MAKAN TUH...BIJI RAMBUTAN...!!!

Wah...senengnya bisa posting lagi ! kemaren-kemaren ide lagi buntu dan terserang penyakit males..les..les. Ibarat kate aer kali, aer yang mao ngalir mampet gare-gare banyak orang yang sembarangan buang sampah di kali. Nah... ide posting yang ada juga sering-sering mampet, kayak kemaren...pas mao posting adaaaa... aje yang bikin ide jadi buyar. Bayangin aje...ude bela-belain ngantuk-ngantuk nongkrong ngadepin kompi, eh...diatas kepale ade cicek yang brisik ... akhirnye kagak jadi posting tapi malah nonton ntu cicek...hehehe

Nah... sekarang mao ngasih tau nih kalo Bang Pendi lagi gondok. Gare-gare rame berita teroris di Sumatera, pak RT jadi latah nyuruh warganye aktifin ronda. Padahal musin ujan...tau sendiri pan kalo dingin-dingin enakan ngeringkel di kasur sambil ngelonin guling . Lagian di kampungnye mana ada yang bikin bom, paling banter...bikin lontong...hehehe.

Malam minggu ini Bang Pendi ronda. Sebenernye sih gilirannye bukan malam ini tapi die minta tukar harinya, die mao di malem yang ade Si Jabrik...biar ade yang dikerjain atawe bahan ledekan. Ni malem Bang Pendi rade-rade telat, soalnye die nonton liga Inggris dulu...antara Chelsea lawan Persib...hehe. Nah..nyampe pas ronda empat temennye ude lagi maen remi termasuk Si Jabrik.

" Eh..gue ikutan dong !"

" Wah..kagak seru Pen kalo maen berlima, tapi daripade nganggur...mending elu bikin kopi dah atawe pijit-pijit pundak gue " Kate Si Jabrik sambil cekikikan yang laen pade ngakak. Bang Pendi gondok, bukannye gue yang ngerjain tapi malah kena skak. Karena kesel akhirnye Bang Pendi ngeloyor pergi.

" Eh..mao kemane..lu Pen !?" Tanye Bang Mamat

" Mao ngider ( muterin kampung ) !"

" Baguslah...! Eh...tapi elu kagak takut jalan sendiri ?" Tanye Bang Japra tapi Bang Pendi ngga ngejawab, Si Jabrik bisik-bisik " Dia mah berani bang...orang kalo ketemu setan bukan die yang takut tapi setannye yang ngacir kalo ngeliat mukanye.." Berempat pade ngakak lagi. Kalo Bang Pendi denger pasti die marah banget, soalnye die selalu merasa kalo mukanye mirip-mirip Justin Bibir...hehehe.

Bang Pendi sebenernye bingung mao kemane tapi lagi bingung-bingung die ngeliat ade pohon rambutan yang buahnye ude mateng-mateng. Sebenernye die takut dosa ngembat rambutan orang tapi die inget pesen  Wira-Wiri Sableng, gurunye " Jangan takut berbuat dosa yang penting nanti tobat.." ( Hah...emang kagak bener tuh ajaran gurunye ! ) Eh...belon pade tau ya kalo Bang Pendi berguru. Die emang  ude dua taon berguru...malah sekarang ude pegang Gelas Hitam ( bukan Ban Hitam ! Soalnye dua taon berguru bukannye belajar silat tapi kerjaannye cuma nimba ame bikinin kopi item buat gurunye...hehe ). Akhirnye Bang Pendi nekat uga naek pohon rambutan tapi belon juga sempet makan, die denger orang ngobrol...buru-buru die naek agak tinggi sambil ngintip...ternyate Si Jabrik ame yang laen. Nyampe di bawah pohon rambutan yang dinaekin Bang Pendi mereka malah berhenti.

" Kayaknye enak nih bang, ngeronda sambil makan rambutan " Kate Si Jabrik

" Wah..sakit perut iya...Brik ! Tapi kalo mao, elu ambil dah sendiri...." Jawab Bang Mamat, ternyate rambutan ntu kepunyaannye die. Si Jabrik langsung aje siap-siap naek, bang Pendi yang ada diatas jadi keder. Bukannye takut tapi die malu kalo ketahuan ngembat rambutannye Bang Mamat. Akhirnye die punya akal, die ambil rambutan terus die lempar kepalanye Si Jabrik. Si Jabrik kaget dan sempet bingung apaan yang nibanin kepalanye, die berhenti manjatnye sambil celingak-celinguk keatas. Bang Pendi nahan-nahan tawa terus die lempar lagi kepalanye Si Jabrik sambil bersuara....hihihihi..hihihihi...hihihihi !. Kagak pake bengong lagi, Si Jabrik langsung merosot turun...

" a..a..ada se..se..setannya bang..!!" Kate Si Jabrik ngadu ame Bang Mamat yang nungguin ngga jauh dari pohon rambutan.

" Ah...yang bener aje lu, gua aje yang punya kagak pernah nemuin...!" Bales Bang Mamat. Bang Pendi hampir ngakak ngeliat tingkah Si Jabrik, sekarang die ngerasa ude aman buat makan rambutannye. Tapi baru aje die caplok ntu rambutan tiba-tiba angin niup agak kenceng, pas die nengok...die ngeliat ade putih-putih melayang kearahnye. Bang Pendi panik....buru-buru die turun ( biasanye kalo keadaan kayak gitu die pasti tereak-tereak tapi sekarang kagak karena dimulutnye ade rambutan..hehe ). Saking buru-burunye Bang Pendi kagak merhatiin lagi kalo cabang pohon yang die pegang kecil, jelas aje ntu cabang jadi patah akhirnye Bang Pendi jatoh dan badannye sukses dengan gilang gemilang mencium tanah...

" Gedebuuuuuukkkkk...!! "

Si Jabrik ame yang laen kaget dan pade bengong. Walau takut-takut die pade nyamperin asal suare.

" Busyeeeet...elu Pen ! Kirain apaan....eh..kenape lu ?" Kate Si Jabrik yang ngeliat Bang Pendi yang nggak bise napas kayak orang sakit asma.

" Ude..ude...tenang Pen, ambil napas pelan-pelan " Kate Bang Mamat tapi Bang Pendi geleng-geleng sambil ngasih kode bulat-bulat pake jari jempol ame telunjuknye, terus nunuk-nunjuk lehernye. Bang Mamat sempet bengong tapi kemudian die langsung mukul belakang lehernye Bang Pendi. Keluar deh..rambutan yang masih ade bijinye, terus gelinding di depannye Bang Pendi. Ternyate ntu rambutan nyangkut ditenggorokan Bang Pendi pas jatoh tadi, kontan aje yang laen langsung pade ngakak.

" Modar lu Pen..!! Makan tuh biji rambutan. Elu sih pake acara nakut-nakutin gue..." Kate Si Jabrik sambil cekakakan. Bang Pendi cuma bise nunduk malu sambil ngambil napas...

( Padahal putih-putih yang ditakutin Bang Pendi tadi cuma karung beras yang dipake Bang Mamat ngebungkus nangka tapi copot ketiup angin...hehehe )

KAYAK IKLAN DI TIPI

Hari ini Bang Pendi ame Si Jabrik belon kerja. Tadi sih sempet ke tokonye Engkoh Achong tapi berhubung masih suasana lebaran Engkoh Achong berbaik hati nambah liburnye satu hari. Sebenernye Bang Pendi ude tau karena Engkoh Achong ude bilang sebelum libur lebaran tapi die tetep dateng soalnye ngarep angpaonye dari Engkoh Achong..hehehe. Abis die bingung mao kemane, mao jalan-jalan kagak punye duit. Ke kebon binatang Ragunan yang murah die masih trauma, soalnye dulu waktu jalan-jalan disono ade yang tereakin.." Wooiii...kok elu ada diluar kandang sih !? Ntar nggak ada yang ngasih kacang loh. Pak petugas..! ada yang lepas nih..". Busyeet..emangnye gue monkey, dikasih kacang..hehehe.

Nah..karena masih suasana lebaran. ditengah jalan tiap papasan sama orang Bang Pendi inisiatif ngajak salaman walau kagak kenal siapa orangnye. Tapi Bang Pendi milih-milih, kalo cowok die pora-pora kagak liat dan kagak kenal tapi kalo cewek, Bang Pendi langsung sok akrab.." Eh...kemane aje nggak keliatan-keliatan !? Nggak pulang kampung nih...?" Kate Bang Pendi sambil nyodorin tangannye ngajak salaman. Terang aje ntu cewek pade bingung tapi karena emang masih suasana lebaran, akhirnye mao juga salaman ame Bang Pendi.." Lumayan dah..bise megang tangan-tangan yang alus " hehehe.

" Siapa Pen ?" Tanya Si Jabrik keheranan.

" Nggak tau..! Yang penting salaman..." Jawab Bang Pendi sambil nyengar-nyengir onta. Si Jabrik cuma bise garuk-garuk kepala. Nggak lame ketemu cewek lagi didepan warung rokok, Bang Pendipun mulai beraksi...

" Eh..si empok baru keliatan lagi, tambah cakep aje ! Nggak pulang kampung mpok..?" Tegor Bang Pendi sambil cengar-cengir. Yang ditegor keliatan bingung sambil celingak-celinguk ke warung.

" Pulang kampung kemane Pen ! Kampungnye pan disini, die pan bini gue.." Jawab Bang Japra yang lagi beli rokok. Bang Pendi kaget, buru-buru die nyamperin Bang Japra basa-basi ngajak salaman trus buru-buru ngacir. Si Jabrik ngikutin Bang Pendi sambil cekikikan.

Ditengah jalan Bang Pendi brenti. Die ngeliat ada nenek-nenek diteras depan rumah keliatan lagi bingung sambil megangin kertas ( kayak iklan ditipi..hehe ) Bang Pendi langsung nyamperin.

" Ada apa Nek , kok sedih ? "

" Ini cuu...nenek mao sms keluarga buat ngucapin Idul Fitri, tapi....."

" Tapi pulsanya kurang atawe habis, iye pan ?" Potong Bang Pendi sambil cengar-cengir ke  Jabrik.

" Iye..bener...bener Pen ! Kayak iklan di tipi.." Kate Si Jabrik

" Bukan cuu..Bukan pulsanye yang habis, tapi hpnya nenek ngga punya !" Jawab Si Nenek. Bang Pendi langsung diem. Mukanye merah karena malu dan gondok.

" Hah...Si Nenek ngada-ngada aje ! Ude tau kagak punya hp, ngapain juga pengen sms.." Bang Pendi ngedumel, Si Jabrik cekikikan lagi.

NUNGGU BEDUK ( 10 )

Matahari siang ini begitu terik, sinarnya jatuh tepat diatas kepala. Peluhpun bercucuran...( Jiaah..kayak mao bikin cerpen aja nih..hehe ). Maksudnye..ni hari panas banget, kata enyak..tengari bolong. Nah..karena cuacanye panas, Bang Pendi ame Si Jabrik ngadem di pos ronda.

Si Jabrik   :   Wah..lebaran ude dikit lagi nih Pen ! Semur daging masakan enyak gue, bau-baunye ude terasa nih...

Bang Pendi  :  Enyaklu masih kayak orang dulu aje Brik..masaknye semur mulu ! Sekali-kali suruh bikin teriyaki kek..! Ya..ude, besok lebaran elu kerumah gue deh ! Rendang ame ketupat sayur Padang baunye kemane-mane...( sambil ngipas-ngipas badannye pake daon pisang )

Si Jabrik   :   Wah..asiiik, kalo ke rumahlu gue bisa makan rendang bumbu Padang dong...!!

Bang Pendi   :   Lha...siape yang bilang dirumah gue masak rendang Padang !? Tetangga gue yang masak, ! baunye aje yang nyampe rumah gue...! ( sambil nyengir onta )

Si Jabrik   :  Busyeeet..!! Masa gue disuruh nyium baunye doang Pen, ape enaknye...( Si Jabrik ngedumel )

Ngga lame lewat Nyak Markonah ame Neng Endang, anaknye..

Bang Pendi   :   Eh...
                         Semilir angin meniup selendang

                         Masuk kandang ayam berpagar kawat

                         Kita lagi ngomongin rendang

                         Eh...Neng Endang yang mao lewat

Si Jabrik      :    Eh...iya Pen...!

                         Begadang sambil minum cendol

                         Tak lupa ketupat sayur Padang

                         Neng Endang emang bahenol

                         Liat aje pantatnye ude kayak dandang..*
                        * ( alat masak )

Neng Endang    :   Heh...ngomong apaanlu..!? ( bentak Neng Endang sambil nyamperin Bang Pendi ame Si Jabrik. Si Jabrik langsung diem klekep )

Bang Pendi    :   Sabar....sabar...Neng ! Bulan puase...kagak baek marah-marah. Lagian Neng Endang kalo marah-marah tambah imut-imut kayak IDEFIX ( sambil senyam-senyum )

Neng Endang  :   Siape lagi tuh IDEFIX...!? ( Tanya Neng Endang sambil melotot ke arah Bang Pendi, Bang Pendi kayaknye keder-keder juga )

Bang Pendi   :   E..e..e..IDEFIX ntu...e...anjingnye ASTERIX* ( Cerita komik anak-anak ) 

PLAAAAKKK...!! Pipinya Bang Pendi dengan sukses dapat tamparan Neng Endang yang pergi sambil ngedumel.

Bang Pendi   :   Eh...gue salah ngomong ya Brik...(  Bang Pendi meringis sambil ngusap-ngusap pipinya, Si Jabrik kagak ngejawab karena die nahan-nahan tawa sambil megangin perutnye )

NUNGGU BEDUK ( 9 )

SAHUR....SAHUUUUUUUR..!!

Wah...lebaran ude deket-deket lagi nih...! Di daerahnye Bang Pendi ade beberapa orang yang pergi pulang kampung . Nah sehubungan dengan itu, Pak Rt meminta warganye untuk menggiatkan ronda malam...maklumlah banyak rumah yang kosong. Sambil menjaga lingkungan, para peronda juga diminta untuk membangunkan sahur...karena kemaren ada yang ngedumel bangun sahur kesiangan. Kebetulan...malam ini gilirannya Bang Pendi, Si Jabrik ame Bang Namin, sekarang die pade lagi ngumpul dipos ronda..

" Ngubek-ngubek kampung udehan nih...Pen ! tinggal bangunin saur dah...tapi jam saur masih lama, yang enaknye  kite ngapain ye..." Tanye Si Jabrik

" Kite bakar singkong aje Brik.." Jawab Bang Pendi

" Ah...dasarlu perut karung, kagak ade kenyang-kenyangnye, dikit lagi pan mao saur..." Bang Namin ikut nimbrung

" Abis...kite ngapain dong !?"

" Kite ngintip aje nyok...!" Usul Bang Namin.

" Busyeet..! gile juga lu Min, bulan puase bukan ngajakin yang bener malah ngajakin ngintip. Eh...tapi siapa yang kite mao intip, ayo dah... ? " Kate Bang Pendi

" Sial lu Pen, kirain mao nolak...eh malah ngajak duluan " Celetuk si Jabrik, bang Pendi cengar-cengir. Akhirnye bang Pendi ame si Jabrik  ngikutin bang Namin tapi bang Pendi masih penasaran siapa target perintipannya kali ini..hehehe.

" Kite mao kemane sih bang ? p'rasaan ini jalanan mao ke Mushola.." Tanye bang Pendi

" Ude...tenang aje ! paha-paha aje sih...pasti keliatan " Jawab bang Namin. Pas sampe samping mushola die berhenti.." Sssst...diem ! Nah..tuh liat, ada paha..ji lagi mengaji " kata bang Namin  cekikikan, trus lari ngacir..

" Sialan lu Min ! gue ude deg-degan, ngga taunye paha..ji " Umpat bang Pendi sambil ngejar bang Namin diikutin si Jabrik. Sampe pos ronda bertiga ude pade ngos-ngosan....

" Wah...lari-lari gini gue jadi aus nih Pen ! bentar ye...gue balik dulu ngambil kopi, sekalian biar kagak ngantuk.." Ujar bang Namin. Bang Pendi ame Si Jabrik cuman ngangguk aje....tapi setelah ditunggu-tunggu bang Namin kagak nongol-nongol juga.

" Wah..wah...brengsek bener dah ah...! Si Namin ngambil kopi di Bogor kali ye..? kenape kagak sekalian aje ke Medan, biar kagak balik sekalian " gerutu bang Pendi

" Iye tuh...si Namin, gue jadi ngantuk nih...! " Ujar Si Jabrik sambil merem

" Eh...elu jangan tidur Brik ! Nanti yang bangunin saur siape..."

" Halaaa...masih lama Pen "

Tadi si Namin yang pergi, sekarang si Jabrik yang tidur. Bang Pendi jadi kagak punye temen ngobrol...akhirnye lama-lama bang Pendi merem juga disampingnye si Jabrik. beberapa saat kemudian Bang Pendi terbangun dari tidurnye. Sayup-sayup die denger suara orang mengaji...

" Wah...jam berapa nih ? brengsek.. si Jabrik maen minggat aje lagi, bukannye bantuin bangunin orang sahur.." gerutu Bang Pendi. Sambil gerutu bin ngedumel dengan pedenya bang Pendi mukul kentongan yang ada di pos ronda

Tong...tong...tong....!!!
" Sahuur....sahuuuuuuuuuurrrr...!!!! " Tereak bang Pendi. Tapi....

" Heh...heh...ngigo kali lu ya !? Tereak-tereak sahur aje, ini jam berapa nih...!? waktu imsak ude lewat..." Ujar Pak Rt yang lewat ame beberapa warga yang mau sholat subuh ke mushola. Jelas aja mereka pade ngakak semua. Bang Pendi menunduk malu sambil ngacir pulang...

NUNGGU BEDUK ( 8 )

Ling..Ling..Ling..Ling..Ling...kekasihku
Dara lincah tetanggaku
Diam-diam aku jatuh cinta
Kepadamu oh..Ling-Ling ku

Pada suatu hari yang indah
Di hari ulang tahunku
Diam-diam engkau menciumku
Hadiah ulang tahunku

Bang Pendi nyanyi-nyanyi sambil jalan. Kayaknya emang die lagi seneng, soalnye hari ini die ame si Jabrik disuruh nganter parcel ke kota ame Koh Achong. Nah...bisa jalan-jalan deh..bang Pendi.
" Wah...kalo tiap hari kayak gini enak ya Brik..., kite bise jalan-jalan sekalian ngabuburit nungguin bedug !"
" Ngabuburit palelu..!! Ngabuburit mah sore Pen...ini pan baru jam sembilan, kelamaan nungguin bedugnya !. Justru kalo disini tambah berat puasa gue Pen, banyak makanan yang menggoda iman "
" Elu salah Brik...harusnye elu seneng, karena makin banyak godaan makin gede pahalanye. Inget Brik..! Bulan puase ntu bulan penuh keajaiban, contohnye...kalo bukan bulan puase yang namanye biji salak ntu kerasnye bukan maen ! tapi di bulan puase, biji salak pade dijadiin kolak...empuk lagi. " Kate bang Pendi sambil ngakak.
" Ah...elu ngada-ngada aja Pen..." mao ngga mao si Jabrik mesem-mesem.

Nah...itu omongannye bang Pendi waktu baru nganter, tapi pas pulang...omongannye ude laen..!
" Duh...panas bangat ya Brik..! kayaknya gue aus banget nih, bedugnye masih lama ya Brik..!?"
" Elu salah Pen...harusnye elu seneng ! makin banyak godaan...."
" Hah..elu ngikut-ngikut aje ngomongnye, kreatif dikit napa..!?" Bang Pendi rade kesel, si Jabrik cuman cengar-cengir aje.  Pas lewat sebuah klinik kesehatan bang Pendi brenti. Die kayaknye serius baca tulisan yang ada di kaca depan klinik.
" Eh...elu tunggu disini Brik...!!" kate bang Pendi langsung ngacir ninggalin si Jabrik yang bengong. " Si Pendi baca apaan sih  ? kok tiba-tiba lari.." Tanya si Jabrik dalem ati. Nggak lame bang Pendi nongol sambil bawa dua bungkus plastik es cendol.
" Nih..buatlu Brik..!! Ude batalin deh...kagak boleh ditunda-tunda "
" Elu apa-apaan sih Pen, gue pan puasa..! kalo elu mao batal...batal aje sendiri "
" Ya..elah, gue juge puasa Brik. Tapi ini pan ude jamnye buka...!"
" Buka dari Hongkong...!! Baru juga jam 10.00..gile aje lu ! "
" Nah..ntu ape..!? Baca dong....!! "

BUKA

JAM  09.00 -  16.00

Abis baca tulisan ntu, si Jabrik kagak bise ngomong ape-ape. Die cuma bise ngakak sambil megangin perutnye.

Siape yang bikin kolak biji salak ? kirim-kirim ke rumah Bang Pendi ya...hehehe

NUNGGU BEDUK ( 7 )

Wah...kagak terase puase ude lewat seminggu, ude lewat seminggu juga bang Pendi kayaknye kagak nongol buat nemuin sohib. Maafin ye...! Maklumlah...bulan ini bang Pendi pengen puasanye beneran dikit dibandingin ame taon-taon kemaren. Bang Pendi atut kalo buka-buka inet, soalnye suka ngga nahan ngelantur ke situs " ZZZ" ( kalo yang " X " ude biase...hehehe ). Nah..kate pak Ustaz bise ngurangin pahala puase tuh ! Sayang pan...kalo cuman dapet laper ame ausnye doang...ye ngga !?

Apelagi imannye bang Pendi masih tipis kayak kulit kadal ( Gantinye kulit Ari, soalnye si arinye lagi pulang kampung...hehe ) jadi gampang jebol. Kalo ibarat kate....Teh Manis ntu Imannye bang Pendi, kadang-kadang kurang gula...jadi berasa pahit. Kadang pula kurang tehnya...nah jadinye aer manis bukannye teh manis. Yang parah lagi...pernah takeran gula ame tehnye ude pas tapi aer panasnye yang kurang...hehehe. Jadi gitu deh...imannye bang Pendi ngga pernah sempurna dan ngga pernah bener..!! Tapi masih untung ade gelasnye buat naroh teh, kalo nggak ! Kagak tau lagi deh....

Nah sambil nunggu bedug, biasanye bang Pendi duduk-duduk pos ronda. Kali-kali aje ade dompet jatoh didepan pos, pan lumayan buat beli baju lebaran..hehehe. Tiba-tiba si Jabrik nongol sambil nyanyi keong racun....versinye die

Kau memang.. keong racun

Belon Maghrib...ude ngajak makan bubur

Kau memang.. keong racun

Nasi basi...elu bilang nasi kebuli

Hei...kau usil sekali

Kau potong kuku-ku

Kau gunting rambutku

Kau cuci sendalku

Mulut kemat kemot.....

" Hadooooh...Brik...Brik...!! Orang-orang ude pade sepet ngeliat mukelu apelagi suaralu. Mending diem dah...malah lebih mantep !

" Yah...elu Pen, bolehnye sirik aje kalo ngeliat temen seneng dikit. Sesama orang jelek mah...kita harus menghargai Pen "

" Heh...kitaaa ? Elu aja kali Brik....gue kagak ! " Kate bang Pendi sambil cekikikan, si Jabrik manyun.

" Nah...elu lagi ngapain disini Pen ? gue liat dari jauh mulutlu kemat-kemot kayak dukun beranak, elu kagak puasa ye ?"

" Sembarangan...! Gue lagi ngapalin doa nih, buat nahan laper.."

" Hah...emangnye ada !? Ajarin gue dong.."

" Nih...dengerin !"

* Huma baring sana...baring sini

  Wa' auuz......Wa' laffar.....Wa' maomati

  Wa' kadaffur....Wa' takadafafa

  Ya' udahlah...Wa' tahan lagi

" Ah...brengseklu Pen, dosa lu.....!!" Gerutu si Jabrik, bang Pendi cekakakan.

*  Dapat dari sms

OBROLAN DI WARUNG KOPI ( 21 )

Mpok Mumun  :  Wah...tumben lu Pen, makan nasi uduk sampe nambah gitu.. laper ape rakus lu...! Asal jangan ampe ngutang lagi aje ( sambil mesam-mesem )

Bang Pendi   :  Ya..elah mpok, tenang aje ape..! Pasti aye bayar..( " taon depan !" katanye dalem ati sambil nyengir sendiri ). Ngga tau juga nih mpok, puase masih berape hari lagi tapi perasaan lapernye ude kerasa !.

Bang Mamat  :  Emangnye elu mao puase Pen ? Bagus dah..tapi mulai sekarang elu kudu siap-siap . Maksud gue, siap lahir bathin...( sambil ngeganyem singkong goreng )

Bang Pendi    :  Kayak mao kawin aje bang, pake siap lahir bathin segale.

Bang Mamat  :  Lha...iye dong ! siap lahir ntu, elu kudu nyiapin fisiklu...biar nanti pas puase badanlu bager ( sehat ) pan puasanye kagak lancar kalo elu sakit. Jaga juga tuh mulutlu jangan sampe ngomong yang bikin orang sakit hati, jaga mata, jaga kuping...pokonye semua deh elu jaga...

Mpok Mumun :  Bener tuh Pen..! jangan cuman sakit panu ame kurap jadi alesan elu kagak puase ( Mpok Mumun cekikikan, bang Mamat mesam-mesem )

Bang Mamat   :  Nah..ntu yang lahir Pen ! kalo yang bathin, hatilu yang kudu bersih...jaga hati kalau kate Aa Gym. Jangan ade marah, ade benci, iri apelagi dendam ! sebelum puase, diilangin deh yang kayak gitu...biar puase kite lebih afdhol.

Mpok Mumun :  Nah...dengerin tuh Pen ! sapuin juge otaklu, jangan sampe punye pikiran ngeres mulu...

Bang Pendi     :  Ah..Mpok Mumun dari tadi nyamber mulu, kayak api kagak boleh liat tabung gas yang bocor aje. Emangnye Mpok sendiri ude siap kagak marah-marah ame siap kagak benci ? ( sambil nyomot pisang goreng )

Mpok Mumun : Yah..gue mah siap-siap aje Pen ! lagian ngapain elu pake nanya-nanya gue, mestinye elu yang kudu siap-siap. Soalnye yang gue tau...elu doang yang kagak pernah bener ! ( Mpok mumun cekikikan lagi )

Bang Pendi      : Ya..kalo ude siap kagak marah ame benci, bagus dah ! soalnye kemaren aye kagak sengaja ngintip pok Mumun lagi mandi...( Mpok mumun yang lagi cekikikan langsung diem, mukanye merah. Bang Pendi malah cuman cengar-cengir aje )

Mpok Mumun :  Hah...jadi elu yang kemaren ngintip gua ? Brengsek lu....... !! ( Mpok Mumun grabag-grubug nyari perabotan buat ngemplang kepalanye bang Pendi. Bang Pendi buru-buru nguyup kopinye ampe keselek dan siap-siap ngacir )

Bang Pendi    :  Eh...eh...katanye ude siap mpok !? Lagian aye ngintip pan kagak sengaja. Ampooooon...ampuuoooon !! ( Bang Pendi ngacir dikejar-kejar Mpok Mumun yang megang gayung aer. Bang Mamat cekakakan sendiri sambil geleng-geleng kepale )

Puasa tinggal beberapa hari lagi nih...! Untuk itu Bang Pendi mao minta maaf kepada sahabat-sahabat...adek, abang, empok, encang-encing, enyak-babe, kalau selama ini ada postingan yang kagak bener isinye juga komen-komen bang Pendi yang kagak pantes. Mohon maaf ye...! Biar bang Pendi bisa ngejalanin puasanye lebih afdhol ( kayak puasa aje...hehehe ). Kalo sempet, di bulan puasa nanti bang Pendi mao nerusin episode "Nunggu Beduk " yang taon kemaren baru nyampe 6 episode. Do'ain ye...! hehe

Selamat Menjalankan Ibadah Puasa bagi yang menjalankannya.

Salam hangat selalu................