pendi kesel juga, tapi tiba-tiba enyaknye neng Siti buka jendela dan langsung nyiram bang Pendi yang lagi ngumpet pake aer bekas cucian piring. " Brisik amat sih..lu cing ! sono jauhan maennye..." omel nyak Salmine. Terang aje bang Pendi langsung basah kuyup, padahal bang Pendi ude dandan abis-abisan. Badan ude pake minyak nyong-nyong punye babenye, tangannye juga ude wangi pake autan sachetan ( abis kagak punye henbodi, yang penting wangi...! he..he ). Akhirnye ntu malem, bang Pendi gagal besukaan ame neng Siti.

Minggu besoknye, bang Pendi ganti kode. Maklumlah bang Pendi ude lama begaul ame James Bodong...katenye sih ganti-ganti kode biar musuh kagak gampang ngelacak...he...he. Nah sekarang die pake suara burung kusidang...bukan kutilang ! ( kena tilangnye kemaren..sekarang giliran sidangnye...he...he ). Denger suara burung dari kebon, keponakannye neng Siti yang kebetulan lagi pade nginep...buru-buru ngambil selepetan ( ketapel ). Langsung aje ntu anak pade nyelepet kearah semak tempat bang Pendi ngumpet...Plettakkkkk..!! wadaaooooow...!! pekik bang Pendi kesakitan. " samber geledek ntu bocah...kepale gue maen selepet aje..., awas lu pade...bakalan gue pites-pitesin kayak kutu..!! bang Pendi nyumpah-nyumpah sambil ngacir dari situ. Nah...itu pengalamannye bang Pendi tapi tetep aje die kagak mao terang-terangan kalo mao ngapel neng Siti. Enakan gelap-gelapan katanye..he..he

" Eh...elu ude baekan Pen ame si Siti ?" tanye si Jabrik waktu die bedue manggul beras.

" Ude sih...die ude mao baekan, tapi sekarang die cuman mao diajak besukaan kalo bilang dulu ame enyak babenye. Kalo kagak begitu...die kagak mao " jawab bang Pendi.

" Lagian elu mao enaknye aje...! mao ame anaknye kagak ijin ame yang miara..( pelihara ) "

" Emangnye kucing brik...dipiara ! sebenernye gue kagak kayak gitu brik...gue juga ude dateng baek-baek. Tapi gue ude terlanjur empet...! apelagi enyaknye kalo ngeliat gue...kayak ngeliat Brad Pitt..he..he maksudnye bangke. Mukanye sepet mulu...mentang-mentang gue cuman kuli manggul beras, lagian bodo amat dah...gue pan demen ame anaknye bukan enyaknye..." kate bang Pendi lagi.

" Ya...mungkin elu kurang trik-trik Pen, makanye sekali-sekali bawain apa kek...sekepel dua kepel.."

" Itu juga ude brik...! pernah sekali gue bawain martabak...waktu ntu kebetulan yang nerima babenye. Ngga lame die ngomong ame nyak Salmine..." Enyaklu...si Mince ude makan belon ? kalo belon ade makanan nih..." nah...gue pikir si Mince itu adenye si Siti atawe empoknye, eeeh...kagak taunye kucing. Wah...gue empet bangat tuh ame babenye.." gerundel bang Pendi, si Jabrik langsung ngakak sambil megangin perutnye tapi kagak lame die malah ngejerit...

" Aw...aw...aw...aw...aw...aw...!!" jerit si Jabrik

" Halaaaaa... makanye jangan kebanyakan nonton tipi, otaklu jadi penuh ame iklan.." pikir bang Pendi si Jabrik niruin iklan A&W di tipi.

" Aw....bu...bu...bukan Peen..! jempol kaki gue kejepit..." kate si Jabrik sambil nunjuk jempolnye yang kejepit kotak ikan asin yang didudukin bang Pendi. Sekarang gantian bang Pendi yang ngakak.

Nah..karena bang Pendi masih aje kepale batu atawe kagak mao baek-baekin calon mertuanye. Akhirnye sekarang die nyesel...pasalnye kemaren ternyate si Siti ngikutin ape kate enyak ame babenye yang nyuruh die ninggalin bang Pendi. Bang Pendi cuman bise pasrah..( diapa-apain die juga mao..! he..he ). Abis mao gimane lagi...itulah akibatnye kalo calon mertue kagak kenal ame bang Pendi, gimane mao disayang. Tapi yang pasti dalem ati bang Pendi ngucap..." Neng Siti...tetep neng Sitinye, yang ude ngebuat hidupnye berwarne kayak permen Gulali.."

SINGKONG BAKAR...BAKAR SINGKONG

Malem minggu kemaren, malem minggu yang apes buat bang Pendi ame si Jabrik. Die bedua kagak bise ngedet alias besukaan ame pacarnye. Kalo bang Pendi ngga bise kencan karena neng Siti masih ngambek ( gara-gara tukang jamu ) sedangkan si Jabrik gara-gara ceweknye ngambek disuruh dorong vespanye yang mogok saat menuju pertunjukkan dangdut. Jadi die bedua akhirnye cuman bise nongkrong dipinggir kebon sambil bakar singkong.

" Woiii..kagak usah dipikirin brik ! besok juga mati....lagian ngapain pake ngelamun, ayam gue kemaren mati gare-gare ngelamun..." kate bang Pendi sambil cengar-cengir.

" Sialan lu...! nyamain gue ame ayam. Gue lagi merhatiin bulan nih...jarang-jarang gue kayak gini " bales si Jabrik

" Eh..brik ! jangan pernah ngarepin indahnye cahaye rembulan kalo pikiranlu lagi kusut, ampe lagi kalo ngeliat mukale yang kusut...bise-bise indahnye akan sirna " kate bang Pendi lagi.

" Alaaaaa...sok puitis lu Pen...!"

" Ya..emang kudu begitu Brik ! walo kate orang gue ini sarap bin sableng tapi paling kagak gue punye sisi yang romantis..ye nggak !?"

" Percume aje elu romantis, buktinye si Siti masih tetep aje ngambek ame elu..."

" Masalahnye laen Brik...kalo soal cewe, elu mao romantis kayak ape juga kalo lagi besukaan cuma modal romantis kagak bakalan kenyang brik...! lagian kalo lagi besukaan mah..gue punye prinsip...less talk do more " celetuk bang Pendi.

" Lha...itu siapenye Demi Moore Pen..?" tanya si Jabrik

" Engkongnye...!! gitu aje kagak tau. Itu bahase Jawa Brik...yang artinye sedikit bicare banyak kerja. Ngerti kagak lu...!? " kate bang Pendi sambil cengengesan, si Jabrik cuman ngangguk-ngangguk aje kayak burung celepuk ( burung hantu ). Lagi enak-enak ngobrol sambil makan singkong dateng orang yang tampangnye kayak bang jampang. Pake peci item, baju item dan dipinggangnye keselip golok.

" Wah...kayaknye enak nih makan singkong bakar " celetuk ntu orang. Si Jabrik langsung mengkeret ketakutan tapi bang Pendi malah cengar-cengir.

" Oh..iye bang, bener-bener enak. Mao bang...? nih ambil dah...masih banyak kok singkongnye, tinggal nyabut..!" jawab bang Pendi cuek. Orang ntu cuman mesam-mesem aje terus ikut nimbrung makan singkong.

" Emangnye singkong ini punye abang ye ? enak dong kalo tinggal nyabut.." kate ntu orang lagi.

" Ya...bukan sih bang, tapi tenang aje..yang punye juga bakalan keder ( takut ) atawe paling juge die bise lari terbirit-birit ngeliat aye..." jawab bang Pendi masih dengan cueknye. Sedang si Jabrik mangkin mengkeret, die nyikut-nyikut badanye bang Pendi. " kenape sih brik..! lagi kebelet..?"

" Eh..iye nih Pen, gue kencing dulu ye..." kate si Jabrik dan langsung pergi pelan-pelan, padahal die seneng banget punye alesan buat kabur dari situ.

" Oh...yang punye singkong ini takut ye ame abang, emangnye abang ude tau yang punye siape...?" lanjut ntu orang.

" Ya...aye kagak tau juga sih bang...."

" Ya ude...kenalin ! gue Japra yang punye kebon singkong ini..." kate orang itu. Bang Pendi  kaget, singkong yang lagi die kunyah langsung mambur keluar. Muke bang Pendi langsung pucet, kakinye gemeteran...die celingak-celinguk nyari si Jabrik..." sialan nih si Jabrik, kagak bilang-bilang kalo ini orang yang punye kebon " bang Pendi ngedumel dalem ati. Die langsung bangun...niatnye mao lari

" Eh...mao kemane lu..! gantiin dulu nih singkong...enak aje lu maen cabut-cabut aje singkong orang. Elu pengen singkonglu gue cabut terus gue bakar...!!" bentak bang Japra sambil megangin kerah baju bang Pendi.

" Enyaaaaaaaaakkk..!!!" tereak bang Pendi sambil megangin celananye yang basah.