REVIEW BLOG ALA BANG PENDI

Awalnye bang Pendi mao ikutan ngerebutin novel yang dihibahkan mba Fanny dengan ngerepiu blognye tapi pas ngeliat dan baca postingan sohib-sohib yang ude pade ngerepiu duluan, bang Pendi jadi keder dah..abis repiunye pade bagus-bagus ! jadi bang Pendi pikir kagak bakalan menang dah...Tapi untuk nunjukin rasa hormat bang Pendi yang ude nganggap mba Fanny sebagai guru, motivator, sohib juga mertua...( eh...mertuanye sape...? he..he ) bang Pendi tetep berusaha ngerepiu walau keinginan untuk dapet novelnye ude bang Pendi buang jauh-jauh ke empang...( abis kalo ke laut dari Lenteng masih jauh...he..he )

Nah..pas mao ngerepiu bang Pendi bingung lagi mao pilih blog yang mane...? abis belon merit aje, anaknye ude segambreng...eh maksud bang Pendi blognye...he..he. Mao ngerepiu blog mba Fanny yang narsis ato sering begaye bak foto model atau blog mba Fanny yang jadi guru cerpen dan menulis atau juga blog mba Fanny yang cerewet dan bawel ame anak buahnye...he..he atau yang mane ye.. ?. Akhirnye bang Pendi pilih blog " Sang Cerpenis Bercerita " atawe http://justfatamorgana.blogspot.com.

Alasan utamanye ngerepiu blog ini karena blog ini adalah blog pertama yang bang Pendi satronin pas bang Pendi baru aje ngemulai maen blog. Awalnye bang Pendi emang kepengen belajar bikin cerpen..terus cari-cari di rumahnye engkong google akhirnye ketemu ame blog Sang Cerpenis Bercerita...jreng...jeeeeng..!!. Disitu bang Pendi ngeliat foto mba Fanny lagi telepon sama bang Pendi...lagi ngomongin tanah trotoar..he..he. Nah....pas bang Pendi baca postingannye, bang Pendi langsung geleng-geleng kepale sambil godeg-godeg kaya orang India...he...he. Kenape..? ya...karena di postingan " Stock Cerpen " kalo ngga salah yang diposting tangggal 10 Mei 2009, mba Fanny si empunye blog bilang kalo cerpen yang die buat dan ude pernah dimuat di berbagai majalah ude sekitar 200 cerpen. Kalo di gabung ame cerpen yang belon dimuat kire-kire ude 300-an...bujug buneeeeng...!! bang Pendi godeg-godeg lagi sambil nyari tiang terus nyanyi...ajeeeegileeee...!! ajeeeegileeeee...!! he..he.

Nah...di blog ini bang Pendi fokus belajar bikin cerpen yang baik, belajar cara bikin karakter tokoh-tokohnye lalu belajar cara bikin komunikasi antar tokoh-tokohnye. Tapi kalo suruh bikin cerpen dengan gayanye mba Fanny yang anak mude banget, bang Pendi kagak nyanggup dah...!! soalnye jaman mude bang Pendi masih jaman kuda gigit oncom...( kemaren gigit besi giginye pade patah...he...he ). Sekarang blog Sang Cerpenis Bercerita ude serba lengkap. Ibarat minum jamu...jamunye ude jamu komplit ! beras kencurnye ade...telor bebeknye ade...sampe madunye juge ade, jadi kalo mampir disitu...mao belajar bikin cerpen bise....mao ngakak, ngikik sampe ngekek juga bise ( karena ade posting humornye ) atawe mao bener-bener jadi orang...eh emangnye kemaren-kemaren bukan orang !? he..he maksudnye mao jadi orang yang bener ( karena banyak renungannye juga ) atau mao cari postingan yang penuh motivasi juga ade.

Eh...ngomong-ngomong motivasi, bang Pendi jadi inget kalo mba Fanny adalah orang pertama yang mampir dan komen di blognye bang Pendi ( hanya ilusi ).  Komen pertama mba Fanny di posting puisi yang bang Pendi bikin..." Bait puisi tetap berarti meskipun si dia tidak lagi bersamamu. Mampir kesini supaya koment ga kosong, boleh ya...? " Ya..boleh bangat...pikir bang Pendi..he..he. Dan bagi bang Pendi  komen itu ude cukup memotivasi bang Pendi untuk terus menulis.

Nah...kira-kira gitu deh, repiu bang Pendi yang singkat tapi ngga padet...he..he buat blog " Sang Cerpenis Bercerita " maupun mba Fanny sebagai empunya blog .

Notes  :   Selain menganggap mba Fanny sebagai guru dan sohib, bang Pendi juga menganggap mba Fanny seseorang yang mempunyai pribadi yang unik, lain daripada yang lain bahkan terbilang langka jika lihat kemampuannya ( kayaknye pantes masuk museum...he...he ). Tapi bagi bang Pendi...mba Fanny tetaplah mba Fanny dengan segala kelebihannye. Jangan marah ya mba...kalo repiunye rade nyeleneh...he...he. Salam hangat Dan sukses selalu....