SERIBU LANGKAH ( Cegah Pertengkaran Suami-Istri )

Hari ini tumben-tumbenan bang Pendi mao bantuin kong Sanip engkongnye buat nyabutin singkong. Keliatannye juga rade-rade akrab, soalnye sambil nyabut singkong ade aje yang diobrolin dari soal janda pahlawan yang dibebasin oleh pengadilan, soal Bibit-Candra, soal Ariel sampe soal anak sekolah yang ngelahirin anak di wc

" Nah..ntu contoh anak muda kayak elu yang kagak tau apa itu arti cinta. Cinta ntu bise diibaratin kayak coklat. Taunye elu pan coklat ntu manis padahal sebenernye pahit, yang bikin manis ntu karena ditambah pemanis atawe gula. Jadi cinta ntu jangan cuma mao ngerasain manisnye doang tapi rasain juga pahitnye. Nah...kalo cuma mao ngerasain manisnye doang, ya..kayak anak sekolah tadi yang ngebuang anaknye. Mao enaknye tapi anaknye kagak mao...!!" Jelas kong Sanip panjang lebar.

" Ah..engkong bise aje..." Kate bang Pendi sambil ngedumel dalem ati karena merasa diceramahin.

" Yah...elu kagak percaya amat ame yang tuaan. Emang mesti begitu ! liat aje engkong ame uwaklu ( nenek ), sampe sekarang masih awet jadi laki bini.." kate engkong lagi

" Kalo awet aye sih percaya, soalnye dulu kagak ade Luna Maya. Eh..kalo Luna Maya mao sama engkong, engkong pasti mao kan...!?" Tanye bang Pendi sambil nyengir

" Busyet...ngeledek gua lu..!? kalao gua mah kagak nolak dah...ya pasti mao bangat, si Lunanya juga pasti mao...cuma mao muntah !" Jawab kong Sanip, bang Pendi ngakak " nyadar juga nih aki-aki..." pikirnye.

" Oh...ye kong sebenernye apa sih resep engkong supaya ame uwak adem tentrem dan kagak pernah ribut " tanya bang Pendi serius

" Nih..denger ! Engkong emang punye seribu langkah supaya kagak ribut mulu "

" Busyet...banyak amat kong ampe seribu !?" bang Pendi keheranan.

" Elu dengerin dulu ! pertame, jadi laki ame bini harus saling menghargai dan menghormati. Kedue, harus bise instropeksi. Kalo emang kite salah...ya musti minta maaf, jangan ude tau salah malah ngotot ( bang Pendi manggut-manggut ) dan yang terakhir, jadi laki bini harus punya sifat mengalah. Kalo laki lagi panas bini harus adem, kalo bini lagi panas giliran laki yang harus adem..." kate kong Sanip lagi.

" Lha...kok ude terakhir kong, katanye ade seribu langkah ?" bang Pendi bingung

" Makanye dengerin...! pan engkong bilang kalo bini lagi panas laki mesti adem. Elu tau sendiri kalo uwaklu lagi marah segala perabot rumah pada melayang, kalo kagak piring atawe gelas...kadang-kadang centong nasi. Daripada kena kepala mending gua kabur ambil langkah seribu. Kalo cuma dua atawe tiga langkah pan kepale gua masih bisa benjut.." Kate engkong Sanip, bang Pendi ngakak lagi.

maaf...lagi nggak ada ide, jadi postinganya ngga jelas gini...