Halaman

Selasa, 28 September 2010

MAKAN TUH...BIJI RAMBUTAN...!!!

Wah...senengnya bisa posting lagi ! kemaren-kemaren ide lagi buntu dan terserang penyakit males..les..les. Ibarat kate aer kali, aer yang mao ngalir mampet gare-gare banyak orang yang sembarangan buang sampah di kali. Nah... ide posting yang ada juga sering-sering mampet, kayak kemaren...pas mao posting adaaaa... aje yang bikin ide jadi buyar. Bayangin aje...ude bela-belain ngantuk-ngantuk nongkrong ngadepin kompi, eh...diatas kepale ade cicek yang brisik ... akhirnye kagak jadi posting tapi malah nonton ntu cicek...hehehe

Nah... sekarang mao ngasih tau nih kalo Bang Pendi lagi gondok. Gare-gare rame berita teroris di Sumatera, pak RT jadi latah nyuruh warganye aktifin ronda. Padahal musin ujan...tau sendiri pan kalo dingin-dingin enakan ngeringkel di kasur sambil ngelonin guling . Lagian di kampungnye mana ada yang bikin bom, paling banter...bikin lontong...hehehe.

Malam minggu ini Bang Pendi ronda. Sebenernye sih gilirannye bukan malam ini tapi die minta tukar harinya, die mao di malem yang ade Si Jabrik...biar ade yang dikerjain atawe bahan ledekan. Ni malem Bang Pendi rade-rade telat, soalnye die nonton liga Inggris dulu...antara Chelsea lawan Persib...hehe. Nah..nyampe pas ronda empat temennye ude lagi maen remi termasuk Si Jabrik.
" Eh..gue ikutan dong !"
" Wah..kagak seru Pen kalo maen berlima, tapi daripade nganggur...mending elu bikin kopi dah atawe pijit-pijit pundak gue " Kate Si Jabrik sambil cekikikan yang laen pade ngakak. Bang Pendi gondok, bukannye gue yang ngerjain tapi malah kena skak. Karena kesel akhirnye Bang Pendi ngeloyor pergi.
" Eh..mao kemane..lu Pen !?" Tanye Bang Mamat
" Mao ngider ( muterin kampung ) !"
" Baguslah...! Eh...tapi elu kagak takut jalan sendiri ?" Tanye Bang Japra tapi Bang Pendi ngga ngejawab, Si Jabrik bisik-bisik " Dia mah berani bang...orang kalo ketemu setan bukan die yang takut tapi setannye yang ngacir kalo ngeliat mukanye.." Berempat pade ngakak lagi. Kalo Bang Pendi denger pasti die marah banget, soalnye die selalu merasa kalo mukanye mirip-mirip Justin Bibir...hehehe.

Bang Pendi sebenernye bingung mao kemane tapi lagi bingung-bingung die ngeliat ade pohon rambutan yang buahnye ude mateng-mateng. Sebenernye die takut dosa ngembat rambutan orang tapi die inget pesen  Wira-Wiri Sableng, gurunye " Jangan takut berbuat dosa yang penting nanti tobat.." ( Hah...emang kagak bener tuh ajaran gurunye ! ) Eh...belon pade tau ya kalo Bang Pendi berguru. Die emang  ude dua taon berguru...malah sekarang ude pegang Gelas Hitam ( bukan Ban Hitam ! Soalnye dua taon berguru bukannye belajar silat tapi kerjaannye cuma nimba ame bikinin kopi item buat gurunye...hehe ). Akhirnye Bang Pendi nekat uga naek pohon rambutan tapi belon juga sempet makan, die denger orang ngobrol...buru-buru die naek agak tinggi sambil ngintip...ternyate Si Jabrik ame yang laen. Nyampe di bawah pohon rambutan yang dinaekin Bang Pendi mereka malah berhenti.
" Kayaknye enak nih bang, ngeronda sambil makan rambutan " Kate Si Jabrik
" Wah..sakit perut iya...Brik ! Tapi kalo mao, elu ambil dah sendiri...." Jawab Bang Mamat, ternyate rambutan ntu kepunyaannye die. Si Jabrik langsung aje siap-siap naek, bang Pendi yang ada diatas jadi keder. Bukannye takut tapi die malu kalo ketahuan ngembat rambutannye Bang Mamat. Akhirnye die punya akal, die ambil rambutan terus die lempar kepalanye Si Jabrik. Si Jabrik kaget dan sempet bingung apaan yang nibanin kepalanye, die berhenti manjatnye sambil celingak-celinguk keatas. Bang Pendi nahan-nahan tawa terus die lempar lagi kepalanye Si Jabrik sambil bersuara....hihihihi..hihihihi...hihihihi !. Kagak pake bengong lagi, Si Jabrik langsung merosot turun...
" a..a..ada se..se..setannya bang..!!" Kate Si Jabrik ngadu ame Bang Mamat yang nungguin ngga jauh dari pohon rambutan.
" Ah...yang bener aje lu, gua aje yang punya kagak pernah nemuin...!" Bales Bang Mamat. Bang Pendi hampir ngakak ngeliat tingkah Si Jabrik, sekarang die ngerasa ude aman buat makan rambutannye. Tapi baru aje die caplok ntu rambutan tiba-tiba angin niup agak kenceng, pas die nengok...die ngeliat ade putih-putih melayang kearahnye. Bang Pendi panik....buru-buru die turun ( biasanye kalo keadaan kayak gitu die pasti tereak-tereak tapi sekarang kagak karena dimulutnye ade rambutan..hehe ). Saking buru-burunye Bang Pendi kagak merhatiin lagi kalo cabang pohon yang die pegang kecil, jelas aje ntu cabang jadi patah akhirnye Bang Pendi jatoh dan badannye sukses dengan gilang gemilang mencium tanah...
" Gedebuuuuuukkkkk...!! "
Si Jabrik ame yang laen kaget dan pade bengong. Walau takut-takut die pade nyamperin asal suare.
" Busyeeeet...elu Pen ! Kirain apaan....eh..kenape lu ?" Kate Si Jabrik yang ngeliat Bang Pendi yang nggak bise napas kayak orang sakit asma.
" Ude..ude...tenang Pen, ambil napas pelan-pelan " Kate Bang Mamat tapi Bang Pendi geleng-geleng sambil ngasih kode bulat-bulat pake jari jempol ame telunjuknye, terus nunuk-nunjuk lehernye. Bang Mamat sempet bengong tapi kemudian die langsung mukul belakang lehernye Bang Pendi. Keluar deh..rambutan yang masih ade bijinye, terus gelinding di depannye Bang Pendi. Ternyate ntu rambutan nyangkut ditenggorokan Bang Pendi pas jatoh tadi, kontan aje yang laen langsung pade ngakak.
" Modar lu Pen..!! Makan tuh biji rambutan. Elu sih pake acara nakut-nakutin gue..." Kate Si Jabrik sambil cekakakan. Bang Pendi cuma bise nunduk malu sambil ngambil napas...

( Padahal putih-putih yang ditakutin Bang Pendi tadi cuma karung beras yang dipake Bang Mamat ngebungkus nangka tapi copot ketiup angin...hehehe )


24 komentar:

  1. hahaha itu akibat nyolong rambutan atau akibat rakus ya? hi hihi..

    BalasHapus
  2. orang rakus ada ganjarannya...

    hehehe

    eh rambutannya kirim ke manado dong
    ^^

    BalasHapus
  3. keqnya yg slah guru bang pendi neh...
    critanya bgus bang, kocak abis...
    slm knal y, skalian q follow...

    BalasHapus
  4. karena banyak yg nympah, jakarta macet n banjir...

    BalasHapus
  5. ituh sie bang pendi makan rambutan g bagi2 >.<

    BalasHapus
  6. mau ngerjain si jabrik maLah dikena skak terus yeh Bang, hehehe...

    BalasHapus
  7. wkkkk..kesian banget bang pendi..hehe..kualat sm si jabrik tuh..hihihi

    BalasHapus
  8. hahahhaha...lagi-lagi bang Pendi ketiban sial..makanya bang jangan usil napa.
    ngomong2 rambutannya manis gak Bang..

    BalasHapus
  9. WAKAKAK.. lagi apes bgt ya nasib bang pendi.. semalemansial mulu kayaknya.. LOL

    BalasHapus
  10. Kesian Bang Pendi, kutukannya gak ilang-ilang...
    *sambilbelaibelai..............pohonrambutan*
    :D :D :D

    BalasHapus
  11. kirain putih2 itu pocong. hehe

    BalasHapus
  12. jiakakakakakakakak
    bisa aja bang pendi...
    laen kali kalo mau nyolong berdua bang biar lebih maknyus...

    BalasHapus
  13. selalu suka baca kisah bang pendi.
    jangan takut berbuat dosa yang penting nanti tobat. huahahahaha.. ngakak banget saya...
    kirain beneran datang hantu deh ke pohon..

    BalasHapus
  14. Pendi...Pendi...Kasihan amat lu jadi orang!

    BalasHapus
  15. Duh kasian banget bang Pendi, gara2 karung beras sampe biru semua tuh jatuh dari pohon.
    Eh, aku ada bagi2 buku loh di blogku. Silakan ikut kalo ebrkenan...

    BalasHapus
  16. si pendi blum pernah liat rambutan kalee hehehehe

    BalasHapus
  17. ahahahha mesti kebanyakan ntn pelem horor kan

    BalasHapus
  18. haha... napa gak ditelen aja biji rambutannya.. bang pendi... bang pendi.. ade-ade-aje akh.. ati2 ye jangan ampe nyuri kadu.. hehe..

    BalasHapus
  19. aku bingung deh bang pendi itu tokoh fiktif ato emang kakak itu bang pendi? :O maklum baru jadi stalker blog ini. belom terlalu lama hihi.

    BalasHapus
  20. wahahahaha rakus banget siiiih :D

    BalasHapus
  21. Satu satu buat Bang Pendi. Hahaha. Jangan penakut dong Bang! Semuanya jadi berantakan, tidak jadi 'pesta kebun' nih.

    BalasHapus
  22. bang pendi...nana is comin',hehe....
    betawinya always d bezt dah,hehe...

    ceritanya pritain,hehe..^_^

    BalasHapus
  23. wkwkwkwkwkwk...ngocol abissss!!!! tambah nge-fans sama bang pendi nih, btw nomor hapenya bang pendi berapa ya??????

    BalasHapus