Halaman

Rabu, 30 Juni 2010

BAKAR AYAM PENDI

Sekarang ini kagak dimane-mane, orang-orang pade gila bola. Kagak tua kagak muda semua pade ngomongin piala dunia. Kalo lagi pade ngumpul nonton bareng komentarnye juga macem-macem. Biasa deh...kayak komentator bola yang ade di tv, bisanye cuman komentar doang atawe nyela yang maen padahal kalo die disuruh maen belon tentu juga bisa..hehehe. Nah... saking pade demen ame bola, sampe-sampe bulutangkis Indonesia terbuka kagak ade satupun yang ngomongin. Padahal untuk ukuran bang Pendi prestasi pemaen-pemaen Indonesia sungguh luar biasa ! masak sebagai tuan rumah kagak satupun ke bagian gelar. Ck..ck..ck..hebat..hebat ! Eh..ape karena ude biasa kali ya, jadi orang-orang nganggapnye kagak aneh lagi...hehehe.

Nah...balik lagi ke soal bola. Bang Pendi yang sebenernye kagak begitu ngerti soal bola jadi ikut-ikutan demen nonton bola apelagi nontonnye rame-rame di pos ronda. Enaknye lagi kalo pas nonton tiap malem ade aje yang dibakar buat ganjel perut. Kadang singkong, kadang ubi, kadang ikan sapu-sapu sampe sendal jepit bang Pendi ikut dibakar ( yang ini kagak sengaja..hehehe ). Yang nonton disitu tiap malem giliran nyari bahan buat dibakar, kayak kemaren gilirannye bang Pendi ame si Jabrik yang nyari.
" Wah..gimane nih Pen !? gua lagi kagak punye duit. Elu punya ngga ?" tanye si Jabrik waktu ntu.
" Tenang aja Brik..! nanti kita minta aje ame kong Amin " jawab bang Pendi santai.
" Mintanye gimane Pen ? ini pan ude jam satu pagi..masak kite mesti gedor-gedor rumahnye kong Amin "
" Ya ude tenang aje, nanti gue ajarin caranye..." kate bang Pendi, si Jabrik akhirnye nurut aje. Sesampenye di kebon singkong kong Amin, bang Pendi nyuruh si Jabrik minta singkong sama kong Amin.
" Kong Amin...aye minta singkongnye barang dua pohon, buat temen nonton bola.." kate si Jabrik ikutin ajarannye bang Pendi.
" Ambiiil...aaaaja cuuu ! kalooo kuraang, singkongnyaaa ambiiiil ajaaa yang banyakaaan. Guaaa relaaaa !" jawab bang Pendi niruin suaranye kong Amin. Si Jabrik cekakakan denger suaranya bang Pendi, terus sambil nahan-nahan tawa die bedua nyabut tuh singkong. Jadi deh malam ntu..pesta bakar singkong.

Malam ini giliran si Amat ame si Jabrik yang nyari bahan yang bisa dibakar. Bang Pendi sempet nyeletuk " cari yang enakan dikit Brik...! ude bosen gue makan singkong mulu...sekali-kali ayam kek !". Si Jabrik ame si Amat cuman manggut-manggut aje.
" Brengsek si Pendi maonye enak aje, darimane kite punye duit buat beli ayam " kate si Amat ngedumel.
" Ah..tenang aje Mat ! nanti kite pake ilmunye si Pendi. Elu ikut aje deh !" kate si Jabrik. Nggak lame die bedue ude bawa ayam ke pos ronda.
" Wah..ini baru Jabrik namanye ! ternyate elu bise diandelin.." kate bang Pendi, si Jabrik cuman nyengar-nyengir kadal. Bang Pendi langsung semangat dan die yang inisiatif motong ame nyabutin bulunye tapi pas lagi megang ayamnye bang Pendi sempet bengong. Ada perasaan aneh..kayak-kayaknye die ngenalin ntu ayam...tapi " Sebodo ah...! yang penting gue makan ayam ni hari " pikir bang Pendi. Ayam langsung dibakar dan dalem itungan menit ayam langsung ludes. Tapi abis makan, bang Pendi masih penasaran ame ayam tadi..
" Eh...Brik, ngomong-ngomong ntu ayam elu beli dimane ? " tanye ban Pendi penasaran.
" Yah...kagak pake beli Pen ! Gue pan ikutin ajaran lu kemaren. Si Amat yang minta ijin, nah..gue yang kasih ijin " kate si Jabrik sambil cengengesan.
" Busyeet...elu ngembat ayam orang, ayam siape ?" bang Pendi masih penasaran.
" Ayamnye kong Jupri.." jawab si Jabrik nyantai.
" Hah..kong Jupri !? itu pan babe gue...berarti tadi ayam gue dong !?. Brengsek lu Brik...pantesan aje gue kayak ngenalin ntu ayam. Gantiin nggak !" kate bang Pendi marah sambil mao mukul si Jabrik tapi langsung dipisahin temen-temennye.
" Lha...gue pan ude minta ijin Pen, pan....elu juga yang ngajarin !. Lagian yang paling rakus makannye juga elu.." kate si Jabrik. Bang Pendi kagak jadi marah, die langsung diem tapi badannye langsung lemes.." Yah..selesai sudah kebersamaan gue ame Novi ( nama ayamnye..hehehe ) " kata bang Pendi dalem ati. Si Jabrik ame yang laen cuman cekikikan aje ngeliat bang Pendi yang lagi manyun.

Selasa, 22 Juni 2010

JAKARTA ( Makin Tua Makin Peyot )

Kalo ngomongin PRJ ( Pekan Raya Jakarta ) bang Pendi suka heran en bingung sendiri. Bukan ape-ape, soalnye sebagai orang yang ngaku anak Jakarte...sebujeg-bujeg ( tak sekalipun ) selame idupnye die kagak pernah tau yang namanye PRJ. Ade apaan disono ? orang-orang pade ngapain ? die kaga pernah tau. Yah..kalo liat filosopi hidupnye yang tidak suka keramaian rasa-rasanye emang pantes die kagak pernah kesono. Kalo ade yang tanye kenape die kagak ke PRJ paling-paling die jawab..." Capek ah..! orang-orang yang ade disono pasti bakalan ngerubutin gue buat minta tanda tangan. Pan bise pegel tangan gue ! " ( he..he.. )

Tapi bise jadi ape yang die bilang bener, soalnye bang Pendi emang rade-rade unik. Uniknye...kalo orang-orang punye pitak di kepale, nah...bang Pendi punye pitak di pipi. Lho..kok bise, gimane ceritanye ?. ceritanye pitak itu dulunye bekas panu, mending panunye kecil...nah yang ini panunye selebar duit logam cepean lama...pan keliatan bangat tuh !. Waktu lagi marahan, neng Siti pernah ngeledek die sambil nyanyi lagunye Betharia Soneta ( mantan pemain gendangnye grup musik dangdut bang haji Rhoma, jadi dibelakang namanye pake soneta...he...he ). Lagunye begini...."  Lihatlah tandaaaa...Pitak di pipiiii...bekas gambar panu..mu " he..he. Nah..gare-gare itu bang Pendi jadi kagak pede, kalo keluar rumah die suka pake tensoplast buat nutupin panunye. Lumayan jadi nyaru ( tersamar ) dikit..paling-paling kalo ade yang tanya die jawab...kena silet atawe kena sabet golok, semalem abis kelahi ame maling...he..he

Nah...kembali ke soal PRJ. Acara ntu biase barengan ame ulangtahunnye kota Jakarte, taon ini kalo kagak salah sih ulang tahun yang ke 483. Ude tua juga ye..? tapi kalo bang Pendi pikir-pikir, Jakarte makin tua bukannye tambah bener atawe banyak kagak benernye. Jalan-jalan malah tambah macet, kalo ujan makin sering banjir dan juga makin kagak aman. Perasaan beberape taon lalu waktu bang Pendi masih suka maen kesana kemari, menclok sana menclok sini jam 1 atawe jam 2 pagi... nyante-nyante aje ! tapi sekarang...boro-boro dah, meleng dikit dompet bise melayang...itu masih untung ! kalo lagi apes mah..nyawa juga bise melayang. Sekarang aje kalo kemane-mane bang Pendi kagak pernah mao bawa duit banyak-banyak di dompet ( lagian kapan die pernah punye duit...he...he )

Atau Jakarta itu bisa disamain kayak orang kali ye..? tambah tua bukannye tambah cakep alias cuman menang tuanye doang. Ude kagak bise ape-ape...bisanye cuman ngemut doang ! he..he. Tapi mudah-mudahan deh...bang Fauzi ame aparatnye punye kepedulian yang tinggi buat ngebangun Jakarte agar bise lebih baik lagi dan bukannye cuma mikir...proyek ape lagi nih yang ngedatengin ( dapat ) duit...he...he... maaaaaaf !
Selamat ulangtahun deh buat kote Jakarte. Moga-moga aje bise nemu jamu kuat yang mantep, biar bise jadi tua-tua keladi makin tua makin jadi...ye ngga ?
Tariiiiik....maaaaang...!!

Senin, 21 Juni 2010

OBROLAN DI WARUNG KOPI ( 20 )

GARE-GARE BOLA

Bang Pendi  :  Ce...elah...pagi-pagi muke ditekuk  aje mpok !  mendingan bikinin kopi dah...biase, kagak pake laler, kagak pake lama dan kagak pake manyun..( sambil cengar-cengir nyomot pisang goreng )

Mpok Mumun  :  Banyak omong lu Pen ! ude tau gue lagi kesel...pake ngeledek lagi...( bales mpok Mumun sewot )

Bang Pendi  :  Ya...maaaaaaf, lagian kenape sih mpok ?

Mpok Mumun  :  Gimane gue kagak kesel ! laki gue ( suami ) mulai abis maghrib ampe subuh kerjaannye nonton bola mulu. Boro-boro dah bantuin gue beres-beres barang dagangan...tiap malem nyolak-nyolek gue juga kagak ! ( bang Pendi ngakak ampe keselek pisang goreng....kaciaaaan deh lu ! kate bang Pendi dalem ati )

Bang Pendi  :  Yah...susah deh aye ngomongnye, namanye juga piala dunia yang adanye cuman 4 taon sekali...wajar kali mpok ! tapi ngomong-ngomong, kate ustad Sobri...kagak baek mpok ngomongin kejelekan laki ( suami ) ke lelaki laen apelagi kalo ude soal kasur. Itu sama aje ngundang setan mpok..!

Mpok Mumun  :  Kalo ngomong sama elu pan laen Pen...emang gue ude ngomong sama setan ! lagian elu pan cuman anak kecil..( mpok Mumun jadi cekikikan, bang Pendi yang lagi nguyup kopi jadi batuk-batuk.." Bujug buneng...! gue dibilang setan, lagian perasaan dari kemaren gue dibilang anak kecil mulu. Ape karena gue ganteng dan imut-imut ye ? " pikir bang Pendi sambil mesam-mesem sendiri )

Si Jabrik  :  Nah..nah.. lagi ngomongin apaan nih !? lagi ngomongin gue ya ? ( tanya si Jabrik sambil nyelonong masuk )

Bang Pendi  :  Jiaaaah...kepedean amat lu Brik ! gue lagi ngomongin bola " Jabulani " yang jalannye kagak jelas dan sering bikin kiper pade bingung. Sama persis ame mukalu yang kagak jelas..! ( kate bang Pendi sambil cengar-cengir )

Si Jabrik  :  Kagak jelas gimana Pen !? ( tanye si Jabrik bingung sambil ngeganyem singkong rebus )

Mpok Mumun  :  Emang kagak jelas Brik ! itu muka ape pantat...abis buriknye sama...! ( mpok Mumun cekikikan lagi, bang Pendi cekakakan, si Jabrik manyun.." Set dah...mimpi ape gue ya ? pagi-pagi ude jadi bahan ledekan " pikir si Jabrik sambil nerusin ngeganyem singkongnye )


Ude dulu ah...! takut kepanjangan...lagian Brazil ude mao maen nih..he..he

Jumat, 18 Juni 2010

SENDAL JEPIT PLUS-PLUS

Bang Pendi agak bingung nih , sebenernye siape sih yang bego !? die ape orang-orang. Abis setiap orang pasti pikirannye negatif kalo ude denger kate plus-plus. Misalnye aje pijat plus-plus atawe salon plus-plus pasti pikirannye pade negatif. Padahal kalo kate guru SD nye bang Pendi kalo plus ( + ) itu positif, kenape pikiran orang selalu negatif. Kalo negatif..pan bukan plus-plus tapi min-min, ye ngga ? he..he

Bang Pendi sekarang mao jualan sendal jepit nih. Kebetulan waktu ke Bandung kemaren sempet beli 50 rebu dapet 6 pasang. Nah..kalo bang Pendi jual 20 rebu sepasang, pan jadi untung tuh. Sore ntu langsung deh bang Pendi nyatronin ibu-ibu yang lagi pade ngerumpi sambil nyari kutu. Biase deh kalo ibu-ibu pade ngerumpi, ade aje yang diomongin. Dari ngomongin anaklah...ngomongin pinter-pinteran masak sayur asemlah sampe ngedumel kesel ame lakinye karena jarang dikelonin gare-gare pade nonton bola..he..he

" Daripade ngomongin laki...cuma bikin dose ! mending mpok-mpok beli sendal aye nih..." celetuk bang Pendi.
" Heh..ikut campur aje lu ! anak kecil masih bau kencur juga..." Omel  mpok Ida yang gendut bin gembrot. Bang Pendi rade keder juga..
" Sendal apaan Pen ? sini gue liat..." tanye mpok Mumun
" Ini sendal bagus mpok ! sendal jepit plus-plus dari Bandung.." kate bang Pendi sambil cengar-cengir.
" Ah..lagulu Pen, kayak panti pijet aje pake ade plus-plusnye.." sambung mpok Saodah
" Plus-plus itu maksudnye ade untung dan banyak kelebihannya mpok. Kalo mpok nanti beli terus rusak, panggil aye...nanti aye yang benerin. Kalo mao tuker tambah juga bisa dan ade juga layanan terbaru nih...kalo mpok-mpok mao bobo, telapak kakinye mao dilapin ( dibersihkan ) aye juga siap " bang Pendi cengengesan.
" Yee..itu mah maonye elu, emangnye elu mao dibejek-bejek laki gue !? " bales mpok Mumun sambil melotot marah, bang Pendi cuman cengar-cengir aje. 

Akhirnye ntu ibu-ibu pade nyobain juga sendalnye bang Pendi tapi gilirannye mpok Ida yang nyobain...
" Ngga ade yang gedean lagi nih Pen..?" tanye mpok Ida. Bang Pendi bukannye ngejawab tapi malah ketawa ngakak.
" Yah...itu mah bukannye sendalnye yang kekecilan mpok ! tapi kakinye mpok yang kegedean, lagian punye jari jempol semua. Jempol ape lengkoas..tuh !?" bang Pendi nerusin ngakaknye, ibu-ibu yang laen pade mesam-mesem ngedengernye.
" Heh...ape lu bilang !? belon pernah ngerasain mukalu gue remek-remek ye..!!!" mpok Ida tereak marah sambil ngelempar sendal kemukanye bang Pendi. Plaaakkk...! Wadaaaoooouuuu..sendal telak kena mukanye bang Pendi. Die langsung buru-buru ngeberesin sendalnye .....
" Wah..bener juga kata lu Pen, sendal plus-plus punye lu banyak kelebihannye. Bise juga buat ngelempar muka lu...!!" celetuk mpok Mumun, ibu-ibu yang laen pade ngakak. Bang Pendi langsung ngacir sambil megangin pipinye yang panas ketampar sendal plus-plusnye...he..he

Selasa, 15 Juni 2010

DISEBUT KAMBING...KOK BANGGA !?

Ini masih tentang acara hajatan di Bandung. Pas ade waktu senggang, bang Pendi ame si Jabrik pengen jalan-jalan...biasa deh cari yang seger-seger. Abis jalan sana jalan sini akhirnye nemuin pasar Andir, disitu kayaknye banyak yang ngejual baju-baju grosiran. Tapi bang Pendi kagak kepengen beli abis kalo liat harganye masih murahan di Tanah Abang ( padahal emang kaga punye duit...he...he )

Nah..kalo ude nyampe ditempat rame kayak gini, si Jabrik paling kaga bise jalan bareng ame bang Pendi. Emang si Jabrik kayaknye tipe-tipe anjing pelacak yang maonye jalan duluan daripade tuannye...he...he. Tapi sebenernye die cuman kaga mao kalah saing ame bang Pendi, soalnye kalo ade cewe...nah cewe-cewe ntu cuman ame bang Pendi maonye ( mao muntah maksudnye..he..he ). Pas lagi jalan, ade anak-anak yang lagi nongkrong nyeletuk sambil nunjuk si Jabrik...
" Wah...aya embe ti Jakarta kasasar di dieu cuy...!" katanye. Si Jabrik yang merasa ditunjuk jadi bingung karena ngga ngerti, tapi denger ade kata Jakartanye si Jabrik dengan pedenya tersenyum-senyum bangga.." Oh..iya dong ! aye emang dari Jakarta.." katanye, tapi anak-anak yang lagi nongkrong malah ngakak. Ibu-ibu yang lagi belanja juga mesam-mesem ngeliat si Jabrik. Karena perasaannya ngga enak, akhirnye si Jabrikpun ngeloyor pergi. Bang Pendi yang juga kaga ngerti langsung nanya ame ibu-ibu yang tadi mesam-mesem.
" Emang tadi anak-anak ngomongin  apaan bu.." tanye bang Pendi
" Oh..tadi ngomong aya embe ti Jakarta kasasar di dieu artinya ada kambing dari Jakarta kesasar disini.." jawab ntu ibu-ibu. Bang Pendi langsung ngakak.." briiik...Brik ! di bilang kambing aje bangga lu..." sambil nerusin ngakaknye.

Nb :  Buat saraper's yang orang sunda, tolong dikasih tau kalo ade kate-kate yang salah..maklum lagi belajar ! oh..ya buat yang tinggal di Bandung, bang Pendi langsung kangen nih ame mie kocok Bandung. Kalo di Jakarta nyarinye dimana ya ? ada yang mao kirimin..? he..he

Jumat, 11 Juni 2010

ROMBONGAN JAGONG

Hari minggu kemaren tetangganye bang Pendi ngajakin ke Bandung menghadiri acara hajatan. Terang aje bang Pendi  paling demen kalo diajak hajatan, soalnye bisa makan gratis..tis..tis ! he..he. Soal duit kondangan ngga masalah, tinggal masukin aje duit dua rebuan selembar ke dalem amplop yang kaga di kasih nama..beres ! yang penting amplopnya jangan lecek bin kumel, kalo perlu mahalan amplopnye daripade isinye..biar kagak malu ame pager ayu yang jagain kendi...he...he.

Nah..si Jabrik pengen juga ikutan apelagi denger mao ke Bandung.  Pikirnye..die bakalan hepi karena disono pasti banyak nemuin peuyem-peuyem yang cantik-cantik...eh..yang gurih dan manis maksudnye...he..he. Soalnye dulu pernah ikut acara hajatan di Wonogiri, die bukannye bise nemuin cewe tapi malah jadi bahan tertawaan. Ceritanye begini..waktu ntu..mobil yang bawa rombongan disetop polisi..
" Selamat malam pak ! bapak bawa banyak penumpang, siapa dan mau kemana ? tanya pak polisi kepada sang supir.
" Oh..kulo gowo rombongan jagong pak..!" jawab sang supir yang memang asli Wonogiri. Denger kata rombongan jagong si Jabrik celingak-celinguk kebingungan..
" Set..dah ! elu kok diem aje Pen dibilang rombongan jagung, perasaan tampang kita kagak lecek-lecek amat ...masak di bilang jagung ?" bisik si Jabrik sama bang Pendi.
" Ya..elu sih rambut ude jabrik pake disemir segala, bukannye keliatan ganteng tapi malah kayak jagung " jawab bang Pendi sambil nunjuk rambutnye si Jabrik yang rade-rade merah. Yang ade di mobil pade ngakak semua, pas dibilangin kalo rombongan jagong itu artinye rombongan hajatan...si Jabrik cengar-cengir malu sambil narik-narik rambutnye yang jabrik.

Ssssssttttttt....besok ade terusannye !

Rabu, 09 Juni 2010

BANG PENDI DATENG...ENG...ING..ENG !!

Bolo-bolo bakar ganjel perut laper
Naek bendi bareng ame si Bedu
Haloooo...apa kabar saraper-saraper
Bang Pendi dateng mao melepas rindu

Kepala peyang kepala pitak
Lubang kendi tak muat buah kelapa
Bukan tak sayang bukan tak cinta
Bang Pendi lama tidak menyapa

Pohon keramat dibuat jimat
Buah delima di belah emak
Mohon maaf seribu maaf
Seikat bunga sudilah diterima


 Photobucket


Bang Pendi kangen banget nih, ude lame kagak nyepam kerumahnye sohib atawe saraper's. Maklumlah...bang Pendi lagi sibuk ngebujuk ayam-ayam dirumah, abis pade ngambek minta dikelonin ame bang Pendi...he...he. Nah..sekarang bang Pendi dateng, walo masih mencuri-curi waktu dan sekalian bawa award seiket kembang. Silahkan diambil bagi siape aje yang ude rela mampir ( kalo disebutin satu-persatu nanti ngga enak ame yang kagak kesebut ).
Langsung dicomot dah....ye...ye...ye...!!!