HILANGNYA JANDA KEMBANG (1)

Serial Detektif : Pendi Van Burick

Gara-gara Bang Pendi demen nonton serial "Dong Yi" yang penuh trik dan intrik, nalurinya tergugah dan jiwa detektifnya bangkit, hehe. Jadi mulai sekarang Bang Pendi mulai bikin serial detektif, tapi jangan terlalu berharap Bang Pendi bisa menyelesaikan sebuah kasus. Kayaknya sih gak yakin Bang Pendi bisa nyelesein kasus, bisa-bisa malah tambah runyam, hehe.

Pagi hari, disaat ayam jago masih kekepan ame ayam betina, di kampungnye Bang Pendi ude kedengeran heboh. Ada yang tereak-tereak, ada yang nangis, ada yang mukul kentongan dan ada juga orang yang maen pukul-pukulan gara-gara yang mao mukul kentongan salah mukul kepala orang yang botak, hehe. Bang Pendi yang lagi enak-enaknye ngorok di bale-bale depan rumahnye jadi kaget. Dia langsung ambil jurus kunyuk negrep (tangkap) jangkrik yang diajarin gurunya yaitu Wira Wiri Tambeng. Dia langsung lompat kebawah tapi sayangnye die lupa kalo semalem abis makan pisang satu tandan, kulitnye pade ngampar (berserakan) di bawah. Akhirnye die kepeleset lalu jatuh tengkurep dan kepalanye nyusruk di kebon depan rumah dengan sukses.

"Heh..heh..teradahan gawe (kurang kerjaan) lu ya? Lagi ngapain lu disitu?" Nyak Salminah bingung waktu ngeliat Bang Pendi tengkurep di tanah.

"Eh, anu Nyak...Aye lagi coba meresapi harumnye wangi bunga di indahnye pagi hari" Bang Pendi ngeles buat ngilangin malu sambil nyium-nyium pohon didepannye.

"$#@31/2km-1/4ons%^**?????" Nyak Salminah kagak bise ngomong ape-ape. Die lagi bingung binti heran..."Kalo bunga mawar atawe melati wajar aje, tapi ini pohon talas yang dicium-cium. Ape yang harum?" akhirnye Nyak Salminah ngeloyor ke dalem rumah.

Ngeliat enyaknye ude masuk rumah, Bang Pendi langsung bangun sambil garuk-garuk hidungnye. Ternyate pohon tales yang tadi die cium-cium bikin idungnye jadi gatel, Bang Pendipun nyumpah-nyumpah dalem ati. Suddenly...tiba-tiba en sekonyong-konyong, kedengeran ada yang tereak manggil-manggil namanye...

"Pen..Pen..gawat Pen...!!" tereak si Jabrik sambil berlari kearahnye. Bang Pendi bingung dan tambah bingung lagi waktu si Jabrik ude nyampe tapi kagak brenti tapi malah nyelonong masuk rumah Bang Pendi.

"Lho....???" Bang Pendi melongo sambil garuk-garuk ketek. Ngga lama si Jabrik nongol sambil nenggak aer minum dari kendi yang dipegangnya.

"Ya..elah Brik, dirumahlu kagak ada aer ape? Dateng-dateng maen nyelonong aje ngambil aer kendi gua.."

"Sorry Pen..tenggorokan gue ampe kering nih, lari-lari..."

"Eh, ati-ati lu megang kendinye, jangan sampe ke usap-usap! Nanti jin Ipritnye masuk lagi ke dalem.."

"Ah, yang bener aje lu Pen. Biasanye kalo diusap-usap jin-nye baru keluar. Emangnye jin-nye ude keluar dari tadi?"

"Iye....ntu yang lagi megang kendi!"

"Ah, sialan lu. Eh, gua kesini mao ngasih kabar heboh nih Pen. Ada janda kembang hilang tadi malem, sampe sekarang belon ketemu..."

"Jande kembang? jande kembang yang mane? setau gue kagak ada jande kembang dikampung kite. Elu tau sendiri pan, mane ade jande yang belon gue satronin...hehe" Bang Pendi cengengesan.

"Iye...iye..gue tau maenan lu. Emang cuman janda-janda aje yang mao ame elu.."

"Eits...siapa bilang Brik, jangan salah...Buah pepaye di makan sekeluarge, makan sekoteng jangan lupa kacang polongnye. Bukan salah gue didemenin perawan apelagi jande, muka gue ganteng emang dari sononye!"

"Jiaaaah..lagulu pera Pen. Eh, tapi bener Pen...gue serius! Hansip sekelurahan aje ampe dateng kesono, semua pade sibuk nyari Mak Saodah yang hilang semalem"

"Heh...siape lu bilang? Mak Saodah? kagak salah lu Brik? setau gue Mak Saodah umurnye ude 60 taon. Jande kembang apanye? Oooh...gue tau, maksudlu kembang Rafflesia Arnoldi ye..?"

"Rafflesia Arnoldi? kembang apaan tuh Pen?"

"Kembang bangke..!!"

"Busyeet...tega amat lu Pen, orang disamain sama  bangke"

"Lagian elu juga yang oon. Kalo bikin definisi janda ntu yang bener dong. Janda kembang ntu jande yang baru kawin terus cere dan belon punye anak. Nah, yang ini mah ude bau tanah elu bilang jande kembang. Jande kembang dari hongkong! mangkanye kalo ngomongin jande mending konsultasi dulu ame gue..." celetuk Bang Pendi. si Jabrik sebenernye gondok tapi die juga nahan-nahan tawa denger celetukannye Bang Pendi.

Bersambung...
maaf, ini cuma cerita...ga ada maksud apa-apa