OBROLAN DI WARUNG KOPI ( 19 )

BULU AYAM....BULU TANGKIS

Si Jabrik    :   Wah...maen bulu tangkis, badan pade pegel-pegel juga ya Pen..! Pegelnye ampe ke pantat-pantat, jalan gue ampe ngegang kayak mentok nih...( kate si Jabrik sambil cengengesan sendiri )

Bang Pendi  :   Elu sih...maen grabag-grubug kayak nangkep ayam ! Orang mah...maen kayak gue, sekali-sekali maen kalem kayak pak SBY...maen dropshot atawe maen netting. Sekali-sekali boleh maen ganas atawe maen smes , tapi jangan asal smes...bise-bise kepala orang pade ilang  ( bales bang Pendi sambil ngeganyem pisang goreng )

Bang Mamat  :   Mangkanye Brik..! kalo maen bulutangkis jangan musiman kayak maen layangan. Orang-orang rame ngomongin bulutangkis, elu baru pade maen....nah besok rame piala dunia gue rasa elu bedue pade demen maen bola...

Bang Pendi   :   Abis kayaknye gemes bin geregetan bang, pemaen Indonesia kalah mulu !! Lagian kagak enak kalo cuma jadi penonton....aye juga takut..

Mpok Mumun  :   Lha....takut apaan Pen...!? ( tanye mpok Mumun keheranan )

Bang Pendi   :   Yah...mpok, kayak kaga tau aje ! kalo nonton pan kite ngeliatin kok ( shuttlecock ), kalo koknye kekiri kite nengok kekiri...kalo kekanan kite nengok kekanan. Lame-lame leher bise kecengklak...! ( keseleo ). Asal tau aje mpok...walo ngetopnye dari Inggris tapi sebenernye asal muasal bulutangkis itu pan dari India. Mpok pan tau...orang India kalo ngomong godek-godek gitu kayak wayang golek, nah...ntu gare-garenye kebanyakan nonton bulutangkis ( kate bang Pendi sambil cengar-cengir, semua pade ngakak ngedengernye )

Mpok Mumun  :   Bise aje lu Pen...! orang India ngomong kayak gitu emang ude dari sononye. Eh...ngomong-ngomong elu bedue maennye pake ape, masih pake potongan triplex..? ( tanye mpok Mumun sambil cekikikan )

Si Jabrik   :   Ye...sembarangan aje, pake triplex...! kite-kite ude punye raket sendiri mpok. Nih..kalo ngga percaye liat raket punye aye... (sambil ngeluarin raket dari tas )

Bang Mamat  :  Coba gue liat Brik...!! Jiaaaahhhh...mereknye kok Bonex !? bukannye Yonex Brik....( bang Mamat heran bercampur geli, bang Pendi cuman cengengesan aje )

Si Jabrik    :   Ntu laen bang...! kalo Yonex aslinye pan dari luar negri, nah..yang ni asli buatan Surabaya ( kate si Jabrik sambil nguyup kopinye )

Mpok Mumun  :   Jiaaahhh...kayak singkatan bondo nekat pendukung Persebaya dong ! ade-ade aje lu Brik...( cekikikan lagi )

Si Jabrik   :   Ya...bise aje mpok ! mungkin aje yang punye pabrik atawe karyawannye emang anak-anak mude pendukung Persebaya. Iye ngga Pen...!?

Bang Pendi   :   Iye...betul tuh mpok...! jangan sangke anak mude cuman bise bikin rusuh doang, anak mude juga bise kreatif dan inovatif. Kayak aye nih...bikin kok sendiri pake bulu-bulu ayam. Liat...kreatif pan...!? ( sambil cengar-cengir nunjukin kok yang bulu-bulunye item )

Babe Jupri   :   Kreatif palelu bau menyan...!!! nih...liat kerjaaanlu....ayam gue jadi pade bugil semua. Tanggung jawab lu...!! ( bentak babenye bang Pendi yang tiba-tiba nongol sambil nenteng-nenteng ayam yang lagi meringkuk malu...he..he. Bang Pendi langsung pucet, yang laen juga kaget. Kopi yang lagi diuyup bang Mamat langsung muncrat kena mukanye si Jabrik. Mpok Mumun langsung mendek atawe ngumpet  di belakang meja sambil nahan-nahan tawa ). Pulang...lu...!! bentak babe Jupri lagi sambil narik kupingnye bang Pendi.

Bang Pendi   :   Ampuuun...be ! ampuuuuuun.....( tereak bang Pendi sambil meringis-ringis, pas babe Jupri ude keluar dari warung semua pade ngakak. Si Jabrik ngekek sambil ngelap mukanye yang kena sembur kopi  )

Mpok Mumun  :   Ya...ude gantian aje be...!! cabutin aje tuh bulunye si Pendi ( tereak mpok Mumun dari dalem, bang Mamat ame si Jabrik ngakak lagi )

( Besok-besok orang Indonesia kalo bikin shuttlecock  jangan dari bulu ayam, nanti kalo maen keseringan...." Keok...! Keok....! Keok....!"  he..he..he )