Kamis, 06 Agustus 2009

OBROLAN DI WARUNG KOPI ( 5 )


Seperti biase..cerite ini cuma buat nanggepin berite yang ade di tv, jangan pade kesinggung dan sakit ati..ye..!

Mpok Mumun : Dari mane bang..? kayaknye lemes banget..( ngeliat bang Mamat baru dateng )

Bang Mamat : Iye nih mpok..abis ngalap rambutannye kong Sapri. Mane banyak bangat semut rangrangnye..lagi, kagak boleh ngeliat kulit dikit..tuh semut maen sosor aje. Bikinin kopi deh..mpok, eh..elu ude ngejogrok disini aje Pen..ude ngopi..? ( bang Pendi ngangguk-ngangguk aje, mulutnye lagi penuh ame singkong goreng )



Mpok Mumun : Segitu sewotnye ame semut..! eh si Pendi mah jangan ditanye..tuh ude ampir abis dua gelas..

Bang Mamat : Set dah..! dokoh amat lu Pen..kebanyakan minum kopi..jantungan lu kayak mbah Surip..

Bang Pendi : Itu mah..mbah Surip aje yang minum kopi kagak pake takeran..bangun tidur minum kopi,aus..kopi, abis makan..kopi. Tapi kasian juge ye..belum lame ngerasain sukses..ude pegi..

Bang Mamat : Umur mah..urusan diatas yang ngatur ! ye..kan mpok ( mpok Mumun ngangguk setuju ). Eh..ade berite baru lagi nih..! denger-denger mba Prita ude sepakat damai sekarang..

Mpok Mumun : Nah..mba Prita yang mane nih bang..? kalo bininye tukang baso aye kagak tau dah..tuh tanya ame si Pendi..!

Bang Pendi : Ya elah..mpok ! segitunye.., paling juge yang diomongin bang Mamat..mba Prita yang ribut-ribut ame rumah sakit. Kalo yang bininye tukang baso mah..emang ude jadi jande. Tapi aye ude kagak maen gitu-gituan dah..!

Bang Mamat : Kaga maen apaan..! orang dienye pulang kampung, kalo masih ade disini mah..gue yakin elu kaga bakalan nongkrong disini Pen..( bang Pendi cengar-cengir ketauan kartunye..)

Mpok Mumun : Kaciaaaan..deh lu !( sambil goyang-goyangin jari telunjuknye )

Bang Mamat : Selain beritanye mba Prita ade juge beritanye pak Antasari mpok.., kabarnye pak polisi belum punye bukti kuat buat jatuhi hukuman..

Mpok Mumun : Oh..yang mantan ketua KPK itu ye..?

Bang Pendi : Lha..bukti apaan lagi sih bang ? bukannye orang yang jadi kaki tangannye ude masuk bui, si Rani yang jadi selingkuhannye juge ude di interogasi.

Bang Mamat : Mane aye tau..! biarin aja dah..itu mah urusannye yang berwajib. Ude gitu sekarang die jadi tambah musuhnye..lagi

Mpok Mumun : Musuh yang mane bang..? para koruptor yang pernah die tangkep ye..?

Bang Mamat : Bukan mpok..! sekarang justru anak buah die sendiri, kemaren waktu disidang..die bilang kalo orang-orang di KPK pade dapet sogokan dari para koruptor..

Mpok Mumun : Wah..bise tambah nih yang masuk bui..! pak Antasari cari temen kali buat maen gaple..di bui ( sambil cekikikan )

Bang Pendi : Ah..itu mah biase mpok ! orang kalo lagi seneng biasenye pengen sendirian..pas susah aje..pengennye ngajak-ngajak..

Mpok Mumun : Iye..persis kayak elu Pen..! giliran punye duit aje..elu sok traktirin jande-jande yang elu demenin. Nah.. giliran boke..kagak punye duit, elu ngutang di mari..( bang Mamat cekakakan.., bang Pendi mesem-mesem malu )

2 komentar:

  1. hahaha...obrolan yang kritis namun di kemas sangat manis... salam kenal mas dari surabaya..

    BalasHapus
  2. Makasih..salam kenal juga..! kalo mampir lagi bawaian rujak cingur ya..he..he

    BalasHapus