Halaman

Selasa, 25 Agustus 2009

NUNGGU BEDUG...( 2 )

Mpok Mumun : Eh...pulang mancing ya bang ? wah..banyak juge nih bolehannye..( sambil nyendokin asinan buat bang Madi )

Bang Mamat : Iye mpok.., biase..! iseng-iseng sambil nungguin beduk. Daripade nongkrong ngomongin orang kaga pugu lagu, ye kan..? ( diamini mpok Mumun )

Bang Madi : Wah iye nih..biar cuma kecil-kecil dapetnye banyak juga.., mancing dimana bang..?( sambil megangin ikan mujaer bawaan bang Mamat )

Bang Mamat : Eh..elu Di..! gue mancing di setu UI, lumayan dah..buat nambah-nambah lauk..

Bang Madi : Empannye pake apaan bang..? aye juga mancing disono kemaren, tapi ikannye kayaknye pade ogah nyaplok empannye..

Mpok Mumun : Pake cebanan bang...! kaga pake repot..kaga pake lama ( sambil ketawa cekikikan )

Bang Madi : Ah..mpok bise aje, itu mah empok..! kalo ngeliat yang merah-merah keluar dari dompet, mulut ude mangap-mangap kayak mujaer..( bang Madi dan bang Mamat ngakak, mpok Mumun manyun ) eh...maaf ye mpok..! cuma becande...

Bang Pendi : Permisi bang...! ( tiba-tiba nyelonong sambil nenteng pancingan ame dua ekor ikan mas dalem plastik)

Bang Mamat : Eh..tunggu..tunggu ! wah..ni ikan gede-gede Pen..mancing dimane ? ( sambil megangin plastik yang isinya ikan mas, bang Pendi cengar-cengir aje )

Mpok Mumun : Wah..hebat lu Pen ! kalah nih..bang mamat..( si Pendi mesem-mesem bangga )

Bang Pendi : Satu, dua, tiga sampailah lima. Maen ke Cilincing membawa kendi...kendi penuh si buah sawo. Jangan curiga jangan menghina, kalau soal mancing tanya si Pendi...Pendi gitu lho...! ( semua pade ketawa cekakakan )

Bang Mamat : Pen..Pen..lagak lu pake mantun segale..! paling juga ntu ikan elu beli dari pasar ( sambil megangin perut nahan tawa )

Bang Pendi : Eitss..sembarangan ! ini kan...( kaga nerusin omongnye pas liat bang Jamin dateng, nietnye mao kabur tapi ikan masnye masih dipegangin bang Mamat )

Bang Jamin : Pen..tungguin !! mau enaknye aje lu, ikannye mau..kerjanye ogah.Nih bawain jalanye..! ( sambil naro gulungan jala ke pundak Pendi. Bang Mamat, Madi dan mpok Mumun bengong en bingung )

Bang Madi : Eh..bang Jamin, nebar jala dimane bang..? ikannye banyak juga tuh..( sambil ngelongok ember penuh ikan )

Bang Jamin : Nebar di empang gue Di..! ni sore anak gue ngajak temennye buka puase bersame, pade mao bakar ikan katenye...!

Mpok Mumun : Lha..si Pendi ngapain tuh bang..

Bang Jamin : Ya..bantuin gue ngumpulin ikan, abis itu gue kasih dua biji. Abis kasian gue.. liat die mancing disetu kagak dapet-dapet. Oooooooh..! ( semua pade kompak, bang Pendi cuma nunduk aje )

Bang Mamat : Eh..Pen ! cari batu didepan rumah, racun berbise diobatin keong. Kalo cuma begitu mah, gue juge bise...monyooooong..! huh...ngurangin pahale puase gue aje lu..!( gemes..sambil nyangkutin kantong plastik dikupingnya Pendi. semua pade ngakak, bang Pendi cuma bise cengar-cengir malu )

15 komentar:

  1. Yah mayan kan fen, daripade manyun aje, nolongin bang Jmin di kolam pan dapet ikan. Eh, pantun si fendi tadi boleh juga, lucu. Nice posting.

    BalasHapus
  2. wkwkwkwkwkk...( ampe guling- guling)pendi pendi...

    BalasHapus
  3. @ Bunda Elly : Makasih Bunda....

    @ Mba Dewi : Jangan sampai guling-guling dong mba...nanti kalo badannya kotor sapa yang gendong...he..he..

    BalasHapus
  4. Wakakakakakakakakaka.....
    Pendi-pendi ....kok segitunya ya ?.

    BalasHapus
  5. @ Kabasaran : Emang adatnye ude gitu bang..! abis mao gimane lagi...he..he..he

    BalasHapus
  6. dasar pendi...belagu banget ya.

    BalasHapus
  7. @ Mba Fanny : He..he..he

    BalasHapus
  8. hahahaha dasar dsi pendi, tukang ngibul tu ya, untung ketauan, coba klo ndak, pasti mau nipu lagi tu hihihii.....yang penting hasl sendiri dan ndak bohong walau kecil2, ya ndak ? ^_^

    kenali dan kunjungi objek wisata di pandeglang

    BalasHapus
  9. @ Pasang iklan : Ya gitu deh pak..! he..he makasih komennya...

    BalasHapus
  10. Yah.... bang fendi,... cuman dapetnya dari Bang Jamin doang...., bangganya selangit, pake pantun lagi. Busyet dah......

    Obrolan yang menarik bang....

    BalasHapus
  11. Yah.... bang fendi,... cuman dapetnya dari Bang Jamin doang...., belagunya selangit, pake pantun lagi. Busyet dah......

    Obrolan yang menarik bang....wkwkwkwk

    BalasHapus
  12. Pendi... Pendi.. suka belagu...!
    Cerita nunggu bedug-nya keren lho...
    Bisa jadi hiburan menjelang buka puasa hehehe.. ^_^

    BalasHapus
  13. Makasih semua atas komennya n' makasih juga ude mao mampir...

    BalasHapus