MASIH TENTANG REVIEW

Sebenernye ini bukan sambungan review kemaren, tapi cuman mao ngasi tau mba Fanny buku novel ape yang bang Pendi pengen. Abis...mba Fanny bise aje, kehamilan bang Pendi eh...repiunye bang Pendi mao digugurin atawe mao didiskualifikasi ( kayak lomba balap karung aje ade diskualifikasi...he...he ). Ya...terpaksa deh...mao ngga tapi mao postingnye nambah.....

Padahal seperti bang Pendi bilang kemaren.. " keinginan " dapet novelnye ude bang Pendi buang ke empang...nah sekarang keinginan itu kudu bang Pendi cari lagi dah..!. Mane bang Pendi lupa lagi empang yang mane, soalnye empangnye banyak. Masak bang Pendi kudu ngubek-ngubek semua...!? Eh... tapi bang Pendi inget, waktu ntu die buangnye pas lagi ngebom di jamban..( nah...ngebom yang ini laen, kalo di Irak yang dibom pade lari kocar-kacir...kalo yang ini di bom malah pade nyamperin. Malah..pas bang Pendi brenti ngebomnye dari bawah ade yang tereak...." Suiit...suiit...lagi dong ! lagiiii...!! " sambil goyang-goyangin ntu jamban. Bang Pendi jadi berasa kayak artis diatas panggung..he..he )

Nah...bang Pendi cari-cari deh empang yang ade jambannye, tapi pas ude ketemu...die lupa ke sebelah mane buangnye. Bang Pendi juga ragu-ragu mao turun ke empang, bukannye die jijik karena empangnye kotor atawe ade jambannye...die cuman takut ame lele ! bukan ape-ape....biasanye kalo bang Pendi turun ke empang, pan ikan pade lari ngumpet...nah kalo lele kagak !! apelagi kalo bang Pendi cuman pake kolor atawe celana boxer. Nah...ntu lele pade berebut nyenggal-nyenggol. Pan...geli-geli gimana gitu....!he..he. Kalo nyenggal-nyenggol doang sih ngga ape-ape, bang Pendi pikir.." paling juga lele-lele itu ikan lele cewe yang genit ". Yang bang Pendi takutin kalo ikan lelenya ...lele cowo ! lha...kalo ngajak berantem gimane...!? bise berabe....he..he

Akhirnye bang Pendi turun juga ke empang tapi sambil getok-getok aernye pake kayu biar lelenye ngga pade nyamperin. Tapi baru aje turun...tiba-tiba ade yang tereak dari jamban...

" Heh...ngapain lu Pen disitu !? mao ngintip gue ya..." tereak mpok Saodah dari jamban. Bang Pendi kaget, die kagak tau kalo ade orang disitu.." set dah...sembarangan aje ngintip ! lagian ape enaknye ngintip orang lagi beol " pikir bang Pendi.

" Kagak mpok...kagak ngintip ! aye cuman mao cari kepengenan ( keinginan ) "

" Pengen ape...!? pengen gue lempar.........( sengaja dikasih titik-titik, soalnye nggak enak kalo yang baca lagi makan...he...he ), ape pengen palelu gue lelepin diluuuuuuum...puuuuuuur ! " mpok Saodah tereak-tereak sambil ngeden. " Nah...lo, ngeden-ngeden dah tuh ! makanye jangan kebanyakan makan jambu klutuk ( jambu biji ). Lagian lagi beol aje galak amat...!" bang Pendi ngedumel sambil cekikikan.

Akhirnye baru sore..." keinginan " itu ketemu. Abis...yang naek jamban pade ngantri, pake acara berebutan segala lagi. " Jiaaaah...naek jamban aje pake berebut ! kayak bocah pade berebut naek odong-odong aje..." pikir bang Pendi. Eh...tapi bang Pendi malah dapet ide.." Gimane kalo jambannye die ganti ame odong-odong ! kayaknye enak tuh...buang hajat sambil ajut-ajutan...he...he. Ngebom juga bise diiringin musik...." Lihat kebunku...Plung..!! penuh dengan bunga...Plung..plung..plung !! he..he..he ".

Hah...emang kebiasaan bang Pendi kalo mao ngutarain sesuatu pake acara muter-muter dulu..he..he. Nah..untuk mba Fanny, keinginan buat dapet novel ketemu nih...! awalnye sih kepengen novel " The girls of Riyadh ( Raja Al Sanea )" tapi kayaknye ude banyak yang minat. Bang Pendi ganti aja deh ame " My Stupid Boss ( Chaos@work )" kata mba Fanny pan ceritanye gokil, barangkali kalo baca cerita gokil...sarapnye bang Pendi bisa ilang atau malah makin sarap....!! ngga tau deh...he...he

Maaf...otak bang Pendi emang bener-bener lagi konslet ! kalo ade sohib yang kurang berkenan ame tulisan diatas...tolong kasih tau, kalimatnye langsung bang Pendi hapus. Salam hangat & sukses selalu.....