Halaman

Rabu, 24 Februari 2010

ENAKNYA NAIK VESPA

Bang Pendi kagak enak ati juga ame babenye, gara-gara die...sekarang ngambek enyaknye jadi berseri kayak sinetron tipi..he..he. Babenye juga jadi sering ngelamun sambil nyanyiin lagunya mas Anang " Separuh jiwaku pergi.." Jiaaahhh....!! pernah ngebayangin nggak, aki-aki ompong duduk ngelamun nyanyiin lagu itu..he..he. Lagian...salah sendiri, bininya jadi ngambek...he...he. Nah..buat nebus dosa, bang Pendi bikinin babenye nasi goreng buat sarapan. Karena nasi putihnye cuman satu piring, bang Pendi rela kagak nyobain barang sesendokpun. Babe Jupri yang lagi bengong didepan seneng bukan maen, anaknye ternyata perhatian ame babenye. Abis ngasi nasi gorengnye ...bang Pendi langsung pegi mandi karena hari ini die mulai kerja lagi di tokonye koh Achong, tapi tiba-tiba...

" Pen...Pendi...sini lu !!" tereak babe Jupri. Bang Pendi yang lagi mandi jadi buru-buru nyamperin, badannye cuman dilit anduk doang dan badannye masih penuh sabun ( untung penuh sabun, kalo ngga..buriknye pade keliatan he..he )
" Apaan sih be..!? orang lagi mandi juga..." tanya bang Pendi.
" Ini nasi goreng bumbunye pake apaan ?"
" Bumbunye ? pake bawang 5 biji, cabe 5 biji, lengkoas 5 biji, kunyit 5 biji, jahe 5 biji, garem 5 sendok, mecin 5 sendok. Pan kata orang 5 sehat 5 sempurne, jadi aye bikin serba lima..biar mantep !" jawab bang Pendi
" Mantep..palelu ketiban atep !! itu bumbu nasi goreng ape bikin obat buat nyembur orok ( bayi )...nih cobain !"  semprot babe Jupri. Akhirnye bang Pendi nyobain juga tuh nasi goreng tapi baru satu sendok die ude huek..huek !
" Eh..iye nih be, kurang enak dikit.."
" Kurang dikit... biji matelu pitak..!! ude bawa sono..." babe Jupri sewot. Bang Pendi lemes, misi buat nyenengin babenye kandas. Akhirnye nasi goreng dikasih ke ayam...tapi ngga lame ntu ayam juga pade klepek-klepek semaput...he..he.

Tumben-tumbenan hari ini si Jabrik nyamperin bang Pendi pake vespa bututnye, sebenernye bang Pendi rade ketar-ketir juga...abis pan vespa rade berat sedangkan si Jabrik badannye cungkring ame sapu lidi kayaknya juga gedean sapu lidi..he..he. Diperjalanan bang Pendi nyeletuk...
" Kalo jalan bareng gini, gua jadi inget pelem si buta dari gua hantu brik..." kata bang Pendi.
" Si buta yang mana Pen ? kayaknye gua belon pernah nonton.."
" Itu pelem eksen, si buta ame sahabatnye jadi jagoan. Nah gue jadi si butanye..."
" Wah..gue jadi sahabatnye dong !? tapi die kagak buta juga kan Pen...?" tanya si Jabrik rade seneng.
" Enggak sih...cuman die demen ( suka ) banget ama pisang " jawab bang Pendi
" Pisang ? wah..kayak monyet aja..."
" Emang monyet brik...!!" bang Pendi cekakakan, si Jabrik ngedumel...

Karena si Jabrik bawa vespanye rade kenceng, pas ade gajlukan ( polisi bobo..he..he) bang Pendi yang lagi cekikikan sendiri ngetawain si Jabrik tiba-tiba kaget dan langsung jatoh...gabruuuuuukkk !! pantatnye dengan sukses mencium aspal..he..he.
" Brik...brik...brik...!! " tereak bang Pendi serak sambil nyengar-nyengir nahan sakit pantatnye tapi si Jabrik kagak denger, die terus aje nyelonong ame vespanye. Orang-orang yang ngeliat bang Pendi jatoh pade ketawa ngakak, muka bang Pendi merah kayak tomat busuk nahan malu. Buru-buru bang Pendi nyetop angkot ( daripade terus diketawain he..he ). Akhirnye bang Pendi nyampe juga ke tokonye koh Achong walau jalannye agak ngegang ( kakinye kaga rapet ).
" Kenape lu Pen, jalan kayak gitu...lagi mens ? " tanya koh Achong sambil nahan-nahan tawa ngeliat jalan bang Pendi. Bang Pendi diem aje...
" Ah...sialan lu Pen, turun kagak bilang-bilang " Si Jabrik ngomel pas ngeliat bang Pendi dateng.
" Elu yang kutu kupret..!! orang gue nyusruk ditengah jalan, elu maen nyelonong aje. Nih...pantat gue ampe besut, brengsek lu..!!"
" Wah...pantes gua ajak ngomong elu diem aje, eh... taunye ngga ade orangnye alias nyusruk...!" Si Jabrik ketawa ngakak sambil megangin perutnye, koh Achong ikut-ikutan ngakak...bang Pendi manyun.

Senin, 22 Februari 2010

GARA-GARA JANDA BAHENOL

Ude dua hari ini babe ame enyaknye bang Pendi marahan ( kayak anak TK aje ye... marahan..he..he ), sampe-sampe tidurnye aje pisang ranjang. Bang Pendi sebenernye mikir.." Ngapain juga sih..pake pisah ranjang segala, lagian kalo tidur satu ranjang juga mao ngapain. Emangnye masih pade doyan ? he..he. Bang Pendi pantes ngedumel karena die yang jadi kena getahnye. Tempat tidurnye ditempatin babenye, terpaksa deh..die tidur dibale-bale depan rumah. Bang Pendi jadi kagak bise tidur gare-gare semaleman " maen pok ame-ame " sama nyamuk-nyamuk nakal...he..he

Semua gare-gare babenye juga, yang nekat ketawa-ketiwi ame jande bahenol pas kondangan kemaren. Ini rekaman pembicaraannya yang bang Pendi pinjem dari KPPN ( Komisi Pemantau Pria-Pria Nakal )..he..he.
" Eh..neng Encum, makin hari makin botoh ( montok ) aje nih..!" suara yang mirip babe Jupri.
" Ah..engkong bise aje.." suara dari Arthalita Encumi...he..he
" Wah..jangan panggil engkong dong, panggil aje abang...ye ! jangan liat fisik abang, gini-gini tiap malem tiga ronde..abang masih kuat..!" kate babe Jupri lagi. Neng Encum cekikikan, dalem ati die  mikir.." Yah...potongan ( perawakan ) kayak gini mah...ibarat naek gunung ! napasnye ade, naeknye kagak kuat. Kalo naeknya kuat...napasnye yang kagak ade...he..he. Neng Encum cekikikan lagi.
" Ah...engkong emang paling bise kalo ngomong, nanti enyak Asiah marah..loh " kate neng Encum sambil ketawa genit.
" Yah...si Asiah mah kagak usah dipikirin, lagian die mah ude kagak ngegigit lagi..." ujar babe sambil nyengir tapi die langsung pucet.
" Heh...apaan tuh yang ude kaga ngegigit, elu ngomongin gue ya ki...?" tiba-tiba nyak Asiah ngebentak dari belakang.
" Ah..kagaaaaak, gue kagak ngomongin elu.." babe Jupri ngeles
" Lha..tadi ngomongin apa, maksudlu ape...gue ude kagak ngegigit ?" tanya nyak Asiah sewot
" Iye..iye ! tapi gue cuman bilang ame si Encum kalo gigilu ude kagak kuat lagi ngegigit singkong mentah, kan keras tuh.." babe Jupri ngeles lagi.
" Alaaaa...jangankan cuma ngegigit. Dipapak ( kunyah ) ampe ancur kayak perkedel gue juga masih bisa. Pengen..lu !" bentak nyak Asiah lagi. Wakkk...! babe Jupri reflex megangin celananya...he..he.

Nah..gare-gare itu tuh, bang Pendi jadi molor didepan. Karena kurang tidur makanye gini hari die belon bangun, babe Jupri yang bangun duluan cuman geleng-geleng kepale liat bang Pendi tapi die kagak mao bangunin karena kesian juga ngeliat anak semata wayangnye tidue ngelingker kayak uler. Terus babe Jupri nyabutin rumput di depan rumah sambil ngarepin bininye udahan ngambeknye, karena sengsara juga kagak ade yang nyiapin sarapan ame bikinin die kopi. Sekonyong-konyong dan tiba-tiba, neng Encum si jande bahenol lewat depan rumah. Wah..kebetulan nih..! pikir babe, karena tadi die liat pintu kamar bininye masih dikonci. Paling-paling bininye masih bobo...
" Eh...neng Encum mao kemane ? pagi-pagi ude harum bener kayak duren baru mateng..." Jiaaaah...!! bise aje basa-basinye si babe.
" Oh...engkong ! aye mao kepasar kong..."
" Ye...si eneng manggil abang engkong lagi sih ! eh...abang anterin ye...!? ( neng Encum mao ngejawab tapi babe Jupri ude tereak ) Pen...Pen...bangun Pen ! keluarin motor honda Tiger babe...koncinye ade diatas kulkas yang lima pintu ( busyeeet...kayak kontrakan aje tuh kulkas, sampe lima pintu..he..he ). Kalo nggak ade...elu cari diatas home teather yang kemaren baru beli...!!" Babe Jupri nyombong,  nyebutin barang-barang yang sebenernye die kagak punye. Maksudnye cuman agar si Encum mikir kalo die punye banyak duit, lagian die tau pasti basa-basinye pasti dijawab " nggak usah.."
" Ah...ngga usah kong ! aye jalan sendiri aje..." nah bener kan tebakan babe Jupri...he..he.
" Ya sudah kalo ngga mao dianter, tapi ngobrol dulu ye...bentaran " bujuk babe Jupri. Bang Pendi yang tadi denger babenye tereak jadi bangun, sambil kucek-kucek hotae...eh.. kucek-kucek mata he..he...die liat babenye lagi ngobrol ame cewe botoh di depan rumah..." Haaaah...dasar aki-aki ! ude bau tanah juga...pagi-pagi brani-braninye nyari perkara. Dasar kadal buntung....!!" bang Pendi ngedumel, terus masuk kedalem rumah. Nggak lame...
" Oooooh....jadi gitu ye...!! roman-romannye ( kelihatannya ) elu belon kapok juga ye..., masih mao ngajak ribut...!!" tereak nyak Asiah dari depan pintu. Neng Encum langsung ambil langkah seratus...eh kurang ! langkah seribu maksudnye..he..he, ninggalin babe Jupri yang lagi ribut mulut ame bininye. Abis berbalas pantun...nyak Asiah ninggalin babe sambil pasang muka sewot lalu masuk rumah. Nggak lame bang Pendi keluar rumah sambil sial-siul...
" Eh...elu mao kemane Pen...!?" tanya babe Jupri.
" Mao nyarap ( sarapan ) ame ngupi di warungnye mpok Mumun ! " jawab bang Pendi.
" Wah...banyak duit lu, punye duit darimana..lu !?" tanya babe lagi
" Dari enyak...barusan dikasih.."
" Ooooh...jadi elu yang tadi ngadu ame enyaklu ye...awas lu..!!!?" tereak babe Jupri sewot sambil nyari-nyari kayu pentungan. Ngeliat gitu...bang Pendi langsung ngibrit... Enyaaaaaaaakkkkk...!!!!

Gbr : rujakmanis.com


Kamis, 18 Februari 2010

TAG.. ALA BANG PENDI

Pertama ngeliat tag semacam ini pas lagi bw ke blog temen-temen, bang Pendi rade-rade keder dikit kalo kebagian ( eh...kebagian juga ). Kalo disuruh nyebutin makanan yang ade di warungnye mpok Mumun mungkin rade gampangan nyebutinnye...A - Apem, B - Bir pletok, C - Combro, D - Disang goreng ( pisang goreng maksudnye...he..he jauh amat ya plesetannye..).

Nah yang ini tag for soul..aye rade ribet nih ngisinye, mao pake bahasa Inggris..bang Pendi taunye cuman " Ay Lap Yu " he..he. Mao pake bahase Belande takut diomelin ame Si Pitung " Belagu amat sih lu, pake bahasenye kompeni segala, lame-lame gue timpe ( hajar ) lu...!" Waakkk...bang Pendi mao di timpe...timpe goreng ape timpe bacem ( eh...itu mah tempe ya..? he..he )

Lagian bang Pendi juga sakit hati ame ntu kompeni, waktu ntu ketemu ame meneer Van Basten...eh si meneer malah bilang " Verdomseh...!! koe inlander-inlander cuma bisa makan ubi dan kentut.." Bussraaaaak dah ! emangnye kentut cuman karena makan ubi doang..he..he . kurang ajar nggak tuh..! yang paling sebel pas waktu kecil sering nonton film-filmnye Si Pitung, nah bang Pendi sebel bin empet pas ngeliat adegan kompeni-kompeni pade merkose perawan-perawan kampung. Abis ntu kompeni kagak ngajak-ngajak...!! he..he ( Pleetaaakkkk...!! hadoooh...perasaan banyak yang jitakin kepale bang Pendi nih...he..he )

Ude ah...bang Pendi emang suka basa-basi kalo mao ngapa-ngapain. Nah ini tag food for soul dari bang Richo. Isinye rade-rade ngaco dikit tapi moga-moga aje kagak ngecewain yang ngetag ame yang baca...

A-nggap saja sebuah pengalaman itu sebagai guru agar di kemudian hari segala sesuatunya bisa lebih baik lagi.
B-erusaha semaksimal mungkin dan berikan yang terbaik dari diri kita
C-epat selesaikan satu masalah dan jangan biarkan masalah-masalah itu jadi bertumpuk
D-imulai dengan niat yang tulus dalam setiap akan melakukan sesuatu
E-tika dalam pergaulan tidak boleh diabaikan
F-alsafah padi, semakin berisi semakin merunduk harus jadi sikap dan pandangan hidup
G-unakan segala ilmu yang dimiliki untuk berbuat kebaikan
H-idup ini terlalu singkat jadi isilah hidup ini dengan melakukan sesuatu yang berguna
I-lmu yang kita miliki akan semakin berguna bila kita bisa berbagi dengan orang lain
J-auhkan segala sifat iri dan dengki hati dari diri kita
K-omunikasi itu penting, baik dalam lingkup keluarga, lingkungan tempat tinggal maupun lingkungan kerja
L-upakan semua kesalahan yang terjadi di masa lalu, anggaplah itu sebagai pembelajaran
M-usyawarah dan mufakat dalam setiap menyelesaikan masalah
N-iat yang baik akan menghasilkan sesuatu yang baik pula
O-rang yang tidak mempunyai imajinasi bagaikan tak punya sayap untuk terbang tinggi
P-rioritaskan hal-hal yang lebih penting untuk diselesaikan terlebih dahulu
Q-aidah-qaidah agama harus dipahami dan dihayati agar dapat berperan lebih baik dalam kehidupan bermasyarakat dan bernegara
R-asa tinggi hati dan sifat sombong akan menjatuhkan seseorang
S-emakin sukses seseorang semakin besar pula cobaan yang akan datang
T-abah dan tawakal dalam menghadapi setiap masalah dan cobaan
U-ntuk mendapatkan hasil yang maksimal hanya bisa dicapai dengan usaha yang maksimal pula
V-andalisme atau tindakan merusak properti milik umum atau pribadi adalah sifat yang seharusnya dijauhi dari dalam diri kita
W-ariskan sifat-sifat rendah hati serta jujur kepada anak-cucu
X-tra hati-hati dan waspada terhadap segala bentuk bujuk rayu bang Pendi setan
Y-akinkan diri kita bahwa apapun bisa kita lakukan bila kita mau berusaha
Z-orro memang cuma legenda  tapi kepeduliannya terhadap orang-orang miskin dan tak punya patut kita tiru.

Nah..selesai deh...tag food for soulnye, sumpah ini ngisi sendiri jadi kagak ade acara ngeliat tag yang ude temen-temen isi tapi bila ada kesamaan nama serta tempat itu hanya kebetulan saja...he..he kayak sinetron aje Oh...ya bang Pendi sekalian mao posting award dari Kebookyut, walau award ini sudah pernah saya posting di hanya ilusi tapi kembali saya pajang untuk menghargai Keboo yang ude cape-cape ngirim. Lagian bang Pendi takut die ngambek...nanti kalo lebaran die nggak mao dipotong, kan repot...he..he. Ini die awardnye...!!

 

OK DEH...GITU AJE DULU, SALAM HANGAT DAN SUKSES SELALU DARI BANG PENDI BUAT SELURUH SAHABAT

Senin, 15 Februari 2010

OBROLAN DI WARUNG KOPI ( 15 )

Sebenernye bang Pendi rade-rade males posting tulisan ini, soalnye kagak jelas ngomongin ape ! tapi mao ngomongin politik juga ude males....bang Pendi ude kagak tau deh, mane yang bener..mane yang salah. Pak Antasari ude dihukum 18 tahun penjare ( ude sesuai ape belon ? bang Pendi kagak ngerti ), ngomongin soal Century juga ude capek...kagak selesai-selesai. Ditambah lagi ribut-ribut antara Demokrat dengan Golkar...haaaaah ! makin puyeng aje ni kepale...

Si Jabrik          :  Bikinin kopi mpok ! ( pas baru masuk warung )  Eh...si Pendi kemane mpok, kok belon keliatan ?

Mpok Mumun :  Yah...si Pendi elu tanyain, paling-paling die masih molor...pagi-pagi gini. Lagian ngapain, emangnye elu mao valentinan ame die ? ( tanya mpok Mumun cekikikan sambil bikin kopi )

Si Jabrik         :  Jiaaaah..valentinan !! itu mah buat anak-anak mude yang punye duit, aye mah boro-boro mikir gituan. Aye mao ngajak si Pendi mancing ! mumpung engkoh Achong masih libur...

Mpok Mumun : Eh...elu salah brik ! modal mah kagak penting, yang penting..gimane caranye ngungkapin kasih sayang. Tapi ade benernye juge brik ! elu kagak usah ikut-ikutan dah...soalnye banyak yang salah kaprah. Gue denger...malah banyak pasangan anak mude yang pade ngamar di hotel-hotel pas malem valentine...

Bang Pendi    :  Jangankan anak mude mpok, anak-anak SD disini aje...ude pade belajar ngamar tuh ! ( baru dateng langsung motong obrolan si Jabrik ame mpok Mumun sambil nyamber pisang goreng )

Si Jabrik        :  Ah...yang bener lu Pen ? ( si Jabrik penasaran, mpok Mumun juga )

Bang Pendi    :  Yah...elu ngga percaya amat sih brik ! ponakan gue aje yang baru 2 tahun ude pinter. Ngamar binaaa..taaang.. ! ngamar...pemaaan...dangaaaaan..! ( bang Pendi niruin orang bindeng ato yang sulit ngomong, si Jabrik langsung ngakak sedang mpok Mumun gondok )

Mpok Mumun  :  Brengsek lu Pen ! lame-lame gua siram kopi lu... ( ujar mpok Mumun dongkol sambil ngangkat gelas )

Bang Pendi     :  Eiiit...ngga usah repot-repot mpok ! mpok Mumun taroh aje kopi di gelas, nanti aye yang nyiram sendiri ( bang Pendi ame si Jabrik cekakakan , mpok Mumun makin dongkol ). Lagian repot-repot amat sih mpok...mikirin anak-anak mude yang kayak gitu, suka-suka die dong ! mao ngamar ape kagak...die pade sendiri yang bayar, enak ape nggak enaknye..die juge yang pade ngerasain ! masa ..die-die pade yang masuk kamar yang ngerasain enaknye si Jabrik, kagak mungkin kan...!? ( bang Pendi cekakakan lagi, si Jabrik celingak-celinguk...die kagak ngarti namanye dibawa-bawa )

Si Jabrik         :  Maksudnye apaan sih Pen ? gua kagak ngarti....( pasang muka oon bin oneng )

Bang Pendi     :  Oh...ntu maksudnye, anak-anak mude pade capek...keringetan pas ngerayain valentin. Kalo elu kan enak, nongkrong disini...ngupi ! kagak pake keringetan...( Si Jabrik manggut-manggut aje kayak ngerti, bang Pendi hampir keselek singkong nahan-nahan tawa. Mpok Mumun juga jadi cekikikan sendiri.. " pantesss... si Pendi seneng banget punye temen si Jabrik, ntu anak oon banget..jadi gampang dikadalin " )

Si Jabrik         :  Ya..udah ! sekarang jadi mancing nggak Pen..? gue ude bawa pancingan tuh...( sambil nunjukin pancingannye )

Bang Pendi     :   Mancing ? elu bawa empan ( umpan ) apaan brik.?

Si Jabrik         :   Cacing...emang kenape ?

Bang Pendi     :  Yah..ude kagak jamannye brik, mancing pake empan cacing. Lama dapetnye..! Elu bawa cebanan berapa...? ( sambil ngeliat kantongnye si Jabrik )

Mpok Mumun :  Heh...heh...anak orang elu kadalin mulu Pen..! kuwalat lu...( mpok Mumun nggak tega ngeliat si Jabrik dibohongin si Pendi )

Bang Pendi     :  Yah..mpok ! kalo buaye..aye emang keder ( ngeri ) dah..ngadalinnye, tapi die mah cuman anak kodok jadi nggak apa-apa di kadalin ( bang Pendi ame mpok Mumun cekakakan, si Jabrik sebenernye masih bingung tapi ngeliat pede ketawa...die ikut-ikutan ketawa. Bang Pendi makin cekakakan ).

Nah...kagak jelas kan ngomongin apaan !! tapi bang Pendi mohon maaf nih...karena emang suka negatif thinking kalo ade pasangan yang masuk kamar, padahal kan belon tentu juga ngapa-ngapain ! siapa tahu aje mereka berdua cuma mao maen catur, siape tau juge...mereka keringetan karna capek ngangkat-ngangkat benteng ame kuda. Ye nggak...!! he..he..he

Selasa, 09 Februari 2010

LAMUNAN BANG PENDI

Sore menjelang maghrib bang Pendi lagi duduk di bale-bale bambu depan rumah, babe ame enyaknye belon juge pulang dari kondangan. Die duduk melamun sambil tutupan kain sarung untuk hilangin rasa dingin karena pas lagi turun hujan. Die sampe terhanyut oleh nyanyian rintik hujan...halaaaah..terhanyut ! die jadi keingetan ame sendal jepit yang anyut pas ujan deres kemaren. Die jadi sedih banget karena sendal jepit itu banyak nyimpen kenangan ( sendal itu adalah sendal pertama dan terakhir yang die embat pas taraweh bulan puase yang lalu..he..he )

Die sebenernye kagak nyalahin ujan hingga sendal jepitnye anyut, karena die pikir segala sesuatunye pasti ade tahapan proses. Waktu itu sendalnye die taroh dipinggir got depan rumah lalu turun hujan, hujannye deres terus sendalnye kebawa..lalu ilang. nah itu prosesnye. Sama juge kalo mao bikin tape...bikin kue..bikin anak..he..he semue ade prosesnye. Bikin anak ? ( maaf..bukan bermaksud jorok ) tapi seperti yang laen itupun ade prosesnye. Setau bang Pendi prosesnye seperti ini, pertama ketemu...haiiii...! kedua kenalan...lalu pacaran...terus lamaran...terus..ning...nang...ning...gung ! ning...nang...ning..gung ! maksudnye acara hajatan. Nah...terus masuk kamar...masak ! terus baru tahun depan ( kalo bumbunye mantep ame rajin ngaduknye he..he ) baru deh jadi masakannye..eh..jadi anaknye. 

Lha...kalo sekarang mah kagak ! anak muda sekarang ude pade pinter-pinter, tempo-tempo bang Pendi liat..baru juge semalem ntu pasangan anak muda pengantenan...besok paginye ude hamil 3 bulan..ck..ck..ck...hebat...hebat ! kagak pake tahapan proses kayak tadi...paling mereka bilang ( halaaaah...kelamaan ! ayo....!! he..he...) maen ayo aje ntu anak, yang diajak juge manggut  aje...ya...ya...ya ! kagak pake malu-malu kebo. Barangkali mereka takut nyesel, abis bang Somad pernah bilang " Gue nyesel Pen...kawin sekarang ! kalo gue tau enak...kenape kagak dari dulu-dulu aje gue kawin..." he..he. Haaaahhh...jadi ngelantur nih ngomongnye...

Bang Pendi ngelamun juge mikirin kerjaan,  pas mao acara hari Imlek...koh Achong kagak dagang seminggu penuh. Nah...bang Pendi kan..jadi nganggur lagi, die lagi mikir...enaknye usaha apa ya ? biar die punye duit. Kalo masih di jaman engkongnye sih enak, anak-anak mudanye kalo pacaran belon ade mall atawe bioskop 21. Mereka cukup besukaan dibawah pohon sambil nyari kutu. Engkongnye dulu punye usaha beternak kutu...modalnye kecil....meliharanye juga gampang. Tinggal beli kutu sepasang...taroh di kepale...terus kagak usah mandi ame keramas tujuh hari tujuh malem...nah...hari ketujuh ntu kutu bise deh dipanen he..he. Setiap anak mude yang mao pacaran...pasti pesen kutu dulu ame engkong. Enkong cuman pesen ame yang mao pacaran...
" elu-elu jangan pade pacaran di bawah pohon duren yang deket pos ronde, bise-bise elu pade semaput nanti.." kate engkong.
" Lha...emangnye ntu pohon ade penunggunye ya kong..?"
" Ya...kagak ! cuman ntu pohon lagi bebuah...elu pengen lagi enak-enak besukaan terus ketiban duren..!?"
" Eh...iya...ya..!" ( yang beli kutu pade ngakak )
Nah...itu dulu ! sekarang mane bise bang Pendi jualan kutu....bise juga kutu yang jualan bang Pendi...he...he. Udah dulu ah...tulisan sarapnya, takut keterusan jadi sarap. Bang Pendi mao ngucapin selamat ngerayain Imlek buat yang merayakannya walo masih 5 hari lagi, takut ade yang duluin...he..he

Sabtu, 06 Februari 2010

ANTARA BROERY & VINA PANDUWINATA

Semalem bang Pendi maen kerumah encingnye ( bibi ), abis di rumah sepi banget...babe ame enyaknye lagi pegi kondangan kerumah sodare di Tanggerang. Mao nonton tv bosen...abis kebanyakan iklannye, nonton sinetron die rada-rada empet abis ade makhluk ruang angkasa ngomongnya rada aneh..." Preketek...preketek wowotek mautek kemanatek ? wowotek...maotek..beraktek.." he..he. Mao maen play station ( maen di stasiun ) dia males, cape...abis stasiunnye jauh.

Nah kalo di rumah encingnye die bise numpang ngupi sambil maen ame ponakannye yang lucu dan imut-imut tapi cerewet kayak emaknye. Bang Pendi bilang cerewet karena kalau die maen, udah deh..bang Pendi berasa kayak artis. Abis ponakannye nanya mulu kayak wartawan infotaimen, kayak semalem pas encingnye nyetel lagu-lagu lame. Kagak tau dah itu lagu era tahun 80an ape 90an, nah pas Broery nyanyi..ponakannye yang sedari tadi lendotan aje ( bermanja-manja ) langsung nanye..
" Cang...! boleh tanya nggak..?" tanya ponakannye
" Yaaah..jangan panggil encang dong non ! masak ganteng-ganteng kayak sekuteng gini di pangil encang, panggil Om..dong " protes bang Pendi
" Ah..Rara nggak mau ! abis muka encang Pendi ngga cocok di panggil Om, kagak mecing ( serasi )..!! " jawab ponakannye. ( " Busyeeet...! ni ponakan kurang ajar juga, muka gue dibilang kagak mecing .." bang Pendi ngedumel sendiri )
" Iya deh..terserah mao panggil ape. Eh..tadi mao tanye ape ?"
" Mao tanya lagu itu, kok katanya...semangka kok daunnya..daun sirih. Emangnya ada cang...?" Bang Pendi kaget.." Haaah...emang ngada-ngada aje nih yang bikin lagu, gua jadi keder ( bingung ) nih jawabnye " bang Pendi ngedumel lagi.
" Oh..waktu itu Om Broery nanem semangkanye deket pohon sirih. Pohon semangkanye pas gede jadi nyampur deh..." jawab bang Pendi asal
" Ooooh gitu !! tapi rasa semangkanya kayak apa ya cang..?"
" Ya..ngga tau deh, pahit kayak sirih..mungkin !"
" Wah..ngga enak dong, Rara ngga mau ah..makan semangkanya Om Broery "
" Iyaaa..karena banyak yang engga doyan, makanya Om Broery ngga jadi penjual semangka...terus dia jadi penyanyi deh.." Ponakannye langsung diem, kayaknye die percaya ame ngomongannye bang Pendi. Bang Pendi sendiri sebenarnye nahan-nahan tawa karena jawabannye tadi. Ponakannye masuk kedalem tapi pas lagunye Vina Panduwinata die balik lagi sambil makan es krim, bang Pendi jadi ngiler...

" Rara bingung lagi nih cang..!, coba deh baca..." tanya ponakannye sambil ngacungin tiga jari didepan mukanye bang Pendi.
" Baca apaan maksudnye..? ngga ade tulisannye kok.." bang Pendi bingung
" Yang ini..." kata ponakannye lagi sambil nunjukin jarinye.
" Oooh..maksudnye dihitung kali...bukan dibaca ! nih..encang hitung...satu...dua...tiga "
" Iya..encang bener, tapi dilagu itu kok dibaca...bukan dihitung. Coba deh dengerin..." Pinta si ponakan, bang Pendi coba dengerin baik-baik lagunya tante Vina itu. Nih..potongan lagunye...

Sepucuk surat yang manis
Warnanyapun merah hati
Bagai bingkisan pertama
Tak sabar ku..buka
Satu..dua..dan tiga
Ku mulai membaca...

Bang Pendi langsung ngakak pas die ngerti maksud ponakannye. " Haaah..memang payah juga nih tante Vina, emang mestinye..1...2...3 itu dihitung dan bukannye di baca...!" he..he..he..bang Pendi jadi ketularan Oon. " Ini gara-gara jarang ade pencipta lagu anak-anak nih..! jadinye si Rara lebih sering dengerin lagu-lagu orang dewasa " bang Pendi jadi ngedumel sendiri. 

Jumat, 05 Februari 2010

AURA KASIH & IKAN ASIN

Pagi ini cuaca mendung, langit gelap banget dan rintik-rintik hujan mulai turun. Ya...cuaca kayaknya kurang bersahabat pagi ini, tapi tidak buat bang Pendi yang pagi ini begitu ceria. Rintik-rintik hujan bagi dia bagaikan suara air di pancuran saat die menyepi di Parung Kuda Sukabumi ( waktu ngambek..kagak boleh netek lagi sama emaknye..he..he), terus cuaca yang mendung & gelap dianggapnya langit penuh dengan warna pelangi ( emang rada-rada buta warna die..)

Semua ade sebabnye, pertama...pagi ini die beruntung banget bise pake mobil kijang Innovanya engkoh Achong, biasanye die pake kijang bak terbuka butut yang kalo ngidupinnya mesti didorong 5 km dulu baru hidup ( seringkali mesin belum hidup tapi ude nyampe duluan ketempat tujuan..he..he ). Nah...yang kedua dan yang bikin dadanye berdebar-debar dari tadi, die disuruh koh Achong nganterin ikan asin ke rumahnye Aura Kasih ( baru tau khan kalo Aura Kasih doyan ikan asin  !? he..he ).  Tapi emang ikan asin milik koh Achong lain daripade yang lain, rasanya tak bisa diungkapkan dengan kata-kata. Bikinnyapun pake resep rahasia warisan leluhur, ngasinin ikannye kagak pake garem tapi campuran upil dari gadis-gadis perawan. Yang sudah kawin apelagi janda kagak boleh ! ( eh..apa bedanya ye ? perawan atau ngga perawan yang namanye upil itu asin, tapi ngga tau juga sih...abis belon nyobain..he..he ). 

Berangkat deh bang Pendi ame si Jabrik, Nah..sampai di depan pintu gerbang rumah Aura Kasih.. bang Pendi nyuruh si Jabrik turun, die celingak-celinguk, abis pintu gerbangnye rapet dan ketutup...lalu ucapin salam Assalamualaikum, kulonuwun sampe sampurasun kagak ade yang jawab tapi pas die bilang " anybody home.." baru deh kedengeran suara ...guk..guk..guk !! rupanya abangnye si Jabrik yang jawab..he..he. Tiba-tiba pintu gerbang kebuka sendiri, dengkul si Jabrik langsung gemeter " set...set..setaaaaann !!" die langsung ibrit balik lagi ke mobil.
" Heh...kenape lu brik..!?" tanya bang Pendi heran
" Mendingan kite balik lagi dah Pen, rumah ntu ade setannye...pintu gerbangnye aje ke buka sendiri "
" Setan apaan...siang-siang begini !? lagian kalo  ada, ntu setan juga bakalan ngacir duluan liat mukalu..." kata bang Pendi sambil cekakakan. " Tuh liat..yang bukain gerbangnye " sambil nunjuk mbok Darmi pembantunya Aura Kasih, si Jabrik nyengar-nyengir onta.
" Mau cari siapa ya pak..?" tanya si mbok
" Ini bu...saya mao nganter ikan asin pesenannye non Aura.." jawab bang Pendi sambil nunjuk ke arah si Jabrik.
" Eaaalahh...ikan asine ijek urip tho..., ya sudah mari masuk..." kata si mbok sambil cekikikan, si Jabrik manyun.
" Iya mbok...tinggal di getok terus kasih garem " kata bang Pendi lagi sambil cekakakan, si Jabrik makin manyun aje.
" Oh..iya mbok, ibu ada..? " tanya bang Pendi pas duduk diruang tamu.
" Lagi keramas.." jawab si mbok
" Kalo bapak, ada..?
" Lagi keramas.." ( bang Pendi ame si Jabrik saling berpandangan lalu cekakakan, perasaan kayak iklan shampo di tipi...pikir mereka. Tapi bisa juga, karena ini hari Jum'at...barangkali semalam sunnah...he...he )

Nggak lama Aura Kasih nongol, seperti biasa..pakaiannye seksi abis. Dada bang Pendi ame si Jabrik langsung dag..dig..dug..derr, mulutnya bang Pendi mangap ( terbuka ) dan air liurnye si Jabrik netes-netes..
" Kalian siapa, ada perlu apa.." tanya Aura Kasih
" Eh..ini non, saya disuruh koh Achong buat nganterin ikan asin. Kenalin... Pendi Van Halen dan temen saya Jabrik Van ci Gosong " Ujar bang Pendi sambil cengengesan, Aura Kasih cekikikan ngedengernye.
" Aiiih...terima kasih, kalian baik banget. Tapi maaf ya saya ngga bisa menemani kalian lama-lama,saya mau shooting. Nah...sebagai ucapan terimakasih saya mau kasih hadiah ciuman...mau nggak ? ( wakk...siapa yang ngga mau, bang Pendi ame si Jabrik sampe nelen ludah ). " Eh...kok bengong, siapa duluan. nih..?" tanya non Aura lagi. Bang Pendi ame si Jabrik langsung berebutan dan maen tarik-tarikan baju. Tapi tiba-tiba...
" Pen....Pendi....Peeeennnn...!!" itu suara enyaknye Pendi, " Set..dah ! ngapain sih enyak kesini-sini.." tanya bang Pendi. Si Jabrik juga sempet bengong tapi kemudian mereka maen tarik-tarikan baju lagi berebut dicium Aura. " Pennn...Pendiiiii.!!!" tereak enyaknye lagi, tapi bang Pendi cuek...die terus berebut sampe akhirnye kepale bang Pendi ame si Jabrik beradu....bleeetak..Juueeegerrrr...!! bang Pendi ngusap-ngusap kepalanye...
" Nah...rasain deh tuh..!! lagian siang-siang molor mulu kerjaanlu.." Enyaknye bang Pendi nyap-nyap, bang Pendi meringis kesakitan karena kejedot bangku pas jatoh dari tempat tidur.
" Haaaahh...enyak ! kagak boleh orang seneng aje, padahal dikit lagi bise nyium Aura kasih...jadi batal dah "
" Aura Kasih palelu benjut..( emang benjut..he..he ). Ude sono..kedapur cuciin ikan asin ! bang Pendi langsung ngakak denger ikan asin..." Ternyate Aura Kasihnye ude berubah jadi peot dan ompong ..." pikir bang Pendi sambil ngeliaten muka enyaknye lalu ketawa lagi sambil guling-guling.

Senin, 01 Februari 2010

CURHAT BANG PENDI

Beneran...! sumpah..! berani dicium Aura Kasih dah..kalau bohong ( he..he..he ). Kali ini bang Pendi lagi mumet, boro-boro ( jangankan ) bikin orang ketawa...nyenengin ati aja ngga bisa...nyengir aja susah. Otak terasa beku, kagak punya jalan keluar...buntu ! Mao curhat... bingung mao curhat ame siape, satu-satunya temen deket cuman si Jabrik tapi daripada uneg-uneg kagak keluar terpaksa dah ngomong juga sama si Jabrik.
" Gua punya masalah nih brik...!!" kate bang Pendi pada suatu sore yang indah di pinggir empang ( kolam ikan ), disaat beberapa warga antri masuk jamban untuk buang hajat ( apanya yang indah...? he..he )
" Masalah apaan..? " tanya si Jabrik sambil ngeganyem singkong bakar hasil ngembat di kebonnye engkong Jupri. Bang Pendi lalu cerita Panjang x Lebar x Tinggi ( he..he kayak mao bikin kandang ayam aje..), maksudnye panjang lebar. Si Jabrik brenti makan singkongnye lalu sok serius dengerin bang Pendi cerite, sekali-kali die manggut-manggut sambil ngelus-ngelus bulu keteknye ( abis..mao ngelus jenggot die kagak punya..he..he ).
" Nah..gitu brik, elu ngerti kagak...!?" kate bang Pendi pas selese cerita
" Ya..ngerti dong Pen, masak gitu aje kagak ngerti.." balas si Jabrik
" Terus jalan keluarnye gimane...?" tanya bang Pendi lagi
" Ya..tergantung ! elu lagi ade dimane. Kalo elu lagi didalam rumah..jalan keluarnye ya pintu, kalo elu lagi didalem goa...keluarnye ya lewat lobang..."
" Ah...brengsek lu Brik , kalo gitu mah..engkong ( kakek ) gua juga tau...! gua kirain..tadi manggut-manggut, elu ngerti..."
" Gua ngerti Pen, cuman jalan keluarnye yang gua kagak tau...eh..tapi sebentar...sebentar ( si Jabrik keliatan mikir )...Ahhaaa...!! elu tanya si Dora aje Pen, dia kan punya Peta ! " bila kau mencari tempat...akulah yang paling tepat...aku peta ! aku peta...aku peta...aku peta...aku peeetaaaa...!!" ( si Jabrik nyanyiin lagunya Dora, kesenangan ponakannye ). Pleeetakkk...!! tiba-tiba kepale si Jabrik kena jitak. Bang Pendi tambah kesel bin senewen denger ocehannye si Jabrik, bang Pendipun ngeloyor pergi ninggalin si Jabrik yang lagi meringis kesakitan.

Ya sudah..daripade terus-terusan senewen, bang Pendi mao pajang award aja deh...dari sahabat-sahabat yang sudah berbaik hati mengirimkan operan bola award pada saya. Tapi maaf ya...buat Non Lina, Non Isna, Non Minomino dan Bang Richo...PR-nya kagak di kerjain dan cuma bisa pajang awardnye doang, abis ude mumet duluan...he..he.
Nah...ini award-awardnye....

1.  Award dari Non Lina                  2.  Award dari Non Isna


3. Award dari Bang Richo & Non Minomino                                        

                                     

Terimakasih sekali lagi buat sahabat-sahabat yang sudah memberikan award dan sudah berkunjung di rumahnye bang Pendi, semoga bang Pendi tambah semangat cari Janda...eh...cari inspirasi untuk sebuah tulisan..he..he. Bagi sahabat yang belum memiliki award diatas silahkan dicomot....