NUNGGU BEDUG ( 3 )

Bang Mamat : Siang-siang gini..enaknye ngapain ya Di..? ( abis sholat di Langgar )

Bang Madi : Mancing di setu aja bang..! kayaknye ngeliat bang Mamat dapet banyak..kemaren, aye jadi kepengen mancing..

Bang Mamat : Wah..boleh juga tuh, ayo dah...!

Bang Madi : Tapi ajak si Pendi bang, aye pengen liat..bener nggak ngomongannye yang kemaren..?

Bang Mamat : Ah..si Pendi elu dengerin, dia mah cuma bacotnye doang yang gede. Kayak kagak tau si Pendi aje, tapi boleh dah..nyok..!( bang Mamat dan bang Madi pulang kerumah masing-masing ngambil joran, terus bareng-bareng ke rumah bang Pendi )

Bang Mamat : Assalamualaikum kong Asan..Si Pendi ada kong..?

Engkong Asan : Waalaikum salam..,eh elu Mat..Di..! si Pendi ade noh di dapur. Emang ade apaan nyariin die..?

Bang Madi : Biase kong, mao ngajak die mancing..die lagi didapur..? wah..rajin bangat tuh anak, bantuin enyaknye masak.

Engkong Asan : Boro-boro bantuin masak..! bantuin makan iye..

Bang Mamat : Bujug buneng..! emangnye die kagak puase kong..?

Engkong Asan : Kagak tau dah..! tuh anak emang paling bader..susah banget di bilanginnye, laen ame empok-empoknye. Liat sendiri gih..! ( bang Mamat dan bang Madi nyamperin bang Pendi lewat jalan samping )

Bang Mamat : Astaga Pen..! tengari bolong gini, elu ude buka puase aje. Pan tanggung Pen..bentar lagi juga Maghrib..( bang Pendi rade kaget ngeliat bang Mamat dan bang Madi mergokin die lagi makan )

Bang Pendi : Eh..sorry bang ! abis semalem aye begadang nonton bola, pas saur ketiduran..!

Bang Madi : Ah..emang dasar elunye aje yang kagak niat puase. Pan..kagak saur juga bise puase..!

Bang Pendi : Bukan gitu bang..! aye juga pan..ngikutin ape kate Ustaz. Makanlah sebelum kamu lapar dan berhentilah sebelum kamu kenyang...( bang Mamat dan bang Madi langsung cekakakan )

Bang Mamat : Pen..Pen..bise aje elu ngeles..! yang elu bilang itu..bener, tapi ini bulan puase..kalo laper ya musti ditahan sampe bedug maghrib..

Bang Madi : Iye..lu Pen, ngada-ngada aje. Ya ude..sekarang kite bedue mau mancing, elu mao ikut kagak..?

Bang Pendi : Mancing..? booooleh.., tunggu bentar..! ( bang Mamat dan bang Madi nunggu di depan rumah )

Bang Madi : Eh..elu bawa empan apaan Pen ? kayaknye banyak bangat..( pas ngeliat bang Pendi keluar bawa pancingan ame kantong plastik item )

Bang Pendi : Ini bukan empan bang..! ini lontong ame bakwan buat bekel aye..

Bang Mamat : Busyet dah..! emangnye elu mao mengen-mengenin gue bedue ye..?. Di setu juga banyak yang mancing Pen.., bukan elu aje ! Malu-maluin aje lu..( bang Pendi cuman nyengar-nyengir kude )

Bang Madi : Ya ude Pen.., tapi nanti mancingnye jauhan dikit..( sampe di setu, bang Mamat ame bang Madi duduk sebelahan..bang Pendi duduk jauhan kire-kire 8 meter sebelah betan. Setengah jam duduk..bang Mamat ude dapet ikan 3 biji, bang Madi 2 sedang bang Pendi beloman..)

Bang Madi : Lha..mane Pen..! katenye elu jago mancing, mancing lontong..? ( bang Madi cekikikan )

Bang Mamat : Elu mestinya malu Pen, ikan ditempatlu aje... pade puase ( bang Madi ame bang Mamat jadi ngakak, bang Pendi manyun dan karena kesel..die gantian ngeledekin. Jorannye ditancepin ditanah lalu die buka bungkusan dan makan lontongnye..)

Bang Pendi : Mendingan gue makan dulu dah..! hm..nyam..nyam..enak bangat nih lontong, mau bang..? mau..mau...? ( bang Mamat & bang Madi cuma bise geleng-geleng ngeliat kelakuan bang Pendi. Lagi asik nyaplok lontong, pancingan bang Pendi gerak-gerak ditarik ikan )

Bang Mamat : Eh..Pen ! pancingan lu ditarik ikan tuh..( tereak bang Mamat, bang Pendi kaget sampe keselek lontong. Bingung mau megang pancingan ape mao ambil aer minum..bikin bang Pendi malah kepleset dan kecebur dipinggir setu. Bang Mamat dan bang Madi sempet kaget..lalu buru-buru mao nolongin tapi tetep aje kagak bise nahan tawa, die bedue malah ngakak )

Bang Madi : Ikannye ude pade mao buka puase kali Pen..! nah..die pade ngajak elu nyobain kolek lumut rasa setu ( tereak bang Madi, bang Mamat ngakak...pemancing yang laen juga ngakak. Muke bang Pendi merah nahan malu...)