HADIAH KONTES

WARNING !! Jangan baca ini sambil makan...hehehe
Sebenernye agak bosen juga ngomongin kentut, tapi mao diapain lagi...ide yang nongol abis semedi tujuh hari tujuh malem cuma ini...hehe. So kita mulai deh !

Masih inget kan cerita tentang Bang Pendi yang kentut terus di gamparin Bang Japra ? Emang apes banget tuh Bang Pendi. Tapi ada untungnya juga, kenape ? Ternyata ada pemandu bakat yang denger suara kentutnya Bang Pendi ( Jiaaah...ngga nyangka, bukan maen bola aja ade pemandu bakatnye. Ternyata kentut juga ! hehe ). Nah akhirnye Bang Pendi diajak ikut kontes kentut seIndonesia, kalo dibandingin ame kontes burung berkicau...nggak kalah dah ! Cuma bedanya, kalo kontes burung berkicau para penontonnye berebut paling deket arena kontes buat ngedenger suaranya tapi kalo kontes kentut penontonnye berebut jauh-jauhan nontonnye sambil tutup idung...hehehe. Kontes terbagi menjadi 3 kategori yaitu kentut ternyaring, kentut terbau dan terakhir gaya kentut paling unik ( yang ini kayak gimana ya..? hehe )

Singkat cerita, Bang Pendi juara di 2 kategori yaitu kentut paling nyaring dan paling bau. Akhirnya sebagai juara, Bang Pendi dapet hadiah jalan-jalan ke negeri Kincir Kentut ( Kentut sama angin cuma beda-beda tipis pan..? hehe ). Bagi Bang Pendi pergi kesono ibarat pulang kampung, asal tau aja Bang Pendi masih keturunan Van Burick, nama di ktpnya aje Pendi Van Burick..hehe. Nah untuk memperlancar bahasa Inggrisnye, Bang Pendi kursus ame Mpok Laela ( bukan LIA ) terus Mpok Lusia ( bukan Santa Lusia ) hehe. Nah..pas hari keberangkatan Bang Pendi dianter orang sekampung, untungnya kagak dipasangin petasan jadi ngga berasa mao pergi besan atawe naek haji...hehe. Ude gitu Uwaknye ( nenek ) pengen ikut-ikutan juga, mao ngga mao Bang Pendi ajak...soalnye ini Uwak tinggal atu-atunye, yang atu lagi ude dipatok ayam...dikira cacing kali ya...hehe ( Uwak..maafkan cucumu ).

" Nanti elu naek apaan Pen ke Holan ? Naek kapal ye..? " Tanya Uwaknye

" Kapal mah dilaut Wak, kalo disini pesawat namanye..."

" Weeehh...kalo cuma naek pesawat ngapain jauh-jauh, dirumah gua banyak pesawat ! Ada pesawat televisi, ade pesawat telepon.."

" Yang ini pesawat terbang Wak ! Kalo pesawat yang itu mah bukan ditaekin tapi diinjek-injek. Lagian klo itu mah ngga ada pragawati yang cakep-cakep " Kata Bang Pendi sewot.

" Ohh..gitu.. Uwak jadi inget kalo dulu ame Engkonglu jadi pramugari ame pramugara "

" Ah...yang bener Wak..?"

" Masa Uwak boong, dulu engkonglu yang pegang gitar...Uwak yang nyanyi "

" Heh..kok pramugari kayak gitu, pesawatnya maskapai apa Wak ?" Bang Pendi heran

" * Kopaja...!" Kata Uwaknye cuek. Gubraaakkk... Ntu mah ngamen !! Bang Pendi ngakak sambil megangin perutnye. * Kopaja : koperasi angkutan jakarta alias angkot

Singkat cerita, Bang Pendi ude duduk di pesawat. Sayangnya ntu pesawat kagak berangkat-berangkat karena ada kerusakan teknis. Gara-gara ntu Bang Pendi jadi sewot, apalagi yang katanya pramugari  ntu cakep-cakep dan ramah ternyata ngga bener. Yang Bang Pendi temuin pramugarinya judes, Bang Pendi tau pas pramugari itu nawarin minum...

" Mau minum apa pak...?" Tanya sang pramugari, Bang Pendi mikir-mikir...

" Oh..aye mao es cendol aja deh ! Kalo ngga es cincau..." Jawab Bang Pendi, sang pramugari langsung merengut.

" Minta bikinin aja sama neneklu...!! " Kata ntu pramugari. Buyset dah...!! Galak amat ya...emangnya Bang Pendi salah ape..? hehehe

Untungnye ngga lama kemudian, pesawat take off juga. Bang Pendi ngeri banget....apalagi kuping berasa budek dan pesawat goyang-goyang sambil bunyi...degedek...degedek...degedek...!!

" Yah...mati dah gua....mati dah gua !!" pikir Bang Pendi.  Pesawat terus goyang-goyang, nyali Bang Pendi jadi tambah mengkeret.

" Heh..bangunlu..!! gini hari molor mulu kerjaanlu, banguuun...!! " tereak Nyak Salminah sambil ngorak-ngorak ( goyang ) bale tempat tidur Bang Pendi. Bukan matanya Bang Pendi yang melek tapi malah pantatnya yang melek....Duuuuttt !!

" Kurang ajar lu ya...dibangunin malah ngentutin !!" Nyak Salminah ngamuk sambil gebukin Bang Pendi pake sapu lidi.

" Ampun nyak...ampuuuuun..!! "

ENAKAN DI ATAS APA DI BAWAH ?

Hari ini indah sekali. Ude hari kejepit, pagi-pagi hujan deres pula...Beeuuh...bikin orang males ngapa-ngapain. Klo guru spiritual Bang Pendi bilang, disitulah letaknye kelihatan loyalitas ame moralitas karyawan. Hari kejepit terus hujan deres tapi tetep berangkat gawe itu namanye karyawan yang loyalitasnye tingi, nah...klo pagi-pagi ude telponan ame cewe.." Ude..kita ngga usah masuk aje, tanggung lagi...hari kejepit ! Mending kita jalan aje...cari yang anget-anget " ( Maksudnye cari bajigur...hehe ). Nah..disitu moralnya perlu dipertanyakan....hehe

Udeh ah...jadi ngaco ngomongnye...hehehe. Gini aje deh...sekarang Bang Pendi mao ceritain tentang obrolannye Bang Pendi waktu ceting ame Om Hosni Mubarak.

Bang Pendi  :  Eh..Om Hosni akhirnye turun juga, kenapa nggak dari kemaren-kemaren Om..? 

Om Hosni   :  Kemaren belon siap Pen...Lagipula kemaren saya kan ke Indonesia, emangnye ente ngga tau ?

Bang Pendi  :  Ke Indonesia,  ngapain..?

Om Hosni  :  Oh..ane coba sowan ke temen lama, sayangnye die ude kagak ada. Sebenernye sih cuman mao cari tau, gimana sih caranya ? Kalo ude lengser nanti saya ngga dituntut ame rakyat Mesir, kagak bakalan di sidang...ape lagi masuk penjara.

Bang Pendi  : Yah...lagian Si Om....kalo ude diatas kagak mao turun, kayak anak kecil maen odong-odong aje...disetelin lagu...Papaaa..bolo-bolo....mamaaa...bolo-bolo...papa bolo...mama bolo...kakek bolo...! Nah..udah deh...ntu anak uma godek-godek kagak mao turun.  ( Bang Pendi cengengesan )

Om Hosni  :  Bukannye kagak mao turun Pen...masalahnye duit ane belon diumpetin semua, niatnye sih mao di taroh di Swiss  yang udaranye dingin, kalo ditaroh di sana kan duit saya pade beku jadi aman sedikit. Nah..ente tau kan kalo di Mesir panas, entar pade lumer semua ntu duit...

Bang Pendi  :  Ntu duit ape dodol Om ? Kena panas kok lumer..?. Ya ude Om...mending minta suaka politik aja ke Indonesia, disini mah enak...gampang...semua bisa diatur ! Kalo punya duit, jangankan polisi...menteri aje langsung diem. Contohnye sekarang..! Ude tau banyak merk susu yang terkontaminasi bakteri Zaki Zimah. eh...masih aja Menkes kagak mao umumin merk susunye....

Om Hosni  :  Eh....sebentar Pen ! Perasaan Zaki Zimah itu nama artis...

Bang Pendi  :  Oh ya...maaf, maksud aye sakazakii ( sambil cengar-cengir )

Om Hosni  :  Iya deh Pen, nanti Om pikirin. Kalaupun nanti Om sampe dipenjara, tolong tanyain ame Si Gayus. Gimana caranye, dipenjara tapi bisa jalan-jalan alias pelesiran ? Tenang aje...nanti ane kirim deh dari Mesir ke Jakarta buat nemenin ente..

Bang Pendi  : Cewe Mesir Om..? Asyiiiik...( Bang Pendi kesenengan..)

Om Hosni  :  Bukan...tapi onta Mesir !

Bang Pendi  :  Eh...bujug buneng.!! Ya ude, gampang Om...beres dah ! Eh..ude dulu ya Om, aye mao angkat jemuran dulu. Kolor atu-atunye lupa diangkat, takut keujanan....

Nah..gitu deh obrolan singkat Bang Pendi. Om Hosni emang kenal banget ame Bang Pendi karena dulu babenye Bang Pendi pernah dimintai tolong buat balsem-in mummi-mummi disono. Tapi pas babenye Bang Pendi yang balsemin, mummi-mummi disono pade kabur...( jelas aje pade kabur, orang balseminnye pake balsem Cap Lang yang extra hot...hehe ). Ngga tau deh mumminye pade kabur kemane, mungkin salah satunye yang baca cerita ini...hehe

Minta maaf buat sohib-sohib kalo postingannye ngaco gini. Abis kesian ame yang ude bolak-balik kesini tapi belon ade yang baru, kalo die kesini lagi terus minta piring...gimane ? bise repot Bang Pendi....hehehe

OBROLAN DI WARUNG KOPI ( 24 )

BEREBUT BANGKU, EH... KURSI

Bang Pendi  : Gut moning epribadi...! ( Sapa Bang Pendi sambil cengar-cengir ). Wah...dah lama nggak kesini makin maju dan gede aje nih Mpok...

Mpok Mumun  : Apanye yang maju..!? Elu ngomong maju...maju gitu jangan pake ngeliatin dada gue dong !! Pagi-pagi ude nyari perkare aje Lu..., lagian pas jadi pengangguran baru mampir lagilu kesini, kemaren lagi kerja kemane aje...( Mpok Mumun sewot )

Bang Pendi   :  Ya elah Mpok...Pengangguran jangan dibawe-bawe ape ! Lagian bukan aye aje yang pengangguran, noh...sarjana-sarjana  banyak juga yang nganggur. Ntar liat aje, dikit-dikit lagi aye jadi ketua PSSI...jangankan nih warung, Mpok mumunnye sekalian aye beli....

Mpok Mumun  : Heh...sembarangan aje Lu ngomong...!! ( Mpok mumun mendelik makin sewot, Bang Pendi cuman mesam-mesem sambil nyomot pisang goreng )

Bang Mamat  :  Lagu lu Pen mao jadi ketua PSSI, Om George Toisutta yang jenderal aje masih mao dijegal ! Gimane elu yang cuma tikus nyingnying... ( Bang Mamat nyengir kadal )

Mpok Mumun  :  Makanye sekolah yang tinggi Pen, biar jadi pinter kayak die-die pade...

Bang Pendi  :  Hah...ngapain juga sekolah tinggi-tinggi, pas ude pinter...ilmunye dipake buat korupsi. Emangnye Mpok kagak denger kalo anggota DPR pade ditangkepin, nah...die-die pade korupsi tuh...!. Lagian sekarang orang-orang berebut jadi ketua PSSI bukan pade mikirin prestasi, urusan prestasi belakangan yang penting kantong keisi...( sambil ngeganyem singkong goreng )

Bang Mamat  :  Kagak semua orang begitu Pen....

Bang Pendi  :  Ya...emang sih. Tapi kenape orang-orang ngotot berebut jadi ketua, terus kenape juga orang ngotot kagak mao turun alias diganti kalo kagak banyak duitnye. Belon lagi yang berebut jadi gubernur atawe presiden kayak di Mesir sekarang. Pernah denger nggak kalo ade orang yang berebut jadi ketua RT ? Nggak pernah kan..!? Lha...emang kagak ade duitnye makanye orang pade males jadi RT. Kayak RT kita sekarang nih...beeuh...ude ogah-ogahan tuh jadi RT ! Keliatan batang idungnye aje cuman pas arisan doang....( sambil nyaplok singkong lagi...)

Pak RT  :  Batang hidungnye siapa Pen..? ( suara berat dibelakang Bang Pendi )

Bang Pendi  :  Ya...pak errr....Eh pak RT, mao ngopi pak..? Bang Mamat geseran dikit dong, pak RT kita mao duduk nih...( Basa-basi Bang Pendi pas tau ada pak RT nongol. Terus buru-buru minum kopinye, singkongnye nyangkut ditenggorokan karena kaget )

Mpok Mumun  :  Hayooo lu Pen, ngomong ape tadi luuuu...( Bang Pendi bangun dari duduknye..)

Pak RT         :  Eh...kamu mau kemana Pen.!?

Bang Pendi  :  Eh...anu pak, perut aye mules kebanyakan makan ubi ! Nanti kalo aye kentut didepan pak RT, pan aye kagak enak....permisi dulu ye pak ( sambil cengar-cengir )

Bang Mamat  :  Bise aje lu ngelesnye Pen....! ( Bang Mamat ame Mpok Mumun ngakak, Bang Pendi buru-buru ngacir )

KENTUT IN A BOTTLE

Jadi orang yang suka bercanda, apalagi ditambah iseng bin jail kadang-kadang emang beresiko. Apalagi pas orang yang diajak becanda atawe diisengin lagi kagak mood dan kagak terima dibecandain...bise repot jadinye. Nah..ini yang juga dialamin  Bang Pendi, gare-gare iseng die dipecat dari kerjaannye ame Koh Achong. Begini ceritanye.....

" Ya elah Pen, elu makan apaan sih ? Sedari tadi braat..broot..braat..broot..mulu, mane bau bangke lagi kentut lu ! " Si Jabrik ngedumel.

" Sory Brik..! Gue kelepasan...Lagian gue kapok Brik, Nahan-nahan kentut  malah bibir gue yang jontor "

" Lah..kok bisa ? Ape hubungannye kentut ame bibir ? " Si Jabrik bingung

" Waktu ntu pas gue lagi ngelayanin yang beli, eh ...gue pengen kentut. Nggak enak dong kalo gue kedengeran kentut, akhirnye gue tahan-tahan...eh masih bunyi...Tiiuuuuuuuutt....Tuuiiiiiiitt...Tuut...Tuut !! Apesnye gue, didepan pas Bang Japra ame bininye yang bohay itu lewat..."

" Busyeeet...ntu kentut ape maen suling ? Pade ketawa dong denger kentutlu...?" Tanya Si Jabrik sambil cekikikan.

" Mending kalo pada ketawa....justru bibir gue yang jontor ditonjok Bang Japra ! Disangkanye gue godain bininye..." Kate Bang Pendi sambil nyengar-nyengir, Si Jabrik ngakak.

Dimane-mane yang namanye kentut emang bau. Cewek cakep atawe cowok ganteng kayak ape juga..tetep aje kentutnye bau. Mao makan daon kemangi segerobak atawe minum minyak nyongnyong sebotol, kentut kagak bakalan wangi. Ada nggak ye...? Yang bise ngedesain celana yang bise nampung angin kentut ? Hehehe. Nah..Bang Pendi jadi rade-rade nggak enak ame Si Jabrik, kalo die kentut mulu...lame-lame bise mabok ntu anak. Akhirnye die nemuin cara, biar kentut tetep jalan tapi baunye kagak kemane-mane.
Nggak lame....

" Jabliiik!! Siapa yang ambil owe punya botol ? Balu gua tinggal bentalan ude ngacil tuh botol..." Koh Achong tereak-tereak manggil Si Jabrik.

" Nggak tau Koh..! Si Pendi kali...Daritadi kayaknye megangin botol. Eh..botol yang ini ya Koh..? " Tanye Si Jabrik pas ngeliat ade botol di deket karung beras.

" Haaah...benel...benel ! Ini botol emang punya owe " Kate Koh Achong seneng sambil ngeloyor pergi. Bang Pendi tergopoh-gopoh lari dari belakang.

" Eh...Brik, Koh Achong ngapain tereak-tereak ?"

" Oooh...die nyariin botol minumannye, tapi barusan gue ude kasih.."

" Heh...Elu kasih botol yang mane ? Yang disini ye ? "

" Iye...emangnye kenape ?"

" Yaaah...mampus deh gue ! Mabok dah...mabok dah die..." Bang Pendi langsung lemes. " Eh...Brik, gue balik duluan ye ! Kalo Koh Achong tanya, bilang aje gue lagi mules-mules " Bang Pendi langsung ngeloyor pergi, Si Jabrik bingung. 

Bener aje...Nggak lame, pas Koh Achong buka tutup botolnye terus die cium-cium, Koh Achong langsung muntah-muntah dan hampir semaput....Hueeekk...Hueeekk !!

" Puiih...Puiih...Kulang ajal benel !! Pendiiiiii....Sini lu ! Elu apain nih botol !?"

Bang Pendi langsung ngacir, Si Jabrik yang ketakutan jadi ikut-ikut ngacir. Tapi pas diceritain Bang Pendi kalo botol tadi die pake buat nampung angin kentutnye, perut Si Jabrik langsung mules nahan-nahan tawa.

SEGENAP STAFF & CREW PRODUKSI JUGA PEMAIN

MENGUCAPKAN SELAMAT TAHUN BARU IMLEK

GONG XI FAT CAI

BAYAR UTANG

Kalo punya utang, rasanye emang rade kagak enak. Kepikiran terus...Apelagi kalo lagi jalan, kayaknye ade aje gangguannye. Kadang nabrak cewek cakep lah...kadang nemu duit seratus rebu lah...Eh...itu mah malah enak ya..? Hehehe. Nah..gitu deh yang dirasain Bang Pendi, kebiasaan ngutang kopi di warungnye Mpok Mumun jadi kebawa-bawa suka nunggak posting awardnye. Kayak award Mba Fanny ini...Bang Pendi masih inget sih kalo dikasih award tapi sayangnye lupa nyimpen, terpaksa deh..ngubeg-ngubeg lemarinye Mba Fanny, untungnye disitu ngga ade daleman...hehehe. Akhirnye ketemu juga ntu award yang lagi ngumpet ketutupan piyama strobery....langsung dipajang deh !!

1. Award dari Mba Fanny

Nah..yang ini juga ude lama dikasih sama Mba Seiri Hanako tapi juga lupa dan belon sempet dipajang. Eh...Mba Dewi Fatma kasih lagi award yang sama, ya ude Bang Pendi pajang aje sekalian. Tapi rade ribet...soalnye ade PRnye, bahasa Inggris pula...jadi rade-rade puyeng ngisinye...hehe

1. Thank and link to the person who awarded me this award

Makasih banyak buat Bu Dokter Seiri Hanako juga Mba Dewi Fatma yang ude ngasih award, tapi lain kali jangan cuma ngasih award...kirim-kirim martabak kek..!! hehehe...

2. Share 8 things about my self

Nah..ini yang rade-rade ribet, tapi tenang...Bang Pendi tetep isi kok !

-  Bang Pendi suka grogi kalo ngobrol sama yang namanye perempuan, apalagi kalo cuma berduaan...rasanye pengen buru-buru.....:)

-  Paling takut sama ular....

-  Paling kagak bisa yang namanye berenang. Ade yang mao ngajarin nggak..!? :)

-  Paling doyan ame yang namanye Duren

-  Kadang suka merasa kesepian kalo lagi tidur sendiri di kamar, kadang merasa rame kalo lagi ade ditengah pasar..orang yang aneh !? :)

-  Kalo disuruh pilih...yang kecil ape yang gede ? Bang Pendi suka yang kecil...tapi apalagi yang gede..lebih-lebih sukanye...:)

-  Kata orang sih...Bang Pendi mirip-mirip ame Tom cruise tapi kalo diliat dari atas Monas ! :)

-  Punya moto.." sedikit bicara banyak kerja !" maklum dulunye bekas maling. Lagian moto ntu cuma Bang Pendi pake kalo lagi besukaan...hehehe

3.  Pay it forward to 8 bloggers that I have recently discoverd

Karena yang kasih award ini wanita semua, makanye Bang Pendi coba balikin ke temen-temen blogger cewek juga. Tapi maaf nih...kagak kebagian semua, abis disuruhnye cuma 8...hehe

1. Chikarei

2. Celotehan

3. Nyanyu Amibae

4. Rin

5. Place to study

6. Thya

7. Mata dunia

8. Kucing tengil

4. Contact those blogger and tell them about their awards...

Ya deh...nanti kalo sempet. Tapi mudah-mudahan ude pade mampir dan langsung comot ni award...hehe

2. Award dari Mba Seiri Hanako & Mba Dewi Fatma

Nah..selesai deh bayar utangnye ! Siapa lagi yang ude kasih award ke Bang Pendi tapi belon di pajang ? Hayooo...ngaku..!! hehe...maaf klo emang kelupaan.
( Maaf kalo linknye belon dipasang, nanti nyusul deh...!! )

NYAWA KUCING LEBIH BERHARGA

Wah..dah lama ga nongol jadi ga enak ( Kalo ga enak kasih kucing aja ya.....hehe ), iya ga enak  sama sohib-sohib  yang masih rajin mampir....makasih ya ! Kali ini Bang Pendi diajak Si Jabrik kerumah encangnye di Citayam, rencananya mao minta nangka cempedak yang ude mateng-mateng. Bang Pendi ude ngancem Si Jabrik jangan sampe ngalamin kayak dulu, dulu die sempet jatoh dari vespanya si Jabrik ampe pantatnya besot...ude ditereakin tapi Si Jabrik tetep ngacir bawa vespanya.....itu dulu ! klo sekarang belon tau...kayaknya sih tambah parah...hehe

Nah...setelah semuanye siap, berangkat deh....tapi baru kira-kira seratus meter dari mulut gang, tiba-tiba ada angkot yang hampir nyerempet vespanye Si Jabrik. Si Jabrik yang kaget jadi ga bisa ngendaliin ntu vespa, karuan aje ntu vespa jadi oleng...

" Eh...eh...eh...Pen, stangnya goyang Pen ! Kite jatoh ape kagak nih Pen...!?" Si Jabrik Panik

" Mendingan jatoh aja Brik....biar seru !!" Jawab Bang Pendi setengah dongkol " ude mao jatoh masih sempet-sempetnya nanya " Ngedumelnye Bang Pendi. Ya udeh...akhirnye jatoh juga tuh motor ....Gubraaaaakkkkk...!! untungnye got yang di pinggir jalan ntu ukurannye kecil, jadi Bang Pendi ame Si Jabrik masih sempet ngeloncatin. Tapi tetep aje die bedue pade nyusruk dirumput alang-alang sambil berpelukan....( ini gosip..! hehe ). Bang Pendi langsung bangun...maki-maki supir angkot yang buru-buru tancap gas..." Hooooiiii...jangan lari lu !! Dasar kadal buntung, sapi kurap, upil onta, belatung nangka, kodok bonsai...ingus kuda nil !! "

Bang Pendi terduduk lemes sambil meringis-ringis kesakitan karena dengkul sampe pantatnye lecet-lecet. Si Jabrik juga, die lagi ngelus-ngelus kepalanye yang benjut.

Kalo ade kecelakaan kayak gini biasanye banyak orang pade dateng untuk nonton. Kali ini yang pertama dateng si tukang roti, kayaknye sih die berniat mao nolongin tapi dateng orang laen dan langsung nanya sama tukang roti...

" Eh...ada apaan Bang ? "

" Oh..ada roti keju, isi kacang ijo, susu...roti tawar juga ade ! "

" Ya udeh..yang kacang ijo aja deh ! "

Busyeeet dah....!!! Kirain tuh orang mao nolongin ang Pendi ame Si Jabrik, tapi ternyata cuman mao beli roti. Abis tukang roti, nggak lama tukang somay nongol, tukang bakso, tukang gorengan juga tukang kacang rebus...Makin lama orang-orang makin banyak tapi boro-boro ade yang nolongin Bang Pendi ame Si Jabrik, yang dateng kesitu cuma mao beli makanan, malah ada anak kecil yang ngelemparin kacang rebus ke Bang Pendi ame Si Jabrik yang lagi geletak kesakitan. Bang Pendi berasa jadi anggota Ragunan, dilemparin kacang begitu....ampun dah !!

Sambil nahan-nahan gondok, Bang Pendi ame Si Jabrik bangun...terus pergi ninggalin tempat ntu sambil dorong-dorong vespa..." Apes bangat dah....kite yang buntung, yang untung malah tukang jualan Brik..." Bang Pendi ngedumel, Si Jabrik cuman ngangguk aje sambil meringis-ringis. Eh...nggak lama ada mobil angkot lagi yang ngebut ngelewatin die bedue. Bang Pendi tambah gondok tapi belon sempet die maki-maki...tiba-tiba...." Ngiiiiiiiiiiiiiiiiiiiiiiiiiiiiiiiiiiiiiiikkkkkkkkkkkkkkkkkk...!!!!!!! Mobil angkot ntu ngerem mendadak. Supir angkot keliatan buru-buru turun, terus die ngelongok-longok ke kolong mobil lalu die nyuruh turun penumpangnye dan nyuruh pade ganti angkot. Si supir lari-lari kerumah yang ada dipinggir jalan, nggak lama dia bawa pacul terus ngelongok bawah mobil lagi...ternyata die ngambil mayat kucing yang ketabrak. Bang Pendi ame Si Jabrik melongo ngeliat kejadian itu...." Ternyate nyawa kucing lebih berharga dari nyawa kita Brik ! Liat aje tuh supir, bela-belain nyuruh penumpangnye turun cuman karena mao ngubur bangke kucing. Lha kita ? Tadi keserempet...boro-boro die nolongin, ditengok aje kagak...malah ngacir iya !! " Si Jabrik hanya ngangguk-ngangguk lemes....

Orang-orang ude pade sarap kali ye....!?

SALAH MASUK

" Briiikkk.....Jabriiikkk...!! Hah...dasar kodok bonsai, ditungguin lama bangat..." Bang Pendi mulai kesel kelamaan nungguin Si Jabrik. Dari baju yang tadi Bang Pendi rapi sampe sekarang lecek, dari yang tadinye wangi sampe luntur tuh wanginye...Si Jabrik belon juga nongol. Ngga lame Si Jabrik nongol juga...

" Busyeet dah...!! Ngapain aje sih lu lama bangat ?"

" Ya elah Pen....Gue pan mesti mandi dulu, belon dandannye..."

" Mandi setaon..! kayak perawan aje lu...mandinye lama. Lagian elu mah kagak perlu repot-repot pake dandan segala, pake apaan juga soalnye elu kagak pantes....tetep aje mukalu lecek bin demek..!!"

" Ya elah...segitu sewotnye Pen ! Eh..ngomong-ngomong, emangnye elu ude pernah ngintip perawan mandi ? Siapa Pen..? " Si Jabrik penasaran.

" Iye...pengen lu !? Noh...Si Nina ponakan gue yang baru 9 bulan, pas dimandiin emaknye. Ayo dah cepetan ! Bang Mamat ude nungguin dari tadi noh..."

Di deket warung kopinye Mpok Mumun emang ude ngejogrog Bang Mamat ame bininye dalem mobil, ade juga Mpok Mumun ame lakinye. rencananye emang mereka pade mao pegi kondangan ke rumah besannye Bang Rojali tetangga satu Rt di Citayem. Karena jaraknye lumayan jauh...mao kagak mao dah Bang Mamat bawa mobil buat bareng-bareng kesono...

" Gue naek lewat mane nih Pen...?" Tanye Si Jabrik pas nungguin Bang Pendi masuk ke mobil.

" Elu mendingan masuk lewat knalpot aje Brik....Elu pan sama cemongnye ame ntu knalpot.." jawab Bang Pendi asal sambil nyengir.

" Kedengerannye sewot banget Pen...!? Ude laper lu ye.., pengen cepet-cepet makan disono ?" Ledek Mpok Mumun.

" Ya iyalah Mpok...tekor bandar kalo kondangan kagak makan !"

" Ngomong-ngomong elu ngasih amplop gak Pen ? Jangan-jangan elu bedue cuman pengen makannye doang...Ngasih amplop kagak ade isinye..." Sambung Bang Mamat, semua pade ketawa.

" Yang penting judulnye ngasih amplop...Bang " Jawab bang Pendi sambil mesam-mesem jawa.

Sampe tempat kondangan, tamu yang dateng pas lagi rame-ramenye. Orang yang mao salaman aje sampe ngantri kayak orang antre beli cabe...

" Wah...Brik, kayaknye lama kalo nungguin salaman dulu. Mending kite langsung makan aje nyok...! Perut gue ude laper nih..." Ajak Bang Pendi.

" Ayo dah...." si Jabrik juga hayo aja. Akhirnye tanpa ngomong-ngomong ame bang Mamat juga Mpok mumun, die bedue langsung ngeloyor ke meja prasmanan. Apelagi gurame gorengnye ude pasrah siap diembat....serbuuu !!

" Bang Mamat...kayak-kayaknye kite salah masuk nih bang. Ntu liat pengantennye...kayaknye bukan Si Siti anaknye Bang Rojali " Kate mpok Mumun sambil celingak-celinguk dari jauh.

" Wah..iye ye..! Itu mah bukannye Si Rojali....Kenape tadi kite kagak ngeliat plangnye ye..."

" Abis kebanyakan orang sih Bang..."

" Ya ude kite balik..! Eh...Si Pendi ame Si Jabrik pade kemane...? Ntu bedue cepet amat ngilangnye..." Tanya Bang Mamat. Akhirnye mereka berempat laki-bini celingak-celinguk nyariin bang Pendi ame Si Jabrik.

" Nah...ntu die bedua !" Kate Mpok Mumun sambil nyamperin. " Ya Allah...elu bedue maen makan aje. ayo kite pegi..! Kite salah masuk..." Kate mpok mumun lagi.

" Ta.. elah Mpok, pelan-pelan kenape ngomongnye....Kite pan jadi malu..." Kate Bang Pendi.

" Elu bedue sih..kerjaannye gegares mulu ! Ayo dah cepetan..." Bang Pendi ame Si Jabrik pun naroh piring makan pelan-pelan, tengok kiri-kanan sambil cengar-cengir malu karena diliatin orang yang lagi pade senyam-senyum geli ngeliat tingkah die bedua. " Hooiii...mau kemana hooiii...Abis makan bayar hooiii..." Ada yang ngeledek begitu. bang Pendi ame si jabrik buru-buru ngacir nyusul Mpok mumun. Untung...makannye tadi pas banget ude abis, jadi kagak tekor-tekor amat....untung malah, kagak kondangan tapi dapet makan !! Hehehehe.....