Halaman

Kamis, 17 November 2011

KAMAR BERCINTA

Tuing...tuing...!
Bang Pendi suka puyeng nih kalo ngomongin gini-ginian, bukannye punya pikiran ngeres tapi yang ini bikin Bang Pendi cuma bisa geleng-geleng kepala kayak orang india nari dan nyanyi ktumbar jahe... hehe. Bayangin aje, para koruptor, bandar narkoba atawe penjahat kelas kakap laennya mestinya pan ditangkep terus dipenjare biar pade kapok, lha..ini mah kagak! dipenjara malah pada dikasih fasilitas serba enak, ruang ber AC, tipi, tempat karoke sampe kamar bercintapun disediain...enak nggak tuh! gimane mao kapok kalo kondisinya kayak gitu? Eh, tapi itu khusus buat napi kelas kakap doang. Kalo kelas teri kagak bakalan mampu dah nyobain kamar bercinta itu, soalnya tarif perjamnya bisa 500 rebu ato lebih. Yah..kalo napi kelas teri sih paling-paling minta yang jenguk bawain.....agak banyakan, hehe. Ck..ck..ck..ada aja ya, obyekannye kepala penjara.

Sabtu, 05 November 2011

PATAH RANJANG...EH, HIDUNG

Sehabis bedug Maghrib, saat orang-orang lagi buka puasa, Bang Pendi malah ngeloyor pergi ke warungnye Mpok Mumun. Die pikir, abis ujan-ujan gini enaknye minum kopi susu anget sambil makan pisang goreng...wuiiih mantep dah!. Sambil jalan die juga ngarepin ada orang yang kesurupan yang tiba-tiba die daging kambing...hehe lumayan pan buat nyate. Abis dari taon ke taon belon pernah yang namanye Bang Pendi motong hewan Qurban, yang ada malah Qurban perasaan mulu...hehe.

Jumat, 28 Oktober 2011

SUMPAH...! PEMUDA

Eh, hari ini hari sumpah pemuda ya? kalo diitung-itung emang kayaknya ude sekitar 80 tahunan sejak sumpah pertama kali dikumandangkan. Jadi harap maklum kalo anak-anak muda sekarang banyak yang kagak hapal lagi butir-butir dari sumpah pemuda, kayak yang Bang Pendi liat di tipi tadi pagi. Bang Pendi hapal gak? wah, jangan ditanya dah...(jelas gak hapal..hehe).


Kamis, 13 Oktober 2011

ATIT GIGI

Duh, emang paling kagak enak kalo lagi sakit gigi. Mao ngapa-ngapain jadi susah dan serba gak enak. Kalo bisa milih, Bang endi milih dipeluk cewe daripada sakit gigi, hehehe...
Nah, kayak hari ini nih...pengen marah-marah mulu dan pengen berantem aja bawaannye. Abis mao makan aje susah, ada pizza gak bisa makan, ada hamburger gak bisa makan, ada holland bakery juga gak bisa makan..(gimana mao makan! duit aja gak punya buat belinya..hehe). Lagian Bang Pendi mah biasanya bukan holland bakery tapi gorengan olahan Bang Bakri..hehe. Ude gitu anak tetangga dari tadi pagi nangis kagak brenti-brenti, bikin Bang Pendi tambah uring-uringan aja..

Senin, 10 Oktober 2011

IKUTAN KUIS MBA FANNY

Siang-siang begini Mba Fanny kasih teka-teki. Duh, jiwa detektif Pendi Van Burick jadi langsung tergugah dan karena penasaran, langsung coba menjawab teka-teki itu sampai dibela-belain telat makan (emang kebetulan gak ada duit buat beli makan) hehe...

Sohib-sohib mao tau apa teka-tekinya? Nah dibawah ini cerita lengkapnya, yang Bang Pendi copas langsung dari yang punya teka-teki..

Selasa, 04 Oktober 2011

ALAMAT PALSU

"Dimanaaa..dimanaaa...dimanaaa" si Jabrik ngelap motor vespa bututnye sambil nyanyiin lagu dangdut yang lagi ngetop sekarang ini.

"Dimana dimana...anak kambing saya. Anak kambing saya ude di sate jabrik.." celetuk Bang Pendi yang baru nongol.
"Ah, kebiasaan lu Pen. Kagak boleh ngeliat orang seneng dikit.."
"Ya elunya aje nyanyi kagak bener. Masa nyanyi dari tadi cuman dimana dimana doang.."
"Habis cuman ntu yang gua hapal" kata si Jabrik sambil nyengir onta.
"Eh, ngomong-ngomong, tumben lu rajin?"
"Oh iya dong...soalnye gua mao ngapelin cewek gua yang baru. Nah, kebetulan dah...elu temenin gua ya.."
"Yah, enak di elu kagak enak digua dong"
"Tenang Pen, anak dari kakeknya juga tinggal disitu. nanti gua kenalin dah.."
"Anak dari kakeknya? emak dari cewek lu dong..?" Bang Pendi bingung, si Jabrik ngakak.

Sabtu, 17 September 2011

GALI SUMUR

Alhamdulillah...walaupun gairah Bang Pendi buat nyatronin rumah sohib-sohib en ninggalin komen konyol lagi menurun drastis, tapi masih banyak sohib-sohib yang baik hati mampir dimari. Bang Pendi janji deh...klo ude nemu jamu yang joss buat ningkatin gairah bewe, Bang pendi langsung deh nyatronin rumah sohib-sohib. Untuk itu Bang Pendi mo ucapin makasih buat sohib-sohib yang ude mampir dan kasih komentar, sohib-sohib yang ude mampir tapi ga kasih komentar juga sohib-sohib yang ga mampir dan ga kasih komentar...hehehe.


Sabtu, 10 September 2011

KE PARANORMAL (RE-POST)

Melihat si Jabrik belon juga punya cewe, Bang Pendi jadi rade-rade kasian juga ame sohibnye ntu. Kebetulan die kenal ame seorang paranormal yang terkenal Sakti Asepguna (kebetulan paranormalnye dari Jawa Barat jadi Saktinye Asepguna, nah kalo Mandraguna itu orang Betawi...hehe).
"Eh...Brik! Elu mao nggak gua ajak ke paranormal? Kali-kali aje die bise bantuin nyariin jodoh buatlu. Katanye sih, die paling manjur kalo soal gitu-gituan. Namanye Ki Ambu.... "
"Paranormal? Wah, ogah gue Pen...gue paling nggak berani ngeliat tampang dukun"
"Yang namanye dukun atawe paranormal emang rate-rate begitu Brik, walau kagak semua! Lah... kalo ganteng kayak gue alias Cristian Bautista gini, nanti cewe-cewe pade dateng bukan pengen di ramal tapi di lamar" Bang Pendi ngikik.
"Cristian Bautista palelu peyang! elu mah pantesnye Bautinja bukan Bautista" kata si Jabrik sambil cekikikan.

Rabu, 07 September 2011

PLISS...KAMBEK TU MI

Pagi ini terasa selalu sama
Kosong dan hampa yang kurasa
Tak pengaruh berapa lama mataku terpejam tadi malam
Tak pengaruh seberapa indah mimpi dalam tidurku
Semua tetap sama
Beningnya embun di dedaunan tak jua menyejukkan hatiku
Segarnya aroma segelas kopi susu tak jua menghangatkan jiwaku

Selasa, 30 Agustus 2011

SENDAL LEBARAN

Yang begini ini nih, tampang orang kagak punya duit. Kayak Bang Pendi yang sedari pagi mukanye ditekuk aje kayak ayam abis kelolodan karet, hehe. Gimane kagak kusut...satu hari mao lebaran, die belon beli ape-ape. Boro-boro sepatu, sendal jepit aje kayaknye kagak kebeli. Sebenernye kemaren die punye duit tapi ude abis buat beliin enyaknye 5 kg daging iga sapi. Eh, sebenernye sih..kalo diitung-itung dagingnye paling cuman ada 1/2 kilo yang 41/2 kilo lagi tulang iganye. Lagian tega amat tuh tukang daging, nyeset daging iganye keterlaluan banget.... hehe.


Jumat, 29 Juli 2011

PUASA BENTARAN LAGI

Nggak terase...bulan Ramadhan tinggal 2 hari lagi, perasaan baru kemaren Bang Pendi ngejalanin puase (emang puasa? hehe). Pengennya sih puasanye bise pol kayak taon kemaren, pan lumayan tuh...dapet hadiah sendal jepit buat lebaran dari Enyak, hehe. Niatnye sih, Bang Pendi mao puase juga nulis diblog...soalnye kebiasaan nyela orang, Bang Pendi jadi takut. Soalnye Pak Ustaz bilang, klo puase ntu bukan sekedar nahan laper ame haus doang tapi semuanye mesti dijaga. Jaga mata, jaga telinga, jaga mulut dan sebagainye...pan tekor kalo cuman dapet puasanye doang tapi pahalanye kagak dapet, ye nggak!?

Senin, 18 Juli 2011

HILANGNYA JANDA KEMBANG (3)

Bau harum semerbak tiba-tiba menyeruak dari kebon pohon pisang yang langsung berhadapan dengan pintu belakang. Bau pesing (pipis) yang menyengat dan menggelitik nonjok hidungnya Bang Pendi. Nah, siapa yang bilang bau jengkol kemaren? ya kira-kira seperti itulah baunya, hehe. Buru-buru Bang Pendi nutup pintunya dan ngajak si Jabrik untuk keluar rumah. Sekarang giliran cari bukti diluar rumah dan Bang Pendipun mengitari rumah Mak Saodah 12 kali sambil mulutnya komat-kamit. 

"Gue heran ame elu Pen. Elo mao cari bukti ape mao jadi dukun? muterin rumah ampe 12 kali gitu, sambil komat-kamit lagi..." Tanya si Jabrik heran.

"Sebenernye gue nyari duit kerokan Enyak gue Brik. Tadi jatoh dimane ye?"

"Ah, elu mah yang aneh-aneh aje. Segala kerokan lah dibawa, aturan mah detektif bawa beceng...bukan kerokan!" 

Bang Pendi diem aje. Sambil ngedumel sendiri, die nyamperin ibu-ibu tetangganya Mak Saodah. Kayaknya sih ada yang ditanyain dan keliatannya Bang Pendi serius dengerin ibu-ibu ntu ngomong sampe manggut-manggut kayak burung onta. Habis ntu, die balik lagi nyamperin si Jabrik.

"Sekarang gimana Pen?" tanya si Jabrik.

"Gue belon yakin Brik, tapi kayaknya gue punya firasat kite mesti ke kali..."

"Lha...ngapain? elu kebelet pengen buang aer?"

"Ya ude ikut aje..."

Akhirnye si Jabrik ngikutin Bang Pendi ke kali (sungai). Nggak jauh dari  rumah Mak Saodah emang ada kali kecil yang dulu sering dipake warga buat nyuci atawe mandi. Tapi sekarang ude jarang, karena warga deket situ ude banyak yang pake sumur pompa selain itu kalinye juga ude mulai kering dan aernye kotor. Jalan menuju kali emang rada menurun tapi nggak terlalu curam walau jalannya akan menjadi licin dan berbahaya kalo turun hujan.

Ketika kali yang dituju ude keliatan, tiba-tiba si Jabrik mengaduh. Ternyata sendal jepitnye tembus oleh pecahan beling atau kaca. Bang Pendi merhatiin pecahan kaca yang dipegang si Jabrik, matanya langsung mengamati sekitarnya dan akhirnya die ngeliat lampu templok yang pecah berantakan. Bang Pendi langsung senyum-senyum sendiri karena merasa firasatnya benar, tapi die langsung inget sesuatu...

"Astaga Brik! cepet kite cari Mak Saodah di kali..." Bang Pendi langsung turun dan si Jabrik yang keliatan masih bingung langsung turun ke kali juga. Tapi tiba-tiba...

"Heh..heh...pade mao ngapain lu!? Pade mao ngintip gue ya? ayo..sono pergi!" tereak Mak saodah. Jelas aje Bang Pendi ame si Jabrik kaget.

"Ya elah Mak...siape yang mao ngintip sih, kagak ade untungnye! Lagian nongkrong dari semalem kagak selese-selese. Orang-orang  lagi pade sibuk nyariin, eh malah enak-enakan nongkrong dimari. Bikin geger aje..."

"Siape bilang gue nongkrong dari semalem. Semalem emang gue pengen berak bab tapi gue kepleset terus nyebur kesini,  gue pingsan dah. Baru aje gue siuman tapi kayaknye gue masih pengen bab gara-gara semalem ketunda karna pingsan. Ya ude, gue bab dulu sebelon pulang" jelas Mak Saodah. Bang Pendi ame si Jabrik ngakak ngedenger itu terus mereka ngejauhin Mak Saodah, kagak tega ngintipnye, hehe.

Sambil nunggu Mak Saodah, si Jabrik penasaran...
"Hebat juga lu Pen...bise tau dimane Mak Saodah. Gimane ceritanye tuh...?"

"Yah..ntu kagak sengaje Brik. Waktu kite nyari bukti dirumahnye, elu tau sendiri pan kalo kamarnye cuman ada tiga, kamar tamu, kamar tidur terus ame dapur. Nggak ada kamar mandinye pan? ude gitu pas gue buka pintu belakang, langsung bau pesing yang kagak ketulungan. Gue pikir itu pasti bau kencingnye si Japra atawe Mak Saodah yang kencing disitu karena nggak punye kamar mandi. Nah, kalo mao mandi atawe bab..gimane? ntu yang jadi pertanyaan. Kemungkinannye cuman due, kalo kagak numpang dirumah tetangge, bise juga Mak Saodah atawe si Japra bab-nye ke kali. Nah, waktu gue nanya ame tetangganye, Mak Saodah ntu die bilang termasuk nenek-nenek prokem. Kemane aje dan jam berape aje, die tetep jalan alias kagak ade takut-takutnye. Waktu di dalem rumahnye, gue sempet merhatiin kalo lampu temploknye kagak ade. Gue pikir, kemungkinan waktu tadi malem..Mak Saodah kebelet pengen buang hajat tapi mao numpang kerumah tetangga kagak enak karna ude malem akhirnye die  nekat pergi ke kali dan bawa lampu templok buat nerangin jalanan..." jelas Bang Pendi panjang lebar. si Jabrik terkagum-kagum.

Akhirnye Bang Pendi dielu-elukan warga karena bise nemuin Mak Saodah walau sebenernye kagak ditemuin juga, Mak Saodah bakal pulang sendiri, hehe. Sebagai tanda terima kasih, Pak Rt menjanjikan akan memberi hadiah tapi Bang Pendi langsung ngacir pulang....

"Lho...kok mao di kasih hadiah, elu malah ngacir Pen?"

"Gile aje ntu Pak Rt, masak hadiahnye gue mao dikawinin ame Mak Saodah. Yang bener aje..."

"Lah...bagus pan!? lagian cocok tuh...elu bujangan dan Mak Saodah jande. Jande kembang tuh Pen..!"

"Jande kembang kepalelu bau menyan!" Bang Pendi ngedumel, si Jabrik ngakak.

Abis dah....

Jumat, 15 Juli 2011

HILANGNYA JANDA KEMBANG (2)

Habis bersihin tanah yang ngotorin bajunye, Bang Pendi pamit bentaran kedalem buat ganti baju. Lalu Bang Pendi pergi mandi dan tak lupa cukur ketek trus ngasih makan ayam, benerin kandang bebek, metik daon melinjo, metik nangka, sarapan pagi dan yang terakhir minum kopi. Jelas aje si Jabrik yang nungguin jadi resah dan gelisah. Die ude minum aer 5 kendi sampe kendi-kendinye die telen, Bang Pendi kagak nongol-nongol juga.

"Set dah...kagak taon depan aje sekalian Pen!" si Jabrik ngedumel. Bang Pendi cuman cengengesan aje sambil ngasih kantong kresek. "Buat apa nih Pen? buat ngumpulin bukti-bukti?"

"Ya ude pegang aje, nanti kalo ada orang hajatan...lumayan pan buat naroh uli ame geplak" Bang Pendi cengar-cengir.

Sambil jalan, Bang Pendi mikir-mikir. Kalo kasus orang hilang kayak gini kemungkinannye bise banyak, jadi ada beberape faktor yang mesti dicari tahu dulu. Gimane latar belakang keluarganye? bibit, bebet dan bobotnye gimane? eh, ntu mah kayak mao cari mantu ye..? hehe. Maksudnye hubungan antara keluarge, hubungan ame tetangga, punye masalah ame tukang kredit ga? punye musuh ga? punye selingkuhan ga? Wah, yang terakhir kayaknye kagak mungkin dah. Selingkuh ame siape? si Jabrik? hehe. Atau Mak Saodah dibawa kabur ame temen fb-nya? hehe

Nggak lama, mereka sampe di TKP (Tempat Kawin Pinguin, hehe). Rumah Mak Saodah  kelihatan masih sederhana banget, dindingnya masih dari anyaman bambu, dia hanya tinggal berdua saja dengan anak semata wayangnya...si Japra. Suaminya meninggal waktu dia belon hamil si Japra. Lho? si Japra anak siapa dong?hehe. Sayangnye si Japra ntu otaknye kurang setengah. Ibarat TV pake antena dalem, kadang-kadang mesti digeser-geser dulu kalo mao dapet gambar yang bagus, hehe. Bayangin aje, untuk pakai pakaian aje mesti Mak Saodah yang make-in. Repot dah kalo si Japra yang pake sendiri, soalnye sering celana die pake di kepala dan baju die pake di kaki malah pernah die langsung pergi maen, baju ame celananye cuman dipegangin doang, hehe.

Pas nyampe di rumah Mak Saodah, disitu ude ada Pak Rt  lagi ngebujukin si Japra yang lagi nangis...
"Ya ude Pra, emaklu mah kagak usah ditangisin. Nanti juga pulang..."

"Aye bukan nangisin emak Pak! masalahnye emak bawa gelang ame kalung emas buat beli motor bebek..hu..hu..hu.." rengek si Japra. Bang Pendi ame si Jabrik geleng-geleng kepala, Pak Rt ngurut-ngurut dengkul.

"Hmm..dasar Malin Kondangan, bukan emaknye  malah motor bebek yang dipikirin" gerutu Bang Pendi. "Eh..Pra, elu pengen beli motor bebek pan? daripade nunggu emaklu, mending sekarang elu beli bebek dulu dah...kalo bisa yang cewe. Nah, elu dandanin dah yang cakep kalo perlu elu pakein lipstik biar rade menor. Nanti motornye juga dateng ke rumahlu, ngapelin ntu bebek!"

"Yang bener Bang? ya ude, aye kepasar dulu...beli bebek" muka si Japra langsung cerah, lalu die pergi sambil jingkrak-jingkrak.

"Bisa aje lu Pen, sampe lebaran kudanil...ntu motor kagak bakalan dateng" Kate si Jabrik. Bang Pendi cuman cengar-cengir, Pak Rt senyum manis.

"Wah, kalian kemana aja baru nongol. Warga yang laen sudah saya sebar kebeberapa family Mak Saodah untuk cari dia. Tapi bagus dah kalian sudah disini, kalian tunggu disini barangkali Mak Saodah nanti pulang sendiri. Saya pulang dulu, sudah pegel nih ngediemin si Japra" kata Pak Rt. Bang Pendi ame si Jabrik manggut-manggut aje.

Sepeninggal Pak Rt, Bang Pendi duduk sambil merenung. Matanya menerawang langit tapi bukan karena ia sedang berpikir keras, Bang Pendi cuma takut ketiban kelapa soalnye die duduk dibawah pohon kelapa, hehe. Sebenernye die emang lagi mikir juga, langkah pertama buat nyelesein kasus hilangnye Mak Saodah ialah cari bukti-bukti.

Bersama si Jabrik, Bang Pendi masuk kerumah Mak Saodah yang sederhana. Ada 1 ruang tamu, 1 kamar tidur dan 1 dapur. Di beberapa bagian dari dinding yang terbuat dari anyaman bambu itu terlihat hitam-hitam, sepertinya sih karena asap dari lampu templok karena rumah Mak Saodah belon pake listrik. Suasana kamar kayaknya nggak ada yang aneh, barang-barang masih tertata rapih atawe kagak ada tanda-tanda bekas peperangan, kulkas juga masih utuh dan tersangkut rapih dibilik dapur (bakul bekas, maksudnye..hehe).

Bang Pendi coba buka pintu belakang tapi tiba-tiba Bang Pendi langsung menutup hidungnye...

Bersambung...

Rabu, 13 Juli 2011

HILANGNYA JANDA KEMBANG (1)


Serial Detektif : Pendi Van Burick

Gara-gara Bang Pendi demen nonton serial "Dong Yi" yang penuh trik dan intrik, nalurinya tergugah dan jiwa detektifnya bangkit, hehe. Jadi mulai sekarang Bang Pendi mulai bikin serial detektif, tapi jangan terlalu berharap Bang Pendi bisa menyelesaikan sebuah kasus. Kayaknya sih gak yakin Bang Pendi bisa nyelesein kasus, bisa-bisa malah tambah runyam, hehe.

Pagi hari, disaat ayam jago masih kekepan ame ayam betina, di kampungnye Bang Pendi ude kedengeran heboh. Ada yang tereak-tereak, ada yang nangis, ada yang mukul kentongan dan ada juga orang yang maen pukul-pukulan gara-gara yang mao mukul kentongan salah mukul kepala orang yang botak, hehe. Bang Pendi yang lagi enak-enaknye ngorok di bale-bale depan rumahnye jadi kaget. Dia langsung ambil jurus kunyuk negrep (tangkap) jangkrik yang diajarin gurunya yaitu Wira Wiri Tambeng. Dia langsung lompat kebawah tapi sayangnye die lupa kalo semalem abis makan pisang satu tandan, kulitnye pade ngampar (berserakan) di bawah. Akhirnye die kepeleset lalu jatuh tengkurep dan kepalanye nyusruk di kebon depan rumah dengan sukses.

"Heh..heh..teradahan gawe (kurang kerjaan) lu ya? Lagi ngapain lu disitu?" Nyak Salminah bingung waktu ngeliat Bang Pendi tengkurep di tanah.

"Eh, anu Nyak...Aye lagi coba meresapi harumnye wangi bunga di indahnye pagi hari" Bang Pendi ngeles buat ngilangin malu sambil nyium-nyium pohon didepannye.

"$#@31/2km-1/4ons%^**?????" Nyak Salminah kagak bise ngomong ape-ape. Die lagi bingung binti heran..."Kalo bunga mawar atawe melati wajar aje, tapi ini pohon talas yang dicium-cium. Ape yang harum?" akhirnye Nyak Salminah ngeloyor ke dalem rumah.

Ngeliat enyaknye ude masuk rumah, Bang Pendi langsung bangun sambil garuk-garuk hidungnye. Ternyate pohon tales yang tadi die cium-cium bikin idungnye jadi gatel, Bang Pendipun nyumpah-nyumpah dalem ati. Suddenly...tiba-tiba en sekonyong-konyong, kedengeran ada yang tereak manggil-manggil namanye...

"Pen..Pen..gawat Pen...!!" tereak si Jabrik sambil berlari kearahnye. Bang Pendi bingung dan tambah bingung lagi waktu si Jabrik ude nyampe tapi kagak brenti tapi malah nyelonong masuk rumah Bang Pendi.

"Lho....???" Bang Pendi melongo sambil garuk-garuk ketek. Ngga lama si Jabrik nongol sambil nenggak aer minum dari kendi yang dipegangnya.

"Ya..elah Brik, dirumahlu kagak ada aer ape? Dateng-dateng maen nyelonong aje ngambil aer kendi gua.."

"Sorry Pen..tenggorokan gue ampe kering nih, lari-lari..."

"Eh, ati-ati lu megang kendinye, jangan sampe ke usap-usap! Nanti jin Ipritnye masuk lagi ke dalem.."

"Ah, yang bener aje lu Pen. Biasanye kalo diusap-usap jin-nye baru keluar. Emangnye jin-nye ude keluar dari tadi?"

"Iye....ntu yang lagi megang kendi!"

"Ah, sialan lu. Eh, gua kesini mao ngasih kabar heboh nih Pen. Ada janda kembang hilang tadi malem, sampe sekarang belon ketemu..."

"Jande kembang? jande kembang yang mane? setau gue kagak ada jande kembang dikampung kite. Elu tau sendiri pan, mane ade jande yang belon gue satronin...hehe" Bang Pendi cengengesan.

"Iye...iye..gue tau maenan lu. Emang cuman janda-janda aje yang mao ame elu.."

"Eits...siapa bilang Brik, jangan salah...Buah pepaye di makan sekeluarge, makan sekoteng jangan lupa kacang polongnye. Bukan salah gue didemenin perawan apelagi jande, muka gue ganteng emang dari sononye!"

"Jiaaaah..lagulu pera Pen. Eh, tapi bener Pen...gue serius! Hansip sekelurahan aje ampe dateng kesono, semua pade sibuk nyari Mak Saodah yang hilang semalem"

"Heh...siape lu bilang? Mak Saodah? kagak salah lu Brik? setau gue Mak Saodah umurnye ude 60 taon. Jande kembang apanye? Oooh...gue tau, maksudlu kembang Rafflesia Arnoldi ye..?"

"Rafflesia Arnoldi? kembang apaan tuh Pen?"

"Kembang bangke..!!"

"Busyeet...tega amat lu Pen, orang disamain sama  bangke"

"Lagian elu juga yang oon. Kalo bikin definisi janda ntu yang bener dong. Janda kembang ntu jande yang baru kawin terus cere dan belon punye anak. Nah, yang ini mah ude bau tanah elu bilang jande kembang. Jande kembang dari hongkong! mangkanye kalo ngomongin jande mending konsultasi dulu ame gue..." celetuk Bang Pendi. si Jabrik sebenernye gondok tapi die juga nahan-nahan tawa denger celetukannye Bang Pendi.

Bersambung...
maaf, ini cuma cerita...ga ada maksud apa-apa

Minggu, 10 Juli 2011

TERUUUUSKANLAH...KAU BERNYANYI...

Itu penggalan syair lagunye  Bang Iwan Fals, abangnye Bang Pendi..hehe. Bukan bermaksud ngomongin Bang Iwan tapi mao ngomongin politikus-politikus kita yang sekarang pade pinter-pinter nyanyi. Itu yang bikin Bang Pendi jadi gondok seperempat mati!!. Masalahnye, Bang Pendi yang ude ngebet pengen jadi penyanyi kagak pernah kesampean. Kagak ada produser rekaman yang tertarik ame suara serak-serak jengkolnye Bang Pendi. Padahal ude ngirim demo masak kemana-mana, jangankan dapur rekaman...dapur tetangga aje ude Bang Pendi satronin, numpang makan maksudnye, hehe.

Nah, politikus kita malah gampang ngetopnya. Kagak pake promosi, kagak pake konser dan kagak pake masuk yutup kayak Briptu Norman. Nyanyian mereka langsung jadi ngomongan orang...
Belon lama, Bang Pendi denger ada rame-rame di DPR ngebahas soal kecurangan pemilu kemaren. Nah salah satu artis yang disorot, yaitu Ibu Dewie Yasin Limpo yang nyanyiin  lagunya Tante Vina Panduwinata...
Surat palsuku yang pertama
Membuat hatiku berlomba...hehe
Masalahnya sekarang, yang lagi dicari-cari ntu pencipta lagunya. Siapa yang nyiptain lagu "surat palsu" itu atawe paling kagak yang bikin arasemennye, pan ga enak kalo ga ketauan penciptanya. Lha...Nanti kalo ada royalti 2 atawe 3 tahun penjara, mao dikasih siape? hehe.

Nah, yang kedua lebih ngetop lagi nih...yaitu Pak Nazaruddin. Wah, dia malah lebih hebat! ngerekam singel pertamanye  aje di Singapura, singel kedua di Malaysia terus di Vietnam dan singel seterusnye kagak tau lagi dah. Sebenernye waktu pertama dia dipecat jadi bendahare Demokrat, Bang Pendi pikir dia mao nyanyi..."pulangkan saja, aku pada ibuku atau ayahku..." hehe. Eh, ternyata lagunya beda! kalo ga salah syairnya kayak lagu Bang Haji Rhoma..."Berakit-rakit ke hulu, berenang ke tepian....Jangan yang sakit gua mulu, elu dong gantian..." hehe.

Kalo dalam kamus persahabatan, Bang Pendi pikir Pak Nazaruddin ini termasuk sahabat yang baik. Kalo lagi seneng dia ntu ngajak temen-temennye. Nah, sekarang lagi dia susah alias keblangsak, die juga mao ngajak temen-temennye buat ngerasain susah. Sayangnye kagak ada temennye yang mao diajak susah, malah sekarang mereka jadi berbalas pantun atawe maen hujat menghujat. Wah, repot emang kalo ude masuk dunia politik. Antara temen ama musuh cuman dibatasin ame sekat tipis setipis kulit kodok bangkong, hehe. Sekarang temen besok bise jadi musuh atau sebaliknye sekarang musuh besok jadi temen.

Haaah...Bang Pendi kagak ngerti dah! biarin dah mereka pade nyanyi,  walau lagunye kayak lagu thrash metal yang cuma bikin kepala puyeng dan kuping budeg, Bang Pendi kagak peduli. Yang penting masih bisa manggut-manggut sambil nyanyi...


Teruskanlah kau bernyanyi...Dan jangan lagumu terhenti...

Senin, 27 Juni 2011

BUKALAH TOPENGMU

Bang Pendi suka kesel ame si Jabrik, gara-garanye die suka nyela..."Kalo mao ngomong, topenglu buka dulu Pen!" gitu celetuk si Jabrik. Prasaan Bang Pendi kagak jelek-jelek amat, lagian  kalo dibandingin ame si Jabrik mukanye Bang Pendi lebih ganteng kemane-mane. Kalo ibarat kate muka Bang Pendi kayak si James Bond Pierce Brosnan, nah kalo si Jabrik muka kayak meja prasmanan, hehe.

Eh, ngomong-ngomong soal buka topeng. Sohib Bang Pendi, Bunda Loving (Bunda Zita Erwina) dan Celotehan (Non Three) kayaknye pengen juga ngeliat Bang Pendi buka topeng. Dan ngasih tugas buat ngebuka 10 hal tentang diri Bang Pendi. Sebenernye tugasnye rade-rade berat juga sih...bukan ape-ape, soalnye guru spiritual Bang Pendi pernah bilang...ilmunye Bang Pendi bakalan luntur kalo sampe buka-bukaan, hehe. Lagian Bang Pendi juga malu kalo disuruh buka-bukaan, soalnye ibarat dari Sabang sampe Merauke, dari Miangas sampe pulau Rote...panunye Bang Pendi ada dimana-mana, hehe.

Ya okelah...sebagai orang yang baik hati dan rajin cabut bulu ketek, Bang Pendi tetep senang hati ngerjain tugasnye dan inilah 10 hal tentang Bang Pendi...

1.  Walau di KTP tertulis Bang Pendi tinggal di Jakarta tapi sebenernye Bang Pendi tinggal jauh dari hingar bingar kota Jakarta. Bang Pendi cuma anak kampung yang tinggal dipinggiran kota Jakarta, kalo sohib tau Universitas Indonesia (UI) Depok. Nah, kira-kira sekitar situlah tempat tinggal Bang Pendi. Maklumlah, dulu Bang Pendi bekas Rektor UI, eh..bukan! maksudnye tukang cari rumput di UI, hehe...

2. Bang Pendi paling jago memanjat, segala macam pohon bisa Bang Pendi panjat kecuali pohon toge, hehe. Ada ceritanye kenape Bang Pendi jadi jago panjat, Bang pendi emang lahir dari keluarga yang penghasilannye pas-pasan, jadi yang namanye uang saku Bang Pendi jarang-jarang punya. Nah, waktu kecil dan saat musim layang-layang, Bang Pendi nggak punye duit buat beli layangan. Akhirnye cuma bisa nunggu layangan putus doang. Karena waktu itu masih banyak pohon, layangan yang putus seringkali nyangkut dipohon. Nah, karena keinginan untuk punya layangan tanpa membeli begitu kuat, hingga setinggi apapun pohonnya tetep Bang Pendi panjat termasuk di pohon bambu sekalipun, hehe.

3.  Bang Pendi paling suka makanan pedas apalagi yang namanya rujak. Wah, jangan ditanya dah....dari rujak buah biasa, rujak bebeg sampe rujak bibir, Bang Pendi paling demen dah! hehe. Sayangnya sekarang Bang Pendi kudu ngurangin makan makanan pedes karena punya penyakit maag. Dan itu sering-sering kumat, apalagi kalau hari sudah malam. Mah...mah.....malam jumat nih! hehe.

4.  Olahraga favorit Bang Pendi adalah sepakbola, walau banyak permainan yang Bang Pendi bisa...macam bola volley, tenis meja, bulu tangkis, catur bahkan maen serong... hehe. Sejak kecil bakat sepakbola cukup menonjol bahkan ortu sempat berniat menyekolahkan Bang Pendi di sekolah atlet Ragunan agar bakat nya bisa tersalurkan. Sayangnya saat pendaftaran, Bang Pendi salah masuk. Bukannya kesekolahan Ragunan tapi malah ke kandang orang utan di kebon binatang Ragunan, jadi batal deh...hehe.

5.  Bang Pendi paling kagak bisa berenang. Mungkin trauma karena waktu kecil  sering dilarang untuk berenang di kali Ciliwung dan ditakut-takutin kalo disitu ada buayanya. Jadi kalo temen-temen berenang, Bang Pendi cuma bisa ngeliatin dan kebagian jagain baju mereka. Sekarang masih pengen belajar berenang tapi kalo yang ngajarin cewek cakep yang punya body kayak palem botol, Bang Pendi mao dah...hehe.

6.  Bang Pendi super duper gaptek, jadi kalo sohib ngomongin soal IT...wah, Bang Pendi nyerah dah. Kenal sama komputer aja belon lama, abis dari dulu tuh komputer kalo diajak kenalan ngabur-ngabur mulu, hehe.

7.  Bang Pendi seorang perokok, dan itu bukan hal yang membanggakan bagi Bang Pendi. Sebenernye ude lama Bang Pendi coba ngilangin kebiasaan buruk itu, tapi masih susah. Tapi sekarang ude mulai bisa ngurangin, maksudnye ngurangi beli! klo minta sama temen, masih tetep....hehe.

8.  Bang Pendi orangnya minderan alias serba nggak pede kalo mao ngapa-ngapain. Termasuk dalam hal pergaulan, rasanya masih kesulitan dalam berkomunikasi dan bersosialisasi dengan orang lain. Jadi terkesan pendiam dan tak banyak omong, apalagi kalo ude beduaan sama cewek cakep ditempat sepi dan gelap. Kalo seperti itu sih, pasti moto Bang Pendi..."Talk Less Do More!" hehe...

9.  Bang Pendi punya kebiasaan memendam perasaan, makanya di kebon banyak bekas galian tanah tempat Bang Pendi mendem perasaan, hehe. Maksudnye kalo punya masalah, Bang Pendi seringkali menyimpannya sendiri dan seringkali pula masalah-masalah itu bertumpuk bagai bisul yang semakin lama makin besar. Kadangkala, apa yang dirasain ame Bang Pendi cuma berani diungkapin lewat puisi, monolog ataupun cerpen. Dan postingan sarap di blog ini juga salah satu cara Bang Pendi mengurangi beban pikiran, hehe.

10.  Apa yang di inginkan Bang Pendi dalam hidup ini cuma satu yaitu jadi orang bener...(jangan sampe salah baca, jadi orang bener! bukan bener-bener orang. Kalo bener-bener orang nanti ada yang ngira selama ini Bang Pendi bukan orang, hehe). Maksudnye, bener jadi anak, bener dalam berkeluarga, bener dalam bermasyarakat, bener dalam beragama dan bener-bener lainnya.

Nah, kira-kira seperti itulah 10 hal tentang diri Bang Pendi. Walau belum semua keanehan-keanehan dalam diri Bang Pendi yang terungkap tapi 10 hal diatas, Bang Pendi rasa cukup mewakili.

Rabu, 22 Juni 2011

SUNGGUH TERLALU...

Jakarta ude ngerayain ulang tahunnye yang ke 484. Ude tua banget ye...? Tapi biar tua, Jakarta ibarat jande kaya yang masih keliatan bahenol dan  royal ame duit, juga masih seneng dandan. Sehingga masih banyak orang-orang yang berebut ngedeketin die buat ngedapetin duitnye, hehe....sayangnya, walau bahenol tapi punya penyakit yang kagak sembuh-sembuh...ada kurap, kudis, panu juga korengan...(maksudnye, masalahnye makin banyak!hehe..). Nah, kalo orang-orang mah berebut nyari duit...Bang Pendi mah enggak, dia malah nyante-nyante aje.

"Heh...pagi-pagi bengong aje kerjaanlu! rejeki bisa dipatok ayam noh..." tereak Nyak Salminah, enyaknye Bang Pendi. Bang Pendi yang kaget jadi nyusruk dari atas bale-bale.

"Bujug dah...Kalo negor jangan pake tereak-tereak apa Nyak! Ngagetin aje..."

"Lagian daripagi ngejogrok disitu kagak pindah-pindah. Ngasih makan ayam kek..! Bantuin Babehlu macul kek..! Noh...liat orang-orang pade getol usahe nyari duit. Elu malah diem aje, gimane mao maju kalo males kayak elu!?" Bang Pendi langsung diem, apa yang diomongin enyaknye emang seribu persen bener. 

Kadang-kadang kalo ketemu temennye die jadi malu, apalagi kalo tau mereka ude pade sukses. Kayak si Ridwan, temennye dari Padang ntu...cuma jualan CD cewek ame kutang sekarang ude sukses. Si Poltak ude jadi pengacara, si Trimo ude jadi pengusaha bakso telor cecek, hehe. Pernah die ketemu si Poltak dijalan, Bang Pendi malah jadi bahan tertawaan...

"Hei kawan...Gimana kabarnya? bisnis apa sekarang?" tanye si Poltak. si Jabrik yang kebetulan jalan bareng ame Bang Pendi langsung nyeletuk.

"Wah, si Pendi mah masih karyawan Tempo Bang. Kerjaannye ngetik..."

"Bah...hebat kali kau! jadi wartawan pula rupanya..."

*"Bukan wartawan Bang... tapi kerjaannye tempo-tempo macul dikebon, tempo-tempo nyari kayu bakar. Kerjaannye juga ngetik...kadang ngetik daon singkong, kadang ngetik daon melinjo, kadang juga ngetik pete.." si Jabrik cengengesan. * celetukan temen

"Itu metik...bukan ngetik!!" Bang Pendi melotot. Si Jabrik ame si Poltak ngakak.

Bang Pendi nyadar kalo orang seantero kampung ude nganggap die orang males. Tapi sebenernye  Bang Pendi bukannye males tapi die kagak mao usaha aje, hehe...sami mawon ye.
Tapi Bang Pendi bertekad mao berubah. Biarin deh, die jualan cd cewek ame kutang (walo pas jualan, pasti pikiran ngeresnye kagak bakalan ilang-ilang dan  bawaannye ngikik mulu, hehe).
Yang penting usahe...ye nggak!?

"Pen....Peeeeen! celana panjang coklat  ame kolor ijo babeh, pade kemane ye...elu ngeliat gak Pen!?" tereak Babeh Jupri.

"A..a..anu Beh, celana ame kolornye ude Pendi jual. Aye pan lagi belajar usahe jualan..."

"Hah...usahe palelu pitak! usahe sih usahe, tapi kenape celana gue yang elu jual...keterlaluan banget lu jadi anak. Sini lu...!!" tereak Babeh Jupri sambil bawa gesper dan nyamperin Bang Pendi. Tau gitu, Bang Pendi langsung ngacir....

"Enyaaaaaaaaaaaaaakkk!!"

Niat jualan cd ame kutang, kenape jadi celana kolor babehnye yang dijual ye..? Bang Pendi emang sungguh terlalu...


Selamat Hari Ulang Tahun Jakarta yang ke 484
Semoga makin bahenol aje deh...

Jumat, 17 Juni 2011

IDENYA BANG PENDI

Baca postingan temen, Bang Pendi mikir. Iye..ye, taon 2014 ude di depan mata, masa pemerintahan Pak SBY ude deket-deket lagi mao abis tapi kayak-kayaknye masalah korupsi di negara ini bukannye pade ilang tapi kayaknye tambah merajalele, hehe.

Susah juga emang buat ngeberantasnye, klo temennye Bang Pendi bilang sih sebenernye maling atawe koruptor ntu terbagi menjadi 2 type :

1. Type maling/koruptor yang melakukan kejahatannya karena terpaksa atau karena kebutuhan hidup. Kalo maling kecil mungkin buat makan keluarganye tapi kalo koruptor barangkali merasa kurang terus karena gaya hidup. Walau gajinye gede, tapi anaknye yang satu minta beliin BMW, anak satu lagi minta Mercedes, bini tua minta beliin rumah baru, bini muda minta beliin kapal pesiar, selingkuhan minta jalan2 ke Paris. belon lagi ngejar setoran buat balikin modal, karena waktu masuk PNS pake duit sogokan, hehe.

2. Type maling/koruptor yang melakukan kejahatannye bukan karena terpaksa tapi karena hoby. Hoby? hoby kok maling? hehe. Nah type yang kayak gini rada2 susah ngeliat ada yang nganggur dikit, kagak pake lama...maen embat aje! Type yang kayak gini paling susah diberantas, yah..namanye juga hoby klo kagak niat bener, susah ngilanginnye.
Sok tau ye!? hehe..

Nah, sebenernye itu yang lagi diomongin Bang Pendi ame Bang Mamat dan si Jabrik. Gara-gara maling mulai merajalela lagi di kampungnye Bang Pendi. Jangankan peralatan elektronik, CD nye Bang Pendi yang ude bolong-bolong aje ikut ke embat juga. Parahnye lagi...kalo ga keburu ketahuan, neneknye Bang Pendi juga ikut dibawa (disangkanye barang antik, kali ye!? hehe).

"Heran ye? Padahal siskamling kite tetep jalan tapi kenape maling-maling pade berani ye..?" tanya si Jabrik.

"Dimane-mane maling biasanye emang lebih pinter daripade polisi. Makanye sistim siskamling kite sekarang yang perlu direboisasi, Brik!" celetuk Bang Pendi.

"Reboisasi? pitak di kepalelu tuh yang perlu direboisasi, biar tumbuh rambut..." balas Bang Mamat.

"Yah, namanye juga si Pendi Bang, yang nilai Bahasa Indonesianye jeblok. Disekolahan waktu ditanya arti pribahasa...Bagai katak dalam tempurung, die malah jawab...kurang kerjaan aje tuh katak! ngapain juga maen dibawah tempurung..." kate si Jabrik sambil ngakak. Bang Mamat ikut-ikutan ngakak.

"Wah, sarap lu Pen! kagak takut dijitak guru?" kata Bang Mamat.

"Ade lagi Bang. Waktu disuruh ngartiin pribahasa...Lain ladang lain belalang, lain lubuk lain ikannya. Eh, die bukannye jawab tapi malah protes....Kalo laen ladang laen belalang mungkin bener Pak! tapi kalo laen lubuk laen ikannye kayaknye gak bener tuh. Soalnye, kagak di danau kagak dikali semuanye sama, yang banyak cuman ikan sapu-sapu...!" sambung si Jabrik sambil cekakakan.

"Ah, elu Brik...malu-maluin gue aje. sekarang gimane nih supaya bise bikin maling kapok!?" ujar Bang Pendi.

"Emang rada susah Pen, kalo mao bikin kapok. Jangankan maling kecil, yang korupsi gede-gedean aje kagak ade yang kapok. Lah, gimane mao kapok? ude tau die itu korupsi...tapi kagak ditangkep. Eh, malah dibiarin pergi keluar negri hanya karena alasan berobat. Sekalinye ketangkep, dipenjare malah dikasih fasilitas mewah...ude gitu bisa bebas keluar masuk sesuka hati, hebat pan....!? Dan yang terakhir kasusnye si Malinda Dee, ude tau die banyak makan duit negare. Eh, mao operasi masih mao pake Jamkesmas yang mestinye buat rakyat kecil..." kata Bang Mamat.

"Nah, itu gare-gare si Malinda nye cuma dihukum 2 bulan. Jadi payudaranye sakit tuh..!" celetuk Bang Pendi.

"Ah, yang bener lu Pen? duit ngebobol banknye pan banyak, kok cuman dihukum 2 bulan? lagian ape hubungannye hukuman 2 bulan ame payudara?" si Jabrik heran.

*"Iye bener cuma 2 bulan, tapi tiap hari disuruh netekin narapidana satu LP.., gimane kagak kempes lagi tuh payudaranye!" Bang Pendi, si Jabrik ame Bang Mamat pade ngakak. Abis ngakak, Bang Pendi punya ide buat bikin kapok maling-maling. (*celotehan temen)

Seminggu kemudian, para peronda termasuk Bang Pendi bisa nangkep maling yang lagi beroperasi. Aneh tapi nyata, kali ini si maling mohon-mohon minta digebukin aje daripade nurutin maonye Bang Pendi. Para peronda yang laen juga bingung, kenape dilarang Bang Pendi gebukin tuh maling. Tambah bingung lagi pas denger kalo Bang Pendi mao nyediain makanan buat tuh maling.

Bener aje, ternyata Bang Pendi bawain 2 piring makanan tapi isi piringnye beda. Yang satu isinye tahi kambing dan yang satu lagi isinye tahi kebo, nah...si maling disuruh makan sampe abis 2 piring ntu!. Jelas aje tuh maling nangis bombay disuruh makan gituan, so pasti die kapok maling dikampungnye Bang Pendi lagi, hehe.

Nah, ntu idenye Bang Pendi buat bikin maling kapok. Ada yang punya ide lain..? hehe..

Selasa, 14 Juni 2011

PENGEN NGADEM...

Wah, runyem dah...
Tiap hari nonton tv, beritanye bikin kepale puyeng aje. Denger pelaku korupsi, Nazaruddin ame Nunun Nurbaeti yang kagak ketangkep-tangkep (kagak ketangkep ape sengaje diumpetin ye!? hehe..). Atau denger berite PSSI yang kagak selese-selese, terus berita perselingkuhan artis Aura Kasih ame Bang Pendi, hehe. Karena keseringan puyeng nonton berita, akhirnye Bang Pendi milih nonton drama Korea " Dong Yi " di indosiar. Ude persis ibu-ibu ye..? hehe

Nah, daripade terus-terusan puyeng, Bang Pendi juga pengen ngadem sekalian mao bagi-bagi award. Ini die awardnye...




Award ini Bang Pendi kasih ke semua sohib-sohib yang ude follow atawe siape aje yang ude mao mampir di mari. Pokoknye semua tanpa pandang bulu (soalnye geli kalo sampe ngeliat bulunye, hehe...). Buat sohib-sohib yang berkenan, silahkan dicomot dah....

Jumat, 10 Juni 2011

REUNINYA BANG PENDI

Umurnye Bang Pendi ude kepale tige tapi urusan jodoh rasa-rasanye masih jauh. Bayangin aje, temen-temen seangkatannye ude pade punye anak seumuran anak SMP, die belon juge nemuin perempuan yang mao diajak kolaborasi buat bikin anak, hehe. Sama aja dengan jodoh, rejekinye juga bise dibilang seret. Sampe sekarang die masih nganggur, dulu kerja di tokonye Koh Achong die dipecat gare-gare keseringan kentut waktu ngelayanin pembeli. Coba-coba jualan duren, die kapok. Gare-gare ujung kakinye ketiban duren sampe pecah jadi lima, hehe. Lame-lame die mikir, ternyate jodoh ame rejeki ada korelasinye, rejeki seret jodoh juge bise ikut seret. Saking susahnye dapet cewe, babehnye sempet nyeletuk.."Mangkanye cewe banyakin! jangan pitak di palelu yang dibanyakin..." set dah...tega amat ye! hehe..

Kalo lagi pusing gini, biasanye Bang Pendi ngeloyor ke warungnye Mpok Mumun. Biase..nyari utangan, hehe. Nyampe disono, ude ada si Udin ame si Makmun, temen seangkatannye waktu di SMP. Kedengerannye sih lagi ngomongin soal reuni.
"Nah...nah, elu pade mau ngadain reuni ye?" Sela Bang Pendi.
"Ah elu Pen, ngagetin gue aje! Lagian mau tau aje lu..." Ujar si Udin.
"Yah...mentang-mentang di SMP gue paling imut, baik hati, tidak sombong dan rajin cukur bulu ketek. Elu pade mao reunian, gue kagak diajak-ajak.." Bang Pendi rade ngedumel. Si Udin ame si Makmun saling pandang ( tapi kagak pake kedip-kedipan mata, hehe..). Die bedue langsung ngakak.
"Iye..iye deh gue kasih tau. Reuninye besok minggu, selepas Johor di rumah Markonah" kate si Makmun sambil nahan-nahan tawa.
"Heh...Markonah temen kite yang ude janda ntu?" Bang Pendi nyengir seneng.
"Huuuu...dasar Pendi! Denger jande...langsung deh" celetuk Mpok Mumun.

Hari minggu siang, Bang Pendi ude rapi jali. Baju baru, celana baru...sepatu juga baru (Baru ngembat di kampung sebelah, maksudnye...hehe). Belon Johor Bang Pendi ude nyampe di rumahnye Markonah, lumayan bise pedekate ame ntu jande sebelon temen-temennye dateng, pikirnye...hehe.
"Eh...elu Pen. Mao ngapain kesini?" tanye Markonah heran.
"Ta..elah tega amat lu, pake ditanyain mao ngapain. Gue pan mao ngeliat reunian, emangnye kagak boleh!?" ujar Bang Pendi.
"Reuni? Bo..bo..boleh. Oh..iye, masuk deh Pen. Elu mao ngopi?"
"Boleh deh, sambil nungguin temen. Eh...mao reunian kok pake ade balon segale?" tanye Bang Pendi pas ngeliat ade balon-balon digantung.
"Iye...reuninye sekalian ngerayain ulangtahun anak gue yang SMP" jawab Markonah.

Abis nganterin kopi, Markonah ijin kebelakang buat nyiapin kue. Bang Pendi duduk diteras depan sambil nguyup kopinye. Nggak lama, dateng satu persatu anak-anak kecil sepantaran SMP. Sebenernye Bang Pendi agak heran..."Reunian gue kok digabung ame anak-anak kecil sih?," akhirnye die cuek. Tapi sampe acara ntu anak-anak ude mao bubar, si Udin ame si Makmun belon juge keliatan batang idungnye. Karena penasaran, akhirnye die nanya juga me Markonah.
"Mar...sebenernye acara reuni kita jam berapa sih? kok sampe jam segini, yang laen belon dateng.."
"Reuni kita? Siapa yang mao reuni?. Yang ada...ntu anak gue yang reunian ame temen-temen SD nye.." jawab Markonah. Muka Bang Pendi langsung merah kayak tomat busuk, kagak permisi lagi die langsung ngeloyor pergi.
"Kurang asem..!! Gue di kadalin si Udin ame si Makmun..." Bang Pendi ngedumel. Dijalanan, die ketemu ame mereka.
"Udahan Pen...reuninye?" tanya si Udin.
"Udahan palelu bau menyan! Brengsek lu pade...." Bang Pendi ngamuk-ngamuk. Si Udin ame si Makmun ngakak ampe guling-guling.
"Lagian, orang gue lagi ngomongin reuni anak gue...elu maen nyela aje. Salahlu sendiri...!!" si Udin ame si Makmun ngakak lagi.

Kamis, 14 April 2011

SINDROM NORMANIPUS

Wah, saban hari kalo ngeliat tipi, yang ada isinya Briptu Norman mulu. Hebat bener ye... die jadi ngetop mendadak kayak artis. Tapi kire-kire, die masih mao jaga pos nggak ye? hehe. Nah, gare-gare keseringan ngeliat Bang Norman ntu, Bang Pendi jadi kayak kena sindrom. Mendadak aje, die jadi demen nonton pelem India, lagu India, gaya India. pokoknye ape aje yang serba India. Tapi kagak ape-ape deh, daripade keranjingan nonton bokep kayak anggota DPR, mending keranjingan lagu India. Ye nggak?

Bang Pendi sekarang mulai hapal ame artis-artis India. Dari mulai artis senior kayak Amit-Amit Manacahan, Garukh-Garukh khan sampe Sirih Kapoor dan Kajol Geal-Geol. Belon lengkap rasanye kalo nggak bise ngomong kayak orang India, yang suka godek-godek ntu lho... makanye Bang Pendi mulai latihan godek-godek kepalanye, walau pernah penumpang satu angkot langsung pade turun gare-gare nyangka Bang Pendi kumat ayannye. 

Dan yang lebih parahnye lagi, sekarang Bang Pendi kagak boleh ngeliat tiang nganggur. Entah ntu tiang jemuran, tiang bendera ampe orang lagi berdiri aje bise jadi tempat die nyanyi sambil muter-muter. Lagu yang die nyanyiin...
K'tumbar Jahe... K'tumbar Jahe...Hei... hei...
K'tumbar Jahe... K'tumbar Jahe...Hei... hei...
( ntu lagu India, ape orang jualan bumbu masak ye? hehe )

Nah, gare-gare Bang Pendi kayak gitu, imbasnyepun jadi luar biase...
Sekarang ibu-ibu kalo lagi jemuran pakaian, pasti ditemenin lakinye yang siap megang pentungan. Ada lagi yang lebih sadis , ntu tiang jemuran dililitin kawat berduri kayak pohon mangga. Ntu gare-gare saking takutnye, tiang jemuran jadi doyong (miring) atawe rubuh gare-gare diputerin Bang Pendi. Disekolah SD, sekarang ada kebijakan meniadakan upacara bendera dan tiang benderanye juga dicopot. Orang-orang  juga langsung pade nongkrong kalo ketemu die di jalan, seperti ibu-ibu yang beli sayuran, tukang siomay, tukang bakso sampe Pak Lurah yang lagi ngobrol ame stafnye di depan kantor, langsung pade nongkrong. Semua pade takut jadi tempat muternye Bang Pendi! hehe

Emang berat tantangannye buat ngejalanin hobi barunye ntu. Tapi akhirnye kemaren die nyerah dan kapok, kagak lagi-lagi bergaye India. Ntu gare-gare tiang jemuran ame tiang bendera kagak ade lagi yang bise diputerin, terus die muterin pohon mangga. Badannye langsung gatel-gatel, karena ternyate disitu ada ulet bulunye. Bang Pendi sempet heran, prasaan berita kemaren... ntu ulet bulu lagi piknik di Bali, kenape ude sampe sini ye?

Batal deh, Bang Pendi ngetop kayak Briptu Norman. Tapi justru dari situlah Bang Pendi dapet hikmah, kalo mao berhasil... kagak perlu dah ikut-ikutan orang. Jadi diri sendiri, ntu lebih baek...ye nggak?





Selasa, 12 April 2011

DEWAN PORNO RAKYAT

Bang Pendi keliatan lagi serius banget baca koran di warungnye Mpok Mumun. Pake geleng-geleng kepale segala, sampe-sampe kagak tau kalo si Jabrik ude duduk disampingnye.

"Eh, elu kayaknye serius amat Pen. Baca apaan sih?'" tanye si Jabrik.

"Ini Brik, gue lagi heran. Yang bikin koran pade sedeng ( gila ) kali ye? masa foto orang pade jungkir balik semua..."

"Yah, otaklu aje yang miring Pen. Gimane kagak jungkir balik! lha, elu bacanye aje kebalik..." sela Mpok Mumun.

"Ya elah, Mpok Mumun protes aje. Pan sekali-sekali perlu inovatif, kreatif dan imaginatif, ye nggak Brik!?"

"Ah, sok tau lu Pen. Nggak sekalian intif-intif?" Mpok mumun cekikikan.

"Ah... Empok, ngintip pake dibawa-bawa. Sekali-sekali buat ngilangin jenuh pan kagak ape-ape. Emangnye anggota DPR aje, yang boleh nonton pelem porno buat ngilangin jenuh"

"Bener tuh Pen! malu-maluin aje ye. Nah, sekarang pade ribut minta bikinin gedung baru. Jangan-jangan minta bikinin kamar tidur tuh, buat naroh gun... yang bisa ngilangin jenuh"

"Bisa jadi Brik..."

"Nah, nah. Kalo ngomongin gituan, pade demen banget dah..." sela Mpok Mumun.

"Ya, bukan ape-ape Mpok. Mereka pan Dewan Perwakilan Rakyat, bukan Dewan Porno Rakyat. Klo nonton dirumah sih kagak ape-ape, masih wajar-wajar aje. Nah, ini pan lagi rapat. Masa orang-orang pade rapat, die malah nonton gituan.  Lagian kalo mao ngeliat  yang telanjang, ngapain juga di hp? Noh, urusin yang pade bugil massal di Jawa Timur. Saking bugilnye, bulu-bulunye aje pade keliatan!" kate Bang Pendi.

"Ah, yang bener lu . Siape yang pade bugil Pen?" si Jabrik penasaran.

"Noh, ulat bulu! Pan pade kagak pake baju tuh, bulunye aje pade keliatan" Bang Pendi cengengesan.

"Ah, sialan lu. Kalo itu mah, nyolek aje, gua bakalan kagak mao..." si Jabrik ngedumel. Bang Pendi ame Mpok Mumun cekakakan.

Senin, 11 April 2011

BAYAR HUTANG LAGI...

Seperti yang ude-ude, Bang Pendi emang kebiasaan banget nunda-nunda pajang award yang dikasih sama sohib-sohib. Ntu emang penyakit lame yang ampe sekarang belon ketemu obatnye, jadi harap maklum dah!
Tapi walau bagaimanapun, Bang Pendi tetep berusahe jadi sohib yang baek, walo telat...paling kagak Bang Pendi ude berusahe ngehargain kepercayaan sohib-sohib yang ude ngasih award-award tersebut. Dan kalaupun ade yang kelewat ato kagak kepajang, Bang Pendi mohon maaf yang sebesar-besarnye, ntu bukan kesengajaan tapi mungkin ude lupa karena ude kelamaan.
Dan yang terpenting dari semua ntu, Bang Pendi tetep berusahe untuk ngejage tali silaturahim dengan sohib-sohib. Moga-moga aje tetep terjalin erat, kalo perlu Bang Pendi beliin power glue biar tambah lengket, hehe.
Nah, inilah award dari sohib-sohib. Eng..ing..eng !!



Ini award dari Non Ata ( Wonderful Life )



Ini award dari Non Sri Wahyuni ( This is Me, Cerye )




Ini award dari Pak Sis ( Djangan Pakies )


Dan ada satu lagi award yang berupa tag atau tugas yang diberikan oleh Bunda Zita Erwina ( Bunda Loving ). Untuk yang ini Bang Pendi mohon maaf yang sebesarnya, karena nggak bisa mengerjakannya. Alasan-alasannya Bang Pendi utarakan di blognya Bunda Loving. Mudah-mudahan masuk akal, 
maaf ya Bunda....

Nah, sekarang kayaknya ude legaan dikit. Bisa joget-joget lagi sama Briptu Norman, sambil dengerin lagu...


Chal chaiyya chaiyya chaiyya chaiyya
Chal chaiyya chaiyya chaiyya chaiyya
Chal chaiyya chaiyya chaiyya chaiyya
Chal chaiyya chaiyya chaiyya chaiyya

Tarik  Maaaang......!!!

Rabu, 06 April 2011

OBROLAN DI WARUNG KOPI ( 25 )

Kebutuhan makin banyak tapi kemampuan makin berkurang, itu yang dialami ame kalangan bawah. Emang ude ketauan kayak gitu, soalnye nyari duit seperak dua perak, susahnye minta ampun. Tapi Bang Pendi rade-rade bingung kalo ngeliat orang yang ude kaya, tapi masih aje ambil cara-cara kotor buat nambah kekayaannye. Ape emang ude lifestyle-nye kayak gitu kali ye? Huh...harta emang seringkali bikin orang gelap mata.

"Ya elah Mpok, bengong aje...kayak patung semar" celetuk si Jabrik pas masuk warung ame Bang Pendi.

"Hush...sembarangan aje lu Brik. Cakep-cakep gitu dibilang patung Semar, pantesnye mah patung bagong!" sambng Bang Pendi. Die bedue akhirnye cekikikan.

"Heh... heh! Elu bedue belon pernah ngerasain dicium ulekan sambel ye? Pagi-pagi ude cari perkara aje" Mpok Mumun melotot sewot.

"Ya, maaaaf... Mpok. Lagian pagi-pagi ude bengong, rejeki bise pade kabur tuh Mpok! Ya ude bikinin kopi dah" kate Bang Pendi.

"Yaaah... elu mah masih bujangan Pen, belon tau ape-ape. Nah, kayak gue... mikirin anak, gimane sekolahnye, gimane makannye, jajannye terus kebutuhan rumah tangge. Belon lagi mikirin laki gue, sekarang pan lagi nganggur. Dapet duit darimane gue, kalo kagak dari warung. Lha, masih mending kalo yang makan disini pade bayar kes. Kalo ngutang gimane?"

"Wah, wah... utang mah jangan dibawa-bawa Mpok. Ade yang kesinggung tuh!" si Jabrik cekikikan. Bang Pendi cuman cengar-cengir.

"Ya elah Mpok, gitu aje dipikirin. Aye emang belon kawin..."

"Belon nikah maksudnye? Kalo kawin, perasaan gue... elu udahan Pen" potong si abrik.

"Heh, sembarangan aje lu. Gue kawin ame siape?"  Bang Pendi bingung.

"Lha, kambing Kong Sanip yang kemaren beranak, bukannye kerjaanlu Pen?" si Jabrik ngakak, Mpok Mumun cekikikan.

"Aiiiihh... sekate-kate lu! kenalan aje belon" kate Bang Pendi sambil mesam-mesem. "Nah, aye terusin yang tadi. Aye emang belon nikah, tapi bukan berarti aye kagak punye masalah. Semua orang punya masalah, baek yang bujangan atawe yang ude keluarga, walau masalahnye mungkin beda-beda. Yang penting mah enjoy  ngejalaninnye, nikmatin hidup aje! Tapi kite tetep usahe sembari sabar juga tawakal..." kate Bang Pendi.

"Lha, tumben lu ngomongnye bener, Pen?" Mpok Mumun takjup.

"Ya maklum Mpok, die emang mantan karyawan TEMPO. Alias, tempo-tempo bener, tempo-tempo sarap!" si Jabrik ngakak lagi.

"Yah, elu Brik. Makanye kalo ngeliat gue, jangan dari luarnye doang. Liat juga dalem atinye, "Don't rujak bebeg pake lemper!" (hehe, istilahnye maksa banget ye...)

"Don't juge a book by it's cover, kaleee Pen..." Mpok mumun cekikikan.

"Nah, maksud aye juga ntu! penampilan luar sering menipu. Nah, kayak si Selly ame si Melinda tuh. Cakep-cakep tapi kerjaannye tepu sini, tepu sono. Sayang pan, anugerah Tuhan dimanfaatin buat yang kagak bener. Makanye kite-kite Brik, jadi cowok jangan gampang ketepu ame penampilan, bahaya!" si Jabrik ngangguk-ngangguk kayak burung celepuk. Sambil ngomong gitu, Bang Pendi ngelirik ke jalanan. Ada cewek yang mao lewat, kulitnye putih, bodinye bohay punya...."Eh, bentaran Brik..." Bang Pendi buru-buru keluar nyamperin ntu cewek.

"Hah, dasar lu Pen! Ngomong doang sebakul. Ngeliat jidat licin, langsung lupa..." Mpok mumun ngedumel.

"Ati-ati Pen, bahaya! jangan ngerujak bebeg pake lemper...!" tereak si Jabrik. Mpok Mumun cekikikan, Bang Pendi cuek, "Sebodo ah! Namanye juga usahe..." hehe...

Sabtu, 02 April 2011

KENA TILANG

Wah, mantap dah! Baru berapa hari operasi 'Simpatik' yang dilaksanain, Pak Polisi ude nilang ribuan kendaraan bermotor. Kayaknye sih, emang kudu sering-sering tuh ngadain operasi kayak gini. Paling kagak, bise nertibin pengendara motor yang kebanyakan pade ugal-ugalan. Selain itu, kalo ngadain operasi kayak gini, duit tilangnye juga jelas larinye kemane. Ye nggak? Walo setuju, tapi Bang Pendi jadi repot juga. Abis sekarang susah kalo mao minjem motor, hehe.

"Brik, motorlu gue pinjem dulu ya"

"Eh, mao kemane Pen? Banyak razia tuh... emangnye elu ude punye SIM C?"

"Ya elah Brik. Jangankan SIM C, SIM O aje gue juga punya"

"SIM O palelu rengat! Emangnye golongan darah, pake ada O-nya segala..."

"SIM O ntu, Surat Ijin Menghamili Orang, Brik" kate Bang Pendi cengengesan.

"Bukan Onta Pen?" ganti si Jabrik yang ngakak. "Ya ude, bawa tuh. Tapi kalo ade ape-ape, tanggung jawab!"

"Beres dah. Eh, gue punya pertanyaan Brik. Burung ape yang paling disukai Pak Polisi?"

"Ye... mane gue tau"

"Ah, payah lu! Dimane-mane Polisi ntu suka burung KuTilang ame burung Emprit, alias suka Tilang ame suka maen sempritan, priiit... priit... priit!" kate Bang Pendi sambil cengar-cengir. Terus ngacir bawa motornye si Jabrik. 

Tapi baru aje keluar dari gang, die ude di stop Polisi
"Selamat siang. Bisa lihat surat-suratnya Pak...?" ujar Pak Polisi ramah.

"Wah, maaf Pak. Aye ude lame kagak maen surat-suratan! Mending SMS-an aje, kalo nggak buka fb" bales Bang Pendi sambil cengar-cengir.

"Jangan main-main! Mana SIM dan STNK?" Pak Polisi yang tadi ramah jadi berubah galak.

"SIM-nya nggak punya Pak"

"Kamu ini bagaimana. Sudah bawa motor nggak pakai helm, tidak punya SIM pula. Sekarang, mau damai atau tilang"

"Damai aja deh Pak. Kalo damai berapa Pak?"

"Lima puluh...!"

"Waduuh... kalo aye kasih  segitu, gimane saya beli helm Pak? Ini aje masih kurang. Gini aje deh , Pak Polisi pan dikenal sebagai pengayom masyarakat. Gimane, kalo Bapak tambahin dulu 25 rebu buat beli helm. Nah, abis beli helm, baru deh kite terusin tilang menilangnye"

"Ya, sudah. Sana beli helm!" ujar Pak Polisi sambil ngeluarin duit 25 rebu (baek bener ye...). Bang Pendi emang bener beli helm, abis ntu Polisi ngikutin die dari belakang. Tapi abis milih-milih helm, die kagak liat lagi Polisi tadi. Langsung die ambil konci, niatnye mao buru-buru ngacir...

"Eh...eh, mau kemana kamu? Urusan kita belum selesai. Nah, tadi denda nggak pakai helm dan nggak punya SIM sebesar 50 ribu. Ditambah lagi coba kadalin saya, dendanya 25 ribu x 10. Jadi semua 300 ribu!"

"Waduuh Pak. Yang 50 rebu aje kagak ade, apelagi 300. Gini aje deh Pak, Bapak ikutin aye ambil duitnye dirumah" Kate Bang Pendi. Pak Polisi kembali nurutin ngomongannye Bang Pendi.

Bang Pendi langsung nyari si Jabrik...
"Nah, ini motorlu Brik gue balikin! Sekalian gue kasih bonus helm sebagai tanda terima kasih. Eh, gue lagi kebelet nih! Gue tinggal dulu ye..." kate Bang Pendi. Si Jabrik jelas aje seneng banget di beliin helm ame Bang Pendi, tapi mukanye langsung berubah pucet, pas ada Polisi yang nyamperin die...
"Pendiiiiiiiiii...!! Brengsek banget dah ah..." tereak si Jabrik sambil nangis Bombay. Abis, mao kagak mao die yang bayarin semua dendanye Bang Pendi.

Maaf ye... Pak Polisi, ini cuma becande. Aye orang baek-baek ko! hehe


Selasa, 22 Maret 2011

ORANG-ORANG SARAP...!!!

Orang-orang ude pade sarap kali ye? kayaknye ngambil nyawa orang seenak udelnye. Contohnye sekarang di Libya. Bang Pendi sempet ngutuk Bang Moammar Khadafi yang membunuh dan melukai para demonstran atau juga para pendukung oposisi, nah sekarang Bang Pendi ganti ngutuk Amerika dan sekutunye yang nyerang Libya. Emangnye kagak ade cara laen ape?  klo di bom kayak gitu, rakyat yang kagak berdose pan nyawanye bise pade melayang. Kalo nyawa manusia pan kagak kayak layangan yang masih punya senar atawe tali, jadi masih ditarik dan digulung  lagi. Sekali melayang, ya ude selamanye. ye nggak?. Kayak-kayaknye pemimpin Amerika dan sekutu-sekutunye yang sok jago ntu, sekali-sekali perlu naek odong-odong, biar otaknye rade beneran dikit. Kagak sarap kayak sekarang!.

Eh, ngomongin orang sarap, Bang Pendi jadi inget kalo sering nemuin orang yang kayak gitu dijalanan. Kalo diperhatiin, macem-macem aje tingkahnye! Ada yang aje kayak patung, tapi matanye plarak-plirik. Ada yang diem juga tapi mulutnye komat-kamit baca mantra, ada yang iseng bawa-bawa kantong plastik kresek terus masukin ape aje yang die temuin dijalan. Bang Pendi aje sempet mao dimasukin ke kantong tapi berhubung nggak muat, akhirnye nggak jadi, hehehe. Selain ntu, ada juga yang mencak-mencak atawe ngomel-ngomel sendiri dan terakhir ada juga yang senyam-senyum sendiri kayak yang lagi baca ini, hehehe.

Nah, kemaren Bang Pendi sama si Jabrik ketemu sama orang di jalan. Die lagi cengar-cengir sendiri sambil megangin usiran laler dari suiran-suiran tali rapia. Ngeliat Bang Pendi ame si Jabrik lewat, ntu orang gila tambah cengar-cengir ( mungkin die seneng ketemu temennye, hehehe )

"Nah, gue bilang juga ape, Brik! kayak-kayaknye ade yang salah ame muka lu. Tuh liat! orang gila aje cengar-cengie ngeliat elu"

"Sialan lu Pen. Dia mah, emang ude kerjaannye cengar-cengir. Kagak ade hubungannye ame muka gue!"

Bang Pendi sebenernye rade-rade ngeri juga pas orang gila ntu nyamperin. Tapi die berusaha tenang, die pikir kalo diajak ngomong orang gila ntu kagak bakalan ngamuk. Barangkali juga ntu orgil mao kasih nomer togel singapur, hehehe. Tapi Bang Pendi belon sempet ngomong, ntu orang gila ngasih isyarat kayak minta rokok. Kebetulan, die baru beli rokok samsu setengah bungkus yang belon sempet die isep. Tapi baru aje ntu rokok die keluarin, orang gila ntu langsung nyamber semuanye. Bang Pendi sempet kaget, tapi die kagak berani ambil lagi rokoknye, takut orang gila ntu ngamuk. Sambil cengar-cengir, orang gila ntu langsung ngomong nyerocos kayak petasan gantet.

"Elu ngangguk-ngangguk aje Brik, kayak burung celepuk. Emangnye elu ngerti ape yang die omongin?"

"Ya kagak Pen. Lah, elu sendiri celingak-celinguk kayak kadal. Elu ngerti?"

"Kagak juga!" jawab Bang Pendi, lalu keduanyepun ngakak. Tiba-tiba ada suara perempuan tereak-tereak dari belakang.

"Baaaang, makan dulu!"

Bang Pendi ame si Jabrik kebingungan. Die pade kagak kenal ame ntu perempuan tapi kok ngajak makan, die ngajak makan siape?

"Eh, permisi Bang, saya mao istirahat makan dulu!. Kalo abang-abang mao gantingin saya, boleh kok! lumayan kan, bise dapet makan ame rokok gratis" kata ntu orgil tiba-tiba. Jelas aje Bang Pendi ame si Jabrik kaget dan terbengong-bengong.

"Anjriiit, sialan banget tuh orang!. Ternyate die cuman pora-pora jadi gila. Yah, lenyap dah rokok gue" Bang Pendi ngedumel, si Jabrik nahan-nahan tawa.

Senin, 21 Maret 2011

BUKU? TAKUT AH....

Dari dulu, bangsa Indonesia memang terkenal kurang suka baca buku. Itu bisa dilihat minat baca penduduknya yang hanya menempati peringkat 96 sedunia (th 2010). Dan sekarang malah tambah parah, jangankan baca buku, ngeliatnye aje banyak orang yang pade takut. Apelagi kalo bukunye rade-rade tebel, beeuuuh! kagak bakalan dicolek-colek dah. Takut meledak! hehehe. Untungnye di rumah Bang Pendi kagak ade buku yang tebel. Kalopun ade, paling-paling buku bon hutangnye Bang Pendi, hehehe.

Nah, saking takutnye. Jangankan orang awam, pak polisi aje pade takut. Dan sekarang, buku ude kayak selebritis bahkan ngelebihin selebritis. Bayangin aje, gara-gara buku yang geletak di warteg ude jadi bahan tontonan orang banyak, ude gitu dikawal ame polisi bersenjata lengkap. Aura Kasih bakalan lewat dah!
Bang Pendi yang kebetulan lewat, sebenernye pengen liat lebih jelas juga. Tapi berhubung die mao nganter pesenannye Koh Achong, diepun cuma ngelongok sebentar terus langsung mao pergi. Eh, baru aje mao pergi ade polisi yang tereak....

"Hei, kamu. Berhenti!" tereak ntu polisi. Bang Pendi kaget bangat dan die langsung berhenti. Orang-orang yang denger bentakan polisi ntu langsung minggir-minggir ngejauihin Bang Pendi.

"Letakkan bungkusan di tanah, dan angkat tangan!" Bang Pendi tambah gemeter. Die langsung taroh bungkusan ditanah lalu nurutin pak polisi untuk angkat tangan.

"Apa isi bungkusan itu? bom ya?"

"Bu...bu..bukan pak! itu cuman....."

"Jangan bohong kamu!" bentak polisi itu lagi. Terus salah satu temannya yang sudah memakai baju anti bom diminta untuk memeriksa bungkusan itu pake sinar x. Nggak lama dia laporan....

"Didalam bungkusan itu ada beberapa selongsong pipa pendek, beberapa lempengan dan 1 bungkus cairan yang saya duga cairan kimia. Tapi menurut saya, itu baru bahan dan belum dirakit" katanya.

"Ya sudah, langsung buka saja" perintah atasannya.

Dan polisi tadi mulai membuka bungkusan itu pelan-pelan. Nggak lama kemudian, tiba-tiba saja polisi tergeletak di tanah dan berguling-guling. Polisi yang lain juga orang-orang yang menonton langsung menyingkir karena mereka pikir sang polisi terkontaminasi cairan kimia, tapi kemudian polisi itu membuka helm penutup kepalanya dan barulah ketauan kalau dia sedang ketawa ngakak. Ternyata di dalam bungkusan ada lontong 5 biji, risoles 5 biji, bakwan toge 5 biji serta 1 bungkus plastik sambel kacang. Orang-orang yang nonton pade ngakak.

"Tuh kan pak, ape saya bilang. Bukan bom kan!" kata Bang Pendi sedikit lega.

"Kamu sih, bungkus lontong aja rapih bener!" balas sang polisi sambil nahan-nahan tawa.

Senin, 14 Maret 2011

PEMERAN PEMBANTU

Dikampungnye Bang Pendi, ada rumah gedong yang suka dipake buat soting pelem. Bang Pendi kagak pernah tau pelem apa yang disoting , abis Bang Pendi males kesono...bukan ape-ape, die cuma takut kalo sutradaranya milih jadi pemeran utama, pan repot jadinya! hehehe...lagian Bang Pendi dah kapok jadi pemain pelem, dulu pernah disuruh jadi pemeran seorang loper koran yang dikejar-kejar anjing. Kalo anjingnya kecil sih ngga ape-ape, ini anjing herder yang segede alaihim. Pas adegan dimulai, Bang Pendi bener-bener dikejar sama ntu anjing. Eh...ude di kat-kat sama sutradara tetep aje ntu anjing ngejar Bang Pendi, ya ude Bang Pendi terpaksa ngacir pulang ke rumah kagak balik-balik lagi....hehehe.

Nah...ini malem ada soting pelem lagi disono, pas Bang Pendi ame Si Jabrik nongkrong di pos ronda.
"Pen....ada soting pelem lagi noh, yang maen Aura Kasih. Kite kesono nyok..!!"

"Ngapain sih Brik, norak lu!"

"Yah...pake nanya ngapain, ya liat Aura Kasih lah! Emangnye elu kagak pengen ngeliat bodinye yang kayak palem botol ntu dari deket!?"

"Jiaaah...palem botol? Emangnye elu kagak tau Brik palem botol ntu gimane bentuknye? Ngada-ngada aje lu....Lagian kagak usah kesono deh Brik! Soalnye kalo Aura Kasih ngeliat elu kemungkinannya cuman dua, kalo kagak die muntah-muntah ngeliat mukalu...die bakalan ngakak ampe guling-guling kalo ngeliat mukalu yang kayak belah ketupat!"

"Busyeeet...!! Belah ketupat yang kayak gimana tuh Pen,? setau gua yang ada muka oval"

"Ya..kayak mukalu itu! Tapi tenang aja Brik, muka kayak itu masih ada untungnya juga...ya paling kagak kalo lebaran nanti enyaklu kagak perlu repot-repot beli ketupat, tinggal belah aje mukalu!" Bang Pendi ngakak, Si Jabrik gondok.

Akhirnye buat nyenengin Si Jabrik, Bang Pendi ikut juga ke tempat soting. Disono ude banyak banget orang yang pade nonton. Bang Pendi ame Si Jabrik celingak-celinguk tapi kagak keliatan Aura Kasihnya, tiba-tiba ada crew pelem yang ngomong ame Bang Pendi.

"Nah..elu kayaknye cocok nih buat bantu-bantu, elu mao nggak!?" Tanyanye.

Denger kata bantu-bantu, Bang Pendi mikir..."Pasti dijadiin pemeran pembantu nih! jadi pemeran pembantu kalo maennye ame Aura Kasih, kagak ape-ape dah.." Bang Pendi senyam-senyum sendiri.

"Nih...liat Brik! Kalo muka ganteng kayak gue, rejeki bise dateng kapan aje. Ye nggak!?" Kate Bang Pendi sombong.

"Iye...iye!!" Si Jabrik rade-rade dongkol.

"Eh...ngomong-ngomong aye jadi pemeran pembantu ape Bang?" Tanye Bang Pendi ame crew yang ngomong tadi.

"Yah...bukan pemeran pembantu tapi bantuin gue! Tuh...narikin kabel-kabel lampu. Dan kebetulan crew listrik gue pade lupa bawa tespen, nanti kalo ade yang kagak nyala...elu colokin deh jarilu kesitu, ade setrumnye ape kagak!?" Kate crew pelem ntu sambil ketawa.

"Ah...Brengseklu!! Colokin aje ke hidunglu...!!! Bales Bang Pendi kesel, sambil ngeloyor pergi. Si Jabrik yang ngedenger itu langsung ngakak ampe guling-guling.

"Pen...ngga jadi nih pemeran pembantunye!?" Si Jabrik ngakak lagi.

Sabtu, 12 Maret 2011

GILA.....

Gila atawe sarap adalah kata yang identik untuk orang yang mengalami gangguan jiwa, yang berperilaku aneh dan punya cara berpikir yang kurang wajar. Tapi kayak-kayaknya gila tak selalu jelek, contohnya penemu-penemu atau seniman-seniman jaman dulu. Kalo mereka ngga pada gila barangkali tak ada penemuan-penemuan atau karya-karya hebat yang kita nikmati sekarang. Setuju nggak? hehe...

Nah...sekarang kalo ada yang nanya, siapa blogger yang gila? Wew...temen-temen ude pasti nunjuk...tuh Si Pendi! hehehe..tapi nggak apa-apalah sedikit-sedikit gila, asal nggak gila beneran...hehe. Gila kerja, gila nulis...kadang-kadang ada bagusnya juga kan? Kalo gila judi, so pasti Bang Pendi ngga deh! Gila minum atawe mabok-mabokan? Nggak juga. Kalo gila perempuan? Hmm...kayak-kayaknya ada sedikit...hehe. Tapi maksudnya Bang Pendi emang paling gampang puyeng kalo ngeliat wanita cantik, apelagi kalo mukanye kayak Sharon Stone atawe Catherine Zeta Jones...beeuuh! Bang Pendi bakal bela-belain deh...gadein 5 bulan gaji agar bisa beduan ame ntu makhluk...hehe. Eh...ngomong-ngomong 5 bulan gaji manggul beras berapa ye? Ape cukup ye? hehe.

Tapi soal gila menggilai, bukan cuma Bang Pendi yang tergila-gila ama cewek lho..! Cewe juga banyak yang tergila-gila sama Bang Pendi. Nggak percaya kan? hehehe. Waktu ntu Bang Pendi nganter beras ke sebuah wisma, cewe-cewe disitu langsung ngelirik dan senyam-senyum sama Bang Pendi bahkan ada yang nekat narik-narik tangan Bang Pendi kekamarnya. Sayangnya disitu wisma panti jompo! barangkali jarang-jarang ada brodong masuk kesitu...hehehe. Lagian yang narik-narik kekamar cuma minta bantuin jemurin kasur, abis pengurus wisma nggak ada yang bantuin...hehehe.

Ya udah deh..posting gilanya, jangan sampe kebawa gila ya! hehehe..

Senin, 07 Maret 2011

MY NAME IS AMIR

" Ayo cepetan Brik!! Time is monay..." Kata Bang Pendi.

" Halaah...lagulu Pen, pake ngomong bahasa Inggris segala. Mending ngerti, apa yang elu omongin..." Sela Mpok Mumun.

" Jiaah..Mpok Mumun kagak percaya amat, gini-gini saban hari aye begaul ame bule...pernah juga ame Demit More yang artis holiwud itu!" Kata Bang Pendi.

" Demit Mor...mukelu kayak dedemit! Nyebut nama orang aje elu kagak becus, kemaren Brus spilis...terus Jastin Bibir. Hah..gua kagak bakalan percaya dah!!" Kate Mpok Mumun.

" Iye...iye...gua tau Pen, elu biasa begaul ame bule...Bulek Yarsih, Bulek Kateni. Kadang disuruh nyuci piring, kadang disuruh manggul beras, iya pan?" Sambung Si Jabrik. Mpok Mumun cekikikan, Bang Pendi Manyun.

Ngga berapa lama, dari jauh keliatan Bang Candra yang mahasiwa ntu jalan bareng ama cewek bule.
" Nah kebeneran, ntu ada cewek bule. Elu buktiin deh ngomonganlu, gua pengen liat!" Kata Mpok Mumun sambil cekikikan lagi.

Bang Pendi kaget, die langsung panas dingin..." Busyet dah...! Tumben-tumbenan bule dateng kesini. Duh...bisa turun gengsi nih gua kalo ketauan ngibul sama Mpok Mumun. Ya ude..terlanjur basah, mending kelelep sekalian dah..." Pikir Bang Pendi. Pas Bang Candra nyampe deket warungnye Mpok Mumun, Bang Pendi keluar...

" Eh...Bang Candra, tumben nih bawa-bawa bule kesini...mangnya ada acara apaan? Eh...ngomong-ngomong ntu bule cakep, tapi kenape mukanye burik-burik gitu kayak pantatnye Si Jabrik!" Bisik Bang Pendi.

" Hush...Sembarangan aja elu ngomong! Mukanye emang darisononye begitu, tapi bukan penyakitan kayak pantatnye Si Jabrik. Lagian mukanye begitu tetep aje banyak yang demenin, lha..kalo pantatnye Si Jabrik siapa yang mao, ngeliat aja ogah!" Bang Candra ame Bang Pendi cekikikan.

Si Jabrik cembetut..." Orang ngomongin bule, kenape pantat gua yang dibawa-bawa?" Pikir Si Jabrik.

" Ya ude Bang...kebetulan aye mao ngajarin Si Jabrik bahasa Inggris, jadi aye mao ngajak ngobrol ni bule. Boleh kan?" Kata Bang Pendi.

" Wah bagus tuh Pen! Kalo pinter emang mesti bagi-bagi ilmunye. Ya ude kebetulan gua mao istirahat, mao ngupi-ngupi dulu!" Kata Bang Candra. Abis ngomong ame ntu bule, Bang Candra terus masuk warungnye Mpok Mumun mesen kopi.

" Nah Brik...sekarang elu mao tanya ape,? biar gua yang terjemahin "

" Eh...tanyain namanye Pen!" Kata Si Jabrik, Bang Pendi mikir sebentar..." Gua mao ngomong ape ye...?" Pikir Bang Pendi.

" Beres Brik...! Ehm...mis...e...ai Pendi, e...where are you?" Kata Bang Pendi sekenanye, belagak sok pede. Si bule jelas aje bingung..." Ude tau gua disini, kok ditanya gua dimana?" Barangkali ntu bule mikirnye gitu, tapi dengan ramah die jawab juga.

" I'm here....," jawab ntu bule sambil tersenyum. Bang Pendi seneng ternyata pertanyaan ngawurnya nyambung, soalnye die denger ntu bule ngomong...Am hir!

" Ooh..namanye Amir atawe Amsir, Brik...!" Kata Bang Pendi

" Lho..namanye kok kayak nama cowok Pen.." Si Jabrik bingung

" Ya..ga tau juga Brik, soalnye ntu bule rade ngga jelas ngomongnye. Kayak cadel-cadel gitu sih...tapi bener kan Bang Candra?" Tanya Bang Pendi.

Bang Candra kagak bisa ngomong, barusan die keselek kopi ampe batuk-batuk gara-gara nahan tawa denger ngomongannye Bang Pendi. Jelas aje yang laen pade bingung kenape Bang Candra ngakak sendirian tapi pas Mpok Mumun, Si Jabrik ame ntu bule dikasih tau ame Bang Candra, semuanye pade ngakak sedang Bang Pendi yang malu ati pelan-pelan ngeloyor pergi.

" Hei...where are you going Pen? My name is Amir..." Kata Si bule, yang laen pade ngakak lagi.

Jumat, 04 Maret 2011

SI.......

Bang Pendi akhir-akhir ini bawaannya pusing, suntuk bin mumet. Ini gara-gara otak Bang Pendi yang error ( prasaan emang dari sononya ye..hehe ), nah gara-gara error ntu Bang Pendi jadi ngga bisa bedain mana yang penting mana yang ngga penting, mana yang kecil dan mana yang besar. Yang kagak penting dibikin penting dan yang penting dibikin kagak penting, Yang kecil dibikin besar dan yang besar dibikin kecil. Bang Pendi tambah mumet waktu temennya  ada yang ngajarin kalo yang kecil itu jangan dibesar-besarin tapi banyak iklan di koran atawe di internet yang nawarin bisa memperbesar yang kecil. Yang bener yang mana sih...!? :)

Mao hiburan di tipi malah ngedenger berita yang bikin kepale tambah mumet, abis beritanye itu-itu aje alias kagak selese-selese. Dari masalah psSI sampe masalah koaliSI, kagak tau deh ape yang diributin, ape yang direbutin ? Bang Pendi cuma berdo'a moga-moga ntu orang-orang bukan pade ngerebutin teraSI, kalo ngerebutin itu...wah bisa berabe tuh ! Enyak kagak bakal kebagian buat bikin sambel teraSI,  kagak ada sambel teraSI, apa kata Mpok Nia ? hehe. Bang Pendi kadang-kadang ude males ngomongin para petinggi yang pade ribut-ribut ntu, ude males mikirin...ude antipati ! Apalagi kalo masalah korupsi....Beuuuh ! Ujung-ujungnye cuma yang punya banyak duit yang pade ketawe, yang kagak punya duit tetep aje manyun. Kayak si sanuSI yang diciduk poliSI lalu masuk jeruji beSI gara-gara ngembat teraSI ditangisin suSI pacar yang perutnya lagi beriSI karena niupnya kagak pake permiSI terus diusir warga bekaSI yang tak suka sama sanuSI punya akSI.

Hah...Dunia...dunia !!! Pengen rasanye Bang Pendi hibernaSI ( die kira beruang kutub kali ye...hehe ), yang maksudnye buat menyepi buat kasih nutriSI ke otak biara rada beneran dikit tapi rasanya kagak enak sama temen-temennye kayak si Jabrik, Bang Mamat juga Mpok Mumun. Kayaknye kalo lama-lama kagak nemuin die pade Bang Pendi berasa jadi orang kagak penting ! Lagian kapan die jadi orang penting ye...? hehe. Yah...daripade mikir yang kagak-kagak, mending kiita ngupi aja. MAMA KITA NGUPI YUUUK...!! MAU IKUT....? MAU IKUT....?