Senin, 31 Januari 2011

BAYAR UTANG

Kalo punya utang, rasanye emang rade kagak enak. Kepikiran terus...Apelagi kalo lagi jalan, kayaknye ade aje gangguannye. Kadang nabrak cewek cakep lah...kadang nemu duit seratus rebu lah...Eh...itu mah malah enak ya..? Hehehe. Nah..gitu deh yang dirasain Bang Pendi, kebiasaan ngutang kopi di warungnye Mpok Mumun jadi kebawa-bawa suka nunggak posting awardnye. Kayak award Mba Fanny ini...Bang Pendi masih inget sih kalo dikasih award tapi sayangnye lupa nyimpen, terpaksa deh..ngubeg-ngubeg lemarinye Mba Fanny, untungnye disitu ngga ade daleman...hehehe. Akhirnye ketemu juga ntu award yang lagi ngumpet ketutupan piyama strobery....langsung dipajang deh !!


1. Award dari Mba Fanny


Nah..yang ini juga ude lama dikasih sama Mba Seiri Hanako tapi juga lupa dan belon sempet dipajang. Eh...Mba Dewi Fatma kasih lagi award yang sama, ya ude Bang Pendi pajang aje sekalian. Tapi rade ribet...soalnye ade PRnye, bahasa Inggris pula...jadi rade-rade puyeng ngisinye...hehe

1. Thank and link to the person who awarded me this award
Makasih banyak buat Bu Dokter Seiri Hanako juga Mba Dewi Fatma yang ude ngasih award, tapi lain kali jangan cuma ngasih award...kirim-kirim martabak kek..!! hehehe...

2. Share 8 things about my self
Nah..ini yang rade-rade ribet, tapi tenang...Bang Pendi tetep isi kok !
-  Bang Pendi suka grogi kalo ngobrol sama yang namanye perempuan, apalagi kalo cuma berduaan...rasanye pengen buru-buru.....:)
-  Paling takut sama ular....
-  Paling kagak bisa yang namanye berenang. Ade yang mao ngajarin nggak..!? :)
-  Paling doyan ame yang namanye Duren
-  Kadang suka merasa kesepian kalo lagi tidur sendiri di kamar, kadang merasa rame kalo lagi ade ditengah pasar..orang yang aneh !? :)
-  Kalo disuruh pilih...yang kecil ape yang gede ? Bang Pendi suka yang kecil...tapi apalagi yang gede..lebih-lebih sukanye...:)
-  Kata orang sih...Bang Pendi mirip-mirip ame Tom cruise tapi kalo diliat dari atas Monas ! :)
-  Punya moto.." sedikit bicara banyak kerja !" maklum dulunye bekas maling. Lagian moto ntu cuma Bang Pendi pake kalo lagi besukaan...hehehe

3.  Pay it forward to 8 bloggers that I have recently discoverd
Karena yang kasih award ini wanita semua, makanye Bang Pendi coba balikin ke temen-temen blogger cewek juga. Tapi maaf nih...kagak kebagian semua, abis disuruhnye cuma 8...hehe
1. Chikarei
2. Celotehan
3. Nyanyu Amibae
4. Rin
5. Place to study
6. Thya
7. Mata dunia
8. Kucing tengil

4. Contact those blogger and tell them about their awards...
Ya deh...nanti kalo sempet. Tapi mudah-mudahan ude pade mampir dan langsung comot ni award...hehe


2. Award dari Mba Seiri Hanako & Mba Dewi Fatma


Nah..selesai deh bayar utangnye ! Siapa lagi yang ude kasih award ke Bang Pendi tapi belon di pajang ? Hayooo...ngaku..!! hehe...maaf klo emang kelupaan.
( Maaf kalo linknye belon dipasang, nanti nyusul deh...!! )

Selasa, 18 Januari 2011

NYAWA KUCING LEBIH BERHARGA

Wah..dah lama ga nongol jadi ga enak ( Kalo ga enak kasih kucing aja ya.....hehe ), iya ga enak  sama sohib-sohib  yang masih rajin mampir....makasih ya ! Kali ini Bang Pendi diajak Si Jabrik kerumah encangnye di Citayam, rencananya mao minta nangka cempedak yang ude mateng-mateng. Bang Pendi ude ngancem Si Jabrik jangan sampe ngalamin kayak dulu, dulu die sempet jatoh dari vespanya si Jabrik ampe pantatnya besot...ude ditereakin tapi Si Jabrik tetep ngacir bawa vespanya.....itu dulu ! klo sekarang belon tau...kayaknya sih tambah parah...hehe

Nah...setelah semuanye siap, berangkat deh....tapi baru kira-kira seratus meter dari mulut gang, tiba-tiba ada angkot yang hampir nyerempet vespanye Si Jabrik. Si Jabrik yang kaget jadi ga bisa ngendaliin ntu vespa, karuan aje ntu vespa jadi oleng...
" Eh...eh...eh...Pen, stangnya goyang Pen ! Kite jatoh ape kagak nih Pen...!?" Si Jabrik Panik
" Mendingan jatoh aja Brik....biar seru !!" Jawab Bang Pendi setengah dongkol " ude mao jatoh masih sempet-sempetnya nanya " Ngedumelnye Bang Pendi. Ya udeh...akhirnye jatoh juga tuh motor ....Gubraaaaakkkkk...!! untungnye got yang di pinggir jalan ntu ukurannye kecil, jadi Bang Pendi ame Si Jabrik masih sempet ngeloncatin. Tapi tetep aje die bedue pade nyusruk dirumput alang-alang sambil berpelukan....( ini gosip..! hehe ). Bang Pendi langsung bangun...maki-maki supir angkot yang buru-buru tancap gas..." Hooooiiii...jangan lari lu !! Dasar kadal buntung, sapi kurap, upil onta, belatung nangka, kodok bonsai...ingus kuda nil !! "
Bang Pendi terduduk lemes sambil meringis-ringis kesakitan karena dengkul sampe pantatnye lecet-lecet. Si Jabrik juga, die lagi ngelus-ngelus kepalanye yang benjut.

Kalo ade kecelakaan kayak gini biasanye banyak orang pade dateng untuk nonton. Kali ini yang pertama dateng si tukang roti, kayaknye sih die berniat mao nolongin tapi dateng orang laen dan langsung nanya sama tukang roti...
" Eh...ada apaan Bang ? "
" Oh..ada roti keju, isi kacang ijo, susu...roti tawar juga ade ! "
" Ya udeh..yang kacang ijo aja deh ! "
Busyeeet dah....!!! Kirain tuh orang mao nolongin ang Pendi ame Si Jabrik, tapi ternyata cuman mao beli roti. Abis tukang roti, nggak lama tukang somay nongol, tukang bakso, tukang gorengan juga tukang kacang rebus...Makin lama orang-orang makin banyak tapi boro-boro ade yang nolongin Bang Pendi ame Si Jabrik, yang dateng kesitu cuma mao beli makanan, malah ada anak kecil yang ngelemparin kacang rebus ke Bang Pendi ame Si Jabrik yang lagi geletak kesakitan. Bang Pendi berasa jadi anggota Ragunan, dilemparin kacang begitu....ampun dah !!

Sambil nahan-nahan gondok, Bang Pendi ame Si Jabrik bangun...terus pergi ninggalin tempat ntu sambil dorong-dorong vespa..." Apes bangat dah....kite yang buntung, yang untung malah tukang jualan Brik..." Bang Pendi ngedumel, Si Jabrik cuman ngangguk aje sambil meringis-ringis. Eh...nggak lama ada mobil angkot lagi yang ngebut ngelewatin die bedue. Bang Pendi tambah gondok tapi belon sempet die maki-maki...tiba-tiba...." Ngiiiiiiiiiiiiiiiiiiiiiiiiiiiiiiiiiiiiiiikkkkkkkkkkkkkkkkkk...!!!!!!! Mobil angkot ntu ngerem mendadak. Supir angkot keliatan buru-buru turun, terus die ngelongok-longok ke kolong mobil lalu die nyuruh turun penumpangnye dan nyuruh pade ganti angkot. Si supir lari-lari kerumah yang ada dipinggir jalan, nggak lama dia bawa pacul terus ngelongok bawah mobil lagi...ternyata die ngambil mayat kucing yang ketabrak. Bang Pendi ame Si Jabrik melongo ngeliat kejadian itu...." Ternyate nyawa kucing lebih berharga dari nyawa kita Brik ! Liat aje tuh supir, bela-belain nyuruh penumpangnye turun cuman karena mao ngubur bangke kucing. Lha kita ? Tadi keserempet...boro-boro die nolongin, ditengok aje kagak...malah ngacir iya !! " Si Jabrik hanya ngangguk-ngangguk lemes....

Orang-orang ude pade sarap kali ye....!?

Selasa, 11 Januari 2011

SALAH MASUK

" Briiikkk.....Jabriiikkk...!! Hah...dasar kodok bonsai, ditungguin lama bangat..." Bang Pendi mulai kesel kelamaan nungguin Si Jabrik. Dari baju yang tadi Bang Pendi rapi sampe sekarang lecek, dari yang tadinye wangi sampe luntur tuh wanginye...Si Jabrik belon juga nongol. Ngga lame Si Jabrik nongol juga...
" Busyeet dah...!! Ngapain aje sih lu lama bangat ?"
" Ya elah Pen....Gue pan mesti mandi dulu, belon dandannye..."
" Mandi setaon..! kayak perawan aje lu...mandinye lama. Lagian elu mah kagak perlu repot-repot pake dandan segala, pake apaan juga soalnye elu kagak pantes....tetep aje mukalu lecek bin demek..!!"
" Ya elah...segitu sewotnye Pen ! Eh..ngomong-ngomong, emangnye elu ude pernah ngintip perawan mandi ? Siapa Pen..? " Si Jabrik penasaran.
" Iye...pengen lu !? Noh...Si Nina ponakan gue yang baru 9 bulan, pas dimandiin emaknye. Ayo dah cepetan ! Bang Mamat ude nungguin dari tadi noh..."

Di deket warung kopinye Mpok Mumun emang ude ngejogrog Bang Mamat ame bininye dalem mobil, ade juga Mpok Mumun ame lakinye. rencananye emang mereka pade mao pegi kondangan ke rumah besannye Bang Rojali tetangga satu Rt di Citayem. Karena jaraknye lumayan jauh...mao kagak mao dah Bang Mamat bawa mobil buat bareng-bareng kesono...
" Gue naek lewat mane nih Pen...?" Tanye Si Jabrik pas nungguin Bang Pendi masuk ke mobil.
" Elu mendingan masuk lewat knalpot aje Brik....Elu pan sama cemongnye ame ntu knalpot.." jawab Bang Pendi asal sambil nyengir.
" Kedengerannye sewot banget Pen...!? Ude laper lu ye.., pengen cepet-cepet makan disono ?" Ledek Mpok Mumun.
" Ya iyalah Mpok...tekor bandar kalo kondangan kagak makan !"
" Ngomong-ngomong elu ngasih amplop gak Pen ? Jangan-jangan elu bedue cuman pengen makannye doang...Ngasih amplop kagak ade isinye..." Sambung Bang Mamat, semua pade ketawa.
" Yang penting judulnye ngasih amplop...Bang " Jawab bang Pendi sambil mesam-mesem jawa.

Sampe tempat kondangan, tamu yang dateng pas lagi rame-ramenye. Orang yang mao salaman aje sampe ngantri kayak orang antre beli cabe...
" Wah...Brik, kayaknye lama kalo nungguin salaman dulu. Mending kite langsung makan aje nyok...! Perut gue ude laper nih..." Ajak Bang Pendi.
" Ayo dah...." si Jabrik juga hayo aja. Akhirnye tanpa ngomong-ngomong ame bang Mamat juga Mpok mumun, die bedue langsung ngeloyor ke meja prasmanan. Apelagi gurame gorengnye ude pasrah siap diembat....serbuuu !!
" Bang Mamat...kayak-kayaknye kite salah masuk nih bang. Ntu liat pengantennye...kayaknye bukan Si Siti anaknye Bang Rojali " Kate mpok Mumun sambil celingak-celinguk dari jauh.
" Wah..iye ye..! Itu mah bukannye Si Rojali....Kenape tadi kite kagak ngeliat plangnye ye..."
" Abis kebanyakan orang sih Bang..."
" Ya ude kite balik..! Eh...Si Pendi ame Si Jabrik pade kemane...? Ntu bedue cepet amat ngilangnye..." Tanya Bang Mamat. Akhirnye mereka berempat laki-bini celingak-celinguk nyariin bang Pendi ame Si Jabrik.

" Nah...ntu die bedua !" Kate Mpok Mumun sambil nyamperin. " Ya Allah...elu bedue maen makan aje. ayo kite pegi..! Kite salah masuk..." Kate mpok mumun lagi.
" Ta.. elah Mpok, pelan-pelan kenape ngomongnye....Kite pan jadi malu..." Kate Bang Pendi.
" Elu bedue sih..kerjaannye gegares mulu ! Ayo dah cepetan..." Bang Pendi ame Si Jabrik pun naroh piring makan pelan-pelan, tengok kiri-kanan sambil cengar-cengir malu karena diliatin orang yang lagi pade senyam-senyum geli ngeliat tingkah die bedua. " Hooiii...mau kemana hooiii...Abis makan bayar hooiii..." Ada yang ngeledek begitu. bang Pendi ame si jabrik buru-buru ngacir nyusul Mpok mumun. Untung...makannye tadi pas banget ude abis, jadi kagak tekor-tekor amat....untung malah, kagak kondangan tapi dapet makan !! Hehehehe.....

Jumat, 07 Januari 2011

KE PARANORMAL

Melihat si Jabrik belon juga punya cewe, Bang Pendi jadi rade-rade kasian juga ame sohibnye ntu. Kebetulan die kenal ame seorang paranormal yang terkenal Sakti Asepguna (kebetulan paranormalnye dari Jawa Barat jadi Saktinye Asepguna, nah kalo Mandraguna itu orang Betawi...hehe).
"Eh...Brik! Elu mao nggak gua ajak ke paranormal? Kali-kali aje die bise bantuin nyariin jodoh buatlu. Katanye sih, die paling manjur kalo soal gitu-gituan. Namanye Ki Ambu.... "
"Paranormal? Wah, ogah gue Pen...gue paling nggak berani ngeliat tampang dukun"
"Yang namanye dukun atawe paranormal emang rate-rate begitu Brik, walau kagak semua! Lah... kalo ganteng kayak gue alias Cristian Bautista gini, nanti cewe-cewe pade dateng bukan pengen di ramal tapi di lamar" Bang Pendi ngikik.
"Cristian Bautista palelu peyang! elu mah pantesnye Bautinja bukan Bautista" kata si Jabrik sambil cekikikan.

Singkat cerite, sampailah kedua sohib korib itu dirumah Ki Ambu sang paranormal.
"Ini Ki...aye bawa temen namanye Jabrik. Kayaknya susah banget die dapet jodoh, tolong dibantu dah..."
"Seberapa parah kondisinya?" tanya Ki Ambu
"Busyeet dah...emangnye aye ketabrak truk Ki? pake ditanye parah ape kagak..." si Jabrik manyun.
"Maksud gue, kondisi kesulitan dapet jodohnye! Klo di ibaratkan penyakit, susah jodoh juga ade tingkat-tingkatannye. Nah, ntu bisa diliat kalo ketemu cewe di jalan. Kalo cewek papasan ame elu terus ngeliat mukalu dan tersenyum, nah ntu tingkat gampang dapet jodohnye tinggi. Kalo cewek ngeliat mukalu tapi diem, itu tingkatannya sedang. Kalo cewe ngeliat mukalu terus cemberut dan buang muka, itu tingkatannya kurang. Dan yang terakhir, kalo cewe ngeliat mukalu terus die ngebuang muka sambil ngeludah, wah.. ntu tingkatannya ude parah. Nah...elu ada dikriteria yang mane?"
"Wah, kayaknye si Jabrik nggak ada disitu kriterianye Ki. Yang aye tau, cewe kalo papasan ame die di jalan, ntu cewe langsung buang muka sambil ngeludah tapi pas si Jabrik ude lewat ntu cewe balik badan ngeliatin si Jabrik "
"Mao manggil maksudnye...!?" tanya Ki Ambu
"Kagak Ki...! Ntu cewe langsung nyari batu buat nyambit kepalanye si Jabrik dari belakang" kata Bang Pendi sambil ngakak.
"Wah, parah amat!? Kalo gitu sih mending...mati aja lu Brik!" celetuk Ki Ambu. Bang Pendi tambah ngakak, si Jabrik tambah gondok.
"Tapi ada lagi nih Ki....Aye pernah ngajak Si Jabrik ke pasar, pengen liat kire-kire ada cewe ngga yang naksir ame die. Nah..kebetulan pas lewat kantor penggadaian, aye liat juru taksirnye cewe. Iseng-iseng aye ajak si Jabrik masuk buat di taksir..."Maaf Mba, kira-kira kalo temen saya ini digadai, taksirannye berapa?" si Mbak juru taksir ngejawab..."Ah,si Mas ada-ada aja, tapi kalo ditaksir....hmmm...sepuluh ribu aja Mas, itu juga kayaknya sudah kebanyakan " jawabnya sambil cekikikan.
"Hah, cuman ceban doang...!? tanya Ki Ambu sambil ketawa huek...huek dan terbatuk-batuk, begitu juga Bang Pendi. Si Jabrik makin gondok aje ame Bang Pendi tapi die ga berani ngomel karena takut ame Ki Ambu.
"Ya udeh, kite mulai aje ritualnye. Sekarang dengerin mantra yang gue baca terus ikutin, elu ude siap Brik..!?" Tanya Ki Ambu.
"Si..siap Ki...."

  Ehmm...
  "Gombal wewe...gombal wowo...gombal wiwi
  Cekidat...cekidet...cekidut....cekidot
  Pit alaipit....kadal buntung kejepit....
  Jin Tomang....Jin semanggi.....Jin Jagorawi..."

"Eh, maaf Ki. Itu nama Jin ape nama jalan tol? Prasaan nama jalan tol semua...." Potong Si Jabrik karena penasaran.
"Ntu Jin emang pade seliweran disitu, soalnye dulu die pade bekas pegawai Jasamarga sebelon jadi jin" Jawab Ki Ambu asal. Si Jabrik ngangguk-ngangguk aje sedang Bang Pendi cekikikan dibelakangnye.
"Ya udeh, kite break dulu dah..! Elu juga sih pake ganggu konsentrasi gue. Eh, elu-elu pade ngopi nggak..? Kalo mao, nanti gue bikinin..." tanya Ki Ambu.
"Kagak usah repot-repot Ki! Eh, emangnye bini kemana Ki? Sampe repot-repot bikin kopi sendiri...." tanya Bang Pendi basa-basi.
"Yah, gue mah.. dari dulu emang kagak punye bini. Kagak ade yang mao ame gue..." jawab Ki Ambu sambil ngeloyor ke dapur. Si Jabrik ame Bang Pendi saling pandang...(tapi nggak pake kedip-kedipan mata...hehe)
"Elu gimane sih Pen!! Die aje kagak laku-laku, gimane die bise nyariin jodoh buat gue...!? Ayo..kite pulang dah..."  si jabrik gondok seperempat mati.
"Ayooo..! Eh, tapi tanggung Brik. Lagi dibikinin kopi..."
"Hah, ude dah..kagak pake ngopi-ngopi segala...!" si Jabrikpun ngeloyor pulang sambil ngedumel. Di jalan Bang Pendi kagak bisa nahan tawa sambil megangin perutnye.