Rabu, 31 Maret 2010

OBROLAN DI WARUNG KOPI ( 17 )

HARI GINI  BAYAR PAJAK, APA KATA BANG PENDIIIII.....!!

Bang Somad   :   Aye bingung nih bang...! orang-orang kok pade pinter-pinter bangat cari duit, aye mah..boro-boro ! buat makan aje susah... ( celetuknye sambil ngeganyem singkong goreng )

Bang Mamat  :   Elu ngomongin siapa sih Mad..!? orang-orang mah pinter karena makan bangku sekolahan. Nah..elu ngerasain makan bangku sekolahan ngga..?

Bang Somad  :   Busyeeet dah.., emang aye rayap...pake makan bangku segala ! ntu bang...aye ngomongin si Gayus yang jadi pegawai pajak.

Bang Pendi    :   Namanye juga Gayus bang....ape yang die GArot ( gigit ) berase maknYUS...!! ( bang Pendi tiba-tiba nyelonong masuk dan langsung nyamber pisang goreng )

Mpok Mumun :  Eh...tumben lu Pen ! gini hari baru keliatan, sombong bangat lu...mentang-mentang ude kerja. Ude kagak mao lagi kongkow disini...

Bang Somad   :   Iye lu Pen...kemane aje ? ( sambil nguyup kopinye )

Bang Pendi     :   Biase lah bang...kemaren-kemaren kan kerja, jadi kagak sempet nongkrong disini..badan ude pegel-pegel duluan. Tapi wajar sih...kalo orang ganteng kayak gini banyak yang kangenin ( sambil nyengir-nyengir jangkrik )

Mpok Mumun  :   Halaaaah...direbonding dulu tuh mukelu, baru ganteng...!! ( rade sewot ), tapi bener Pen...tukang kredit juga kangen bangat ame elu. Katanye elu belon bayar 2 bulan cicilan sendal jepit...( sambil cekikikan )

Bang Pendi      :   Yah...itu mah kecil mpok..! nanti kalo ketemu aye lunasin...jangankan sendal jepitnye, tukang kreditnye sekalian aye bayar...! Oh..ya ngomong-ngomong soal si Gayus yang gelapin pajak, aye emang empet ( kesel ) bangat tuh. Gimane kite-kite pade mao bayar pajak kalo yang disetorin masuk kantong pribadi...bukannye buat negara. Nah...sekarang, ngapain juga kite bayar pajak...!!

Bang Somad   :   Bener juga tuh Pen...! gue denger malah di facebook ade gerakan anti bayar pajak, kayak-kayaknye patut kite dukung tuh..!!

Bang Mamat   :   Ye...kagak boleh gitu dong ! namanye kewajiban..ya kudu ( harus ) dilakuin. Soal ade yang korupsi ape kagak...itu mah urusan pemerentah ame polisi. Lagian ape enaknye kayak si Gayus...sekarang buron, pan die kagak bise tuh..! nikmatin hasil korupsinye...

Bang Pendi    :    Bener juga sih bang....tapi sekarang polisi kudu gerak cepet. Ibarat kate orang maen bola...pan kagak mungkin si Gayus maen bola sendirian, pasti ade temennye yang bantuin. Si Gayus gocek sana gocek sini...oper sana oper sini, baru deh bise gol...nah jangan sampe pade buron juga tuh temennye...

Mpok Mumun  :   Ye...orang lagi ngomongin pajak, kok jadi ngomongin bola sih Pen. Ngaco aje lu...!!

Bang Pendi    :   Kayak-kayaknye sih ade hubungannye mpok, kalo kite ngomong duit apelagi soal bocor ngga bocor...! sekarang ngapain juga coba...pak Nurdin Halid ngotot kagak mao ngelepas jabatannye dari ketua umum PSSI..kalo kagak gampang metik duit disitu...( sambil niup-niup kopinye )

Bang Mamat  :   Nah...bener tuh kate si Pendi ! dimane-mane kekuasaan yang jadi rebutan apelagi kalo bukan ujung-ujungnye duit...tinggal kite-kite, orang bawah yang susah alias kebagian kagak enaknye...

Bang Pendi    :    Eh...jangan salah bang, ngga semua yang ade dibawah kaga enak...! coba aje tanya mpok Mumun, iye...nggak mpok !? ( sambil nyengar-nyengir )

Mpok Mumun  :   Nah...nah..mulai ngelantur lagi dah omongan lu...! Ternyate penyakit saraplu kagak ilang-ilang juga ( marah sambil melotot ). Nah...sedari tadi elu ngomongin pajak, sekarang gue mao tau...emang selama ini elu bayar pajak Pen...?

Bang Pendi    :    Ya...kaaagak sih...( sambil malu-malu ). Lagian pajak apaan yang kudu aye bayar mpok...? Tipi kaga punya, motor kaga gablek...apelagi mobil. Kalo muka ganteng..mesti bayar pajak, ya...mao ngga mao dah..! aye mesti bayar...( sambil cengengesan, tapi tiba-tiba.." Mukelu kayak genteng...!!" mpok Mumun sewot lagi sambil ngelempar sendok sayur ke bang Pendi dan sukses mendarat di jidat. Pleetttakkkk....!! Wadaowww...jidat bang Pendi merah . " Set..dah. Segitu sewotnye...!" bang Pendi ngedumel sambil meringis kesakitan. Bang Mamat ame bang Somad pade ngakak )

Jumat, 26 Maret 2010

AYAM MALANG

Ini bukan cerita ayam dari Malang atau malang ayam...eh maling ayam, tapi ini cerita nasib ayamnya bang Pendi pas ada perda yang melarang ayam hidup di Jakarta.

" Peeeen...bangun ! kasih makan ayam tuh..." tereak enyak Aisah ngebangunin bang Pendi. Bang Pendi yang lagi enak-enak ngelingker kayak uler dipager wak umer jadi sewot. " Hah...enyak ade-ade aje, kaga boleh orang seneng dikit. Lagian ntu ayam pade manja-manja amat sih...ude gede masih aje makan diambilin.." bang Pendi ngedumel sendiri. Pas lagi ngasih makan, die jadi inget waktu si Jabrik jemput die pas lagi makan.
" Hoiii...Peeen ! makan lama amat sih, emang elu makan sama apaan..!?" tereak si Jabrik dari depan rumah.
" Makan sama ayam..!!" jawab bang Pendi
" Wah...enak ! gue mao dong...kebetulan gue belon nyarap ( sarapan ) nih..." si Jabrik jadi ngiler denger bang Pendi makan sama ayam.
" Ya..ude..elu kesini aje, gue dibelakang.." tereak bang Pendi. Tapi pas si Jabrik nyampe dibelakang, die jadi gondok karena bang Pendi ternyata cuma makan ame teri jengki.
" Ah..sialan lu Pen...ngibulin gue aje. Elu bilang makan  ayam nggak taunye teri...!"
" Lah..elu tadi nanya apaan ? gue jawab kan makan sama ayam bukannye pake ayam. Nah elu liat sendiri ntu ayam pade makan bareng gue...sama-sama makan " jawab bang Pendi cuek. Si Jabrik diem dan jadi keder ( bingung ) sendiri, sebenernye yang Oon siape sih..gue ape si Pendi ye..!?. Bang Pendi nyengir-nyengir sendiri kalo inget itu, tapi pas ngeliat ayamnye lagi pade makan die jadi sedih lagi.

Soalnye denger-denger pemda DKI ngelarang ade ayam idup di Jakarta, kalo mao masuk Jakarta...ntu ayam mesti dipotong dulu. Padahal temennye di Sukabumi bilang...ayam-ayamnye pengen juga ngeliat suasana Jakarta walau cuman sempet kukuruyuk ame petak-petok doang sebelum dipotong...he..he. Sekarang bang Pendi bingung, ini ayam mao diapain...dipelihara ngga boleh...kalo dipotong die kagak tega, apelagi disuruh motong sendiri. Pernah suatu kali bang Pendi disuruh motong ayam betina, nah..pas mao dipotong..ntu ayam nangis dan ngeluarin aer mata sambil ngomong.." Kok tega banget sih bang !? abang ude lupa ye..ame 5 tahun kebersamaan kita.." Wakkk...bang Pendi kaget tiga perempat mati ( kalo setengah mati masih kaget biasa tapi kalo tiga perempat ude hampir pingsan..he...he ). Untung aje pas ntu ayam ngomong kayak gitu yang denger cuman bang Pendi, kalo ade orang laen yang denger...bisa repot " Hmmm...pantesan aje ! padahal ntu ayam kaga pernah ketemu ayam jago tapi saban ( tiap ) hari betelor, ngga taunye ade kebersamaan ame si Pendi " he..he pasti begitu mikirnye. Nah...gara-gara itu bang Pendi suka kagak mao kalo makan dikasih ayam satu potong, die maonye 3 atawe 5 potong he..he. Ude dulu ye...otaknye bang Pendi lagi mumet, nanti ceritanye bersambung deh..taon depan. Lagian bang Pendi mao liat keluar...malem-malem gini ade ayam yang lewat ngga ...he...he

Oh...ya, buat sahabat-sahabat...AYAM SORRY nih...kalo belon bisa nengok-nengokin rumahnye. Abis agak sibuk nih....ngurusin ayam-ayam..he..he.

Sabtu, 20 Maret 2010

BATAL KETEMU RIANA JANGKARU

Ini cuma cerita...jangan diambil ati ye...!! :)

Bang Pendi paling demen ( suka ) kalo kebagian kerjaan disuruh nganter-nganter barang. Die inget waktu terakhir kali nganter ikan asin ke rumahnye Aura Kasih...wuiiiih...mantep dah ! bang Pendi bise ngeliat langsung bodinye Aura...Wah susah deh dilukiskan dengan kata-kata ( jelas susah...! wong kalo ngelukis ntu pake kuas sama cat bukan pake kata-kata, iye nggak ! he..he ). Nah sekarang giliran nganter ikan ke rumahnye Riana Jangkaru ( eh...Riana ape Riani ya ? ) tapi ude pade, tau kan ? itu tuh..presenter jelajahnye trans 7 yang caem tapi rade-rade bawel dan kalo ngomong asal njeplak...nah die juga idolanye bang Pendi tuh...! bang Pendi emang demen ame perempuan yang rade-rade bawel kayak gitu, soalnye..yang kayak gitu biasanye " maennya " galak..! he...he. Oh...Riana kutunggu jandamu...( Pletakkkk....!! wadoooh...kayaknye ade yang getok kepale bang Pendi lagi nih...he..he ). Tapi bang Pendi jadi heran, cantik-cantik kok pada demen bangat ame ikan asin ye...? ade benernye juga lagunye KAGAK ADA BAND.. " Karena wanita...sulit dimengertiiiii... " he..he

Rumahnye neng Riana ntu di Bogor, tambah demen dah bang Pendi soalnye lewat jalan Raya Bogor yang banyak pabriknye. Nah...sekarang pas jam bubar, jadi nanti bisa ketemu ame cewe-cewe buruh pabrik yang baru pulang kerja. Bener aje tuh...dari sebuah gang keluar gerombolan cewe, kayak laron..he..he
" Nah...brik ! tuh banyak cewe...kesempetan buatlu. Mao yang kayak Aura Kasih ade...kayak Ayu Azhari juga ade sampe yang kayak mpok Nori juge ade. Bodinye..? mao yang gimane...kayak gitar Spanyol ape yang kayak bedug ? ade semua brik.... " bang Pendi cekikikan, si Jabrik diem aje ( kirain kesambet..eh..ngga taunye nyiapin jurus he.he )
" Hai..cewe, mao pulang ye..mao ngga dianter ame abang..!? si Jabrik ngeluarin jurus pertamanye sambil ngerebahin rambutnye yang jabrik pake tapak tangan yang ude die kasih ludah...hueeekkk !. Cewe-cewe yang digodain si Jabrik, ade yang diem aje sambil cemberut...ade yang senyam-senyum tapi ade juga yang nyeletuk..." Ogah..ah, kalo satu mobil ame onta...!!" wakkkk...si Jabrik kaget, rambutnye yang tadi ude rebah...langsung " Tuiiiiing...!!" jadi jabrik lagi...he..he. Bang Pendi ngakak ampe batuk-batuk. Akhirnye karana ngga ade yang mao bang Pendi jalan teyusss....

Tapi ngga jauh dari situ, ade cewe yang nyetop. Wuiihh...tadi ditanjain ( ditawarin ) kagak ade yang mao, pas ngga ditawarin...eh mao sendiri. Orang bilang ini...pucuk singkong buat nasi ulam eh...maksudnye pucuk dicinta ulampun tiba...he...he. Nggak pake lama...si Jabrik langsung bukain pintu mobil, cewe itupun masuk dan bang Pendi tancap gas. Tapi sayangnye ntu cewe agak pendiem, ditanyain diem...digodain diem...ampe dikitik-kitik die masih diem aje..he..he.
" Si non kok diem aje...nerpos ye ame abang ? tanye si Jabrik lagi masih usahe...tapi tibe-tibe
" Heh...onta, brisik bangat lu ! bise diem ngga....!?" ujar si cewe tapi suaranye ngebas bangat kayak babenye bang Pendi. Bang Pendi yang megang setir jadi kaget dan replek ngerem kijang bututnye ampe kepale si Jabrik kejedot desbor...
" Ya...udah, sekalian gua turun disini ! sini ikan asinnye...buat gua..!! " bang Pendi ame si Jabrik cuman bise bengong. Aiii...yaiyaiyai....set dah !! cakep-cakep ternyate bencrong...mane ikan asinnye diambil lagi. 
" Mate kite udeh..kotok ayam kali ya...brik !?" celetuk bang Pendi, si Jabrik masih bengong...mulutnye ampe mangap..( kayaknye die shok bangat...he...he ). Sekarang bang Pendi bingung gimane jelasin ke koh Achong about ikan asinnye, masa die mesti bilang..." tadi ade kucing ikut numpang ke Bogor terus ngembat ikan asinnye atau tadi pas di jalan ikan asinye ngeliat kali ( sungai ) terus die loncat dan berenang...he..he.

Bang Pendi puyeng...apes lagi apes lagi !! batal deh ketemu ame Riana Jangkaru....
Tapi ini jadi pelajaran buat bang Pendi
PertameKalo mao deketin cewe jangan ngajak-ngajak si Jabrik, bawaannye pasti sial. 
Kedue   :  Kalo deketin cewe jangan bawa-bawa ikan asin, soalnye nanti ntu cewe lebih milih ikan asin daripade bang Pendi 
Ketige   :  Kalo mao deketin cewe, tanya dulu..." situ cewe beneran ape cewe jadi-jadian ?" he...he ( paling-paling abis nanye kayak gitu langsung dapet bogem mateng...eh..mentah..he..he )

" Jadi sekarang gimana nih Pen...!?" tanya si Jabrik
" Yah...gimane lagi, ikan asin yang kite mao anter ude dibawa kabur jawawut bin jampudut. Terpakse kite pulang aje...."
" Yuuuuuk...mariii !!" jawab si Jabrik sambil niruin bencrong he...he

Kamis, 18 Maret 2010

BELAJAR GITAR

Sedari tadi pas waktunye istirahat, si Jabrik kaga ade brenti-brentinye genjrang-genjreng ame gitar dekilnye. Mending suaranye enak dibaca...eh didenger, ini mah suara gitarnye ke mane...suara si Jabriknye kemane !! " Kau petik...gitaaar, nyanyikan laguuuu...perlahan usap hatiku " suara serak-serak bau jengkolnye si Jabrik nyanyiin lagu bang Iwan.
" Dimane-mane yang dipetik mah...jambu...rambutan brik !!" bang Pendi rade dongkol. si Jabrik cuman senyam-senyum aje sambil nerusin nyanyinye, bang Pendi tambah dongkol
" Emang suara lu bagus juga brik, tapi lebih bagus lagi kalo elu diem...!"
" Ah...elu Pen, bolehnye sirik aje ! sirik itu tanda tak mampu Pen...makanye kalo belajar gitar jangan pake kotak sabun yang senarnye dari karet ban dalem, paling-paling elu cuman bise nyanyi " Akoo tak maooo...di kalau aku di madooo, pulangkan saja kepada orangtuakooo..." Nyanyi si Jabrik yang suaranye di bindeng-bindengin ( sengau ) kayak suara bencong di Taman....( eh..ngga usah disebutin deh ! ntar pade tau tempat mangkalnye bang Pendi...he..he ). Bang Pendi sebenernye dongkol diledek kayak gitu tapi juga pengen ketawa ngeliat tingkahnye si Jabrik niruin bencong apelagi ngebayangin si Jabrik jadi bencong beneran, bang Pendi jadi cekikikan sendiri.

Tapi emang ade benernye juga ngomongan si Jabrik, bang Pendi emang rade ngiri ame si Jabrik. Abis ntu anak banyak banget kebiseannye...( kadang bise nyopet, kadang bise nyolong...he..he ). Tapi emang bener si Jabrik banyak kebiseannye, maen gitar salah satunye. Padahal bang Pendi dari dulu pengeeeeen banget bise maen gitar kayak Eet Syahraninye Edane yang rade gahar atawa yang rade slow kayak Dewa Bujananye Gigi, tapi ampe sekarang...boro-boro dah maen gitar ( kalo maen serong bang Pendi bisa..he..he ).
" Ya ude Pen, daripade elu bengong disitu..mending elu kesini. Elu yang nyanyi nanti gue yang giring " kate si Jabrik sambil nyetel senar gitarnye..
" Sekate-kate elu ngomong, emangnye gue bebek elu giring..."
" Ape katelu deh..! nah sekarang elu mao nyanyi ape, lagu baru ape lagu lama ? tapi jangan lagu lama dah...capek gue maen gitarnye.." kata si Jabrik
" Lha...emang kenape brik ?" tanya bang Pendi bingung
" Pan..lagunye lama, nanti kapan selesenye...? bise-bise abis Maghrib baru selese..lha pan bise sengkle ( keseleo ) tangan gue..." jawab si Jabrik sambil nyengir jangkrik, bang Pendi sewot
" Yah....gue bisenye lagu lama brik, alwaysnye Bon Jovi bisa ? " si Jabrik geleng-geleng kepale.
" Kalo Mr. Big bisa ? si Jabrik geleng lagi
" Hah...apaan sih yang elu bisa !? ini aja deh...lagu " Look In the Garden " elu pasti bisa !"
" Wah...yang kayak gimane tuh ?" tanye si Jabrik penasaran"
" Nih...dengerin ! Lihat kebunku...penuh dengan bunga, ada yang putih dan ada yang merah..setiap hari kusiram semua..." bang Pendi cekikikan, si Jabrik gantian dongkol tapi belon sempet ngomong tiba-tiba ade yang ngebentak
" Heh...!! elu berdua mao kerja ape maen gitar..? " suara koh Achong
" Maen gitar..! " jawab bang Pendi ame si Jabrik asal tapi kompak tanpa ngeliat siapa yang nanya. Tapi pas ngeliat koh Achong yang kacak pinggang, mereka berdua langsung ngacir kedepan toko buat ngelayanin pembeli. Tapi karena belon kesampean nyanyi, didepan bang Pendi nyanyi lagu India " kucek-kucek matae " sambil muterin tiang juga kedip-kedip mata. Ibu-ibu yang belanja pade ngakak, koh Achong cuma bise narik napas sambil geleng-geleng kepale.



Sabtu, 13 Maret 2010

FOTO SI JABRIK...!! ( GANTI )

Ini cuma postingan iseng karena lagi kehabisan ide. Dikesempatan ini kayaknya aye mao mencermati...jiaaaah..!! maksudnye coba menanggapi usul dari para sahabat yang telah sudi mampir di rumahnya bang Pendi. Terima kasih buat sahabat karena terus terang terkadang dari komen-komen sahabat justru aye dapet ide untuk bikin cerita. Oh..ya mengenai komen sahabat,  ada beberapa sahabat yang kayaknya kasian sama bang Pendi karena sial terus..he..he.

Nah...mao coba bikin cerita dengan akhir happy ending buat bang Pendi kayaknya susah...atau karena mentertawakan kesusahan orang lain lebih mudah daripada mentertawakan orang yang lagi seneng ya..!? aye ngga ngerti dah... Dan ada juga sahabat yang penasaran sama tampangnya si Jabrik...nah ini juga susah, karena aye bikin karakter si Jabrik juga cuma namanya aja...gimane tampangnye juga belon pernah ngebayangin. Tapi kayaknya ngga jauh-jauh ( ancurnye...) ame tampang yang nulis cerita...he..he

Sesuai janji bang Pendi ame si Jabrik, kalo pajang fotonye cuman sehari. Makanye hari ini bang Pendi ganti fotonya si Jabrik dengan temennye si Jabrik, tapi kayaknye yang ini bener-bener jabrik..he..he




Nah...pelototin deh tampangnye ! gantengan mane jika dibandingin ame foto yang sebelumnya..so pasti gantengan yang sekarang ya !? he..he

Eh...ude dulu ye....happy monday buat semua sahabat...!!


Kamis, 11 Maret 2010

HATI PEREMPUAN, SIAPA YANG TAU ?

Kalo ngomongin soal sayang-sayangan, bang Pendi masih bingung. Soalnye yang bang Pendi rasain cinta itu sulit dimengerti...misterius kayak duitnya Century yang raibnya kemana ? rasa dan baunye juga campur-campur, bukan kayak nano-nano lagi tapi ude kayak masuk ke pasar tradisional ( ada berasa bau ikan, bau jengkol juga bau ketek..he..he ). Sama bingungnye juga sama ngga ngertinye kalo lagi ngadepin perempuan. Dideketin die melengos ( menghindar ), diuber ( kejar ) die kabur ( yang diuber itu copet..he..he ) tapi kalo didiemin kadang bise nyamperin sendiri.

Ibarat ngeliat ayam jago ngajakin betina kawin, padahal ntu jago ude pelan-pelan muterin ayam betina dan jalannye juga ude kayak penari balet....tapi pas dideketin ntu betina malah kabur...pake berisik lagi.." Petok...petok...petok !! " Set dah...ampe bang Pendi denger ayam jagonye ngomong.." Sssst...jangan berisik dooong !! ade monyet lagi ngeliatin tuh..." ( wakkk...bang Pendi dibilang monyet, orang mirip Cristian Bautista gini...he..he ). Tapi pas kena pegang  ntu betina diem aje tuh..diapa-apain ame ntu jago, nyaris tak bersuara..he..he ( emang dasar ayam..kaga ade malu-malunye, ude tau ade bang Pendi...masih aje diterusin ntu hajat. Eh...mestinye bang Pendi yang malu ya, ayam kawin diintipin..he..he ). Ah...tapi bang Pendi pikir kaga ade enak-enaknye ngintip ayam kawin, abis meleng dikit..ngga taunye ude bubaran. Heh...gitu doang...!?

Si Jabrik juga pernah cerita, die juga sama bingungnye ame bang Pendi kalo ngomongin soal perempuan
" Gue bingung Pen...si Yati kalo gue ajakin, bahasanye...kaga mao mulu "
" Ya...tergantung brik, elu ngajakin ngapain dulu ! kalo elu ajak macul atawe ngajak manggul beras, jelas aje die kaga mao " jawab bang Pendi sambil cengengesan.
" Ya...ngajak dua-duaan Pen, masa ngajak macul. Nah...kemaren die abis nyuci langsung aje gue ajak die ke suatu tempat. Eh...ujung-ujungnye die yang minta tambah !"
" Busyeet...doyan juga si Yati, keenakan elu dong !"
" Enak apanye...isi dompet gue jadi bures ( habis ) bayarin die tiga mangkok bakso !"
" Ah...sialan lu brik ! gue pikir elu ngajakin apaan. Ya..pantes aje dia nambah...die abis nyuci kan laper " Bang Pendi dongkol, padahal ude semangat 45 dengerin ceritanye si Jabrik.

Nah...itu ceritanye si Jabrik....laen lagi ceritanye bang Pendi. Die inget waktu pertandingan sepakbola antar RT dan die diajak maen juga. Sebenarnye bukan karena die jago maen bolanye tapi karena kaga ade orang lagi makanye die di ajak. Sayangnye pas maen die kaga sekalipun nendang bola, die cuma lari-larian aje dilapangan kayak orang ngejar jangkrik...he..he. Sampe mao bubaran kedirian...eh...kedudukkan masih kosong-kosong tapi pas waktu tambahan, didepan gawang lawan...bola yang ditendang kena mukanye bang Jabrik. Kepanye langsung kliyengan ( pusing ), matanye kunang-kunang...bang Pendi ampe jatoh duduk. Tapi ajaibnye..bola malah masuk gawang...Goooool..!! ( pas banget peluit bubaran ) kontan bang Pendi langsung dikerubutin ame temen-temennye, satu persatu nindihin badannye...lidahnye ampe melet-melet ( menjulur ) karena kaga bise napas. Belon lagi penonton yang ikut-ikutan nindihin bang Pendi, mending kalo cuma nindihin...ade yang ngiler, ade yang ngompol, ade yang kentut..( masih untung kaga ade yang berak...he..he ). Saking rusuhnye..ampe celana kolor bang Pendi ketukar ame kaen kebayanye nenek-nenek ( bang Pendi pake kebaya, nenek-nenek jadi pake kolor...he...he ). Tega banget emang ntu orang pade...

Lebih teganya lagi, abis ngerubutin...semue pade ninggalin bang Pendi yang lagi semaput ditengah lapangan. Tapi tiba-tiba dateng neng Yuli nyamperin...
" Duh...kasian banget bang Pendi.." kate neng Yuli sambil ngelapin kotoran dimukanye bang Pendi. Bang Pendi berasa kayak raja yang dikelilingin ame dayang-dayang.
" Wah...neng Yuli baek bangat, makasih ya..."
" Ngga usah terimakasih bang, aye cuma mao praktekin cara P3K doang kok !"
" Heh...P3K ? berarti ade praktek kasih napas pake mulut dong " bang Pendi ngarep.
" Ada bang...cuma kasih napasnye kaga pake mulut, tapi pake pompa ban sepeda...tuh lagi diambilin ! " sambil nunjuk seorang bocah yang lagi nenteng-nenteng pompa sepeda. Bang Pendi langsung pingsan lagi....Ah...memang hati perempuan susah ditebak, kadang bise lembut..selembut-lembutnye kayak kaen sutra. Tapi kadang bise kasar kayak parutan kelapa punyanye enyak didapur...he..he

Sabtu, 06 Maret 2010

OBROLAN DI WARUNG KOPI ( 16 )

Bang Somad   :   Wah...wah..elu mao kemane brik..!? kepale dibebet ( diikat ) gitu, mao maen perang-perangan ? ( keheranan pas ngeliat si Jabrik masuk warungnye mpok Mumun )

Si Jabrik         :   Ya..elaah...emangnye aye bocah ( anak-anak ) maen perang-perangan ! lagian abang ketinggalan jaman amat, sekarang pan lagi musimnye demo ...nah aye mao ikut demo nih...( sambil nyomot ubi goreng, kalo polisi pake water canon...die bise bales pake kentut..he..he )

Mpok Mumun :  Demo lu bilang musim, emangnye rambutan...! lagian elu mao demo apaan brik...demo masak !? kok..elu kaga bawa panci...( sambil cekikikan )

Si Jabrik         :   Sembarangan aje...demo masak ! aye..mao demo kasus bank Century nih...

Bang Somad   :   Lha...emangnye elu ngerti brik, kasus Century itu kasus apaan ? lagian elu mao belain siapa sih...( sambil nguyup kopi )

Bang Pendi     :   Iya..lu brik ! sok banget lu pake ikut-ikut demo. Nasabah yang dirugiin ame bank Century..pantes demo, nah...elu nabung ke bank juga kaga..paling-paling nyelengin ( nabung ) di celengan kodok...! ( bang Pendi yang baru dateng langsung ikut nimbrung Eh..bikinin kopi mpok..! biase...kaga pake laler ( lalat )...kaga pake lama...( sambil nyengir kadal.., eh...nyengir kadal kayak gimana ya..he..he )

Si Jabrik        :   Emang sih..aye kaga ngerti masalahnye, tapi kan ngga penting juga aye belain siape...yang penting pan bayarannye. Duit 50 rebu ame bensin 2 leter..pan lumayan tuh !

Bang Somad  :   Hmmmm...yang kayak gini nih, yang bikin rusuh ! yang punye urusan siape...yang demo siape, pantes aje kalo gue liat di tipi..yang demo tampangnye pade lecek semua. Sampe ibu-ibu ame anak-anak ikutan demo...

Bang Pendi    :   Nah..denger tuh brik ! demo kan tujuannye buat nyampein asem terasi...jadi...( mpok Mumun motong ngomongannye )

Mpok Mumun  : Aspirasi kaleeee...pen ! emangnye mao bikin sambel.... ( sambil cekikikan lagi )

Bang Pendi     :   Ya...bener itu ! nyampein aspirasi...nah kalo cuman karena bayaran, bise jadi makin gede bayarannye makin sangar ( galak ) aje tuh yang demo. Bukan nyampein aspirasi tapi ujung-ujungnye malah ngerusak ! yang kasian pan masyarakat yang kagak tau ape-ape...apelagi sampe ibu-ibu ame anak-anak yang ikut demo jadi klenger ( semaput ) kena timpuk ( lempar ) batu....

Bang Somad   :   Tumben lu Pen...ngomongnye rade waras ! ( sambil megang jidatnye ( kening ) bang Pendi, bang Pendi cuman nyengar-nyengir aje ). Tiba-tiba seorang ibu ame beberapa bocah dateng ke warungnye mpok Mumun )

Mpok Saidah  :   Peeeen...Peeeen..!! kurang ajar bangat lu ya...anak gue elu kadalin. Elu suruh demo...duitnye elu kaga kasih, mane duitnye...cepet !! ( mpok Saidah langsung nyerocos, kayak petasan gantet...he..he.  Mpok Mumun jadi kaget...apelagi pas ngeliat anaknye si Amin ada disitu )

Mpok Mumun  :   Lha...elu ikut juga Min...? ( nanya ame anaknye, si Amin cuman manggut aje karena takut diomelin )

Mpok Saidah   :  Bener mpok...! anak empok juga disuruh si Pendi tuh..ikut demo, tapi duitnye kaga dikasih....( mpok Mumun jadi senewen, die langsung gulung lengan bajunye )

Bang Pendi      :   Eh...maaf...maaf ! duitnye ude kepake mpok, besok dah...aye ganti....( bang Pendi ketakutan, suaranye ampe serak karena tenggorokkannye keselek pisang goreng...tapi die kagak bise lari )

Mpok Mumun  :   Maaf...maaf, kaga pake maaf !! ( mpok Mumun yang kesel langsung ngambil adonan terigu buat goreng pisang terus ditumplekin dimukanye bang Pendi pake tangannye dibantuin mpok Saidah. Bang Pendi cuman bisa tereak...." ampun...ampuuuuun...enyak...!! " ). Nah...makan tuh !! (tereak mpok Mumun, bang Somad ame si Jabrik yang sedari tadi bengong jadi ngakak ngeliat muka bang Pendi belepotan adonan terigu.

Bocah-bocah   :    Wah...sekalian aje mpok mukanye masukin penggorengan ! nanti kalo ude mateng biar kite-kite dah yang makan ( bocah-bocah pade ngakak ampe guling-guling, semua juga pade ketawa...bang Pendi jadi dongkol..." Siaaaaaaaaaallll...!! mimpi ape gue ya, semalem...." )

Rabu, 03 Maret 2010

UPSSSS.....SALAAAAH !!!

Hari ini bang Pendi berangkat ke kantor...jiaaah...ke kantor ! ( tapi emang itu yang bang Pendi bilang ke tetangga kalo ade yang nanya...he..he ). api die sekarang berangkat sendiri, die kapok nebeng ( numpang ) naek vespanye si Jabrik...sampe sekarang pantatnye aje masih berasa sakit. Di angkot aje bang Pendi kaga bise duduk diem, apelagi kalo angkot ngelewatin jalanan yang kaga rata...bang Pendi cuman bise nyengar-nyengir onta nahan sakit. Sampe ade yang nanya sambil tutup idungnye......" Abang nahan-nahan kentut ya...?" he..he. Bang Pendi dongkol, sayangnye yang nanya cewe cakep kalo bukan die ude jitak..

Yah...bang Pendi coba bela-belain dah berangkat kerja, biarin deh pantat sakit yang penting bise cari duit halal daripade ngemis..ye ngga ?. Nah..die sempet dongkol waktu ketemu pengemis di jalan.
" Pak..tolong sedekahnya pak, buat tambah-tambah ganti kulkas baru !" Ujar pengemis....Wakkk...!! bang Pendi mangkel bin dongkol " Gue aje kaga punya kulkas, elu malah minta-minta buat ganti kulkas..ngehe..!!" bang Pendi ngedumel sambil ninggalin tuh pengemis.

Jam delapan kurang seprapat ( seperempat ), bang Pendi ude nyampe di tokonye koh Achong. Si Jabrik ude ade disitu..lalu seperti biase die berdua beres-beres barang dagangan ame ngangkat beras yang baru dateng. Tapi belon-belon bang Pendi ude ngancem si Jabrik.." Awas lu brik..nyenggol-nyenggol pantat gue..! gue bikin jari kakilu jempol semua.."..busyeet..gimane caranye tuh ! si Jabrik cuman nyengir-nyengir doang padahal dalem atinye.." Lagian siape yang mao nyenggol pantatlu Pen, kagak nafsu gue ame pantat buriklu..!!" he..he. Nah..pas disuruh ngelayanin pembeli didepan, bang Pendi malah nyuruh si Jabrik..
" Tumben lu Pen ! biasenye elu paling seneng bise godain ibu-ibu "
" Ah..pegel gue brik, abis ntu ibu-ibu bukannye pade belanje tapi malah sibuk minta tangan gue.."
" Jiaaahhhh..lagulu Pen !"
" Yah..elu ngga percaya bangat ame gue brik. Elu coba sendiri dah..tapi kalo mao ngomong ame ibu-ibu, topenglu buka dulu brik..!" bang Pendi cekikikan sendiri, si Jabrik bingung sambil ngeraba pipinye.." perasaan...gue kaga pake topeng.." he..he

Bang Pendi sebenernye bukannye males, sekarang justru die lagi ngerapiin tumpukan beras sambil nyanyi-nyanyi...

Maybe my love will come back someday
Only heaven knows...
And maybe our hearts will find away
Only heaven knows...
And all I can do is hope and pray
'Cause heaven knows...

Koh Achong ame si Jabrik sampe bengong.." tumben nih si Pendi nyanyi lagu barat, biasanye juga dangdut..". Bang Pendi jadi bangga ngeliat koh Achong ame si Jabrik sampe terpana denger suaranye. Tiba-tiba serombongan anak-anak cewe SMA histeris dan langsung berebutan lari ke arah bang Pendi. Bang Pendi tambah bangga, die ngelirik koh Achong ame si Jabrik dan tersenyum sombong lalu sambil matanye merem-melek die ngebuka tangannye lebar-lebar karena die sangka ntu cewe-cewe histeris denger suaranye lalu berebut mao meluk die. Tapi bang Pendi jadi kaget pas cewe-cewe ntu pade tereak...
" Awas bang...awas ! minggir bang...minggir..." bang Pendi kagak siap, cewe-cewe yang tadi pade jorokin ( dorong ) bang Pendi ampe jatoh nyusruk...lagi-lagi pantatnye duluan.
" Aduuh...aduuuh..nyak ! aduuuuhhh...ledes ( luka ) lagi dah pantat gua, aduuuuhhh! " tereak bang Pendi sambil meringis kesakitan.
" Maaf bang...maaf ! abis ade orang gila ngejar-ngejar kita. Jadi kita terpaksa numpang ngumpet disini..." Kata cewe-cewe yang tadi jorokin die. Wekkkk...!! jadi bukannye pade mao meluk bang Pendi...he..he
Koh Achong ame si Jabrik ketawa ngakak sambil guling-guling pas tau emang ade orang gila lewat. Tambah ngakak lagi pas si Jabrik niruin bang Pendi tadi yang buka tangan sambil merem melek, lalu niruin si Vincent..." Uppssss...salaaaaaahhh !!"