Halaman

Senin, 14 September 2009

NUNGGU BEDUK ( 6 )

Bang Pendi : Neng Yuuuli.., abang boleh nganterin pulang ga..? ( pas ketemu di luar langgar abis sholat taraweh, neng Yuli cuman angguk aje sambil mesem-mesem malu )

Bang Somad : Eh..Pen ! berani-beraninya lu..ntar enyak Salmineh nyap-nyap baru tau dah..

Bang Pendi : Biarin aje bang..orang anaknye mao ko..! iye kan neng..? ( neng Yuli masih senyam-senyum aje lalu keduanye jalan pulang bareng. Sambil jalan mereka ngobrol, sebenernye bukan ngobrol..abis yang nanya cuma bang Pendi, neng Yuli cuma angguk..geleng ame mesem-mesem )

Bang Pendi : Ah..si eneng dari tadi cuman ngangguk-ngangguk aje kayak burung celepuk..eh maaaaf..! ngomong-ngomong malam minggu ade acara ga neng, kite jalan nyok..!

Neng Yuli : Iiih..abang, mao jalan kemana sih..? ini kan bulan puase. Lagian..malemnye pan taraweh..( akhirnya ngomong juga karena ngga mao di bilang kayak burung celepuk )

Bang Pendi : Ye..jalan kemane kek..! yang penting bise ngobrol, lagian taraweh pan sunnah..kalo dikerjain dapet pahale kalo kagak dikerjain pan kaga ape-ape..

Neng Yuli : Ah..enggak ah..! nanti enyak ngomel. Mendingan kalo mao ngobrol..lewat face book aje bang..

Bang Pendi : Pace buk itu apaan sih..? ( bang Pendi bingung, kedengeran die kayak nama buah..)

Neng Yuli : Face Book baaang..! f-a-c-e b-o-o-k ( sambil ngeja ), gimane ye jelasinnye..itu loh bang kayak ngobrol lewat sms-an gitu deh..

Bang Pendi : Yah..boro-boro gituan neng ! ngadepin komputer mpok aye aje..abang bingung. Abis ditempat ketikannye ade dua shift..nah abang kaga tau, yang shift siang yang kiri ape yang kanan. Maklum dah..abang pan gaplek..! ( sambil cengar-cengir )

Neng Yuli : Iiih..gaptek kaleee..! abang gimane sih.., kalo lewat face book pan kite bise ngobrol sepuasnye, walo kaga ketemu muke..

Bang Pendi : Yah..kaga seru neng..! kaga ade ser..sernye..

Bang Madi : Eh.. besukaan aje kerjalu Pen ! kaga nyadar ape..ini bulan puase ( pas ketemu di tengah jalan )

Bang Pendi : Ye..abang sirik aje.., puase kan di siang hari kalo malem pan kaga..lagian kalo nanti aye bikin bulan pacaran..ape orang puase kaga boleh..?

Bang Madi : Ah..bise aje lu ! dibelakang ade nyak Salmine noh..( bang Pendi celingak celinguk )

Neng Yuli : Ya..ude ya bang disini aje, ude nyampe nih..( gantian bang Pendi yang cuman angguk aje )

Bang Pendi rade puyeng, die ngerase kayaknye didepan neng Yuli die mati gaye karna kaga ngarti face book. Die kaga jadi pulang dan balik lagi mao nyari anak mude yang bise ngajarin die, di pos ronda die ngeliat si Pian ame si Mamo lagi nongkrong.

Bang Pendi : Eh..tong ! elu pade ngarti fes buk ga..bikinnye gimane sih..?

Si Pian : Cieee..mau fesbuk-an ame siape bang..?

Bang Pendi : Ye..orang nanya malah balik nanya.., elu ngarti kaga..?

Si Mamo : Segitunye..! abang bikin status aje dulu..

Bang Pendi : Status..? status apaan..? tersangka ape baru saksi..( si Pian ame Mamo ngakak )

Si Pian : Emangnye kasus kriminal..pake status tersangka, status itu..ape ya Mo..gampangnye sih..status itu data-data pribadi bang Pendi buat jadi anggota. Eh..tapi abang ude punya alamat email belon..? abang kudu punya dulu tuh..

Bang Pendi : Wah..ribet amat ya..! kayak mao bikin ktp aje. Tapi kenapa harus punye alamat Imel.., emangnye Imel itu anak mane..?

Si Mamo : Walllah..! pusing dah ngomong sama bang Pendi, mendingan kite masang petasan aje Pi..!

Si Pian : Nyok..!! ( bocah-bocah itu pade ninggalin yang bengong en binun )

Bang Pendi : Eh..elu pade mao kemane..? yah..kaga bise pedekate deh gue..( bang pendi manyun sambil garuk-garuk kepale )

18 komentar:

  1. lah ini udah hari keberapa bang, nunggu bedugnya koq masih part 6 ajah hehehe

    BalasHapus
  2. Mantap. Nyok kite nunggu bedug lagi ntar disini ye.....

    BalasHapus
  3. Pendi ...pendi !
    Pan dari dulu udah ane bilangin belajar yang bener
    eh malah maen-maen ..nah begini nih jadinya.
    wakakakakakaA

    BalasHapus
  4. huwakakakakakak seru bahasanya, serasa di Betawi.... serasa ngeliat si Doel niy.... wekekekekek

    BalasHapus
  5. iiii....Nggak tau neh Pendi dinamakan untung atau bodo gara2 nggak bisa fesbukan

    BalasHapus
  6. Wekkekekeke....PENDI minta di ajarin AYE aje....:)

    BalasHapus
  7. dialognya lucu. hahahaha
    betawi banget dah!

    BalasHapus
  8. pendi kasihan deh luu...he he..ajarin dong noor.

    BalasHapus
  9. wkwkwkw....pendi pendi, fesbuk di samain ma buah pace...

    BalasHapus
  10. @ Mba Wendy : Wah..aye kaga bise tulis ceritanya setiap hari mba.., soalnye tiap 1 cerite aye kudu semedi dulu paling ga 3 hari..he..he

    @ Mba Fanny : Sssst..jangan bilang siapa2 ya mba, sebenernye aye ngetawain diri sendiri karena aye sendiri gaplek...eh.. gaptek he..he. Nanti si Pendi aye suruh belajar ame mba Fanny aje ye..

    BalasHapus
  11. salam sobat
    wah bisaan deh cerita obrolannya .
    yang komentar pada suka sama Pendi nich,,

    teruskan berkarya sobat...

    BalasHapus
  12. kunjungan perdana
    salam hangat selalu

    BalasHapus
  13. Hehehe... Pendi mau pesbukan nih..? Ati-2 lho, ntar kecanduan pesbuk hahaha..

    BalasHapus
  14. malam
    salam kenal
    salam hangat selalu

    BalasHapus
  15. ngobrol di ril sama di Facebook apa bedanya ya? hehehe

    BalasHapus
  16. mampir di siang panas nih. bawain es doger sebaskom.

    BalasHapus
  17. Wekkk..sebaskom ? bisa kembung neh..bang Pendi..he..he

    BalasHapus
  18. soree...bw sambil ngeprint.

    BalasHapus