Halaman

Senin, 24 Agustus 2009

NUNGGU BEDUG..( 1 )

Berhubung warung kopinye mpok Mumun tutup di bulan puase, jadi obrolan di warung kopi di ganti sementara ame " Nunggu Bedug ". Moga-moga isi ceritanye kaga ganggu khidmatnye orang yang lagi puase...

Bang Mamat : Eh..kenape elu Pen..? mukelu kusut amat, kayak puase aje..( pas liat bang Pendi lewat di depan pos ronda )

Bang Somad : Iye..Pen ! kalo kaga puase..kaga ape-ape Pen, kaga usah dilemes-lemesin tuh badan ( sambil cekakakan )


Bang Pendi : Ah..bang Mamat ame bang Somat, puase-puase bukannye baca zikir. Ini malah ngeledekin orang..aye lagi pusing nih..! ( bang Mamat, bang Somad ame bang Madi saling pandang.." tumben nih anak ngomong bener..?" )


Bang Madi : Ape yang elu pusingin Pen ! makan tinggal makan..tidur tinggal tidur. Sini duduk..ceritain elu pusing kenape ?

Bang Pendi : Aye pusing..! bulan puase gini ape-ape pade serba mahal. Cabe naek, tomat naek, ayam naek..semua pade naek..!

Bang Mamat : Itu mah ude jamak Pen, dari dulu emang ude begitu. Ntu barang-barang pade naek karena di bulan puase ini permintaan barang meningkat

Bang Somad : Tapi bener juga bang..ape yang si Pendi bilang ! yang bikin gondok..semua juga gara-gara ulah pedagang gede yang pade
nimbun barang..


Bang Madi : Iye bener..! malah biasenye kalo ude naek..pade lupe turun dah. Itu yang bikin pale puyeng ( bang Pendi cengar-cengir.. seneng kalo omongannye di tanggepin )


Bang Mamat : Yah..memang suse kite kalo begitu, kite cume ngarepin pemerintah bertindak cepet, kalo cume ngandelin Operasi Pasar kayaknye kagak cukup. Ya..kite liat aje nanti ! eh..tapi gue bingung Pen.., yang punye duit kan babe ame enyaklu..kenape elu yang pusing..?

Bang Pendi : Bukan gitu bang..aye kan yang sering disuruh enyak buat belanje ke pasar. Nah kalo pade naek semue kagak ade lebihnye dong buat aye..bise-bise aye tekor dah..

Bang Somad : Ya..elah Pen ! kalo ngobyek yang beneran..apa, masa belanjaan enyaklu..elu obyekin juga..

Bang Madi : Iye..masa biangnye kadal..di kadalin ( semue pade ngakak, cuma bang Pendi aje yang keliatan sewot )


Bang Pendi : Ya..ude dah bang..! aye mao pegi dulu..

Bang Mamat : Elu mau kemane Pen..? belum juga bedug Maghrib..

Bang Pendi : Mau ngaji..!! ( sambil ngeloyor pergi, bang Mamat, Madi dan Somad megangin perut nahan tawa. Dalam ati mereka ngucap " lagak lu Pen..! " kemudian nerusin obrolan mereka sampai menjelang maghrib )

Bang Mamat : Eh..ude jam lima nih..! gue balik dah, mau bantuin bini gue nyiapin buka puase..

Bang Madi : Ayo..dah ! eh..sendal gue kemane nih ? ( sambil celingak-celinguk )

Bang Somad : Lha..itu sendal siape..?

Bang Madi : Bukan yang ntu..! sendal gue mah..masih cakep, baru juga minggu kemaren gue beli... Set..dahh ! ini pasti kerjaannye si Pendi nih..( sambil mukul tapak tangannye ke jidat, bang Mamat dan bang Somad cekakakan )

6 komentar:

  1. wah, Pendi tukang embat sandal rupanya. dasaarr..puasa2 nyolong tuh. he he he..

    BalasHapus
  2. Luucu juga Mas...keep on writing...hopefully suatu saat nanti bisa jadi penulis naskah drama komedy atau film komedy hehhehhhehhh!
    Thanks and met kenal juga!

    BalasHapus
  3. jadie kesimpulannya: sandalnya ilang ya? hehe...(kebetulan saya juga sedang punya cerita tentang sandal!)

    BalasHapus
  4. @ mba Fanny : ngga ngembat mba..! cuma salah pakai he..he

    @ Pelangi anak : niatnya buat nyenengin diri aja, tapi klo ada yang terhibur lebih seneng lagi..makasih komennya dan met kenal juga...

    @ Ernut : Terus terang..ide nulis sendal hilang baru terakhir didapat saat tulisan hampir selesai, biasanya di akhir tulisan warung kopi ada sesuatu yang lucu yang saya tulis..nah ide sendal itu muncul deh..btw makasih komennya dan met kenal..

    BalasHapus
  5. Hehehe, sandal ilang sering terjadi ya. Tapi penutup di akhir tentang sandal ilang ini memang mmeberi penutupan yang manis. Yuk, saya juga mau nunggu beduk nih.

    BalasHapus
  6. @ Bunda Elly : makasih Bunda...selamat berbuka puasa dengan mas Bejo tercintanya...salam hangat buat seluruh keluarga

    BalasHapus