Jumat, 22 Januari 2010

PENGANTEN BARU

Malem-malem gini, gerimis masih aja turun kagak ade brenti-brentinya. Bikin males ngapa-ngapain...maonye kekepan ( pelukan ) aje di tempat tidur. Orang-orang sih enak...kalo ude ade yang dikekepin, lha..kayak bang Pendi..siape yang dikekepin...guling aje die kagak punye. Mao kekepan ame enyaknye...malu ame umur, lagian babenye pasti melotot.." sembarangan aje lu.., ini jatah ( bagian ) gue !"

Yah...daripade kagak ade yang bisa dikekepin terus menghayal yang iya..iya...eh..yang enggak..enggak, bang Pendipun ngeloyor ( berangkat ) pergi ke warung kopinye mpok Mumun. Kebetulan disitu ude ngejogrok ( nongkrong ) si Jabrik, setelah kerja bareng...ntu berdue jadi keliatan akrab. Kalo orang Citayem bilang sih...hubungan keduanya adalah hubungan " Simbiosis Mutualisme " alias saling menguntungkan. Kalo bang Pendi kagak punye duit, si Jabrik yang bayarin kopinye..nah kalo si Jabrik kagak punye duit..bang Pendi utang atas nama die..( he..he ..keenakan bang Pendi ya...). Karena cukup akrab, ade yang bilang mereka berdua ude kayak " Pinang di Tumbuk Jadi Dua " ( bukan di belah...! abis sama ancurnye...he..he ).

Lagi asyik ngobrol ngalor-ngidul sambil berbalas kentut ( bukan pantun..! abis dua-duanye kebanyakan makan ubi ), dijalanan lewat bang Kuya ame neng Siti yang masih penganten baru..
" Wah..wah penganten baru ! rendengan ( gandengan ) ajeee.., kayak laron.." celetuk bang Pendi, si Jabrik cekikikan sendiri denger celetukan bang Pendi karena die inget kalo laron sayapnye ude putus pade gandengan kayak bocah maen kreta-kretaan.
" Eh..bang Pendi, iye nih bang...abis ngajak bini ( istri ) jalan-jalan ke Ancol !" jawab sahut bang Kuya
" Wah..enak dong, mampir bang...ngupi dulu nih..!" si Jabrik basa-basi
" Makasih deh bang...aye ude kagak nahan nih..." bales bang Kuya sambil ngelirik neng Siti yang mesem malu-malu kuda. Bang Pendi ame si Jabrik langsung saling pandang ( tapi kagak pake kedip-kedipan mata...he..he.. ), keduanye langsung bisik-bisik..
" Heh..heh ! elu pade ngomongin ape tuh ? mesra amat pake bisik-bisik segale...!" tanye mpok Mumun penasaran.
" Hah...mesra ? ih...jijay deh...emangnye ike..hombreng " jawab Pendi sambil bergaya seperti waria dengan siku tangan kanannye diatas telapak tangan kirinye ( si Jabrik ame bang Pendi cekakakan, mpok Mumun mesem-mesem sambil geleng-geleng kepale )

Nggak lame keduanye keluar warung, rupanye mereka berencana untuk ngintip bang Kuya ame bininye. Nyampe dirumahnye bang Kuya mereka mindik-mindik ( mengendap-ngendap ) di bawah jendela kamar.
" Kite langsung aje ya neng.." suara bang Kuya. Bang Pendi bisik-bisik ame si Jabrik " kebetulan brik..! pertempuran baru mao dimulai ", si Jabrik manggut-manggut sambil cekikikan.
" Ah...abang, maonye buru-buru aje ! emangnye abang kagak cape ape..? tadi berenang seharian..." jawab neng Siti.
" Yah...neng..soal gini-ginian mah, abang kagak ade cape-capenye. Makin cape...abang makin nafsu ! malah kalo si eneng mao..tadi dipinggir kolem renang juga abang jabanin ( lakukan ) !"
" Iiihhh..si abang, malu atuh...ame yang laen. Nah..kalo yang laen mao...abang bise kagak kebagian tuh...!" ujar neng Siti sambil cekikikan.
" Iye...ye ! kalo disini..abang bise puas-puasin sendirian ye...ya ude neng...ayo buka cepetan!" bujuk bang Kuya. ( bang Pendi ame si Jabrik saling pandang sambil nelen ludah, sayangnye gorden jendela rapet bangat jadi susah ngeliat ke dalem )
" Ayo dong...neng !" bujuk bang Kuya lagi
" Sabar ape bang...! ya ude nih...abang aje yang buka tapi pelan-pelan ya bang..." pinta neng Siti.  Bang Pendi ame si Jabrik makin blingsatan ( gelisah ), atu-atunye jalan ngintip lewat lubang angin diatas jendela tapi sayangnye tinggi...die bedue kagak nyampe..
" Ya..ude brik ! elu naek dah..dipundak gue, tapi nanti gantian...cepetan nanti keburu abis..!" bisik bang Pendi. Si Jabrik manggut-manggut ( mengangguk ) lalu naek ke pundak bang Pendi yang ude sten bay...he...he. Si Jabrik mulai mencoba ngintip tapi ntu lobang angin tetep aje kagak nyampe...
" Eh..eh brik ! jangan goyang-goyang dong...sakit nih pundak gue.." bisik bang Pendi.
" Sapa yang goyang-goyang, orang gue gemeteran nih Pen...!" jawab si Jabrik
" Emangnye ude keliatan...lagi ngapain ?" tanya bang Pendi penasaran.
" Belon ( belum )....belon keliatan !" jawab si Jabrik. ( bang Pendi ngedumel " halaaaah...brik...brik..!! belon keliatan aje elu ude gemeteran...apelagi ude ngeliat, pingsan bise lu...!" )

" Abang buka sekarang ya neng..., eh..tapi kok empuk gini ? lagian diluarnye aje item...gimane dalemnye nih.. ?" tanya bang Kuya keheranan. ( bang Pendi ame si Jabrik saling pandang lagi ....item !? bisik mereka berdua lalu cekikikan )
" Ye...abang ! item dari luarnye, coba liat dalemnye...! abang rasain sendiri deh..."
" Wah..iye ! ternyate dalemnye putih, eh...tapi entunye ngga ade...nyempil ( terselip ) dimane ?" tanye bang Kuya, kedengerannye lagi bingung.
" Apaannye sih bang yang nyempil...cabe ? di makan aje dulu...ntar juge berase ( terasa )...!
( " Hah...cabe ? emangnye lagi pade ngapain sih...?" pikir si Jabrik. semakin penasaran..die berusaha cari celah buat ngintip, denger gitu bang Pendi juga bingung sambil meringis-ringis nahan pegel pundaknye )
" Enak nggak bang..?" tanya neng Siti
" Wah...enak bangat neng. Pepes Jamur ini emang mantep dah...! pedesnye juga berase..."
( " Hah...Pepes Jamur ?  busyeeet dah...gue ude cape-cape gini ampe dengkul gemeter, nggak taunye cuman lagi makan pepes jamur. Bang Pendi juga pengen ngedumel tapi malah nggak bise nahan-nahan tawanye...dengkulnye jadi lemes. Bang Pendipun jatoh...mukanye persis jatoh diatas kobakan ( kubangan ) aer. Ude gitu badan si Jabrik juga nibanin bang Pendi...muke bang Pendi tambah kelelep aje di kobakan )
Denger ade berisik-berisik di luar, bang Kuya tereak..." heh...siapa tuh !? Monyet ape Orang Utan...? " ( Walaaah..bang Kuya tega amat nanyanye...biasanye juga nanyanye..." Orang ape kucing...?", kalo nanya kayak gitu...mungkin bang Pendi masih mao jawab. Eh...nanyanye "monyet ape orang utan"..ya ude, bang Pendi ame si Jabrik langsung ngacir ). Nyampe di pos ronda, si Jabrik kagak bise nahan tawa sambil guling-guling ngeliat mukanye bang Pendi yang belepotan lumpur. Mao kagak mao bang Pendi juga ikut-ikutan ngakak sambil ngedumel sendiri..." Sialan...ketepu lagi dah...gue !!!".

Senin, 18 Januari 2010

BANG PENDI KERJA EUY..! ( BAG.2 )

Ni hari ude seminggu bang Pendi kerje ame engkoh Achong, pagi ini sambil bersiul-siul di kamar mandi bang Pendi cukur bulu keteknye pake piso ( pisau ) dapur enyaknye..( bujug buneng...!! ). Mane piso ntu pudul ( tumpul ) banget lagi, die kerok sekenceng-kencengnye ntu bulu kagak rontok-rontok juga...eh yang ade juge dakinye ( kotoran ) yang ke kerok, kalo dikumpulin mah...ade kali satu ember..! he..he...

Lagi asyik-asyiknye ngerok ntu ketek, enyaknye tereak-tereak dari luar.
" Pendiiiii...elu bawa piso enyak...!!?" ( set dah...ntu nenek-nenek beberekan bae...( teriak2 aja ) kayak kaleng rombeng ( butut ) pikir bang Pendi sambil tutup hidung..eh..tutup kuping maksudnye...)
" Iye...nyak..!!" bales tereak.
" Emangnye elu mao ngapain mandi pake bawa piso segale, emangnye punyelu mao lu kebiri...!?" ( Aiiiiiihhhh...! enyak sekate-kate kalo ngomong, orang cuman atu-atunye mao dikebiri...bise-bise kagak ngerasain surge nanti..he..he )
" Cepetan Peeen...! enyak mao nyiangin ( potong ) ikan nih..." ( Wah..wah..wah..!! bise-bise ikan yang mao disiangin ude pade kabur duluan tuh, gare-gare kagak tahan nyium piso yang bau keteknye bang Pendi...huek...huek...!! )

Nggak lame bang Pendi ude rapi jali, pake sepatu item yang ude mengkilat disemir pake cuh..cuh..!, kemeja tangan panjang terus bawa ransel. Karena bang Pendi punya moto.." Walau cuman kuli panggul beras, yang penting kesan pertama begitu menggoda...selanjutnye terserah anda.." ( terserah mao digebukin kek..., dilemparin batu kek....he..he ). Sebelum ke tempat kerja, bang Pendi nyempetin minum kopi di warungnye mpok Mumun.
" Gud morning..epri badi...!!" kate bang Pendi pas masuk warung.
" Lagulu pera Pen...kayak beras pegawai negri...!! bales mpok Mumun ( bang Pendi cuman mesem-mesem )
" Wah..wah keren amat lu Pen...!?" tanye bang Somad
" Yoiii..., yang penting penampilan bang, biar cuman luarnya doang. Kalau dalemnye biar bini aye aje yang tau.."
" Binilu yang mane...?"
" Bini siape kek...yang penting bukan bininye onta !" jawab bang Pendi sekenanye sambil nyomot pisang goreng dan pesen kopi. Abis ngopi segelas ame makan ubi goreng dua ( dua belas maksudnye...he..he ) yang kali ini die bayar lunas, die langsung mao cabut.
" Eh lupa...! aye punye pantun nih..." Kalo ade sumur di ladang, boleh kite menumpang mandi...kal..." ( belon selese pantunnye, tibe-tibe mpok Mumun nyautin )
" Sekarang kagak jamannye lagi Pen..numpang !, mao ngapain aje..sekarang mah kudu bayar..." ( saut mpok Mumun sambil cekikikan, bang Somad ngakak...bang Pendi manyun sambil ngeloyor pergi )
" Lha...Pen, pantunnye kagak diterusin..!? tanya bang Somad sambil cekakakan.
" Kagak...!! ude kagak lucu...." jawab bang Pendi sewot.

Sampe ditoko, bang Pendi langsung ganti baju dinasnye yaitu kaos buntung ame celane sedengkul ( bekas celane babenye yang die potong ). Selesai manggulin beras, koh Achong nyuruh bang Pendi jage didepan buat ngelayanin yang beli. Sebab si engkoh seneng, kalo bang Pendi didepan..banyak ibu-ibu yang pade dateng belanje. Ibarat kate.." disitu ade bangke..disitu banyak laler...he..he maksudnye ade gule ade semut..". Si engkoh aje kadang-kadang sampe heran, ade aje akalnye si Pendi buat narik perhatian...dari ngomong rade ngeres sampe nyanjung-nyanjung...seperti kayak gini...pas mpok Surti lewat..

Aku bagaikan kupu-kupu diatas mata air
Ingin rasanya kuminum....tapi aku takut tenggelam
Engkaulah mata air...mata air cinta...
Ijinkanlah kuminum walau setetes saja
Berikan kesejukan pada diriku ini 
Yang lama ditinggalkan pergi....

( Bang Pendi nyanyi lagu dangdut, suaranye mendayu-dayu..turun naek kayak bawa mobil dijalan yang banyak lobangnye...he...he ). Koh Achong seneng sekaligus heran karena mpok Surti mampir dan nggak marah dinyanyiin kayak gitu, ini yang bikin si Jabrik ngiri dan ngotot gantiin bang Pendi didepan...
" Sekali-sekali gue Pen..yang ngadepin cewe. Emang elu doang yang bise...! elu mingseran ( minggir ) dikit dah..." kate si Jabrik sambil ngeludahin tangannye...cuh...cuh ! buat ngebasahin rambutnye yang jabrik, bang Pendi cuman nyengar-nyengir aje.
" Gini nih Pen...tampang yang pantes jadi idola, jangankan ibu-ibu...abg juga bakalan klepek-klepek ngeliat gue.." si Jabrik nyombong.
" Eh brik...!! buah pace..buah mengkudu, gua aje yang kece kagak belagu ( takabur ) kayak elu..."
" Ude deh...sono lu..!!"
" Iye...iye..! gua pengen liat..." jawab bang Pendi sambil nyari tempat duduk di tumpukan beras.

Nggak lame lewat mpok Salma yang emang tersohor paling bahenol di seantero kampung, bang Pendi ampe nyesel mao digantiin ame si Jabrik. Sekarang die cuman bise nelen ludah...
Si Jabrik ude pasang kude-kude ( kayak mao balap lari aje...he...he )

Duhai rembulan malam
Datanglah padaku...hampiri diriku
Sinarilah jiwaku...hangatkanlah kalbuku..

Koh Achong ame bang Pendi sempet bengong dan saling pandang, ngga nyangke si Jabrik bisa bikin puisi. Tapi tiba-tiba mpok Salma nyamperin si Jabrik dan langsung..." Plak....plak..!!" tamparan mendarat di mukanye...
" Kagak tau gua lagi mumet ya...!!? siang-siang ngomongin bulan, lagian enak aje lu nyamain muke gue kayak bulan yang bopeng-bopeng ( tidak rata ) kayak gitu. Gua bilangin laki gua baru tau rasa lu..."
Bang Pendi yang tadi sempet kagum langsung ngakak dan guling-guling diatas tumpukan beras sambil terkentut-kentut, si Jabrik nyengir-nyengir kuda nil sambil nahan sakit pipinye.

Rabu, 13 Januari 2010

OBROLAN DI WARUNG KOPI ( 14 )

PENJARAKU...ISTANAKU



Bang Somad   :  Eh...denger-denger bu Artalita yang nyuap jaksa itu tinggal disel penjara yang kayak istana, Emang bener tuh bang..? Gile bener dah...kalo gitu mah, aye juga mao dah masuk penjare...

Bang Mamat   :  Hush...sembarangan aje lu ngomong ! Emangnye enak masuk penjare..? lha...jangan samain ame die, kalo die mah duitnye banyak. Belon lagi beking dari pejabat-pejabat yang ude kena rayuan mautnye, mao gimane aje atawe mao ape aje gampang ! kalo cuman maling ayam mah..tetep aje empet-empetan di sel kayak ikan sarden... ( sambil ngeganyem singkong goreng )

Bang Pendi    :  Tapi bener kate bang Somad tuh bang...ruang selnye aje 8 x 8 meter, rumah aye aje kalah gede ! belon lagi dalemnye...ade springbed, ruang anak sampe karokeannye juga ade...ck..ck..ck sel penjara ape kamar hotel tuh...!?

Mpok Mumun  :  Alaaaa...sok bangat lu Pen, segala kamar hotel elu bawa-bawa. Emangnye elu tau ape, hotel itu kayak gimane...!? ( cekikikan sambil ngelap penggorengan )

Bang Pendi     :   Eh...si mpok sekate-kate kalo ngomong..! jangankan hotel itu kayak gimane, kamarnye aje ude pernah aye masukin...

Bang Somad   :  Ah...yang ngada-ngada aje lu Pen, ngopi aje ngutang mulu gimane bayar kamar hotel. Lagian siape yang elu ajak, kambingnye babelu...( sambil ngakak )

Bang Pendi     :  Eiiits...!! jangan ngeres dulu bang, dengerin dulu aye ngomong. Sekali-sekali positip ting-ting dong..!!

Mpok Mumun  : Positif thinking kaleeeee...!! ( cekikikan lagi )

Bang Pendi     :  Eh..ude ganti ya mpok..? ( sambil cengengesan ) ceritanye begini, dulu aye pernah jualan rambutan di depan hotel. Suatu kali ade cewe yang semok bin bahenol ngajakin aye masuk kedalem...aye kire diajak ngapain..eh ngga taunye ngambil duit buat beli rambutan ( cengengesan lagi, bang Somad nyengir onta )

Bang Mamat   :  Heh..heh..gue heran ame lu pade, kalo ngomongin yang ngeres-ngeres pade getem bangat. Ngomongin penjara malah jadi ngomongin hotel...yang semok-semoklah dibawa-bawa...

Bang Pendi    :   Jangan salah bang..., penjara ame hotel ade hubungannye. Contohnye banyak, salah satunye..ntu pak Antasari. Gare-gare masuk hotel ame si Rani...ujung-ujungnye kan masuk penjare, ye khan..? Emang ade untungnye juge aye kaga gablek duit jadi kagak mikir maen-maen ke hotel dah...( sambil nguyup kopi yang tadi dibikinin mpok Mumun tapi langsung die sembur lagi keluar ) Brrrrr...!! set dah...kopi rasanye gini amat mpok.., kopi ape kolek nih..kaga ade enak-enaknye ni kopi....

Mpok Mumun   :   Ah...elu pan ngutang Pen...! jadi takeran kopinye cuman setengah, laen ame yang pade bayar ( cekikikan lagi )

Bang Somad   :   Ternyate kagak gablek duit,  banyak ruginye Pen...!! ( bang Somad ame bang Mamat cekakakan, bang Pendi manyun...)

Rabu, 06 Januari 2010

BANG PENDI KERJA EUY.....!

Babe Jupri lagi uring-uringan, die empet bangat ame anak semata wayangnye..si Pendi. Ude gede kaga ade gesit-gesitnye apelagi kalo ngomongin soal cari duit. Disuruh kerja... maunye kerja yang enak...kaga cape tapi gajinye gede, disuruh bantuin macul di kebon..yang ade malah molor diatas pohon manggis, disuruh metik nangka muda eh..malah metikin rambutan tetangga. Kadang malah bikin malu, abis..saban minggu si Mumun lapor ame die " Beh..si Pendi belon bayar utangnye..!". tempo hari terpaksa duit buat kondangan kepake buat nalangin utangnye si Pendi, emang nyusahin bangat ntu anak...makan ati...!


" Heh..mao kemana lu Pen.." pas ngeliat bang Pendi mao nyelonong pegi...
" Mao ngupi diwarungnye mpok Mumun, emangnye kenape beh..?"
" Ngopi mulu kerjaanlu, emang utanglu emaren ude lu bayar..!?"
" Ah..tenang aje beh, soal utang beres dah...! ngga percuma babe punya anak kayak aye yang baik hati dan tidak sombong, jadi bikin peri-peri pada baek hati ngebayarin utang aye. Buktinye mpok Mumun kaga pernah nagih..." jawab Pendi sekenanye..
" Peri...peri...peri palelu rengat ! gua nih yang bayarin utang-utanglu...sekate-kate lu ngomong " Babe Jupri nyap-nyap, bang Pendi cuman diem aje sambil mikir.." Set dah..sewot amat sih ni aki-aki, segale jidat rengatlah dibawa-bawa...emangnye tembok..rengat !. Yang ade mah..Rengat Dengklok, daerah di Karawang tempat anak-anak muda nyulik bung Karno ame bung Hatta sebelum proklamasi. Eh..tapi ngomong-ngomong ternyate babe yang jadi perinye, baru tau ade peri yang giginye ompong kayak gitu " bang Pendi cekikikan sendiri.
" Kenape lu cengar-cengir sendiri..?" bang Pendi langsung mingkem. " Sini..lu ! daripade elu mondar-mandir kaga puguh lagu, mending elu kerja aje gih sama engkoh Achong.." kate babenye lagi.
" Engkoh Achong yang mana beh ? perasaan namanye kayak toko obat kuat.." Tanya bang Pendi, babe Jupri melotot..( dalem ati babe Jupri " Tau-tauan aje nih anak kalo gue pake obat kuat..." )
" Engkoh Achong ntu...yang punye toko kelontong di prapatan sono...!" kate babe Jupri sambil ngangkat jari telunjuknye.
" Prapatan mane..., prapatan Mekah ? lagian emang aye boleh kerja disitu...?" Tanye bang Pendi lagi.
" Dari tadi elu nanya mulu, kayak wartawan aje ! ude deh..kaga usah banyak nanya. kemaren babe ketemu sama ntu engkoh, die ntu temen lame babe. Orangnye baek ! dulu babe yang nyariin tanah buat ngebangun tokonye, waktu bikin tokonye juga babe yang ngerjain. Mangkanye sampe sekarang die masih baek ame babe, tempo-tempo kalo babe maen kesono suka disuruh bawa beras ame minyak goreng buat enyaklu.."


Singkat cerite, besoknye bang Pendi ude kerja di tokonye koh Achong. Kerjaannye ngelayanin orang beli ame manggul-manggul barang dagangan. Hari pertama dan kedua bang Pendi masih keliatan semangat 45 tapi kesinian malah jadi males, lelet, letoy...lemot ( lengkap dah....) yang bikin koh Achong geleng-geleng kepale. Kayak ni hari pas ngangkatin beras, baru juga satu karung die ude ngaso...tinggal si jabrik temen kerjanye yang bolak-balik sendirian. Pas ditegor koh Achong... baru dah die kerja lagi, tapi bentaran die ude brenti lagi malah diri di tumpukan karung beras sambil kacak pinggang niruin koh Achong...
" Heh...Jablik ! Owe liat keljaanlu mundal..mandil...mundal..mandil, haiyaaa...owe lugi bayal lu olang !" si jabrik empet bangat liat lagunye si Pendi tapi die langsung ngakak pas liat koh Achong geleng-geleng kepale di belakangnye si Pendi.." mampus lu Pen..!" sumpah serapah jabrik. Bang Pendi juga kaget ngeliat si engkoh ude ade di belakangnye, langsung die pora-pora ngusap-ngusap karung beras sambil nahan tawa.
" Kalo kerjaanlu disini ude beres, elu kedepan gih ! layanin yang beli..." ujar koh Acheng, bang Pendi ngangguk sambil cengar-cengir.


Didepan belon ade orang yang belanja, bang Pendi cuman ngeliatin orang-orang yang seliweran di depan toko. Nah..pas ade cewe cakep lagi bahenol lewat, bang Pendi buru-buru nyamperin...
" Mao kemana neng.., mao belanja ye..?" tanya bang Pendi, si cewe cuman mesem-mesem aje. " Kalo mao beli beras disini aje neng ! beli beras seliter bise dapet banyak ". denger gitu si cewe yang tadinye mao jalan terus jadi mampir..
" Beneran nih bang...?"
" Ya bener dong, masa abang bohong sih..."
" Ya ude bang, aye beli 5 liter deh...". Bang Pendi langsung naker beras, tapi sampe takeran terakhir si cewe liat kaga ade bedanye. 1 liter tetep aje takerannye 1 liter, kagak ade lebihnye...
" Kok kaga ade lebihnye bang, katanye 1 liter dapat banyak...!?" tanya si cewe bingung
" Lha..ini apa neng ! Nih..liat abang taker 1 liter, coba neng itung berapa biji berasnye...banyak kan ?" ujar Pendi sambil nyengir.
" Ye...itu mah ngibulin aye namanye..! tapi ngga ape-ape deh, soalnye abang lucu. Kalo ade toko yang jual kayak abang, aye mao dah..beli satu "
" Bener nih...!? buat nemenin bobo ya neng...?" tanya bang Pendi bangga
" Kagak...!! buat nakutin tikus....." jawab si cewe sambil cekikikan, koh Achong yang lagi ngitung kembalian jadi ngakak.
" Ya..udah neng...buat nebus dose, aye mao kok bawain ntu beras sampe ke rumah. Kalo perlu sampe pintu kamar...he..he, ngomong-ngomong rumahnye dimana neng..?"
" Rumah aye..? ngga jauh ko..tanye aje rumahnye bang Japra..." jawab si cewe
" Bang Japra...? bang Japra yang mana ya..." tanya Pendi bingung
" Bang Japra yang jadi jagoan prapatan sini Pen...!! " yang ngejawab si Jabrik...
" Oh...jadi si eneng ini..anaknye ye ?"
" Bukan..! aye bininye...." jawab si cewe sambil ngeloyor pergi
" Wakkkk...!! mampus dah gue, kalo sampe die ngadu ame lakinye..." Koh Achong ame si Jabrik ngakak bareng ngeliat mukenye bang Pendi yang pucet.
" Emang ude gile lu Pen...! bini orang maen godain aje...." ujar si Jabrik.
" Ah..itu mah kaga seberape gile brik..! masih mending gua godain bini orang, daripade gua godain bininye monyet...ape kaga lebih gile..." Bang Pendi, koh Achong ame si Jabrik kompak ngakak bareng-bareng.