ORANG-ORANG SARAP...!!!

Orang-orang ude pade sarap kali ye? kayaknye ngambil nyawa orang seenak udelnye. Contohnye sekarang di Libya. Bang Pendi sempet ngutuk Bang Moammar Khadafi yang membunuh dan melukai para demonstran atau juga para pendukung oposisi, nah sekarang Bang Pendi ganti ngutuk Amerika dan sekutunye yang nyerang Libya. Emangnye kagak ade cara laen ape?  klo di bom kayak gitu, rakyat yang kagak berdose pan nyawanye bise pade melayang. Kalo nyawa manusia pan kagak kayak layangan yang masih punya senar atawe tali, jadi masih ditarik dan digulung  lagi. Sekali melayang, ya ude selamanye. ye nggak?. Kayak-kayaknye pemimpin Amerika dan sekutu-sekutunye yang sok jago ntu, sekali-sekali perlu naek odong-odong, biar otaknye rade beneran dikit. Kagak sarap kayak sekarang!.

Eh, ngomongin orang sarap, Bang Pendi jadi inget kalo sering nemuin orang yang kayak gitu dijalanan. Kalo diperhatiin, macem-macem aje tingkahnye! Ada yang aje kayak patung, tapi matanye plarak-plirik. Ada yang diem juga tapi mulutnye komat-kamit baca mantra, ada yang iseng bawa-bawa kantong plastik kresek terus masukin ape aje yang die temuin dijalan. Bang Pendi aje sempet mao dimasukin ke kantong tapi berhubung nggak muat, akhirnye nggak jadi, hehehe. Selain ntu, ada juga yang mencak-mencak atawe ngomel-ngomel sendiri dan terakhir ada juga yang senyam-senyum sendiri kayak yang lagi baca ini, hehehe.

Nah, kemaren Bang Pendi sama si Jabrik ketemu sama orang di jalan. Die lagi cengar-cengir sendiri sambil megangin usiran laler dari suiran-suiran tali rapia. Ngeliat Bang Pendi ame si Jabrik lewat, ntu orang gila tambah cengar-cengir ( mungkin die seneng ketemu temennye, hehehe )

"Nah, gue bilang juga ape, Brik! kayak-kayaknye ade yang salah ame muka lu. Tuh liat! orang gila aje cengar-cengie ngeliat elu"

"Sialan lu Pen. Dia mah, emang ude kerjaannye cengar-cengir. Kagak ade hubungannye ame muka gue!"

Bang Pendi sebenernye rade-rade ngeri juga pas orang gila ntu nyamperin. Tapi die berusaha tenang, die pikir kalo diajak ngomong orang gila ntu kagak bakalan ngamuk. Barangkali juga ntu orgil mao kasih nomer togel singapur, hehehe. Tapi Bang Pendi belon sempet ngomong, ntu orang gila ngasih isyarat kayak minta rokok. Kebetulan, die baru beli rokok samsu setengah bungkus yang belon sempet die isep. Tapi baru aje ntu rokok die keluarin, orang gila ntu langsung nyamber semuanye. Bang Pendi sempet kaget, tapi die kagak berani ambil lagi rokoknye, takut orang gila ntu ngamuk. Sambil cengar-cengir, orang gila ntu langsung ngomong nyerocos kayak petasan gantet.

"Elu ngangguk-ngangguk aje Brik, kayak burung celepuk. Emangnye elu ngerti ape yang die omongin?"

"Ya kagak Pen. Lah, elu sendiri celingak-celinguk kayak kadal. Elu ngerti?"

"Kagak juga!" jawab Bang Pendi, lalu keduanyepun ngakak. Tiba-tiba ada suara perempuan tereak-tereak dari belakang.

"Baaaang, makan dulu!"

Bang Pendi ame si Jabrik kebingungan. Die pade kagak kenal ame ntu perempuan tapi kok ngajak makan, die ngajak makan siape?

"Eh, permisi Bang, saya mao istirahat makan dulu!. Kalo abang-abang mao gantingin saya, boleh kok! lumayan kan, bise dapet makan ame rokok gratis" kata ntu orgil tiba-tiba. Jelas aje Bang Pendi ame si Jabrik kaget dan terbengong-bengong.

"Anjriiit, sialan banget tuh orang!. Ternyate die cuman pora-pora jadi gila. Yah, lenyap dah rokok gue" Bang Pendi ngedumel, si Jabrik nahan-nahan tawa.