MY NAME IS AMIR

" Ayo cepetan Brik!! Time is monay..." Kata Bang Pendi.

" Halaah...lagulu Pen, pake ngomong bahasa Inggris segala. Mending ngerti, apa yang elu omongin..." Sela Mpok Mumun.

" Jiaah..Mpok Mumun kagak percaya amat, gini-gini saban hari aye begaul ame bule...pernah juga ame Demit More yang artis holiwud itu!" Kata Bang Pendi.

" Demit Mor...mukelu kayak dedemit! Nyebut nama orang aje elu kagak becus, kemaren Brus spilis...terus Jastin Bibir. Hah..gua kagak bakalan percaya dah!!" Kate Mpok Mumun.

" Iye...iye...gua tau Pen, elu biasa begaul ame bule...Bulek Yarsih, Bulek Kateni. Kadang disuruh nyuci piring, kadang disuruh manggul beras, iya pan?" Sambung Si Jabrik. Mpok Mumun cekikikan, Bang Pendi Manyun.

Ngga berapa lama, dari jauh keliatan Bang Candra yang mahasiwa ntu jalan bareng ama cewek bule.

" Nah kebeneran, ntu ada cewek bule. Elu buktiin deh ngomonganlu, gua pengen liat!" Kata Mpok Mumun sambil cekikikan lagi.

Bang Pendi kaget, die langsung panas dingin..." Busyet dah...! Tumben-tumbenan bule dateng kesini. Duh...bisa turun gengsi nih gua kalo ketauan ngibul sama Mpok Mumun. Ya ude..terlanjur basah, mending kelelep sekalian dah..." Pikir Bang Pendi. Pas Bang Candra nyampe deket warungnye Mpok Mumun, Bang Pendi keluar...

" Eh...Bang Candra, tumben nih bawa-bawa bule kesini...mangnya ada acara apaan? Eh...ngomong-ngomong ntu bule cakep, tapi kenape mukanye burik-burik gitu kayak pantatnye Si Jabrik!" Bisik Bang Pendi.

" Hush...Sembarangan aja elu ngomong! Mukanye emang darisononye begitu, tapi bukan penyakitan kayak pantatnye Si Jabrik. Lagian mukanye begitu tetep aje banyak yang demenin, lha..kalo pantatnye Si Jabrik siapa yang mao, ngeliat aja ogah!" Bang Candra ame Bang Pendi cekikikan.

Si Jabrik cembetut..." Orang ngomongin bule, kenape pantat gua yang dibawa-bawa?" Pikir Si Jabrik.

" Ya ude Bang...kebetulan aye mao ngajarin Si Jabrik bahasa Inggris, jadi aye mao ngajak ngobrol ni bule. Boleh kan?" Kata Bang Pendi.

" Wah bagus tuh Pen! Kalo pinter emang mesti bagi-bagi ilmunye. Ya ude kebetulan gua mao istirahat, mao ngupi-ngupi dulu!" Kata Bang Candra. Abis ngomong ame ntu bule, Bang Candra terus masuk warungnye Mpok Mumun mesen kopi.

" Nah Brik...sekarang elu mao tanya ape,? biar gua yang terjemahin "

" Eh...tanyain namanye Pen!" Kata Si Jabrik, Bang Pendi mikir sebentar..." Gua mao ngomong ape ye...?" Pikir Bang Pendi.

" Beres Brik...! Ehm...mis...e...ai Pendi, e...where are you?" Kata Bang Pendi sekenanye, belagak sok pede. Si bule jelas aje bingung..." Ude tau gua disini, kok ditanya gua dimana?" Barangkali ntu bule mikirnye gitu, tapi dengan ramah die jawab juga.

" I'm here....," jawab ntu bule sambil tersenyum. Bang Pendi seneng ternyata pertanyaan ngawurnya nyambung, soalnye die denger ntu bule ngomong...Am hir!

" Ooh..namanye Amir atawe Amsir, Brik...!" Kata Bang Pendi

" Lho..namanye kok kayak nama cowok Pen.." Si Jabrik bingung

" Ya..ga tau juga Brik, soalnye ntu bule rade ngga jelas ngomongnye. Kayak cadel-cadel gitu sih...tapi bener kan Bang Candra?" Tanya Bang Pendi.

Bang Candra kagak bisa ngomong, barusan die keselek kopi ampe batuk-batuk gara-gara nahan tawa denger ngomongannye Bang Pendi. Jelas aje yang laen pade bingung kenape Bang Candra ngakak sendirian tapi pas Mpok Mumun, Si Jabrik ame ntu bule dikasih tau ame Bang Candra, semuanye pade ngakak sedang Bang Pendi yang malu ati pelan-pelan ngeloyor pergi.

" Hei...where are you going Pen? My name is Amir..." Kata Si bule, yang laen pade ngakak lagi.