Halaman

Jumat, 31 Juli 2009

OBROLAN DI WARUNG KOPI ( 3 )


Seperti biase, ini cerite cuma imajinasi aye. Moga-moga kagak ade yang kesinggung apelagi sewot, kalo ade yang keberatan silahkan salurkan ke MK he..he.

Bang Mamat : Si Pendi kemane mpok? tumben ginihari belon nongol..

Mpok Mumun : Tau tuh..! ke KPU kali..nanyain jadi ape nggak, masuk anggota DPRD..( sambil cekikikan )

Bang Mamat : Ah..die mah boro-boro mikirin kursi DPR, bangku dirumah aje die jualin.. ( sambil ngeganyem singkong goreng ). Eh..iye mpok, ngomongin kursi DPR..kalo dipikir-pikir kasian juge ye kalo yang dapet kursi kemaren tiba-tiba kaga jadi.

Mpok Mumun : Iye juge bang..! mane ude pade pesta..lagi. Kayak-kayaknya rumah sakit mesti nyiapin lagi kamar khusus buat caleg stres

Bang Mamat : Bise jadi mpok..! jabatan ude didepan mate..tiba-tiba nganyut. kayak mba Prita juge, ude bebas..eh..sekarang mao disidang lagi..

Mpok Mumun : Lha..emangnye kenape bang..?

Bang Mamat : Ya..kagak tau..! jaksanye dapet sogokan banyak kali..jadi masih ngotot nuntut mba Prita. Eh..si Pendi nongol tuh..

Bang Pendi : Kopi satu mpok, manis..! kagak pake laler..kagak pake lame..( sambil cengar-cengir )

Mpok Mumun : Yang kagak-kagak aje lu..Pen ! kagak pake gelas aje..sekalian..( rade sewot )

Bang Mamat : Eh..elu darimane Pen..? mukelu keliatannye cerah amat..

Bang Pendi : Itu..bang ! abis jadi sporternye mba Prita yang mao ngadepin sidang.

Bang Mamat : Sporter..? elu kire maen bole..

Bang Pendi : Ya..ilah bang.., sporter kan bahase sononye ! kalo bahase kite kan..kasi semangat, biar kagak sedih..biar kagak manyun..

Mpok Mumun : Tumben., otaklu kagak konslet Pen..!

Bang Pendi : Pendi gitu loh..! ( sambil cengengesan ) Lagian kasian mpok, kalo sidangnye ude selese..die kagak ade yang ngekepin..

Bang Mamat : Lha..maksudnye ape tuh Pen..? elu ngomongin mba Prita yang mane..?( mpok Mumun melongo )

Bang Pendi : Lha..emang yang mane lagi..? aye ngomongin mba Prita bininye mas Nano tukang baso, yang lagi sidang mao cere..

Mpok Mumun : Huuuu..! ( sambil jenggut kepalenye bang Pendi, bang Mamat ngakak ) Pen..Pen..! otaklu emang kaga jauh-jauh dari jande..( bang Pendi cengengesan )

Bang Mamat : Pendi gitu loh..! ( semue pade ngakak, mbah Surip ngakak..ha..ha..ha )

Kamis, 30 Juli 2009

DAPET AWARD NEH..!

Nah..ini award dari bunda Elly. Langsung dikasih tiga biji ! cakep-cakep ye..

Award pertame

Award ke dua

award ke tige

Photobucket

Aye juga mo langsung bagi-bagi buat temen-temen...silahkan di ambil tapi tinggalin komeng ye..

OBROLAN DI WARUNG KOPI ( 2 )


Mpok Mumun : Eh..tau ngga bang..waktu aye tadi belanje di pasar, banyak bangat polisi pade ngider.

Bang Mamat dan bang Pendi : Emang ada apaan mpok..? ( kompak )

Mpok Mumun : Ntu..pade nempelin fotonye Noordin M Top

Bang Mamat : Oh..ntu ! emang lagi rame-ramenye tuh mpok..

Bang Pendi : Lha..emang si Noordin caleg dari partai mana tuh..? bukannye milih caleg udeh dari kemaren-kemaren..

Bang Mamat : Ah..dasar lu Pen..! dirumah kagak gableg tv apa..?, itu kan teroris yang ngebom hotel Marriot kemaren.

Bang Pendi : Heh..mak Erot punye hotel..? ck..ck..hebat bangat..

Bang Mamat : Hotel Marriot Oon..! emang dasar kuping ama otaklu kagak pernah disekolahin. Gua bilangin Pen..Si Noordin itu udeh 7 taon kagak ketangkep, licin kayak belut..!

Bang Pendi : Nah..kalo nangkep belut, serahin aje..! aye jagonye..apalagi mpok Mu....

Mpok Mumun : Hayo..mao ngomong apa lu..! ( mata mendelik sambil ngangkat ulekan sambel, bang Pendi ngakak..)

Bang Pendi : Tapi..kenape polisi kagak bise-bise nangkep ye..? ( sambil nyeruput kopi )

Bang Mamat : Soal nangkep sih..gampang Pen ! nyarinye yang susah..

Bang Pendi : Lagian polisi bingung-bingung amat..kan paranormal kite banyak, ade Ki Joko Bodo..ade Ki Gendeng Pamungkas..ade Mama Lauren. Tinggal tanye aje..beres kan ?

Mpok Mumun : Wah..iye..ye ! ( sambil manggut-manggut )

Bang Mamat : Ala..ude deh Pen, jangan tambah ngaco..! mendingan sekarang kite ajak warge kampung untuk lebih ketat ngawasin pendateng yang kagak jelas juntrungannye, awasin juge kalo ade gerak-gerik orang yang mencurigakan..

Mpok Mumun : Iye..bener juga tuh bang ! perketat juge siskamlingnye..jangan intipin jande aje..kerjaannye ( bang Pendi mesem-mesem )

Bang Pendi : Ah..si mpok ! yang tadi iye..sekarang juge iye, gimana sih ?

Mpok Mumun : Beneran omongannye bang Mamat..tadi aye salah, dengerin omongan dukun cabul..( sambil ketawa cekikikan, bang Pendi sewot )

Bang Mamat : Eh..Pen ! itu ade orang jalannye nunduk-nunduk, gue curiga..kita ikutin nyok ! kalo perlu kite gebukin biar ngaku..

Bang Pendi : Mane..mane ? biar gue duluan deh yang gebukin..( langsung bangun dari duduknye dan ngambil kayu pentungan )

Bang Mamat : Itu..tuh !( sambil nunjuk orang yang lagi jalan )

Bang Pendi : Ah..brengsek lu ! itu mah babe gue...jalannye bukan nunduk-nunduk, tapi emang udeh bongkok..ngehe..!

Bang Mamat dan mpok Mumun : Ooooh...! ( sambil ngakak bareng )

Jumat, 24 Juli 2009

OBROLAN DIWARUNG KOPI ( 1 )


cerite ini cuma bentuk imajinasi aye buat nanggepin berite-berite yang seliweran di tv ame dikoran-koran. Moga-moga aje kagak ade yang kesinggung.



Bang Mamat : Kopinye satu mpok..! ( pas nyampe diwarungnye mpok Mumun )

Mpok Mumun : Pahit ape manis bang..?

Bang Pendi : Ye..elah mpok! pake nanya segale. Ude tau si Mamat dukun..die mah kasih pait aje...!

Bang Mamat : Husss! sembarangan aje lu ngomong..( sambil nyomot pisang goreng )

Mpok Mumun : Iye nih..si Pendi! nyamber aja kayak bensin..

Bang Pendi : Bukan gitu mpok..! sekarang kan paling gampang nyari duit..ya jadi dukun kayak Ponari, tinggal celupin batu doang..jadi duit. Tapi kalo bang Mamat cari pasiennye..caleg-caleg yang stress aja bang..duitnya gampangan !

Bang Mamat : Ah..elu telat amat Pen..!itu mah ude basi..ude kagak mantun..! ude kagak ade lagi berite caleg stres..nih gue kasi tau berite barunye..menurut ketua MK, PilPres kemaren bise aje diulang lagi..

Bang Pendi : Lha..emang kenapa ?

Bang Mamat : Kalo ada bukti pasangan yang menang kemaren, curang..!

Bang Pendi : Ah..itu mah biase bang! kalo pasangan yang kalah, pade kagak lapang ati...

Mpok Mumun : Mane ade lapang ati...lapang dada kaleee..!

Bang Pendi : Ye..! si mpok protes aje. Mpok kan punya buah dada..lha aye kan kagak ( sambil nunjukin dadanya )

Mpok Mumun : Eh...sembarangan aje lu ngomong! belum pernah ngerasain mulutlu di kompres air panas ye..? ( mpok Mumun melotot sambil benerin kancing bajunye, bang Mamat cuma cengengesan aje )

Bang Pendi : Aiih..segitunye ! maafin mpok..aye cuma becande. Maksud aye.. yang kalah kemaren cuma cari-cari alesan aje. Ude tau kalahnye telek gitu, ibarat kate main bola..kalahnye ude 5-0. Nah..kalo ude gitu jangan nyalahin wasit dong..!Liat beknye..liat kipernye..liat juge penyerangnye, maennye ude pada bener belon..

Bang Mamat : Kadang-kadang pinter juga lu Pen..sayangnye kadang-kadang doang..( betiga pada ngakak..)

Bang Pendi : Tapi bener kan..?

Bang Mamat : Bener juga sih..!tapi kite juga kudu ngehargain pendapat orang. Barangkali pendapat mereka juga bener...ngomong-ngomong kemaren elu milih pasangan yang menang ye..? kayaknye belain bangat..

Bang Pendi : Kagak juga sih..( sambil ngeganyem singkong goreng )

Mpok Mumun : Lha..emangnye elu milih siape Pen..?

Bang Pendi : Kagak milih siape-siape..abis aye ketiduran. Malemnye aye ronda..sekalian ngintipin janda sebelah..

Mpok Mumun : Huuu..dasar lu !aye sumpahin matalu bintitan...( bang Pendi ngakak sedangkan Bang Mamat nyengar-nyengir kuda )