Halaman

Jumat, 21 Agustus 2009

OBROLAN DI WARUNG KOPI ( 6 )


Bang Pendi : Wah..kemane aje mpok ? lame amat nih warung dibukanye..pale aye jadi sering-sering pusing nih.. kaga ngupi-ngupi

Mpok Mumun : Yah..biase Pen ! kayak kaga tau ajelu..kan besok ude mao puase. Kemaren aye silaturahmi ame orangtue sekalian nyekar ke kuburan engkong di Tangerang. Lagian yang bikin pusing bukannye kaga ngupi, tapi kaga ade tempat ngutang. Iye kan..?

Bang Pendi : Ah..mpok bise aje. Ngomong-ngomong kalo besok puase, nih warung tutup lagi dong..!( sambil nyomot pisang goreng)

Mpok Mumun : Ya iyalah..! siape yang mao nongkrong disini siang-siang..paling-paling elu ! yang kaga kenal puase..

Bang Pendi : Ye..sembarangan aje, aye puase mpok ! taon kemaren pol..kaga ade bolong-bolongnye. Tanye aje bang Mamat..

Bang Mamat : Heh..lagi ngomongin gue ya..? ( baru nyampe ke warung )

Mpok Mumun : Itu si Pendi bang..ngakunye taon kemaren puasenye pol, emang bener bang ?

Bang Mamat : Wah..iye bener mpok, Pendi emang paling top..! taon kemaren cuma dua kali..

Mpok Mumun : Bolongnye..?

Bang Mamat : Bukan..!puasenye yang cuma 2 kali. Sisanye ya gitu deh..pade bolong. Paling kalo ditanya jawabnye lagi M alias males ( sambil cekakakan, bang Pendi cuman mesem-mesem doang )

Mpok Mumun : Pen..Pen..! kaga malu lu ama umur..( sambil geleng-geleng kepale )

Bang Mamat : Ya udeh mpok, sekarang bikinin aye kopi yang paling sip..kan ini hari terakhir. Sekalian dah itung utang-utang aye yang kemaren..

Mpok Mumun : Nah..kebeneran bang ! kalo yang punye utang pade bayar kayak abang, aye bise nambahin modal nih buat dagang kolek ame asinan puase nanti ( bang Pendi mingser pelan-pelan lalu ngeloyor pergi ). Eh..elu mau kemana Pen..? bayar dulu utanglu..!

Bang Pendi : Besok mpok..! ( sambil tereak dari jauh )

Mpok Mumun : Emang dasarlu Pen..! ngomongnye tarsok-tarsok mulu..( sambil pasang muke cemberut )

Bang Mamat : Ya udeh mpok..! kaga usah cemberut gitu..emang ude begitu adatnye si Pendi. Sekalian diitung dah utangnye si Pendi, biar aye yang bayarin. Aye juga mao minta maaf nih..ame mpok juge bang Sanif, barangkali kemaren-kemaren ade sale-sale kate. Mohon dimaafin, biar aye ngejalanin puasenye lebih afdol..

Mpok Mumun : Iye bang..same-same, mohon maaf lahir dan bathin. Moga-moga kite di beri kekuatan buat ngejalanin puase nanti...

Bang Mamat : Amiiiiin....

5 komentar:

  1. Iye aye juge minta maaf kalu ade salah-salah kate ye. Besok mau puase ini. Marhaban ya ramadhan.

    BalasHapus
  2. wakakakakakakaaka ...pendi..pendi.
    duh segitunya.

    BalasHapus
  3. wkwkwkwkk.... pendi mang sllu gokil. yang ngarang cerite apalagi... met mnjalankan puasa mas

    BalasHapus
  4. He..he..he, Met puase juga mba..

    BalasHapus