TAK KENAL MAKA TAK SAYANG

Bang Pendi emang laen daripade yang laen, selain sarap die juga kepale batu. Orang-orang mah...kalo mao deketin cewe paling kagak baek-baekin juga babe ame enyaknye. Kalo ngapel...bawain duren kek...! martabak kek...! atawe apes-apesnye bawain kue cucur..he..he ( Eh..ngemeng-ngemeng kue cucur pade kemane ye..? perasaan ude lama kagak ketemu. Gimane ketemu kalo kagak beli...! he..he ). Nah...kalo bang Pendi mah..boro-boro bawain duren atawe martabak, kasih unjuk batang idungnye didepan enyak ame babenye neng Siti aje die ogah !. Kalo die mao ngajak besukaan neng Siti, die cuman kasih kode dari kebon pisang samping rumah.

Tempo-tempo die pake kode suare kucing..." meooooong..!!" suarenye bang Pendi tapi neng Siti belon nongol.  Yang kedua..." meoooooong...meoooong !! " neng Siti kagak nongol juga..." meooong...meooong...meoooong...!!!" lame-lame bang Pendi kesel juga, tapi tiba-tiba enyaknye neng Siti buka jendela dan langsung nyiram bang Pendi yang lagi ngumpet pake aer bekas cucian piring. " Brisik amat sih..lu cing ! sono jauhan maennye..." omel nyak Salmine. Terang aje bang Pendi langsung basah kuyup, padahal bang Pendi ude dandan abis-abisan. Badan ude pake minyak nyong-nyong punye babenye, tangannye juga ude wangi pake autan sachetan ( abis kagak punye henbodi, yang penting wangi...! he..he ). Akhirnye ntu malem, bang Pendi gagal besukaan ame neng Siti.

Minggu besoknye, bang Pendi ganti kode. Maklumlah bang Pendi ude lama begaul ame James Bodong...katenye sih ganti-ganti kode biar musuh kagak gampang ngelacak...he...he. Nah sekarang die pake suara burung kusidang...bukan kutilang ! ( kena tilangnye kemaren..sekarang giliran sidangnye...he...he ). Denger suara burung dari kebon, keponakannye neng Siti yang kebetulan lagi pade nginep...buru-buru ngambil selepetan ( ketapel ). Langsung aje ntu anak pade nyelepet kearah semak tempat bang Pendi ngumpet...Plettakkkkk..!! wadaaooooow...!! pekik bang Pendi kesakitan. " samber geledek ntu bocah...kepale gue maen selepet aje..., awas lu pade...bakalan gue pites-pitesin kayak kutu..!! bang Pendi nyumpah-nyumpah sambil ngacir dari situ. Nah...itu pengalamannye bang Pendi tapi tetep aje die kagak mao terang-terangan kalo mao ngapel neng Siti. Enakan gelap-gelapan katanye..he..he

" Eh...elu ude baekan Pen ame si Siti ?" tanye si Jabrik waktu die bedue manggul beras.

" Ude sih...die ude mao baekan, tapi sekarang die cuman mao diajak besukaan kalo bilang dulu ame enyak babenye. Kalo kagak begitu...die kagak mao " jawab bang Pendi.

" Lagian elu mao enaknye aje...! mao ame anaknye kagak ijin ame yang miara..( pelihara ) "

" Emangnye kucing brik...dipiara ! sebenernye gue kagak kayak gitu brik...gue juga ude dateng baek-baek. Tapi gue ude terlanjur empet...! apelagi enyaknye kalo ngeliat gue...kayak ngeliat Brad Pitt..he..he maksudnye bangke. Mukanye sepet mulu...mentang-mentang gue cuman kuli manggul beras, lagian bodo amat dah...gue pan demen ame anaknye bukan enyaknye..." kate bang Pendi lagi.

" Ya...mungkin elu kurang trik-trik Pen, makanye sekali-sekali bawain apa kek...sekepel dua kepel.."

" Itu juga ude brik...! pernah sekali gue bawain martabak...waktu ntu kebetulan yang nerima babenye. Ngga lame die ngomong ame nyak Salmine..." Enyaklu...si Mince ude makan belon ? kalo belon ade makanan nih..." nah...gue pikir si Mince itu adenye si Siti atawe empoknye, eeeh...kagak taunye kucing. Wah...gue empet bangat tuh ame babenye.." gerundel bang Pendi, si Jabrik langsung ngakak sambil megangin perutnye tapi kagak lame die malah ngejerit...

" Aw...aw...aw...aw...aw...aw...!!" jerit si Jabrik

" Halaaaaa... makanye jangan kebanyakan nonton tipi, otaklu jadi penuh ame iklan.." pikir bang Pendi si Jabrik niruin iklan A&W di tipi.

" Aw....bu...bu...bukan Peen..! jempol kaki gue kejepit..." kate si Jabrik sambil nunjuk jempolnye yang kejepit kotak ikan asin yang didudukin bang Pendi. Sekarang gantian bang Pendi yang ngakak.

Nah..karena bang Pendi masih aje kepale batu atawe kagak mao baek-baekin calon mertuanye. Akhirnye sekarang die nyesel...pasalnye kemaren ternyate si Siti ngikutin ape kate enyak ame babenye yang nyuruh die ninggalin bang Pendi. Bang Pendi cuman bise pasrah..( diapa-apain die juga mao..! he..he ). Abis mao gimane lagi...itulah akibatnye kalo calon mertue kagak kenal ame bang Pendi, gimane mao disayang. Tapi yang pasti dalem ati bang Pendi ngucap..." Neng Siti...tetep neng Sitinye, yang ude ngebuat hidupnye berwarne kayak permen Gulali.."